ZODIAC

Ang hugpong sa mga bituon nga makita gikan sa yuta. Kini makita sulod sa anggulo nga siyam ka grado diha sa isigkakiliran sa agianan sa Yuta palibot sa adlaw. Maylabot kang Haring Josias sa Juda, ang 2 Hari 23:5 nag-ingon: “Ug iyang giwagtang ang mga saserdote sa langyawng diyos, nga gipamutang sa mga hari sa Juda aron sila maghimog gipaaso nga halad sa hatag-as nga mga dapit sa mga siyudad sa Juda ug sa palibot sa Jerusalem, ug usab kadtong naghimog gipaaso nga halad kang Baal, sa adlaw ug sa bulan ug sa mga konstelasyon sa zodiac ug sa tanan nga panon sa mga langit.” Ang ekspresyon dinhi nga gihubad nga “mga konstelasyon sa zodiac” naggikan sa Hebreohanong pulong nga maz·za·lohthʹ, nga kas-a lamang makita sa Bibliya, bisan tuod ang pulong nga Maz·za·rohthʹ nga makaplagan sa Job 38:32 lagmit nga susama niini. Ang konteksto makatabang sa pagpatin-aw sa kahulogan niini.

Ang gitawag nga zodiacal zone sagad nga gituohang nadiskobrehan sa unang mga Babilonyanhon. Walay duhaduha nga ilang naobserbahan ang dayag nga agianan sa adlaw kada tuig taliwala sa mga bituon, ug kini nga agianan nailhan karon nga ecliptic. Namatikdan sa mga astronomo nga sulod sa usa ka zone nga mga 18 ka grado ang kalapad, nga may 9 ka grado sa matag kiliran sa ecliptic, nahimutang ang dayag nga mga agianan sa adlaw, bulan, ug sa pangunang mga planeta, ingon sa makita gikan sa yuta. Hinunoa, niadto lamang ikaduhang siglo W.K.P. nga ang usa ka Gregong astronomo nagbahin sa zodiac ngadto sa 12 ka parehong mga bahin nga 30 ka grado ang matag usa; kini nga mga bahin gitawag karon nga mga simbolo sa zodiac ug ginganlan pinasukad sa nalangkit nga mga konstelasyon. Ang pulong nga “zodiac” naggikan sa Grego ug nagkahulogang “sirkulo sa mga hayop,” sanglit ang kadaghanan sa 12 ka konstelasyon sa zodiac sa orihinal ginganlan pinasukad sa mga ngalan sa hayop o sa mga linalang sa dagat.

Karong adlawa kini nga mga ilhanan dili na motukma sa mga konstelasyon nga gikan niana gipasukad ang ilang ngalan sa sinugdan. Tungod kini sa gitawag nga kausaban sa mga equinox, nga miresulta sa inanayng pag-irog sa mga konstelasyon ug mga usa ka grado pasidlakan sa matag 70 ka tuig sa usa ka siklo nga mokabat ug mga 26,000 ka tuig aron makompleto. Busa ang simbolo sa Aries, sa milabayng 2,000 ka tuig, miirog ug halos 30 ka grado paingon sa konstelasyon sa Pisces.

Kalangkitan sa Astrolohiya. Ang mga konstelasyon sa zodiac gigamit sa bakak nga pagsimba sukad pa sa unang kapanahonan sa Mesopotamia. Ang pipila ka kinaiya sa tawo gilangkit sa matag usa sa nagkalainlaing mga konstelasyon, ug dayon kini gigamit sa mga astrologo sa ilang mga prediksiyon nga gipasukad sa partikular nga posisyon o kalangkitan sa langitnong mga butang ngadto sa mga simbolo sa zodiac sa bisan unsang panahon. Ingon sa gipakita sa teksto sa 2 Hari 23:​5, ang maong paggamit sa astrolohiya gipasulod sa Juda pinaagi sa mga saserdote sa langyawng mga diyos nga gidala sa pipila ka hari ngadto sa nasod. Ubos sa silot nga kamatayon, si Jehova nga Diyos dugay nang nagdili sa maong pagsimba sa mga bituon.​—Deu 17:2-7.

Ang astrolohiya maoy usa ka dakong bahin sa Babilonyanhong pagsimba. Apan, ang mga prediksiyon sa iyang mga astrologo nga pinasukad sa zodiac wala makaluwas sa Babilonya gikan sa kalaglagan, sumala sa tukmang gipasidaan ni manalagnang Isaias.​—Isa 47:12-15; tan-awa ang ASTROLOGO.

Sa modernong kapanahonan ang mga simbolo sa zodiac nagpadayon nga may dakong bahin sa pagsimba sa daghang tawo. Makaiikag, ang mga simbolo sa zodiac makaplagan diha sa pipila ka relihiyosong mga katedral sa Kakristiyanohan ug makita karong adlawa diha sa mga dapit sama sa Katedral sa Notre Dame sa Paris, ingon man sa mga katedral sa Amiens ug Chartres, Pransiya.