Kon Nganong ang Armageddon Pagabugnoon
“ANG DIYOS GUGMA.” Dili lamang kay ang Diyos magapakitag gugma, kondili siya maoy gugma—ang kahulmahan mismo sa gugma.—1 Juan 4:8.
Bisan pa niana, kining samang Diyos sa gugma subsob ihulagway sa uban ingong mapanimalosnon nga diyos nga magadalag pintas nga silot diha niadtong mawad-an sa iyang pabor. Busa, daghan ang nawad-ag pagtuo sa Diyos o kaha nagtamay sa Bibliya, nga nagaangkon nga kini dili mahimong gikan nianang maong Diyos. Ilabina ang mga bahin sa basahong Pinadayag ginasaway diin gibatbat ang mga hukom sa Diyos sa mga daotan, nga ang tayuktok niana mao ang gubat sa Armageddon.
Pananglitan, si Joseph Wheless nagsulat diha sa iyang librong Is It God’s Word?: “Tinong ang malumong magbabasa dili makaantos sa panan-awon bahin sa kataposan nga nagapadayag sa malumong mahinulsolong kalag taliwala sa pobreng mga makasasala (sa orihinal kaha o sa mortal nga sala), si kinsa tua didto ‘gisakit sa kalayo ug asupre sa atubangan sa balaang mga manulonda, ug sa atubangan sa Kordero,’ nga ang tanan nagatan-aw nga dili matinagdanon samtang ‘ang aso sa ilang pagsakit magautbo hangtod sa kahangtoran: ug sila walay pahulay sa adlaw o sa gabii’ gikan sa kabangis sa kapungot sa Diyos nga Makagagahom sa Tanan (Pin. xiv, 10, 11). Kini mao ang dinasig nga pinadayag sa Diyos sa tanang gugma.”
Si Propesor Gerald A. Larue sa University of Southern California, nga nagsaway usab sa talaan sa Pinadayag, karong bag-o misulat diha sa magasing Free Inquiry: “Ang mga dili-magtutuo igatambog ngadto sa bung-aw sa pagsakit nga makapalipong sa handurawan. Ang silot dili mao ang lex talionis, ang mata-sa-mata nga hustisya; ni sama kini sa hustisya sa pagpanimalos, diin ang tibuok pundok mahimong laglagon. (itandi ang Gen. 4:23, [24]; Jos. 6; ubp). Dinhi ang silot maoy sa walay kataposan. Wala ing kaluoy, ang silot dili matapos. Wala ing pagpasaylo, silot lamang nga magahikaw sa kalinaw sa pagkalaglag. Kini dili hulagway ni Jesus nga maaghop ug malumo.” Dayon, sa pagkutlo sa Pinadayag 14:9-11, siya nagpadayon: “Walay pagtahan dinhi sa pikas nga aping—mapintason lamang, mapungtanong panimalos sa kaluog nga mopatim-aw sa Nazi nga pagsakit nga lumo kon itandi.”
Hisabtan, ang mga hunahuna sa mapintasong pag-antos samtang ang mga makasasala sakitong walay kataposan makapatunghag mga pangutana mahitungod sa usa ka ‘Diyos sa gugma.’ Apan kanang mga ideyaha gipasukad sa sayop nga pagsabot sa Bibliya ug sa mga simbolismo nga gigamit dinha. Bisan diin ang Bibliya wala magtudlo nga ang kalag dili mamatay. Hinunoa, ang Kasulatan nagapunting nga “ang bayad sa sala mao ang kamatayon”—dili ang walay-kataposang pagsakit—ug sa pagkamatay ang mga sentido sa usa, apil ang katakos nga mobati sa sakit, mohunong.—Roma 6:23; Ecclesiastes 9:5, 10.
Ang silot, dili ang pagsilot, ang molungtad sa walay kataposan—kay ang mga daotan bug-os pagalaglagon diha sa “linaw sa kalayo,” usa ka simbolo sa bug-os nga kalaglagan. (Pinadayag 20:14, 15; 21:8) Bisan pa niana, ang gubat sa Armageddon mopahinabog tumang pag-antos ug kalisdanan sa katawhan ug mamahimong labing madugoong gubat nga sukad bugnoon. (Mateo 24:21, 22; Pinadayag 14:20; 19:17, 18) Magagikan ba kini sa ‘Diyos sa gugma?’ Ipahinabo ba gayod sa Diyos ang ingon nga gubat?
Usa ka Kapahayagan sa Gugma sa Diyos
Sa pagkamatuod, maoy tungod sa gugma sa Diyos nga bugnoon ang gubat sa Armageddon. Ang katuyoan ni Jehova nga Diyos alang sa yuta mao ang pagpasig-uli niini ngadto sa unang Paraisonhong kahimtang ug papuy-on ang katawhan niini diha sa kalinaw ug kahingpitan “nga walay magapakurog kanila.” (Ezekiel 34:28; Miqueas 4:3, 4; Pinadayag 21:4) Nan, unsay buhaton niadtong si kinsa pinaagi sa ilang krimen ug kapintasan magadaot sa kasegurohan sa napasig-uling Paraiso? Walay sistema nga gimugna sa tawo ang sukad nagmalamposon sa pagsagubang nianang sulirana. Ang bugtong paagi sa pagpasalig sa hingpit nga kalinaw mao ang pagwagtang bisan sa hulga sa pagkadaotan. Oo, pagalaglagon sa Diyos ang mga daotan nga dili na matul-id tungod niadtong buot mobuhat sa matarong. Tungod sa gugma, siya molihok sa paghinlo sa yuta niadtong nagalaglag niini.—Pinadayag 11:18.
Apan, walay usa ang kinahanglan mamatay. “Ang kabubut-on [sa Diyos] mao nga ang tanang matang sa mga tawo mamaluwas,” nagsulat si apostol Pablo. (1 Timoteo 2:4) Ug si Pedro, nga nagsulat usab ubos sa inspirasyon nag-ingon: “Siya dili matinguhaon nga may si bisan kinsang malaglag, kondili matinguhaon nga ang tanan makadangat sa paghinulsol.” (2 Pedro 3:9) Ang Diyos naghikay nga “ang maayong balita sa gingharian” igamantala aron ang tagsatagsa makabaton ug higayon sa pagpaningkamot sa iyang kaugalingong kaluwasan. (Mateo 24:14; Filipos 2:12; Galacia 6:5) Ikaw mahimong mabuhi sa walay kataposan sa kahingpitan sa usa ka paraisong yuta. Ikaw ang magpili. (Roma 2:5-9; Ezekiel 18:23, 32) Dili ba kini ang imong laoman gikan sa usa ka Diyos sa gugma?
Ang Isyu sa Pagkasoberano
Sa pagseguro sa hingpit nga pakigdait ug kalinaw, may usa lamang unya ka kagamhanan nga magmando sa tibuok yuta—ang Gingharian sa Diyos. Dili ba ang daghang tawhanong kagamhanan, nga ang tanan naningkamot alang sa ilang kaugalingong hakog nasyonalistikanhong kaayohan, ang nagpahinabog tumang kagubot ug pag-ula sa dugo sa yuta? Kining mga kagamhanana kinahanglang wagtangon aron paghatag ug dapit sa matarong nga pagmando sa Gingharian sa Diyos ilalom ni Kristo. (Daniel 2:44) Nagaampo ka alang nianang langitnong kagamhanan dihang imong sublion ang sulundang pag-ampo nga gihatag ni Jesus sa iyang mga disipulo: “Umanhi ang imong gingharian. Matuman ang imong kabubut-on, ingon nga natuman sa langit, mao usab sa yuta.”—Mateo 6:10.
Apan unsang kagamhanana ang imong nasayrang andam mosurender sa iyang gahom ug magpailalom sa bug-os sa Gingharian sa Diyos? Dili ba ang mga kagamhanan mopalabi sa paghawid nga hugot sa ilang kaugalingong gahom, nga kanunay mangita sa pagpadako sa ilang dominyo sa impluwensiya ingong pagsukol sa natukod nga Gingharian sa Diyos? (Salmo 2:1-9) May bisan unsa bang timailhan nga luwatan sa kanasoran ang ilang mga pagmando ngadto sa Diyos ug kang Kristo? Ang pagkadili-epektibo sa organisasyong Hiniusang Kanasoran ingong instrumento alang sa pakigdait sa kalibotan nagapakita sa pagkadili-andam sa kanasoran nga moirog kon bahin na sa mahakogong nasodnong intereses ug magpasakop sa usa ka bugtong awtoridad. Ang kanasoran determinadong modumala sa kahikayan sa yuta sa ilang paagi. (Pinadayag 17:13, 14; 19:19) Busa ang gubat sa Armageddon pagabugnoon sa pagtapos niining maong pagkatabla ug husayon ang isyu sa walay kataposan kon kinsa ang may katungod sa pagmando sa yuta.
Pagtagana sa mga Panginahanglan sa Tawo
Ang mga lihok ni Jehova sa Armageddon mao unyay uban ang labing dakong kaayohan sa katawhan sa kaisipan. Palandonga. Unsay imong bation bahin sa mga kahimtang karon sa kalibotan? Gusto ba nimo nga ingon niana kana? Gibati mo ba ang kasegurohan sa dihang anaa ang hulga sa nukleyar nga kalaglagan? Mangurog ka ba sa pagkakitang nagauswag ang kapintasan, nga ang kaugalingon nimong silinganan nagakahimong dili luwas? Nahadlok ka ba alang sa imong mga anak ug sa ilang kaugmaon? Unsang kahupayan ang imong nakita? May kagamhanan ba nga sukad nagpakitang kini makahatag ug pakigdait ug kauswagan sa tanang tawo? May nakaarang ba sukad sa paghanaw sa sakit ug kamatayon gikan sa yuta? Hinunoa, dili ba ang mga kahimtang sa tibuok kalibotan misamot bisan pa sa teknolohikanhong mga kahimoan sa tawo, ug sa kadaghanan tungod nianang mga kauswagana? Ang matarong lamang nga Gingharian sa Diyos ang bug-os magtagbaw sa mga panginahanglan sa katawhan. Pinaagi lamang niini nga ang tinuod nga pakigdait molungtad sa tibuok yuta. Kinahanglang bugnoon ang gubat sa Armageddon!
Apan komosta man ang pag-antos sa tawo ug kalisdanan nga mosangpot iniglihok sa Diyos sa paghinlo sa yuta? Kini sa kanunay mao ang mga bunga sa gubat. Kana mahitabo lamang sa Armageddon tungod kay ang kanasoran nagakuta sa ilang kaugalingon sa pagsupak sa teokratikanhong pagmando. Determinado silang makig-away ug mosukol. (Salmo 2:2, 3) Dili kana sayop sa Diyos. Siya nagahatag kanila sa nahaigong pasidaan: “Ug karon, O mga hari, patalinghog kamo; dawata ang pasidaan, kamong mga magmamando sa yuta. Alagara ang Ginoo uban ang kahadlok, ug magkalipay sa iyang atubangan; uban ang pagkurog simbaha siya, basin siya masuko ug kamo mangawagtang sa dalan, sa dihang sa kalit mosilaob ang iyang kasuko. Malipayon ang tanang nagadangop diha kaniya!”—Salmo 2:10, 11, The New American Bible.
Karon palandonga. Sama unya sa unsa ang kahimtang sa kalibotan kon ang Diyos molikay sa pagbalda sa pagtul-id sa mga kahikayan sa kalibotan? Dili ba ang mga gubat, kapintasan, ug mga pagdumot mopadayong walay pagkunhod sumala sa nahitabo latas sa kasiglohan sa tawhanong pagmando? Dili ba kana sila misamot pa karon hangtod sa punto nga ang tibuok katawhan nameligro sa makalilisang nukleyar nga pakiggubat ug sa pagkahilo sa radyasyon? Ang Armageddon sa pagkamatuod mao ang labing maayong butang mahitabo sa atong yuta! Kini magatapos sa hakog mahikogong dalan sa kanasoran. Kini maghanaw sa mga sistema nga nagadalag kagul-anan sa katawhan ug maghatag dapit alang sa tinuod matarong bag-ong sistema sa mga butang diin ang tanang ginamag-tawong kasub-anan, kasakit, ug kamatayon sa walay kataposan mahanaw na. Unya ‘ang unang mga butang nangagi na,’ sumala sa saad sa Diyos.—Pinadayag 21:4; 2 Pedro 3:13.
Atong pagahinumdomang ang Diyos tungod sa iyang kaalam ang nasayod kon unsay labing maayo alang sa katawhan ug kon unsay gikinahanglan sa pagkab-ot niana. Bisan ang tawhanong mga kagamhanan nagasugyot ug nagabugno sa gubat aron sa pagtul-id sa mopatim-awng mga inhustisya o makig-away tungod sa ilang giisip nga usa ka hamili nga kawsa. Apan ang Diyos lamang ang may kaalam sa pagbugno sa tinuod matarong nga gubat. Siya lamang ang makabugno sa tinuod mapilion nga gubat diin ang mga tawong matarong ug kasingkasing, bisan kon diin sila sa yuta, pagaluwason. (Mateo 24:40, 41; Pinadayag 7:9, 10, 13-17) Ug Diyos lamang ang may katungod sa pagpahamtang sa iyang pagkasoberano sa tibuok yuta, kay kini maoy iyang linalang. Oo, sa pagwagtang sa tanang timaan sa pagkadaotan sa walay kataposan, pagtapos sa inhustisya, malupigong bakak nga pagsimba, bisan sa hinungdan sa sala, ug bug-os sa pagbalaan sa ngalan sa Diyos—ang Armageddon kinahanglang bugnoon. Ug kini pagabugnoon, tungod kay “ang Diyos gugma!”
[Hulagway sa panid 6, 7]
ARMAGEDDON. . . . . . ang mohatag dalan sa pakigdait