ZOBA

Usa ka Siryanhon (Aramaeanhon) nga gingharian nga nailhan usab nga Aram-Zoba. (Sal 60:Sup) Usa sa mga hari niini mao si Hadadezer. (1Ha 11:23) Ang linangkob nga pormang “Hamat-zoba” lagmit nagtumong sa magkasikbit nga mga gingharian nga ginganlag Hamat ug Zoba. (2Cr 8:3) Lagmit ang Zoba nahimutang sa A sa Damasco ug may dominyo nga miabot sa rehiyon sa Hamat sa A ug hangtod sa suba sa Euprates sa S.​—2Sa 8:3.

Si Haring Saul nakiggubat batok sa mga hari sa Zoba. (1Sa 14:47) Ang mga Ammonhanon sa ulahi nagsuhol sa mga Siryanhon sa Zoba ug sa ubang kasundalohan aron makig-away kang David, apan ang tanan napildi sa iyang kasundalohan. (2Sa 10:6-19; 1Cr 19:6-19) Lagmit gayod nga niining gubata nga si David nakadaog ug nagdalag mga inagaw gikan kang Haring Hadadezer sa Zoba, lakip ang daghang tumbaga (sa ulahi gigamit sa pagtukod sa templo) gikan sa iyang mga siyudad sa Beta (lagmit ginganlan usab ug Tibhat) ug Berotai (Cun?). (2Sa 8:3-12; 1Cr 18:3-9) Usa sa gamhanang mga tawo sa kasundalohan ni David mao si Igal nga anak nga lalaki ni Natan sa Zoba.​—2Sa 23:​8, 36; tan-awa ang ARAM Num. 5; HADADEZER.