TIMNA

1. Puyopuyo sa anak nga lalaki ni Esau nga si Elipaz ug inahan ni Amalek. (Gen 36:10-12) Sa talaan sa kagikan nga makita sa 1 Cronicas 1:​36, unang gihisgotan ang lima ka anak nga lalaki ni Elipaz nga anak ni Esau. Dayon gidugang, “si Timna ug si Amalek.” Si Propesor C. F. Keil mikomento bahin niini: “Busa ang pagdugang sa duha ka ngalang Timna ug Amalek diha sa Cronicas mopatim-aw nga usa lamang ka pagpamubo, nga hayan gihimo sa awtor, sanglit ang mga kaliwat ni Esau nailhan na sa iyang mga magbabasa diha sa Genesis. Lain pa usab, tungod sa porma sa ngalang Timna (nga usa ka feminine), napamatud-ang sayop ang ideya sa pipila ka modernong mga tigpanukiduki nga si Timna maoy usa usab ka anak nga lalaki ni Elipaz.” (Commentary on the Old Testament, 1973, Tomo III, First Chronicles, p. 53) Busa, gitala ang unom ka anak nga lalaki ni Elipaz, apan uban ang nota nga ang usa kanila, si Amalek, maoy anak sa puyopuyo ni Elipaz nga si Timna. Angayng hinumdoman nga si Amalek nahimong usa ka nasod nga nagdumot sa katawhan sa Diyos ug bahin kaniya nga si Jehova miingon: “Si Jehova makiggubat kang Amalek gikan sa usa ka kaliwatan ngadto sa laing kaliwatan.” (Ex 17:8-16) Busa, ang mga asoy sa Genesis ug sa Mga Cronicas naghatag niini nga detalye mahitungod sa kagikan ni Amalek. Kini nga Timna lagmit mao ra usab ang Num. 2.

2. Usa ka anak nga babaye ni Seir nga Horihanon, busa igsoon ni Lotan ug sa laing mga anak nga lalaki ni Seir. (Gen 36:20-22; 1Cr 1:39) Lagmit mao ra usab ang Num. 1.

3. Ang unang ngalan nga makaplagan sa talaan sa 11 ka “sultan ni Esau,” o Edom. (Gen 36:40-43; 1Cr 1:51-54) Sa panghunahuna sa daghang maghuhubad, ang Timna ug ang ubang mga ngalan nga gitala maoy personal nga mga ngalan. (AS, KJ, JB, NW, RS) Hinunoa, gidawat sa kadaghanan nga ang ekspresyon nga “sumala sa ilang mga banay, sumala sa ilang mga dapit, sumala sa ilang mga ngalan” nagpaila nga usa ka tribo o usa ka dapit ang gipasabot. Busa gipalabi sa pipila ka bersiyon ang mga ekspresyon sama sa “ang pangulo sa Timna.” (JP, AT) Ngani, sa Genesis 36:​41, diha sa samang talaan, makita ang usa ka ngalan sa babaye nga Oholibama, nga mahimong sabton nga ang ngalang Timna maoy ngalan sa usa ka babaye. Gituohan ni Eusebius ug Jerome nga ang Timna maoy usa ka dapit sa Edom nga gitawag ug “Thamna,” nga naglungtad sa ilang adlaw. (Onomasticon, 96, 24-27) Apan ang nahimutangan sa maong rehiyon nga ginganlan ug Timna wala mahibaloi sa pagkakaron.