Silas​—Usa ka Tinubdan sa Pagdasig

GIKAN pa sa sayong bahin sa Kristohanong kasaysayan, ang buluhaton sa matinumanong nagapanaw nga mga magtatan-aw maoy hinungdanon sa pagdasig sa mga kongregasyon sa katawhan sa Diyos ug sa pagpakaylap sa maayong balita ngadto sa kinalay-ang mga dapit sa yuta. Lakip sa kinaunahang mga magtatan-aw nga gitudlo mao si Silas, usa ka propeta ug nangunang membro sa kongregasyon sa Jerusalem. Siya nagdulag yawing papel diha sa hinungdanong mga kaugmaran sa buluhatong pagsangyaw ug usa sa mga misyonaryo nga unang nagwali sa ebanghelyo sa Uropanhong teritoryo. Unsay naghimo kang Silas nga ilabinang kuwalipikado kaayo sa paghimo niining tanan? Ug unsang mga hiyas sa iyang personalidad ang maayo natong sundogon?

Ang Isyu sa Sirkunsisyon

Sa dihang ang lagmit makapabahinbahin nga isyu sa sirkunsisyon mitungha sa mga 49 K.P., ang nagamandong lawas sa Jerusalem kinahanglang magpakaylap ug tin-awng direksiyon taliwala sa mga Kristohanon aron mahusay ang isyu. Niining mga kahimtanga, si Silas, nga gitawag usab ug Silvano, mabasa diha sa rekord sa Bibliya. Mahimong usa siya sa mga tigdesisyon kinsa gipili dayon ingong emisaryo sa “mga apostol ug sa mga ansiyano,” aron ipahibalo ang ilang desisyon ngadto sa “mga igsoon sa Antioquia ug Siria ug Cilicia.” Sa Antioquia, si Silas ug Judas (Barsabas), nga kauban si Barnabas ug Pablo, naghatod sa mensahe nga ilang gidala, nga walay duhaduha binaba nga nagsugilon sa mga panghitabo sa miting sa Jerusalem, sa mga desisyon nga nakab-ot, ug sa kaundan sa sulat. Sila usab “nagdasig sa mga igsoon pinaagi sa daghang pakigpulong ug nagpalig-on kanila.” Ang makapalipayng resulta mao nga ang mga Kristohanon sa Antioquia “nagmaya.”​—Buhat 15:1-32.

Busa si Silas nagdulag hinungdanong bahin sa paghusay niining pasukaranang isyu. Apan ang iyang asaynment dili sayon. Walay paagi sa paghibalo kon unsay mahimong reaksiyon sa kongregasyon sa Antioquia sa nahimong desisyon. Busa, “kini nagkinahanglan ug usa ka tawo nga dunay dakong kaalam ug pagkamataktikanhon aron ipatin-aw kon unsay gisulat sa mga apostol diha sa ilang sulat,” nag-ingon ang usa ka komentarista. Ang pagpili kang Silas alang niining sensitibong asaynment naghatag kanatog ideya mahitungod sa iya gayod nga pagkatawo. Siya kasaligan sa pagkomunikar sa mga lagda sa nagamandong lawas sa matinumanong paagi. Segurado usab nga usa siya ka maalamong magtatan-aw nga makahimog makapasig-uling impluwensiya sa dihang ang kongregasyon gihulga sa panagbangi.

Mga Pagpanaw Uban ni Pablo

Dili matino kon kaha mibalik si Silas sa Jerusalem human sa misyon o wala. Kon unsa ugaling, human sa panaglalis tali ni Bernabe ug Pablo bahin kang Juan Marcos, gipili ni Pablo si Silas, kinsa atua didto sa Antioquia niadtong higayona, alang sa usa ka bag-ong pagpanaw nga sa sinugdan gituyo sa pagduaw pag-usab sa mga siyudad nga gisangyawan ni Pablo panahon sa iyang unang misyonaryong panaw.​—Buhat 15:36-41.

Ang pagpili kang Silas mahimong naimpluwensiyahan sa iyang positibong tinamdan maylabot sa misyon nga sangyawan ang mga Hentil ug sa awtoridad nga iyang nabatonan ingong propeta ug tigpamaba sa nagamandong lawas nga makatabang sa paghatod sa ilang mga desisyon ngadto sa mga magtutuo sa Siria ug Cilicia. Ang mga resulta maayo kaayo. Ang basahon sa Buhat nag-asoy: “Karon samtang sila mipanaw latas sa mga siyudad ilang ipanghatod aron sundon sa mga atua didto ang mga sugo nga gidesisyonan sa mga apostol ug mga ansiyano nga didto sa Jerusalem. Busa, sa pagkatinuod, ang mga kongregasyon padayong nalig-on diha sa pagtuo ug miuswag sa gidaghanon adlaw-adlaw.”​—Buhat 16:4, 5.

Samtang nagpadayon sa pagpanaw ang mga misyonaryo, ang balaang espiritu duha ka beses nga nagpalikay kanila gikan sa ilang giplanong ruta. (Buhat 16:6, 7) Si Timoteo gidugang sa grupo pagpaingon, didto sa Listra, human sa wala-giklarong “mga panagna” mahitungod kaniya. (1 Timoteo 1:18; 4:14) Pinaagi sa usa ka panan-awon ngadto kang Pablo, kinsa may gasa usab sa pagpropesiya, ang nagapanawng grupo gimandoan sa paglawig padulong sa Macedonia, sa Uropa.​—Buhat 16:9, 10.

Gibunalan ug Gibilanggo

Sa Filipos, “ang pangunang siyudad sa distrito,” si Silas nakasinatig dili hikalimtang kalisdanan. Human mapagula ni Pablo ang espiritu sa pagpanag-an gikan sa ulipong babaye, ang mga nanag-iya kaniya, kay nakitang nawad-an na silag pangita, nagguyod kang Silas ug Pablo sa pag-atubang sa mga mahistrado sa siyudad. Ingong resulta, silang duha nakaagom sa kaulawang ipresentar sa publiko isip mga mamumuhat ug daotan, nga gigisi ang ilang panggawas nga mga besti, ug gibunalan diha sa tiyanggihan.​—Buhat 16:12, 16-22.

Ang maong mga pagbunal dili lamang makuyaw nga mga silot, nga magsulay sa pagkamalahutayon sa tawo ngadto sa punto nga dili na makaagwanta apan, sa kaso ni Pablo ug Silas, kini usab maoy ilegal. Ngano? Gilatid sa Romanhong mga balaod nga dili puwedeng bunalan ang usa ka Romanong lungsoranon. Si Pablo usa ka Romanong lungsoranon, ug lagmit nga si Silas mao usab. Human sa ‘daghang paghampak’ nga gihimo kanila, si Pablo ug Silas gibalhog sa bilanggoan diin ang ilang mga tiil giipit sa mga kahoyng-giakob. Kini maoy “makahahadlok nga instrumento,” nagsaysay si Gustav Stählin, “nga niana ang mga bitiis sa mga binilanggo mabikangkang taman sa gitinguha, sa maong paagi mapugngan ang pagkatulog.” Bisan pa niana, sa tungang gabii, nga ang ilang mga bukobuko walay duhaduhang napuno sa masakit nga mga samad, “si Pablo ug si Silas nanag-ampo ug nanagdayeg sa Diyos pinaagig awit.”​—Buhat 16:23-25.

Nagtug-an kini kanatog lain pa mahitungod sa personalidad ni Silas. Siya mangayaon sanglit nag-antos sila tungod ug alang sa ngalan ni Kristo. (Mateo 5:11, 12; 24:9) Kana sa walay duhaduha ang mao gihapong espiritu panahon sa unang misyon sa Antioquia nga nagpaarang kang Silas ug sa iyang mga kauban nga magmaepektibo sa pagdasig ug paglig-on sa kongregasyon, nga maoy hinungdan sa pagmaya sa ilang isigka-Kristohanon. Ang kangaya ni Pablo ug Silas mahimong midugang sa dihang sa milagrosong paagi sila nakagawas sa bilanggoan pinaagig usa ka linog ug nakatabang sa gusto-maghikog nga tigbilanggo ug sa iyang pamilya nga magpasundayag ug pagtuo sa Diyos.​—Buhat 16:26-34.

Si Pablo o si Silas wala mahadlok sa mga pagbunal ug pagkabilanggo. Sa dihang gipadala ang mensahe nga sila pagawason, midumili sila nga moyuhot sa kaulaw pagawas sa Filipos, sumala sa gidahom sa mga mahistrado. Sila nagpabiling lig-on ug bug-os nga gibali ang kahimtang ngadto sa mapasigarbohon ug mabuotbuoton nga mga opisyales. “Ila kaming gibunalan nga wala pa mahusgahi sa publiko, nga mga tawong Romano, ug nagbalhog kanamo sa prisohan; ug sila karon magpuwera na kanamo sa tago?” misukna si Pablo. “Dili gayod! hinuon paanhia sila mismo ug pagawason kami.” Tungod kay nahadlok sa mga sangpotanan, ang mga mahistrado naobligar sa paghangyo sa duha nga mobiya sa siyudad.​—Buhat 16:35-39.

Busa pagkahuman isilsil ang ilang mga katungod ingong mga Romano diha sa mga kaisipan sa mga awtoridad, si Pablo ug Silas misugot sa hangyo sa mga mahistrado​—apan nanamilit una sa ilang mga higala. Uyon sa kon unsa nay nahimong kinaiya niadtong tungora sa tibuok panaw nga pagsangyaw, “gidasig” na usab ni Silas ug sa iyang kauban ang mga igsoon ug dayon mibiya.​—Buhat 16:40.

Gikan sa Macedonia Padulong sa Babilonya

Sanglit wala mapaluya sa usa unta ka negatibong kasinatian, si Pablo, Silas, ug ang ilang kaubanan nagpadayon ngadto sa bag-ong misyonaryong mga kanataran. Sa Tesalonica nakasugamak na usab silag mga kalisdanan. Tungod sa kalamposan ni Pablo diha sa iyang ministeryo sulod sa yugto sa tulo ka Igpapahulay, ang nasinang mga magsusupak miaghat ug kagubot, nga nagpahinabo sa mga misyonaryo nga maalamong mobiya sa siyudad sa gabii. Sila nangadto sa Berea. Sa pagkasayod mahitungod sa mga kalamposan ni Pablo ug sa iyang kaubanan sa maong siyudad, ang mga magsusupak miabot gikan pa gayod sa Tesalonica. Si Pablo nagpadayon sa pagpanaw nga nag-inusara, samtang si Silas ug Timoteo nagpabilin sa Berea aron atimanon ang grupo sa bag-ong mga interesado. (Buhat 17:1-15) Si Silas ug Timoteo nakig-uban na usab kang Pablo sa Corinto, nga may dalang maayong balita ug tingali usa ka gasa gikan sa maunongong mga higala sa Macedonia. Mahimong nakapaarang kini sa nanginahanglang apostol sa paghunong sa sekular nga trabaho, nga iyang gibatonan sa kasamtangan, ug may kalagsik nga mibalik sa bug-os-panahong pagsangyaw. (Buhat 18:1-5; 2 Corinto 11:9) Sa Corinto, si Silas ug Timoteo gitawag usab ingong mga ebanghelisador ug ingong kaubanan ni Pablo. Busa tataw nga ang ilang mga kalihokan wala usab mohinay sa maong siyudad.​—2 Corinto 1:19.

Ang paggamit sa pronombre nga “kami” sa kabug-osan sa mga sulat para sa mga Taga-Tesalonica​—kining duha gisulat sa Corinto niining yugtoa—​gisabot nga nagkahulogang si Silas ug Timoteo nakatampo sa pagsulat. Hinunoa, ang ideyang si Silas nalangkit sa buluhatong pagsulat sa panguna gipasikad sa kon unsay gisulti ni Pedro mahitungod sa usa sa iyang kaugalingong mga sulat. Si Pedro nag-ingon nga iyang gisulat ang iyang unang sulat “pinaagi kang Silvano, usa ka kasaligang igsoon nga lalaki.” (1 Pedro 5:12) Bisan tuod mahimong nagkahulogan lamang kini nga si Silvano mao ang tigdala, ang kalainan sa estilo tali sa duha ka sulat ni Pedro mahimong nagpakita nga iyang gigamit si Silas ingong magsusulat aron isulat ang unang sulat apan dili ang ikaduha. Busa, ang lain pa sa daghang katakos ug teokratikanhong mga pribilehiyo ni Silas mao tingali ang pagkasekretaryo.

Usa ka Panig-ingnan nga Angayng Sundogon

Sa dihang atong palandongon ang mga butang nga atong nasayrang gibuhat ni Silas, ang iyang rekord maoy dalayegon. Siya maayo kaayong panig-ingnan alang sa modernong-adlaw nga mga misyonaryo ug nagapanawng mga magtatan-aw. Siya dili-mahakogong mipanaw sa lagyong mga lugar nga may dakong sakripisyo sa iyang kaugalingon, dili aron makabaton ug materyal nga kaayohan o kadungganan, kondili sa pagtabang sa uban. Ang iyang tumong mao ang pagdasig kanila pinaagi sa maalamon ug mataktikanhong tambag, naandam-pag-ayo ug mainitong mga pakigpulong, maingon man sa iyang kasibot sa pagministeryo sa kanataran. Bisan unsa ang imong papel taliwala sa organisadong katawhan ni Jehova, kon sa kaamgid ikaw maningkamot nga magmapositibo​—bisan pag nag-atubang sa kalisdanan—​ikaw usab mahimong tinubdan sa pagdasig sa imong kaubang mga magtutuo.

[Mapa sa panid 29]

(Alang sa aktuwal nga pagkahan-ay, tan-awa ang publikasyon)

Ang Ikaduhang Misyonaryong Panaw ni Pablo

Ang Dakong Dagat

Antioquia

Derbe

Listra

Iconio

Troas

Filipos

Amfipolis

Tesalonica

Berea

Atenas

Corinto

Efeso

Jerusalem

Cesarea

[Credit Line]

Mountain High Maps® Copyright © 1997 Digital Wisdom, Inc.