Mga Pangutana Gikan sa mga Magbabasa

Unsay gipasabot ni apostol Pablo sa dihang miingon siya nga iyang “kalimtan ang mga butang sa luyo ug magapangab-ot sa mga butang sa unahan”? (Filipos 3:13) Ang usa ka tawo tinuyo bang makalimot sa usa ka butang?

Dili, sa kadaghanang kaso dili nato tinuyong mapapha ang usa ka hunahuna gikan sa atong kaisipan. Ang kamatuoran mao, kita malimot sa kadaghanan sa buot natong hinumdoman ug mahinumdom sa daghang butang nga buot natong kalimtan. Nan, unsay gipasabot ni Pablo sa dihang iyang gisulat ang mga pulong sa Filipos 3:13? Ang konteksto motabang kanato sa pagsabot.

Sa Filipos kapitulo 3, gibatbat ni Pablo ang iyang “pasukaranan sa pagsalig . . . diha sa unod.” Iyang gihisgotan ang maayong Hudiyonhong kagikan ug ang iyang kasibot alang sa Balaod​—mga butang nga makahatag unta kaniya ug daghang bentaha diha sa nasod sa Israel. (Filipos 3:4-6; Buhat 22:3-5) Sa gihapon, iyang gitalikdan ang maong mga bentaha, nga nagpapas niana ingong kapildihan, ingnon ta. Ngano? Tungod kay nakaplagan niya ang usa ka butang nga mas maayo​—ang “pagkalabawg bili sa kahibalo ni Kristo Jesus.”​—Filipos 3:7, 8.

Ang pangunang tumong ni Pablo mao ang pagkab-ot, dili sa usa ka posisyon niining kalibotana, kondili sa “mas sayo nga pagkabanhaw gikan sa mga patay.” (Filipos 3:11, 12) Busa, siya misulat: “Kalimtan ang mga butang sa luyo ug magapangab-ot sa mga butang sa unahan, nagapangagpas ako sa tumong alang sa ganti nga pagkatinawag sa Diyos ngadto sa itaas pinaagi ni Kristo Jesus.” (Filipos 3:13, 14) Sa dihang miingon si Pablo nga iyang “kalimtan ang mga butang sa luyo,” wala niya ipasabot nga iyang gilangkat sa iyang panumdoman “ang mga butang sa luyo.” Dayag nga nahinumdoman pa niya kadto, sanglit bag-o pa niya kadtong gilista. Gawas pa, sa orihinal nga Grego, gigamit niya ang usa ka matang sa berbo nga nagpakita ug usa ka aksiyon nga nagapadayon, wala makompleto. Siya miingong “kalimtan,” dili “nakalimtan.”

Ang Gregong pulong nga gihubad ug “pagkalimot” (e·pi·lan·thaʹno·mai) adunay lainlaing mga kahulogan, usa niana mao ang “dili-pagtagad,” o “pagpasagad.” Sumala sa Exegetical Dictionary of the New Testament (giedit ni Horst Balz ug Gerhard Schneider), mao kini ang kahulogan sa “kalimtan” diha sa Filipos 3:13. Si Pablo wala maghunahuna kanunay sa mga butang nga iyang gibiyaan. Nakakat-on siya sa paglantaw niana nga dili kaayo angayng kabalak-an. Kini sila maoy “mga basura” kon itandi sa langitnong paglaom.​—Filipos 3:8.

Sa unsang paagi ang mga pulong ni Pablo mapadapat karong adlawa? Aw, ang usa ka Kristohanon tingali, sama kang Pablo, mihimog mga sakripisyo aron sa pag-alagad sa Diyos. Lagmit gibiyaan niya ang usa ka dakog-kita nga karera tungod sa bug-os-panahong pag-alagad. O lagmit nasakop siya sa usa ka adunahang pamilya nga wala na magsustento kaniya ug salapi tungod kay sila supak sa kamatuoran. Ang maong mga sakripisyo dalayegon, apan dili kini sila angayng hunahunaon kanunay. Ang usa ka Kristohanon ‘makalimot,’ mohunong sa paghunahuna, “sa mga butang sa luyo” tungod sa mahimayaong palaabuton nga nagpaabot kaniya.​—Lucas 9:62.

Ang lintunganayng prinsipyo sa mga pulong ni Pablo ikapadapat tingali sa laing paagi. Komosta ang usa ka Kristohanon nga nalangkit sa daotang panggawi una makakat-on mahitungod sa Diyos? (Colosas 3:5-7) O pananglitan human mahimong usa ka Kristohanon, siya nakahimog seryosong sala ug gidisiplina sa kongregasyon. (2 Corinto 7:8-13; Santiago 5:15-20) Aw, kon siya tinuod nga mahinulsolon ug nag-usab sa iyang mga dalan, siya “nahinloan na.” (1 Corinto 6:9-11) Ang nahitabo miagi na. Lagmit dili niya literal nga makalimtan ang iyang nahimo​—sa pagkatinuod, maalamon siya nga mokat-on gikan sa kasinatian aron dili sublion ang sala. Sa gihapon, siya ‘malimot’ sa diwa nga dili kanunayng mayugot sa iyang kaugalingon. (Itandi ang Isaias 65:17.) Kay gipasaylo pinasikad sa halad ni Jesus, siya maningkamot nga dili sobrang maghunahuna sa nangagi.

Sa Filipos 3:13, 14, gibatbat ni Pablo ang iyang kaugalingon ingong magdadagan sa usa ka lumba, “magapangab-ot” aron makab-ot ang tumong. Ang usa ka magdadagan magatan-aw sa unahan, dili sa likod. Sa susama, ang usa ka Kristohanon kinahanglang molantaw sa mga panalangin sa unahan, dili sa mga butang nga anaa sa likod. Si Pablo nag-ingon usab: “Kon sa bisan unsang bahina kamo may pangisip nga nakiling nga sukwahi, ipadayag sa Diyos kining ania sa itaas nga tinamdan nganha kaninyo.” (Filipos 3:15) Busa, pag-ampo ngadto sa Diyos aron tabangan ka nga maugmad kining maong punto de bista. Pun-a ang imong hunahuna sa mga hunahuna sa Diyos nga makaplagan diha sa Bibliya. (Filipos 4:6-9) Palandonga ang gugma ni Jehova alang kanimo ug ang mga panalangin nga imong napahimuslan gumikan niana. (1 Juan 4:9, 10, 17-19) Unya, pinaagi sa balaang espiritu si Jehova motabang kanimo nga dili maghunahuna sa imong gibiyaan. Hinunoa, sama kang Pablo, ikaw molantaw ngadto sa mahimayaong palaabuton sa unahan.​—Filipos 3:17.