SILAS, SILVANO

[gikan sa Lat., nga nagkahulogang “Lasang; Kakahoyan”].

Usa ka pangunang membro sa unang-siglong Kristohanong kongregasyon didto sa Jerusalem, usa ka manalagna, ug usa ka kauban ni Pablo sa iyang ikaduhang misyonaryong panaw. Dayag nga usa siya ka Romanong lungsoranon. (Buh 15:​22, 26, 27, 32, 40; 16:​19, 25, 37, 38) Lagmit ang ngalang Silvano, nga makaplagan diha sa mga sulat ni Pablo ug Pedro, maoy Linatin nga porma sa Gregong ngalan nga Silas, nga gigamit ni Lucas diha sa Mga Buhat.

Ang kongregasyon sa Jerusalem nagpili kang Silas aron mouban kang Bernabe ug Pablo balik sa Antioquia, Sirya, aron dad-on sa kongregasyon didto ang desisyon mahitungod sa pagtuli.​—Buh 15:​22, 30-32.

Dili tino kon si Silas nagpabilin ba sa kasilinganan sa Antioquia o kaha mibalik sa Jerusalem. Ang pipila ka manuskrito naundan sa Buhat 15:​34, nga mabasa: “Apan gipakamaayo ni Silas nga magpabilin pa didto.” Apan ang labing ilado nga mga manuskrito wala maglakip niining bersikuloha. (Tan-awa ang ftn sa Rbi8.) Bisan pa niana si Silas didto sa Antioquia sa pagsugod sa ikaduhang misyonaryong panaw ni Pablo. Sugod didto, siya ug si Pablo mibiyahe paingon sa A ug sa K latas sa Sirya, dayon sa Cilicia ug sa uban pang mga rehiyon sa Asia Minor. Si Timoteo miduyog kanila sa Listra ug si Lucas sa Troas.

Kay gidapit sa pag-adto sa Macedonia pinaagi sa usa ka damgo nga gihatag kang Pablo, sila miestar una sa Filipos. Sa tiyanggihan didto, si Silas ug Pablo gipanggarote ubos sa sugo sa mga mahistrado sibil ug gibutang sa mga sepohan sa bilanggoan, apan sa pagkagabii, samtang sila nag-ampo ug nag-awit ug mga awit, usa ka linog ang nagtangtang sa ilang mga gapos sa bilanggoan ug ang mga pultahan sa bilanggoan nabuksan. Ang magbalantay sa bilanggoan nalisang sa hilabihan ug sa dihang siya nagpatalinghog kang Pablo ug Silas siya nahimong usa ka Kristohanon, ug iyang giatiman ang ilang mga samad gumikan sa pagbunal.​—Buh 15:41–​16:40.

Ang ilang ministeryo nagmalamposon sa Tesalonica ug Berea, diin si Silas ug Timoteo temporaryong nagpabilin samtang si Pablo mipadayon padulong sa Atenas ug Corinto. (Buh 17:​1, 10, 14-16; 18:1) Sa dihang si Silas ug Timoteo sa kataposan nakaapas kang Pablo didto sa Corinto, sila nagpadayon sa pagtabang kang Pablo. Samtang atua didto, sila miduyog kang Pablo sa pagsulat sa duha ka sulat alang sa mga taga-Tesalonica. (1Te 1:1; 2Te 1:1) Si Silas wala na hisgoti pag-usab diha sa makasaysayanhong asoy sa mga panaw ni Pablo.

Pipila ka tuig sa ulahi, sa mga 62-64 K.P., si Pedro misulat sa iyang unang sulat gikan sa Babilonya “pinaagi kang Silvano,” dayag nga nagpasabot nga si Silvano nag-alagad ingong sekretaryo ni Pedro. Siya gihubit diha niana ingong “usa ka matinumanong igsoon,” ug lagmit nga siya mao ang Silvano nga kanhi nakig-uban kang Pablo.​—1Pe 5:12.