SIMEI

[lagmit pinamubo sa Semaias, nga nagkahulogang “Si Jehova Namati (Nagpatalinghog)”].

1. Ikaduhang ginganlan nga anak nga lalaki ni Gerson (Gersom); apo ni Levi. (Ex 6:​16, 17; Num 3:​17, 18; 1Cr 6:​16, 17) Ang pipila ka Simeihanong banay sa mga Levihanon naggikan kaniya.​—Num 3:21-26; 1Cr 23:​7, 10, 11; Zac 12:13.

2. Usa ka Rubenhon kansang kaliwat nga si Beerah, usa ka pangulo, gidestiyero sa Asiryanhon nga si Haring Tilgat-pilneser (Tiglat-pileser III).​—1Cr 5:​1, 4-6.

3. Usa ka Merarihanon nga Levihanon.​—1Cr 6:29.

4. Usa ka Gersonhon nga Levihanon; katigulangan ni Asap.​—1Cr 6:​39, 42.

5. Usa ka Benjaminhon kansang siyam ka anak nga lalaki (o mga kaliwat) maoy mga pangulo sa mga balay o banay sa mga katigulangan nga nagpuyo sa Jerusalem. (1Cr 8:​1, 19-21, 28) Lagmit siya ang gitawag nga Sema sa 1 Cronicas 8:13 kinsa gipaila ingong usa ka pangulo sa banay sa Aijalon.

6. Usa ka Simeonhon, ang anak nga lalaki ni Zacur; siya may 16 ka anak nga lalaki ug 6 ka anak nga babaye.​—1Cr 4:24-27.

7. Usa sa mga igsoong lalaki ni David.​—2Sa 21:21; tan-awa ang SAMMAH Num. 2.

8. Usa ka kaliwat ni Gerson pinaagi kang Ladan. Sa panahon sa paghari ni David, tulo ka anak nga lalaki (o mga kaliwat) ni Simei maoy mga pangulo sa Levihanong mga banay.​—1Cr 23:​8, 9.

9. Pangulo sa ikanapulo nga dibisyon sa mga maghohoni nga Levihanon; anak nga lalaki ni Jedutun.​—1Cr 25:​1, 3, 17.

10. Tig-atiman sa mga parasan ni David; usa ka Ramatnon.​—1Cr 27:27.

11. Usa ka maunongong tigpaluyo ni Haring David nga wala moduyog sa panagkunsabo ni Adonias. (1Ha 1:8) Gituohan nga siya mao usab ang Simei nga gitudlo ingong luyoluyo sa pagtaganag pagkaon ni Haring Solomon sa teritoryo sa Benjamin; anak nga lalaki ni Ela.​—1Ha 4:​7, 18.

12. Usa ka Benjaminhon gikan sa balangay sa Bahurim. Si Simei nga anak nga lalaki ni Gera nga sakop sa usa ka banay sa balay ni Haring Saul, naghambin ug kayugot kang David sulod sa daghang katuigan human si Saul mamatay ug matangtang gikan kaniya ang pagkahari gikan sa iyang balay. Si Simei nakakitag higayon aron ipahungaw ang iyang dugay nang giluom nga kapungot sa dihang si David ug ang iyang mga kaubanan mikalagiw gikan sa Jerusalem tungod sa pagrebelde ni Absalom. Sa unahan ug diyutay sa S sa Bukid sa mga Olibo, si Simei, samtang miabay paglakaw, naglabay ug mga bato ug nagsaliyab ug abog ngadto kanila ug nagtunglo kang David. Si Abisai mihangyo kang David nga tugotan siyang patyon si Simei, apan midumili si David, ug naglaom nga basin ang tunglo ni Simei himoon ni Jehova nga usa ka panalangin.​—2Sa 16:5-13.

Sa pagbalik ni David, sa dihang nabali ang panghitabo, si Simei ug ang usa ka libong uban pang Benjaminhon mao ang unang misugat kaniya, si Simei miyukbo sa iyang atubangan ug nagpakitag paghinulsol sa iyang mga sala. Sa makausa pa buot ni Abisai nga patyon si Simei, apan sa gihapon wala kini itugot ni David, ug niining higayona siya nanumpa nga dili niya patyon si Simei. (2Sa 19:15-23) Hinunoa, una pa siya mamatay giingnan ni David si Solomon nga ‘dad-on ang mga uban ni Simei ngadto sa Sheol uban ang dugo.’​—1Ha 2:​8, 9.

Sa sinugdanan sa iyang paghari, gipatawag ni Solomon si Simei ug gisugo nga pabalhinon ngadto sa Jerusalem ug dili pabiyaon sa siyudad; kon siya mobiya gani sa siyudad, siya pagapatyon. Miuyon si Simei niini nga mga kondisyon, apan tulo ka tuig sa ulahi siya mibiya sa siyudad aron mabawi ang duha sa iyang mga ulipon nga mikalagiw ngadto sa Gat. Sa pagkasayod niini nga paglapas, gipatawag ni Solomon si Simei aron manubag sa pagbungkag sa iyang panumpa kang Jehova ug gimandoan si Benaias sa pagpatay kaniya.​—1Ha 2:36-46.

13. Usa ka Levihanong kaliwat ni Heman nga nagbalaan sa iyang kaugalingon ug mitabang sa paglabay sa mahugaw nga mga butang nga gikuha gikan sa templo sa sinugdanan sa paghari ni Ezequias. (2Cr 29:​12, 14-16) Lagmit mao ra usab ang Num. 14.

14. Ang Levihanon nga ikaduhang tinugyanan sa pagtigom sa daghang amot ug sa ikapulo nga gidala ngadto sa templo panahon sa paghari ni Ezequias. (2Cr 31:11-13) Lagmit mao ra usab ang Num. 13.

15. Katigulangan ni Mardokeo; sakop sa tribo ni Benjamin.​—Est 2:5.

16. Igsoong lalaki ni Gobernador Zorobabel; kaliwat ni David diha sa tribo ni Juda.​—1Cr 3:19.

17. Usa sa mga Levihanon nga nagpabiya sa ilang langyaw nga mga asawa ug mga anak sa dihang gibadlong ni Esdras tungod sa ilang mga pagpakig-alyansa sa kaminyoon uban sa mga langyaw.​—Esd 10:​10, 11, 23, 44.

18, 19. Duha ka Israelinhon, mga anak nga lalaki ni Hasum ug Binui, nga nagpapahawa usab sa ilang langyaw nga mga asawa ug mga anak.​—Esd 10:​33, 38, 44.