SUNAMINHON

[Taga- (Iya sa) Sunem].

Usa ka molupyo sa Sunem. Si Abisag, ang tig-alima ni David sa iyang pagkatigulang, gitawag nga “Sunaminhon.”​—1Ha 1:​3, 4, 15; 2:​17, 21, 22; tan-awa ang ABISAG.

Wala hinganli ang usa ka prominenteng babaye sa Sunem nga nagpakitag pagkamaabiabihon sa manalagna nga si Eliseo, nga kanunayng nagtanyag sa manalagna ug pagkaon ug kasak-an. Tungod sa iyang kalulot, siya gigantihan ug usa ka anak nga lalaki. Sa dihang ang batang lalaki namatay pipila ka tuig sa ulahi, ang babayeng Sunaminhon mipanaw ug mga 30 km (19 mi), ug sa dihang iyang nakaplagan si Eliseo didto sa Bukid sa Carmelo, iyang gipahayag ang iyang tumang kaguol, sa pag-ingon: “Nangayo ba ako ug usa ka anak pinaagi sa akong ginoo? Dili ba nag-ingon man ako, ‘Ayaw gayod ako agaka ngadto sa bakak nga paglaom’?” Sa dihang nakapauli na uban kaniya, ang manalagna nag-ampo kang Jehova, ug ang bata nabuhi.​—2Ha 4:8-37.

Tungod sa pasidaan ni Eliseo kaniya mahitungod sa usa ka umaabot nga gutom, ang babayeng Sunaminhon, nga mopatim-awng usa na karon ka balo, mipuyo taliwala sa mga Filistehanon sulod sa pito ka tuig uban sa iyang panimalay. Sa dihang natapos na kining panahona siya mipauli, apan iyang nakaplagan nga gikuha na ang iyang mga kabtangan. Sa dihang nahibaloan sa hari ang iyang nangaging mga pagpakiglabot kang Eliseo, giuli ang tanan niyang mga kabtangan.​—2Ha 8:1-6.