Nahiusa sa Pagmantala sa Pulong ni Jehova

“Batoni ninyo ang samang tinamdan sa hunahuna nga nabatonan ni Kristo Jesus, aron nga may panaghiusa pinaagi sa usa ka baba kamo makahimaya sa Diyos ug Amahan sa atong Ginoong Jesu-Kristo.”—ROMA 15:5, 6.

1. (a) Unsa ang kahikayan ni Jehova sa paghiusa sa iyang katawhan? (b) Unsay ginapaila sa Kasulatan bahin sa kahikayan niining panaghiusaha?

SI Jehova nagtigom sa iyang mga saksi ngadto sa usa ka bililhong panaghiusa sa tibuok yuta. Kini nahiuyon sa panimalaynong kahikayan sa Diyos nga gibatbat ni apostol Pablo sa Efeso 1:10: “Usa ka administrasyon sa kinutoban sa tinudlong mga panahon, nga mao, sa pagtigom pag-usab sa tanang butang diha kang Kristo, ang mga butang sa mga langit ug ang mga butang sa yuta.” Unang matigom mao ang mga sakop sa “gamay nga panon” sa dinihogan moadto-langit nga mga Kristohanon ug tapos niana ang mga sakop sa “dakong panon . . . gikan sa tanang kanasoran” nga nagapanglantaw nga maluwas ngadto sa matarong “bag-ong yuta” nga gisaad sa Diyos.—Lucas 12:32; Pinadayag 7:3, 4, 9, 13-17; 21:1, 5.

2. Unsay nagapaposible nga ang mga Saksi ni Jehova magasulting “may panaghiusa”?

² “Nga may panaghiusa”—kana ang paagi sa pagpahayag sa maong mga saksi ni Jehova sa mensahe sa iyang Gingharian. Nganong sila makahimo niini? Tungod kay, sa tibuok tang yuta, ilang ginapasundayag ang “samang tinamdan sa hunahuna nga nabatonan ni Kristo Jesus” samtang dinhi sa yuta. Siya dili bahin niining hambogirong kalibotan. Hinunoa, iyang gipaubos ang iyang kaugalingon sa pagbuhat sa kabubut-on sa Diyos ug pag-ugmad sa mainiton, mahigugmaong panaghiusa taliwala sa iyang mga disipulo. Kadto ang sinugdan sa tibuok-yuta nga panaghiusa nga nagpaila sa matuod nga mga Kristohanon sulod sa sunod nga kasiglohan.—Filipos 2:5-8; Juan 13:34, 35; 17:14.

3. (a) Unsa ang dakong kalainan nga makita sa yuta karong adlawa? (b) Sa unsang paagi ang Kasulatan nagatabang sa pag-ila sa tibuok-yutang kapunongan sa matuod nga mga Kristohanon?

³ Kining panaghiusa sa organisasyon nakadangat sa iyang labing kahibulongang kapahayagan panahon niining “kataposang mga adlaw,” nga nailhang kaatbang kaayo sa pagkabahinbahin nga nahiagoman sa sistema sa mga butang ni Satanas, diin ang pagdumot ug pagkamalapason kaylap. (2 Timoteo 3:1-5, 13; Mateo 24:3, 12) Wala pa sukad sa kasaysayan sa tawo, diha sa 203 ka kayutaan, nga nagalungtad sa atong yuta ang usa ka organisasyon nga bug-os nagkahiusa kon bahin sa pagtuo, katuyoan ug buluhaton kay sa karon. Kining tibuok-yuta nga kapunongan sa mga disipulo ni Jesus mailhan pinaagi sa mga bunga nga gipamunga niini.—Juan 15:8; Hebreohanon 13:15; Galacia 5:22, 23.

Panaghiusa sa Kalihokan

4. (a) Unsang panaglantugi ang mitungha sa unang-siglong kongregasyon? (b) Sumala sa Buhat 15:1-6, unsang teokratikanhong lihok ang gihimo?

⁴ Ang panaghiusa sa kalihokan diha sa organisasyon ni Jehova giilustrar alang kanato diha sa Mga Buhat kapitulo 15. Handurawa sa imong hunahuna ang panagtigom sa hamtong nga mga saksi ni Jehova—ang 12 ka apostoles, ubang ansiano sa kongregasyon sa Jerusalem ug si Pablo ug Bernabe, mga ansiano gikan sa kongregasyon sa Antioquia. Sa Antioquia, ug usab sa Jerusalem, ang pipila ka nakabig gikan sa mga Hudiyo miinsistir nga ang katawhan sa kanasoran pagasirkunsidahan ug magbantay sa kasugoan ni Moises aron maluwas. Busa ang mga apostoles ug mga ansiano “nagtigom aron sa pagtino niining butanga.”—Buhat 15:1-6.

5-7. (a) Sa unsang kahulogan may “dakong panaglantugi”? (b) Unsang pamatuod ang gipresentar? (c) Sa unsang paagi ang Kasulatan gipapamatuod bahin sa ulohan? (d) Unsang hamtong nga determinasyon ang gihimo ni Santiago, nga mitultol sa unsang kataposang desisyon? (e) Unsa matang sa paglihok ang misunod?

⁵ May walay-gidapigan nga paghisgot sa suliran, nga kadtong debotadong mga lalaki nagpahayag sa mga argumentong pabor ug kontra. Wala sila magbatog daang panghukom. Andam silang mosusi sa butang gikan sa tanang anggulo. Dihay “dakong panaglantugi,” apan dayag ilang gihuptan ang kahusay ug gipamatiang matinahoron ang mga hunahuna sa usag usa. Gipamatud-an ni apostol Pedro ang kamatuorang gihatag sa Diyos ang balaang espiritu ngadto sa dili-sinirkunsidahang katawhan sa kanasoran—tinong usa ka dakong pamatuod nga dili na kinahanglan ang lawasnong sirkunsisyon alang sa mga maluwas. Si Bernabe ug si Pablo midugang sa maong pamatuod, nga mibatbat sa daghang kahibulongang butang gibuhat sa Diyos pinaagi sa ilang ministeryo ngadto sa kanasoran.—Buhat 15:7-12.

⁶ Sunod gikutlo ni Santiago ang Kasulatan sa pagpaluyo sa argumento nga bag-o pang gipahayag. Iyang gisaysay nga ang Amos 9:11, 12 nagpunting sa pagpasig-uli sa balaang pabor ilalom sa Dakong David, si Jesu-Kristo, ug sa pagpaabot ni Jehova sa dili-takos nga kalulot ngadto sa “tanang kanasoran nga diha kanila ang [iyang] ngalan gitawag.” Nasabot ni Santiago nga dili na kinahanglang samokon ang mga kinabig gikan sa kanasoran pinaagi sa pag-insistir nga sila sirkunsidahan ug pabantayon sa tanang kalagdaan nga naglangkob sa Kasugoan ni Moises. Bisan pa niana, gikinahanglan ang pila ka butang: Kinahanglang likayan nila ang pagsimbag diyosdiyos, pagkaon sa dugo sa bisan unsang dagway ug ang seksuwal nga imoralidad.—Buhat 15:13-2l.

⁷ Ang nagmandong lawas sa Jerusalem nakakab-ot sa usa ka nagkahiusang desisyon. Kadto nagpadalag mga mensahero ngadto sa kongregasyon sa Antioquia nga may sulat nga gitapos nga may pagdasig: “Kon magpahilayo kamo niining mga butanga, kamo magmauswagon. Maayong panglawas kaninyo!”—Buhat 15:22-29.

Teokratikanhong Paagi

8. (a) Sa unsang paagi ang modernong-adlawng Nagamandong Lawas gigiyahan sa paghimog mga desisyon? (b) Unsa ang pila ka butang nga natin-aw dili pa dugay?

⁸ Sa modernong panahon, ang Nagamandong Lawas sa mga Saksi ni Jehova, nga nagahawas sa “matinumanon ug maalamong ulipon” sa Agalon dinhi sa yuta, nagasunod sa samang apostolikanhong sumbanan. (Mateo 24:45-47) Sa ingon, ang Kristohanong kasinatian, giya gikan sa Bibliya, ug ang pag-agak sa espiritu ni Jehova nagatultol niining pundok sa dinihogang mga Saksi ngadto sa teokratikanhong mga konklusyon bahin sa mga butang nga hinungdanon kaayo sa kongregasyon. Pananglitan, sa katuigang dili pa dugay ang Nagamandong Lawas nagsunod sa Kasulatanhong paagi sa pagtin-aw sa mga butang sama sa panghunahuna sa Bibliya bahin sa “mga ministro,” hinatag-sa-Diyos nga konsensiya, pagdalag makapatayng armas, ug ang gilapdon nga ikapadapat ang mga bahin sa tagna ni Isaias nganha sa umaabot nga Paraiso sa yuta.—Itandi ang Juan 14:26; 1 Corinto 2:10.

9. Unsang paagi ang pagasundon sa mga ansiano sa pagsulbad sa mga suliran karong adlawa?

⁹ Ang paagi sa Buhat kapitulo 15 kinahanglang sundon usab sa mga ansiano sa kongregasyon sa pagsulbad sa mga suliran karong adlawa. Nahauna, ipahayag sa tin-aw ang suliran ug langkit nga mga kamatuoran. Sunod, ipahatag sa kasaligang mga saksi ang tin-aw, tinuod nga ebidensiya nga maykalabotan sa butang. Susiha ang Kasulatan aron mabatonan ang punto de vista ni Jehova, nga gamiton usab ang tabang nga tingali anaa sa mga basahon sa Watch Tower Society. Sa mainampoon maningkamot padulong sa pagkab-ot sa nagkahiusa nga solusyon, nga nahiuyon sa pagtulon-an sa Pulong ni Jehova, nga makaayo sa kongregasyon.—Isaias 48:17; 1 Corinto 14:33.

Pagkalipay—Niadto ug Karon

10. (a) Sama sa unang-siglong kongregasyon, sa unsang paagi ang teokratikanhong mga desisyon magaapektar kanato karong adlawa? (b) Sa unsang paagi ang modernong mga hitabo mitultol sa paglig-on ug pag-uswag sa katawhan sa Diyos?

¹⁰ Sa nadunggan nila ang desisyon sa nagmandong lawas, ang mga sakop sa kongregasyon sa Antioquia “nagmasadyaon tungod sa pagdasig.” Sa susama karong adlawa, ang mga Saksi ni Jehova nagakalipay nga mahibalo sa mga desisyong organisasyonal ug mga katin-awan sa doktrina nga nagapauswag sa espirituwal nga kahimsog sa katawhan sa Diyos ug sa kauswagan sa buluhaton ni Jehova. (Itandi ang Tito 2:1.) Apan dili na kinahanglang mosulat ang Nagamandong Lawas sa mga sulat sa instruksiyon pinaagig kamot ug pagpasirkular niini pinaagi sa mga mensahero nga magabaktas. Ang modernong paagi sa komunikasyon ug pasilidad sa pag-imprenta diha sa kapin sa 30 ka sanga sa Watch Tower sa tibuok yuta nagapaposible sa pagpasa sa “maayong balita sa pulong ni Jehova” ngadto sa minilyong katawhan sa Diyos sa labing gamayng panahon. Kini gihimo ilabina pinaagi sa magasing Bantayanang Torre. Busa, ang mga kongregasyon sa tibuok kalibotan nagapadayon “nga nalig-on sa pagtuo ug pag-uswag sa gidaghanon sa adlaw-adlaw.”—Buhat 15:30–16:5.

11. Sa unsang paagi gigamit ni Jehova ang Bantayanang Torre sa pagtuman sa Isaias 30:18-21?

¹¹ Kadtong nagbasa sa Bantayanang Torre latas sa katuigan nagakalipay usab sa paglantaw sa miuswag nga sirkulasyon niini. Sa 105 ka katuigan sa pagpatik, kini miuswag gikan sa 6,000 ka kopya diha sa Iningles kas-a sa usa ka bulan ngadto sa 11,150,000 ka kopya diha sa 102 ka pinulongan, nga ang tanang dagkong edisyon maoy kaduha sa bulan. Sa walay duhaduha, gigamit pag-ayo sa atong Dakong Instruktor, si Jehova nga Diyos, ang Bantayanang Torre ingong katumanan sa saad: “Malipayon ang tanang nagapaabot kaniya. . . . Ang imong mga igdulongog makadungog sa usa ka pulong sa imong luyo nga magaingon: ‘Kini mao ang dalan. Lumakaw kamo niana, kamong katawhan,’ kon kamo mopaingon sa tuo o kon kamo mopaingon sa wala.”—Isaias 30:18-21.

12. (a) Nganong kita karon dunay dugang hinungdan sa pagkalipay? (b) Sa unsang paagi kining bag-ong kahikayan makahatag kanatog kaayohan?

¹² Karon adunay dugang hinungdan sa pagkalipay. Sugod sa tuig 1985, ang The Watchtower ginapatik nga dungan, bahin sa mga unod niini, diha sa 23 ka pinulongan!a Kining tanang edisyon may samang desinyo sa hapin. Naundan kana sa samang serye sa unang mga artikulo ug samang mga artikulong tun-anan. Ginatagana niini ang dungang programa sa “pagpakaon” nga maghiusa sa katawhan ni Jehova sa pagtubo sa espirituwal “hangtod kitang tanan makadangat sa pagkausa sa pagtuo.” Kini angay magdasig kanato sa dugang, ‘nga may panaghiusa pinaagi sa usa ka baba kita magahimaya sa Diyos ug Amahan sa atong Ginoong si Jesu-Kristo.’—Efeso 4:13; Roma 15:6.

13. (a) Unsa ka bug-os kining programaha? (b) Busa mahimo ang unsang pagpadapat sa 1 Corinto 1:10?

¹³ Inigkupot nimo niining magasina sa imong kamot sa senemanang pagtuon sa kongregasyon sa Bantayanang Torre, dili ba malipay ka nga masayod nga ang kadaghanan sa imong mga igsoon sa tibuok kalibotan magkahiusa sa pagkaon niining samang espirituwal nga pagkaon sa samang adlaw? Oo, kini mahitabo sa tibuok Norte ug Sur Amerika, sa kinadak-an sa Uropa, sa Hapon ug sa daghang dapit sa habagatang Aprika! Gibanabana nga kapin na sa 90 porsiento sa mga nagatambong sa pagtuon sa Bantayanang Torre sa tibuok yuta—mga 2,500,000 ka tawo matag semana—karon nagaambit niining dungang kahikayan sa “pagpakaon.” Sa tingob, kini sila “nagkahiusa sa samang hunahuna ug sa samang kaisipan.” (1 Corinto 1:10) Sumala sa itugot sa kahimtang, ang ubang pinulongan igadugang.

14. Sa unsang paagi ang mga pamilya makabatog kaayohan?

¹⁴ Sa nangagi, tungod sa kalainan sa pinulongan, ang mga membro sa usa ka pamilya tingali ulahi sa mga bulan diha sa pagtuon sa linaing mga artikulo sa Bantayanang Torre. Apan karon sila mahiusa na niining bahina. Pananglitan, ang imigranteng mga ginikanan nga mas nasinati sa laing pinulongan tingali molingkod uban sa ilang tigsultig-Iningles nga mga anak sa samang tun-anan sa Bantayanang Torre diha sa duha ka pinulongan. Sa mga pamilya nga tagurhag-pinulongan, ang mga ginikanan mas masangkapan sa pagtuman sa instruksiyon sa Efeso 6:4 ug sa 2 Timoteo 3:14, 15.

15. (a) Sa atong publikong ministeryo, unsa karon ang atong mahimo nga nahiuyon sa Isaias 52:8, 9? (b) Unsa ang naposible sa sayo sa l985, ug sa umaabot?

¹⁵ Palandonga, usab, ang atong publikong ministeryo uban ang mga magasin. Niining dugang paagi, ang mga magmamantala sa Gingharian sa tibuok yuta karon “makahugyawng malipayon nga nahiusa” samtang ilang ipresentar ang samang impormasyon ngadto sa publiko sa samang panahon. (Isaias 52:8, 9) Sa pagsangyaw pinaagig magasin sa kadalanan diha sa daghag-pinulongang mga teritoryo, ang mga magmamantala makapasundayag sa mga magasin nga samag tema sa hapin diha sa duha o kapin pang pinulongan. Hunahunaa kana! Sulod sa sinugdan sa 1985, ang mga magmamantala sa Gingharian sa tibuok yuta magahatag sa makapukaw, nagkahiusang pamatuod mahitungod sa Armageddon! Sa igong panahon, basin tultolan ni Jehova ang iyang katawhan sa paghimog laing gamhanan, nagkahiusang mga kapahayagan sa tibuok kalibotan samtang sila nagaalagad “kiliran por kiliran alang sa pagtuo sa maayong balita.” (Filipos 1:27) Ang dungan nga pagpatik sa Bantayanang Torre diha sa daghang pinulongan mopaposible nianang mga kapahayagana.—Itandi ang Daniel 11:44.

Pagpanglantaw sa Unahan

16. (a) Unsa ang ginasulti kanato niining maong Bantayanang Torre bahin sa kalihokan sa magasin diha sa mga panid 8, 9, ug 25? (b) Nganong gikinahanglan sa katawhan ang atong mga magasin karong adlawa?

¹⁶ Sulod sa tuig 1984, nahimo sa mga Saksi ni Jehova ang kaylap nga pagpanagtag sa magkaubang mga magasing Bantayanang Torre ug Pagmata! Tugob gipanalanginan ni Jehova kining buluhatona, sumala sa makita gikan sa mga estadistika nga gipatik sa mga panid 8, 9, ug 25 niining magasina. Sa tibuok kalibotan, ang pagpanagtag sa kanataran sa atong mga magasin sulod sa 1984 miuswag ug 11.1 porsiento ngadto sa katibuk-ang gidaghanon nga 287,358,064, samtang ang mga napahimutang nga suskrisyon sa magasin miuswag ug 3.2 porsiento ngadto sa 1,812,221. Walay duhaduha nga dugang ug dugang katawhan buot masayod nganong ang kanasoran anaa sa kagul-anan, “nga wala mahibalo sa lutsanan.” (Lucas 21:25, 26) Buot sa mga ginikanan ang malipayong kaugmaon alang sa ilang mga anak—butang nga labing maayo kay sa usa ka yuta nga nasunog sa nukleyar nga gubat. Ang atong mga magasin nagatanyag sa buhing paglaom!—Mateo 12:18, 21; Roma 15:4.

17. Sa unsang paagi ang atong mga magasin motabang kanato sa pagsukol sa Yawa?

¹⁷ Nan, unsay ikasulti sa 1985? Ang mensahe diha sa Bantayanang Torre ug Pagmata! nagkapintok. Kini madahom samtang ang kataposang mga adlaw alang sa kalibotan ni Satanas nagkadiyutay. (Pinadayag 12:12) Ayaw pagkasayop! Buot sa Yawa nga kita maluya gikan sa pagpakig-ambit nga regular sa pag-alagad kang Jehova. Oo, buot ni Satanas nga kita mabulag sa pundok sa katawhan sa Diyos ug sa buluhaton niini, ug niana kita lamyon. (1 Pedro 5:8) Apan kita makasukol kaniya pinaagi sa regular nga pagpakigtigom aron mabatonan ang tukma nga kahibalo, ug pinaagi sa paggamit niining miuswag nga kahibalo sa pag-alagad kang Jehova.—Efeso 6:11, 14-16; Colosas 1:9-11.

¹⁸ Ikaw ba usa ka magmamantala sa Gingharian? Kon mao, imong nabatonan ang pasukaranang posisyon diha sa modernong-adlawng teokratikanhong kapunongan. Ingong dedikadong Kristohanon, tingali ikaw dunay laing responsabilidad sa kongregasyon. Bisan pa niana, sa pagkinabuhi sumala sa ngalan ni Jehova, kinahanglang mahimo kang madasigong ministro diha sa kanataran. Nga nahiusa sa inigsoong pagbati sa usag usa, kitang tanan magpadayong mainiton sa espiritu samtang kita “nagapaulipon kang Jehova.” (Roma 12:10, 11) Bisan unsa ang mga kalisod nga atong hiagoman gikan ni Satanas ug sa iyang kalibotan, kinahanglang magpadayon kita ingong usa ka lawas, oo, ‘nga may panaghiusa ug pinaagi sa usa ka baba,’ sa paghimaya kang Jehova pinaagi sa pagpahibalo sa mga katuyoan sa iyang Gingharian.

19. (a) Sa unsang paagi kita malamposong makaatubang sa mga paglutos ug sa ubang suliran? (b) Unsang tambag ang ginahatag kanato sa Sofonias 3:8, 9?

¹⁹ Daghan kanato ang kinahanglang makigbisog sa paglutos o sa mga teritoryo nga walay pagsanong sa atong pagsangyaw. Bisan pa niana, magpadayon kita sa pagpakita sa samang tinamdan sa hunahuna nga nabatonan ni Kristo Jesus. (Juan 16:33; 1 Pedro 4:1, 2) Ingong nahiusang lawas atong ipasundayag ang tinuod nga kaisog—ang espirituwal nga kalig-on sa kahiladman nga molahutay ug dili mapukan ilalom sa pagpit-os. (Salmo 27:14; Filipos 1:14) Dili gayod nato ihuyhoy ang kamot sa pagpangita sa mga karnerohon. Magpabilin kitang “nagapaabot” kang Jehova ug sa iyang adlaw sa panudya, nga magaalagad nga abaga sa abaga samtang kita magatawag sa iyang ngalan ug magasulti sa “putling pinulongan” sa kamatuoran.—Sofonias 3:8, 9.

20. (a) Sa unsang paagi atong makaplagan ang tinuod nga kalipay? (b) Ang Isaias 11:6-9 nagbaton sa unsang talagsaong katumanan?

²⁰ Nga nahiusa, hinaot kitang tanang nagahimaya sa Diyos “magasul-ob sa bag-ong pagkatawo nga nalalang sumala sa kabubut-on sa Diyos diha sa matuod nga pagkamatarong ug pagkamaunongon.” (Efeso 4:24) Kini mosangpot sa tinuod nga kalipay. Kini gihulagway sa Isaias 11:6-9, nga nagahisgot sa espirituwal nga paraiso nga karon nagalungtad taliwala sa napasig-uling katawhan ni Jehova! Pagkatagsaong pakigdait ug harmoniya! Wala na gayod ang dalo, daotang mga kinaiya sa pagkatawo! Ingong panapos sa maong kabatbatan sa paraiso, atong mamatikdan kining mga pulonga: “Sila dili magadaot o magalaglag sa tibuok kong balaang bukid; tungod kay ang yuta mapuno gayod sa kahibalo kang Jehova sama sa katubigan nga nagatabon sa dagat mismo.” Ang “balaang bukid” ni Jehova sa nahiusang pagsimba lig-ong natukod karong adlawa sa tibuok yuta. Ngano? Kay gidasig man ni Jehova ang iyang mga saksi sa paghimaya sa iyang ngalan ‘nga may panaghiusa ug pinaagi sa usa ka baba.’ Sa ingon “ang yuta,” ang espirituwal nga kahimtang sa Iyang katawhan, napuno sa “kahibalo kang Jehova.”

21. Nganong hatagan nato ang atong mga magasin sa labing kaylap posibleng pagpanagtag?

²¹ Hinaot kita, sa kusog nga ginahatag ni Jehova, magahatag sa Bantayanang Torre ug sa iyang kaubang magasing Pagmata! sa labing kaylap nga posibleng pagpanagtag. Ug hinaot atong buhaton kana sa paglaom nga ang tanang kinatumyan sa yuta ug tanang banay sa kanasoran, nga hawasnon, “mahinumdom ug mobalik kang Jehova.”—Salmo 22:27; Pinadayag 15:4.

[Mga footnote]

Sa Pagsubli Niining Artikuloha—

◻ Giunsa paglihok sa unang-siglong kongregasyon?

◻ Unsang mga kaayohan ang mosangpot sa dungan nga pagpatik sa Bantayanang Torre?

◻ Unsang maayong paningkamot bahin sa magasin ang gihimo sa 1984?

◻ Sa unsang paagi kita mouswag sa espirituwal, bisan sa mga panahon sa pagsulay?

18. (a) Unsa ka dako ang imong responsabilidad ingong magmamantala sa Gingharian? (b) Sa unsang paagi atong ikapadapat ang tambag sa Roma 12:10, 11 ug 15:5, 6?