SISTRUM

Ang Hebreohanong pulong nga mena·ʽan·ʽimʹ (mga sistrum) kas-a lamang makita sa Kasulatan ug mopatim-awng naggikan sa lintunganayng pulong nga nagkahulogang “yugyog.” (2Sa 6:5) Sanglit ang sistrum patingogon niini nga paagi, nga magpatunghag tagingting nga tunog, daghang leksikograpo ug mga historyador sa musika mipabor niini nga hubad, usa nga gidawat usab sa ubay-ubayng mga maghuhubad sa Bibliya.​—Da; NW; Ro; Vg.

Ang sistrum sagad maoy usa ka gamay, linginon nga metal nga bayanan nga may usa ka kuptanan. Ang tulonggon lainlain ug gitas-on, gikan sa mga 20 ngadto sa 46 sm (8 ngadto sa 18 pul.), sumala sa atong makita sa karaang mga sistrum ug sa mga larawan niini diha sa monyumento sa Ehipto ug sa uban pang mga dapit. Ang bayanan adunay pipila ka luag pagkataod nga metal nga mga balabag nga, kon yugyogon, mopatunghag tagning, tagingting nga mga tunog. Kini nga mga balabag tingali lainlain ug gitas-on aron makapatunghag lainlaing mga tunog. Ang laing matang sa sistrum may mga argolya diha sa mga balabag, ug kini nga mga argolya motagingting kon yugyogon. Bisan tuod nga kas-a lamang kini hisgoti sa Bibliya sa dihang gihubit ang usa ka dakong selebrasyon, ang tradisyonal nga Hudiyohanong mga tinubdan nag-ingon nga ang sistrum gipatugtog usab sa masulub-ong mga okasyon.