TIRHAKA

Sagad nga giila nga mao si Paraon Taharqa, bisan tuod ang petsa nga gihatag sa modernong mga historyador alang sa pagmando ni Taharqa dili mohaom sa kronolohiya sa Bibliya. (Alang sa ebidensiya nga gipalabi ang kronolohiya sa Bibliya inay ang sekular nga kronolohiya, tan-awa ang KRONOLOHIYA [Ang Kronolohiya sa Bibliya ug ang Sekular nga Kasaysayan].) Sa panahon sa paghari ni Ezequias, samtang ang Asiryanhon nga si Haring Senakerib nakiggubat batok sa Libna, ang balita miabot nga si Tirhaka, ang Etiopianhong hari sa Ehipto, nagpaingon na aron sa pagpakiggubat sa mga Asiryanhon. (2Ha 19:​8, 9; Isa 37:​8, 9) Ang usa ka inskripsiyon nga Asiryanhon, bisan tuod wala maghisgot kang Tirhaka, nagpakita nga si Senakerib nagpildi sa kasundalohan nga naggikan sa Ehipto ug nagbihag sa “mga magkakaro sa hari sa Etiopia.” Ang sunod nga hari sa Asirya, si Esar-hadon, nanghambog bahin sa iyang pagsakop sa Ehipto, nga nag-ingon: “Ang hari niini, si Tirhaka, akong gisamaran sa lima ka higayon pinaagig pana ug ako nagmando sa tibuok niyang nasod.” Sa panahon sa paghari sa anak nga lalaki ug manununod ni Esar-hadon nga si Ashurbanipal, si Tirhaka mialsa batok sa pagpasakop sa Asirya. Apan, sumala kang Ashurbanipal, “ang kalisang sa (sagradong) hinagiban ni Ashur, nga akong ginoo, nagbuntog kang Tirhaka sa dapit diin siya midangop ug siya wala na gayod mabalitai pag-usab.”​—Ancient Near Eastern Texts, giedit ni J. Pritchard, 1974, pp. 287, 288, 290, 295.