“Nagapadayon Paingon sa Tumong”

“Sa paghikalimot sa mga butang sa nangagi ug pagpangab-ot sa mga butang sa unahan, ako nagapadayon paingon sa tumong.”—FILIPOS 3:13, 14.

1, 2. (a) Sa unsang paagi nadawat ni Saulo sa Tarso ang tinudlong-buluhaton diha sa ministeryo, ug unsa man kadto? (b) Unsa man ang iyang pagsanong ngadto sa maong tinudlong-buluhaton?

SA DIHA nga si Saulo sa Tarso nagpaingon sa Damasco nga ang tuyo mao ang paglutos sa mga Kristohanon, ang usa ka kahayag gikan sa langit misidlak sa iyang palibot, ug iyang nadungog ang usa ka tingog nga miingon: “‘Saulo, Saulo, nganong ginalutos mo ako?’ Siya miingon: ‘Kinsa ka ba, Ginoo?’ Siya miingon: ‘Ako mao si Jesus, nga imong ginalutos. Bisan pa niana, bumangon ka ug sumulod sa siyudad, ug kon unsay imong pagabuhaton igasulti ra kanimo.’”—Buhat 9:3-6.

² Nganong gihatagan ni Jesus si Saulo sa Tarso sa maong kasinatian? Gisaysay kini ni Jesus ngadto sa disipulong si Ananias: “Kining tawhana [Saulo] maoy usa ka pinili nga sudlanan alang kanako aron sa pagpamatuod sa akong ngalan ngadto sa kanasoran maingon man ngadto sa mga hari ug sa mga anak sa Israel.” Si Ananias masinugtanong milakaw, mipandong sa iyang mga kamot kang Saulo ug miingon: “Si Jesus nga mipakita kanimo sa dalan nga imong gilaktan sa imong pagpaingon dinhi, nagpadala kanako, aron ikaw maulian sa panan-aw ug mapuno sa balaang espiritu.” (Buhat 9:15, 17) Sa naulian siya sa iyang panan-aw, siya nabawtismohan, misugod sa iyang pagpakig-uban sa Kristohanong kongregasyon sa Damasco. Sa maong panahon, ingong bawtismadong Kristohanong ministro, sa dihadiha siya napuliki sa madasigong pagsangyaw sa maayong balita mahitungod kang Jesus, ang Anak sa Diyos, taliwala sa mga Hudiyo.—Buhat 9:20-22.

3, 4. (a) Unsa ang pag-isip ni Pablo sa iyang ministeryo? (b) Sa unsang paagi ang tinamdan ni Pablo lahi niadtong gipakita sa kongregasyon sa Efeso?

³ Kining maong madasigong ministro labi pang ilado ingong apostol Pablo. Siya kanunay naghisgot nga may pagdayeg sa iyang ministeryo ug sa dili-takos nga kalulot nga gipakita kaniya. “Ako mapasalamaton kang Kristo Jesus nga atong Ginoo, kinsa mihatag kanakog gahom, kay ako iyang giisip nga matinumanon pinaagi sa pagtudlo kanako ngadto sa usa ka ministeryo, bisan pag sa nangagi ako usa ka mapasipalahon ug maglulutos ug tawong lampingasan. Bisan pa niana, ako gipakitaan ug kaluoy, tungod kay ako walay kabangkaagan ug milihok nga walay pagtuo.” (1 Timoteo 1:12-14) Oo, iyang gipabilhan ug dako ang ministeryo.—Roma 11:13; 2 Corinto 4:7.

⁴ Ang maong mga kapahayagan sa bahin ni Pablo nagailustrar sa bili nga iyang padayong nahuptan sa ministeryo sa tibuok niyang karera. Siya wala mahatumpawak sa kahimtang nga sa usa ka panahon naglungtad sa kongregasyon sa Efeso, nga niana si Jesus miingon: “Ako adunay ikasumbong batok kanimo, nga imong gibiyaan ang gugma nga imong nabatonan sa sinugdan.” (Pinadayag 2:4) Hinunoa, gibutang kanunay ni Pablo ang iyang tumong sa iyang atubangan ug padayong gihuptan ang samang kakugi ug kadasig alang sa ministeryo nga iyang nabatonan sa unang mga adlaw sa Damasco.

5. Tapos kita makaalagad kang Jehova sa daghang katuigan, sa unsang paagi kita makadasig sa uban?

⁵ Tapos mahimong matinumanong Kristohanong ministro sulod sa tinagpulo ka katuigan, gigamit ni Pablo ang iyang kaugalingong kagikanan ug mga kasinatian sa pagdasig sa kaubang mga ministro sa kongregasyon sa Filipos aron sila dili mohunong. Wala ba nimo hikaplagi nga kasagaran makaikag kaayo ang pagpatalinghog kon sa unsang paagi ang usa nakakat-on sa kamatuoran ug nahimong ministro? Uyon niana, nagadasig ka ba sa uban pinasukad sa imong kaugalingong kasaysayan ug katuigan sa matinumanong pag-alagad ingong dedikado Kristohanong ministro?

6. Unsa ang kagikanan ni Pablo ingong usa ka Hudiyo?

⁶ Si Pablo, sa iyang sulat ngadto sa mga taga-Filipos, nakatumong sa iyang kinabuhi ingong magtutuman nga Hudiyo. Miingon siya: “Kon may laing tawo nga nagahunahuna nga siya adunay mga hinungdan sa pagsalig sa unod, ako labi na: gisirkunsidahan sa ikawalo ka adlaw, gikan sa kaliwatan ni Israel, sa banay ni Benjamin, usa ka Hebreohanon nga natawo gikan sa mga Hebreohanon; mahitungod sa kasugoan, usa ka Pariseo; mahitungod sa kadasig, naglutos sa kongregasyon; mahitungod sa pagkamatarong nga pinaagi sa kasugoan, usa nga napamatud-ang walay ikasaway.”—Filipos 3:4-6.

7. Nganong gibiyaan ni Pablo ang mga butang sa nangagi, ug unsay iyang nabatonan tungod sa pagbuhat niana?

⁷ Tungod sa maong kagikanan si Pablo makabaton untag daghang materyal nga kaayohan sa pagpakig-uban sa mga Hudiyo. Bisan pa niana, siya mipadayon sa pag-ingon: “Ang mga butang nga naangkon ko, kini akong giisip nga kapildihan tungod kang Kristo. Aw, bahin niana, giisip ko usab ang tanang butang nga kapildihan tungod sa labaw nga bili sa kahibalo ni Kristo Jesus nga akong Ginoo. Tungod kaniya akong giisip nga kapildihan ang tanang butang ug akong giisip nga biya, . . . aron makaila kaniya ug sa gahom sa iyang pagkabanhaw ug sa pagpakig-ambit sa iyang mga giantos, nga nagapasakop sa akong kaugalingon sa usa ka kamatayon nga sama sa iya, sa pagtino nga sa bisan unsang paagi akong makab-ot ang unang pagkabanhaw gikan sa mga patay.” (Filipos 3:7-11) Kana maoy mga pulong nga nagapasundayag sa bug-os nga pagtuo diha kang Kristo Jesus ug sa mga tagana nga gihimo ni Jehova nga Diyos. Ikaw ba sama kang Pablo diha sa dili pagtugot nga ang tinguha sa pagkailado ug materyal nga mga bentaha maoy magamando sa imong kinabuhi?

Ang Hustong Tinamdan sa Hunahuna

8. (a) Tapos sa pag-alagad ug dugay sa ministeryo, unsay giingon ni Pablo mahitungod sa iyang tumong? (b) Sa unsang paagi ang mga pulong ni Pablo sa 1 Corinto 9:24, 27 matuman sa atong kahimtang?

⁸ Tapos si Pablo makaalagad sa Diyos sulod sa tinagpulo ka katuigan, mahimo bang hunongon niya ang pag-agpas sa iyang tumong? Siya misulat sa mga taga-Filipos: “Mga igsoon, wala ko pa isipa nga ako nang nakuptan kana; apan adunay usa ka butang mahitungod niini: Sa paghikalimot sa mga butang sa nangagi ug sa pagpangab-ot sa mga butang sa unahan, ako nagapadayon paingon sa tumong alang sa ganti sa pagtawag sa kahitas-an sa Diyos pinaagi kang Kristo Jesus.” (Filipos 3:13, 14) Nakahimo na siyag maayong rekord sa Kristohanong ministeryo ug nag-antos sa daghang butang, ug maoy samtang didto sa bilanggoan sa Roma nga siya misulat niining mga pulonga ngadto sa mga taga-Filipos, bisan pa niana ang iyang ministeryo wala pa matapos. Aron iyang madawat ang ganti nga mabatonan niadtong nag-alagad sa unang-siglong Kristohanong kongregasyon, nga mao “ang pagtawag sa kahitas-an sa Diyos pinaagi kang Kristo Jesus,” nan kinahanglan siya magpadayon paingon sa iyang tumong. Kini ang hustong tinamdan nga nabatonan sa tanang hamtong nga Kristohanon, bisan kon ang ilang paglaom maoy umaabot nga kinabuhi sa langit kun sa yuta. Maayong susihon sa matag usa kanato ang atong kaugalingong kahimtang ug atong paagi sa panghunahuna sa pagsuta kon kita tinuod nagapabili sa ministeryo nga gitugyan kanato ilalom sa kahikayan sa Diyos.

9. Kita makabaton sa unsang hamtong tinamdan sa hunahuna?

⁹ Gipaila ni Pablo ang hamtong Kristohanong tinamdan, nga miingon: “Nan, maingon nga ang daghan kanato maoy hamtong, atong batonan kining tinamdan sa hunahuna; ug kon ugaling kamo lahi ug panghunahuna, kini usab igapadayag ra kaninyo sa Diyos.” (Filipos 3:15) Ang hamtong Kristohanong tinamdan motultol sa kalamposan. Nalangkit niini ang pagsunod sa mga lakang ni Kristo Jesus, kinsa malamposong nagtapos sa gitudlo kaniyang yutan-ong ministeryo. Si Jesus nakaampo ngadto sa iyang Amahan: “Gihimaya ko na ikaw sa yuta, kay natapos ko na ang buluhatong imong gihatag kanako. Busa karon, Amahan, himayaa ako tupad kanimo sa himaya nga akong nabatonan tupad kanimo sa wala pa ang kalibotan.”—Juan 17:4, 5.

10. Unsa pa ang atong ikasulti mahitungod sa sulundang tinamdan sa hunahuna ni Kristo bahin sa pag-alagad kang Jehova?

¹⁰ Sa pagpahimuot kang Jehova nga Diyos, ug sa ingon madawat ang ganti nga kinabuhing walay kataposan, kinahanglang atong batonan ang samang tinamdan sa hunahuna nga gipadayag ni Kristo Jesus. Kay nahibalo niini, si Pablo mihangyo: “Batoni ninyo kining tinamdan sa hunahuna nga diha usab kang Kristo Jesus, si kinsa, bisan pag naglungtad sa dagway sa Diyos, wala maghunahuna sa pag-ilog, nga mao, nga siya mahisama gayod sa Diyos. Wala, apan iyang gihukasan ang iyang kaugalingon ug nagbaton sa dagway sa usa ka ulipon ug nahisama sa mga tawo. Labaw pa niana, sa nakaplagan niya ang iyang kaugalingon nga nahisama sa usa ka tawo, siya nagpaubos sa iyang kaugalingon ug nagmasinugtanon hangtod sa kamatayon, oo, kamatayon diha sa usa ka kahoy sa pagsakit. Tungod niini mismo gibayaw usab siya sa Diyos ngadto sa labaw nga katungdanan ug malulutong gihatagan sa ngalan nga labaw sa tanang ubang ngalan.” (Filipos 2:5-9) Pagkakahibulongang tinamdan ang nabatonan ni Jesus! Kita makasundog ba kaniya? Ang mapainubsanong pagtinguha sa pagbuhat sa kabubut-on sa Diyos sa kanunay mosangpot sa mga panalangin. Kon tumanon ang tinudlong-buluhaton, kini mosangpot sa kaayohan.

11. Unsay pagabuhaton niadtong lig-on ug hamtong sa espirituwal?

¹¹ Tungod sa gisulat ni Pablo, ang pipila sa kongregasyon sa Filipos dayag kinahanglan maningkamot pa sa pagkab-ot sa hamtong Kristohanong tinamdan. Si Pablo nanguna sa paglihok aron sa pagdasig ug sa pagtabang kanila. Sa kadaghanang kongregasyon karong adlawa, anaa usab kadtong mas lig-on sa pagtuo ug kadtong may kahuyangan. Ang mga lig-on angay, sama kang Pablo, magdasig sa uban. Dako ang gihimo ni Kristo Jesus sa paglig-on niadtong may espirituwal nga mga panginahanglan, nga mihatag ug panig-ingnan nga sundogon sa mga Kristohanon. “Apan, kita nga mga malig-on angay magpas-an sa mga kahuyangan niadtong dili malig-on, ug dili magpahimuot sa atong kaugalingon. Pasagding ang matag usa kanato magapahimuot sa iyang silingan diha sa kon unsay maayo aron sa paglig-on kaniya. Karon hinaot ang Diyos nga nagatagana sa pagkamainantoson ug kalipay magatugot nga kamo sa inyong kaugalingon makabaton sa samang tinamdan sa hunahuna nga nabatonan ni Kristo Jesus, aron nga may panaghiusa pinaagi sa usa ka baba kamo magahimaya sa Diyos ug Amahan sa atong Ginoong Jesu-Kristo.”—Roma 15:1, 2, 5, 6.

12. Batonan nato ang unsang panglantaw sa ganti nga igahatag sa Diyos?

¹² Si Pablo, sa paglig-on sa pagtuo sa mga taga-Roma, mipunting nga “ang gasa nga ginahatag sa Diyos mao ang kinabuhing walay kataposan pinaagi kang Kristo Jesus nga atong Ginoo.” (Roma 6:23) Panahon sa iyang ministeryo si Jesus, usab, daghag gipamulong mahitungod sa kinabuhing walay kataposan. Kini usa ka kahibulongang ganti nga ginatanyag sa Diyos ngadto sa iyang mga alagad. Buot sa Diyos nga itutok sa iyang mga alagad ang ilang mga mata sa ganti, kay kini nagadasig kanila nga magmatinumanon. Sa dihang buhaton nato kana atong ginapakita ang lig-ong pagtuo sa iyang mga saad. Panahon sa atong Kristohanong mga tigom kita may higayon sa paghisgot kanunay sa ganti nga igahatag ni Jehova sa mga matinumanon.

Ang Atong Ministeryo Bisan pa sa mga Kalisdanan

13. Unsang bahin ang ginadula sa Kasulatan sa atong pagbatog hustong tinamdan sa hunahuna?

¹³ Ang paghupot nato sa hustong panglantaw, o tinamdan sa hunahuna, mapamatud-ang bililhon kaayo samtang atong ginatuman ang atong ministeryo niining kataposang mga adlaw. Bisan pag ang pipila tingali nawad-an sa gugma nga ilang nabatonan sa sinugdan, hinaot atong ihukom nga kini dili gayod mahitabo kanato. Ang Kasulatan mismo usa ka tabang sa maong katuyoan. (Roma 15:4) Pinaagi sa atong pagtuon niini atong mabatonan ang paglaom. Ikaw ba dulot mapasalamaton kang Jehova tungod sa Kasulatan, uban sa daghang butang nga nahitala niana mahitungod sa matinumanong mga alagad ni Jehova sama kang apostol Pablo?

14. Sa unsang paagi nahuptan ni Pablo ang iyang positibong tinamdan atubangan sa lisod nga mga kasinatian?

¹⁴ Unsay atong buhaton kon atong mabatonan ang personal nga mga kasinatiang gihisgotan ni Pablo sa 2 Corinto 11:23-28? Nganong si Pablo wala man mohunong? Tungod kay gibutang niya sa hunahuna ang iyang tumong. Kita mahimong makaagom sa pipila sa susamang mga butang. Apan kinahanglang atong ipadayon ang pag-agpas sa atong tumong alang sa ganti nga ginatanyag sa Diyos kanato. Sa misulat si Pablo ngadto sa mga taga-Filipos, iyang gipakita ang iyang maayong hunahuna pinaagi sa paghisgot nga siya gibilanggo tungod sa pagpanalipod sa maayong balita. (Filipos 1:7, 16) Iyang nasabtan nganong siya atua didto. Kana hinungdanon sa diha nga kita mailalom sa ingon nga pagsulay. Dugang pa, kita nasayod nga si Jehova makagamit kanato sa paghatag ug pamatuod sa iyang kadayegan.

15. (a) Nganong gikinahanglan sa kongregasyon sa Filipos ang pagdasig, ug unsay gisulti ni Pablo kanila aron sa paglig-on kanila? (b) Unsay pagsanong sa kongregasyon sa Roma ngadto sa pagkabilanggo ni Pablo?

¹⁵ Nabatonan sa mga taga-Filipos ang pipila ka pagsulay nga susama sa nabatonan ni Pablo sa Roma. Siya misulat: “Kay inyong nabatonan ang samang pakigbisog sumala sa inyong nakita sa akong kahimtang ug sumala sa inyo karong mapatalinghogan sa akong kahimtang.” (Filipos 1:30) Sa maong mga kahimtang si Pablo nakasulat sa pagdasig kanila. Siya miingon nga ang maayong balita nahibaloan taliwala sa Magbalantay nga Pretoryano. Lagmit ang Kristohanong mensahe nakasulod pa sa panimalay mismo sa emperador, kay ang pipila didto nahimong dedikadong mga Kristohanon. Maayo ang pagsanong sa kongregasyon sa Roma ngadto sa kahimtang, kay wala maguol, maluya o mahadlok tungod sa kamatuorang si Pablo nabilanggo. Hinunoa, sila napuliki sa buluhatong buot ni Jehova nga buhaton, nga nagpakitag labaw pang kaisog sa pagpahayag sa pulong sa Diyos.—Filipos 1:12-14; 4:22.

16. Unsa ilabina ang kinahanglang atong buhaton kon motungha ang pagsupak?

¹⁶ Sa diha nga motungha ang pagsupak, adunay dagkong mga kaayohan sa paghupot sa panaghiusa sa Kristohanong kongregasyon. Gipasiugda ni Pablo ang panaghiusa ug ang pagkausa. (Filipos 1:27–2:4) Nianang mga panahona gikinahanglan ang pagpahayag ug mga pulong sa pagtuo sa usag usa, aron dili kita mohunong sa pagpangagpas sa tumong. Kini panahon sa paghupot sa mahigugmaon, mapaubsanong tinamdan ug sa pagbuhat sa maayo sa usag usa, nga mangita sa kaayohan sa usag usa.—Itandi ang Filipos 2:19-21.

Pagbuntog sa Kababagan

17. Nganong dili kita angay mohunong sa pagpangagpas paingon sa atong tumong kon motungha ang mga suliran sa panglawas?

¹⁷ Usa ka suod nga kauban ni Pablo mao si Epaprodito. Tungod sa buluhaton sa Ginoo siya hapit mamatay, apan walay ebidensiya nga tungod sa iyang suliran sa panglawas siya nahikalimot sa tumong nga diha sa iyang unahan. (Filipos 2:25-30) Sa 2 Corinto 12:7, gihisgotan ni Pablo ang iyang kaugalingong eksperyensiya sa “usa ka tunok sa unod,” nga lagmit nagtumong sa suliran sa iyang mga mata. Miampo siya nga kana mamaayo unta, apan wala itugot ang iyang hangyo. Bisan pa niana, ang pagbutang sa hunahuna sa iyang tumong nakatabang kang Pablo sa pagpadayon sa pagpangagpas niana bisan pa sa mga sakit sa lawas. Bisan pag may mga kahuyangan, nakaplagan niya ang usa ka paagi sa tabang ni Kristo Jesus.—2 Corinto 12:9.

18. Giunsa pagpakita ni Pablo ang maayong pagpanimbang bahin sa materyal nga mga butang?

¹⁸ Ang sulat ngadto sa mga taga-Filipos (4:11-13) naghisgot usab sa mga kinahanglanon sa kinabuhi. Ang pagkaagom ug kanihit mahimong usa ka pagsulay alang sa Kristohanon kon kaha siya mohunong sa pagpangagpas sa iyang tumong. O batonan ba niya ang hamtong nga tinamdan pinaagi sa pag-atubang sa suliran ug sa gihapon may bahin sa ministeryo? (Itandi ang Buhat 18:1-4.) Bisan pag si Pablo may diyutay nga pagkaon o kaha may dagaya, ang iyang ministeryo mao ang una. Sa iyang nabatonan ang kadagaya wala niya gamita ang higayon sa paggugol ug daghang panahon sa pagtinguhag mga kalingawan, kondili iyang gipadayon ang pagpangagpas sa tumong nga mao ang ganti.

19. Unsay ginatambag nga atong buhaton diha sa Filipos 4:6, 7 sa dihang atong gikinahanglan ang tabang? Uban ang unsang mga sangpotanan?

¹⁹ Wala hisgoti ni Pablo ang tanang matang sa kasinatian nga mahimong agoman sa Kristohanon sa kinabuhi. Apan kon moabot ang mga butang makabalda sa ministeryo, ingong hamtong nga mga Kristohanon angay kitang modangop kang Jehova sa pag-ampo, ang dalan nga gisugyot sa Filipos 4:6, 7. Unya ihatag kanato ni Jehova ang kalinaw sa hunahuna, nga motabang kanato sa paghunahuna nga tin-aw ug mobulig kanato sa pagbuntog sa mga suliran samtang kita magpadayon ingon nga iyang matinumanong mga ministro. Ang pag-ampo nagatabang kanato sa paghupot nga padayon sa atong pagtuo ug sa pagpadayon paingon sa atong tumong.

20. (a) Sa unsang paagi ang mga panig-ingnan sa matinumanong mga tigulang sa kamatuoran nagadasig kanato? (b) Unsay atong angay pagabuhaton? Ngano?

²⁰ Daghan niadtong nakig-uban sa mga kongregasyon karon ang nagaalagad kang Jehova sa tinagpulo na ka katuigan. Silang tanan nakaagig mga pagsulay samtang nagtuman sa ilang ministeryo. Apan si Jehova nagtabang kanila, mao nga sila nagapadayon paingon sa tumong alang sa ganti. Kita mapasalamaton kang Jehova nga sa modernong mga panahon, sama sa unang siglo, adunay mga igsoong lalaki ug mga babaye nga mga panig-ingnan sa pagkamainantoson, matinumanon sa ilang pag-alagad sa Gingharian ug nagatutok sa ilang mga mata sa ganti. Kadtong batan-on o bag-ohan pa diha sa “Ang Dalan” makabatog kaayohan pinaagi sa pagsusi sa rekord ni apostol Pablo o sa matinumanong mga alagad sa modernong-adlaw nga kongregasyon, sa pagsuta kon giunsa nila pagsagubang ang ilang mga suliran. (Buhat 9:2; Hebreohanon 13:7) Hinaot ang matag usa kanato magagamit sa tanang higayon sa pagdasig sa usag usa aron kita makaantos nga matinumanon diha sa pag-alagad nga atong nabatonan ug sa panaghiusa magpadayon paingon sa tumong nga gibutang ni Jehova sa atong atubangan. Sa pagbuhat niana, mabatonan nato ang kalaoman sa pag-alagad kang Jehova nga Diyos sa walay kataposan diha sa malipayong pagpakig-uban sa mga matinuohon.—Filipos 3:13-16.

Mga Puntos nga Pagahinumdoman

◻ Unsa ang personal nga kagikanan ni Pablo, ug giunsa niya paggamit kini sa pagdasig sa iyang mga igsoon?

◻ Sa unsang paagi ginapakita kanato sa mga panig-ingnan ni Kristo Jesus ug ni Pablo kon unsa ang hamtong Kristohanong tinamdan?

◻ Sa unsang paagi atong ikapasundayag ang atong panaghiusa kon motungha ang pagsupak?

◻ Nganong kinahanglang mopadayon kita sa pagpangagpas paingon sa atong tumong?

[Hulagway sa panid 12]

Dakog gihimo si Kristo Jesus sa paglig-on niadtong may espirituwal nga mga panginahanglan