Pagkakita sa “Ilhanan” Uban ang Pagsabot

“Samtang naglingkod siya sa Bukid sa mga Olibo miduol kaniya ang mga tinun-an nga silasila ra, nga nag-ingon: ‘Tug-ani kami, Kanus-a mahitabo kining mga butanga, ug unsa unya ang ilhanan sa imong presensiya ug sa konklusyon sa sistema sa mga butang?’”—MATEO 24:3.

1. Nganong ang makapauyog-sa-kalibotang mga hitabo sukad 1914 dili sulagma, ug unsay gipangutana sa mga tinun-an ni Jesus kaniya?

ANG makapauyog-sa-kalibotang mga hitabo sukad sa Gubat sa Kalibotan I sa 1914-18 dili sulagma. Sila gitagna 19 ka siglo kanhi ni Jesu-Kristo. Iyang gisuginlan ang iyang mga tinun-an mahitungod sa daghang katingalahang butang nga moabot, ug tungod niana sila nangutana kaniya: “Tug-ani kami, Kanus-a mahitabo kining mga butanga, ug unsa unya ang ilhanan sa imong presensiya ug sa konklusyon sa sistema sa mga butang?”—Mateo 24:3.

2. Nganong ang mga apostoles buot masayod sa labaw pa kay sa kon unsay mahitabo una ang pagkalaglag sa Jerusalem sa 70 K.P.?

² Buot hisayran sa mga apostoles ang labaw pa kay sa kon unsay mahitabo tali niadtong panahona ug sa pagkalaglag sa Jerusalem. Si Jesus wala mobalik nga makita o dili makita niadtong makatalagmanong okasyon. Ni natapos ang sistema sa mga butang nga naglungtad sukad sa Lunop sa pagkalaglag sa Jerusalem sa 70 K.P. Sa pagkamatuod, “ang ilhanan sa presensiya [nga dili makita] ni Jesus ug sa konklusyon sa sistema sa mga butang” nahitakdang mopatim-aw sa dugay pang panahon tapos sa yutan-ong pagkinabuhi sa iyang mga apostoles.

3. (a) Unsay nagapakita nga “kining maayong balita sa gingharian” wala iwali sa mga relihiyon sa Kakristiyanohan panahon sa tapos-apostolikanhong apostasiya? (b) Mapakyas ba ang Gingharian sa Diyos sa dihang mapakyas ang Hiniusang Kanasoran?

³ Pinaagi sa matagnaong mga sambingay mahitungod sa Gingharian sa Diyos, gisultihan ni Jesus ang iyang mga apostoles mahitungod sa relihiyosong rebelyon nga mahitabo tapos sa iyang pagbalik ngadto sa langit ug sa ilang pagkamatay. Sulod nianang tanang panahon sa apostasiya, aduna ba kahay tibuok-kalibotang pagsangyaw “niining maayong balita sa gingharian”? (Mateo 24:14) Tinong dili pinaagi sa mga relihiyon sa Kakristiyanohan, sa dihang niadtong Disyembre 1918 ang Pederal nga Konsilyo sa mga Iglesya ni Kristo sa Amerika nagdayeg sa gisugyot niadto nga Liga sa Kanasoran ingong “ang politikanhong kapahayagan sa Gingharian sa Diyos sa yuta.” Bisan pa niadtong relihiyosong pagduso, hinunoa, ang Liga napakyas sa pagsilaob sa Gubat sa Kalibotan II sa 1939. Apan duyog sa maong kapakyasana, ang matuod nga Gingharian sa Diyos napakyas ba? Wala! Ni mapakyas kini sa dihang ang sumusunod sa Liga, ang Hiniusang Kanasoran, sa dili madugay mapakyas. Hinunoa, ang maong balaang Gingharian magalaglag sa Hiniusang Kanasoran, bisan pag pila tingali ka manulonda ang gikinahanglan sa pagbuhat niini!

4. Nganong ang buluhaton sa pagwali sa Gingharian mahimong bahin sa “ilhanan”?

⁴ Ang tanang nag-unang impormasyon motabang sa pagpaposible sa mas tin-awng pagsabot niining hinungdanong kamatuoran: Maoy tubag sa hangyo alang sa usa ka “ilhanan” nga gisultihan ni Jesus ang iyang mga sumusunod: “Kining maayong balita sa gingharian igawali sa tibuok gipuy-ang yuta alang sa usa ka pamatuod sa tanang nasod; ug unya ang kataposan moabot.” (Mateo 24:14) Kini nagapasabot nga ang maong tibuok-yutang pagsangyaw sa Gingharian mahimong bahin sa daghag-bahin nga “ilhanan” nga magtimaan sa “konklusyon sa sistema sa mga butang.” Kini usab maoy makitang ebidensiya sa dili-makita nga “presensiya” ni Jesu-Kristo. Ang paagi sa paghan-ay ni Jesus sa sunodsunod nga mga hitabo una sa iyang tagna mahitungod sa buluhatong pagsangyaw sa Gingharian maoy talagsaon. Sa bahin siya miingon:

5. Unsa ang pipila ka bahin sa “ilhanan” nga gihisgotan ni Jesus una magtagna sa tibuok-kalibotang pagwali sa Gingharian?

⁵ “Kamo makadungog sa mga gubat ug sa mga dinungogdungog sa gubat; tan-awa nga dili kamo malisang. Kay kining mga butanga kinahanglang mahitabo apan dili pa mao ang kataposan. Kay ang nasod motindog batok sa nasod ug ang gingharian batok sa gingharian, ug aduna unyay mga kanihit sa pagkaon ug mga linog sa usa ka dapit ngadto sa laing dapit. . . . Ug tungod sa pag-uswag sa pagkamalapason ang gugma sa kadaghanan mabugnaw. Apan siya nga nakaantos hangtod sa kataposan mao ang mamaluwas.”—Mateo 24:6-13.

6. Nganong ang mga bahin sa “ilhanan” dili lamang usa ka pagpadayon sa nangaging mga hitabo?

⁶ Tinuod, dihay mga gubat, mga kanihit sa pagkaon, mga linog, ug mga kamatay latas sa kasiglohan sa atong Komung Panahon hangtod 1914. (Lucas 21:11) Bisan pa niana, walay ikatandi sa kon unsay nahitabo sukad natapos ang Hentil nga mga Panahon sa maong halandumong tuig. Ang internasyonal nga away nga katingalahang napukaw sa ting-init sa 1914 midako ngadto sa usa ka militaryong away nga niana 28 ka nasod ang kataposan miapil. Duyog nianang tawhanong kagubot miabot ang kinaiyanhong mga linog. Dihay mga kanihit sa pagkaon, o mga kagutmanan, ug sa kataposang tuig nianang gubat sa kalibotan miabot ang samag-kawatang kamatay nga gitawag trangkaso Espanyola nga naghunos sa mga kinabuhi sa kapin ug 20,000,000 ka tawo. Kadtong tanan dili lamang kay pagpadayon sa nagkahitabo sa nangagi. Kadto ang sinugdan sa sunodsunod nga mga hitabo nga maglangkob sa usa ka “ilhanan” nga kining sistemaha sa mga butang anaa na sa iyang gitagnang “panahon sa kataposan.” (Daniel 12:4) Ang kataposang basahon sa Bibliya—Ang Apocalipsis, o Pinadayag—ang nagatino niini.

7. Nganong ang basahong Pinadayag gitala, ug unsay ipasabot sa daghang butang nga diha niana “gipahayag . . . diha sa mga ilhanan”?

⁷ Si apostol Juan, kinsa nakadawat sa Pinadayag, gisugo sa pagsulat niini alang sa linaing katuyoan. Unsang katuyoana? Kini: “Sa pagpakita sa mga ulipon [sa Diyos] sa mga butang nga mahitabo sa dili madugay.” Ug sa pagkatapos sa Pinadayag ang Ginoong Jesu-Kristo nagaingon: “Oo; ako moanha sa madali.” Niana, si Juan nagatubag: “Amen! Umari ka, Ginoong Jesus.” Sa ingon ang daghang butang nga “gihatag . . . diha sa mga ilhanan,” sa pagpakita niana sa kasaysayan, magpasabot nga kita nagapuyo na sa “panahon sa kataposan” niining sistema sa mga butang. (Pinadayag 1:1; 22:20) Oo, kana sila makatabang kanato sa pagkakita sa daghag-bahin nga “ilhanan” uban ang pagsabot.

8. Kinsa ang magkakabayo sa “maputing kabayo,” ug kanus-a siya hatagi sa Diyos ug awtoridad sa paglihok batok sa iyang mga kaaway?

⁸ Sa Pinadayag kapitulo 6 makita ang asoy sa gitawag nga pagsakay sa “upat ka magkakabayo sa Apocalipsis.” Ang unang magpakita mao ang magkakabayo sa “usa ka maputing kabayo,” ang hinimayang Jesu-Kristo, nga magasakay sa pagpakiggubat batok sa iyang mga kaaway. Siya giawtorisahan sa Diyos sa pagbuhat niini sa pagkatapos sa Hentil nga mga Panahon, sa dihang ang mga kaaway ni Jesus sa langit ug sa yuta angay magpasakop na sa iyang pagmando.—Salmo 2:1-12.

9. Unsay gihulagwayan sa magkakabayo sa (a) “mapulang” kabayo? (b) sa “maitom nga kabayo”? (c) sa “luspad nga kabayo”?

⁹ Ang magkakabayo sa “pulang” ikaduhang kabayo naghulagway sa internasyonal nga gubat, kay ang usa ka militaryong hinagiban, “usa ka dakong pinuti,” gihatag man kaniya. Sa ikatulong kabayo, “usa ka maitom nga kabayo,” mao ang usa ka magkakabayo nga naghulagway sa kanihit sa pagkaon. Sa unsang paagi atong nasayran kini? Tungod kay siya nagdalag timbangan aron pinaagi niana timbangon ang mga suplay sa pagkaon sa mahal nga mga prisyo. Ang ikaupat nga magkakabayo, nga nagsakay sa usa ka masakiton tan-awong “luspad nga kabayo,” naghulagway sa kamatay, kay ang talaan nagaingon: “Ang usang nagsakay niana may ngalan nga Kamatayon. Ug ang Hades [ang lubnganan] nagsunod niana.” Matuod, ang maong ikaupat nga magkakabayo gihatagag pagbulot-an sa “pagpatay pinaagi sa usa ka hataas nga pinuti” sa gubat “ug pinaagi sa kanihit sa pagkaon . . . ug pinaagi sa mabangis nga mga hayop sa yuta.” Hinuon, mamatikdang siya, usab, gihatagag pagbulot-an sa paghimog mga biktima alang sa lubnganan (Hades) pinaagi sa “makapatay nga hampak.”—Pinadayag 6:1-8.

10. Unsay mahitabo tapos sa pagbukas sa ikalima ug ikaunom nga timri, ug unsay pagaadmitihon sa mga molupyo sa yuta?

¹⁰ Tapos makita ni apostol Juan ang maong mga panan-awon sa mga bahin nga magtimaan sa “konklusyon sa sistema sa mga butang,” iyang nakita ang pagbukas sa ikalima ug ikaunom nga mga timri sa matagnaong linukot. Nianang puntoha, iyang nakita ang panan-awon sa makalilisang kinaiyanhong mga hitabo, nga sugod sa “usa ka dakong linog.” Sa kataposan, ang mga molupyo sa yuta napugos sa pag-admitir: “Ang dakong adlaw sa ilang kapungot [ang iya ni Jehova nga Diyos ug kang Jesu-Kristo] miabot na.” Ang pagkatapos nianang simbolikong adlaw sa kapungot magpasabot nga ang kalaglagan sa kataposan miabot na alang sa mga tigpaluyo niining kalibotana.—Pinadayag 6:9-17.

Pagtigom Niadtong Giuyonan Alang sa Kaluwasan

11. Unsang ilustrasyon ang gigamit ni Jesus sa pagpakita sa pagkatino sa iyang gitagna mahitungod sa iyang “presensiya” ug sa “konklusyon sa sistema sa mga butang”?

¹¹ Sa paghatag sa “ilhanan” sa iyang “presensiya ug sa konklusyon sa sistema sa mga butang,” si Jesus miingon: “Karon kuhaig pagtulon-an ang kahoy nga igira ingon nga ilustrasyon niining puntoha: Inigpanglumoy sa iyang bag-ong mga sanga ug kini manalingsing, inyong hisayrang haduol na ang ting-init. Susama usab kaninyo, inigkakita ninyo niining tanang butang, hibaloi nga siya anaa na sa mga pultahan. Sa pagkamatuod ako magaingon kaninyo nga kining kaliwatana dili gayod moagi hangtod mahitabo kining tanang butang. Ang langit ug ang yuta mahanaw, apan ang akong mga pulong dili gayod mahanaw.”—Mateo 24:32-35.

12, 13. (a) Unsay wala ipasabot sa Hudiyonhong nasodnong katalagman sa 70 K.P.? (b) Ang maong katalagman maoy usa ka matagnaong tipo sa unsa? (c) Busa, unsay gipadayon sa pagtagna ni Jesus mahitungod sa iyang pag-anhi?

¹² Sa gilaglag sa mga Romano ang Jerusalem ug ang templo niini sa 70 K.P. sumala sa gitagna ni Jesus, kining makalilisang nga kasakitan sa mga Hudiyo wala magpasabot nga siya miabot na sa ikaduhang panahon ug nga nagsugod na ang iyang dili-makitang presensiya. (Mateo 24:15-21) Sanglit ang Bibliya nagagamit sa karaang Jerusalem ingong usa ka tipo, ang maong makalilisang nga katalagman sa 70 K.P. mao gayoy usa ka matagnaong tipo. Kadto naghulagway sa gamay nga paagi kon unsay mahitabo sa tibuok kalibotan pagkatapos sa Hentil nga mga Panahon sa 1914 ug busa pagkatapos sa pagsugod ni Jesus sa iyang dili-makitang presensiya. Kana ang hinungdan si Jesus miingon usab:

¹³ “Sa gilayon tapos sa kasakitan nianang mga adlawa ang adlaw mongitngit, ug ang bulan dili mohatag sa iyang kahayag, ug ang mga bituon mangataktak gikan sa langit, ug ang mga gahom sa mga langit pagauyogon. Ug unya ang ilhanan sa Anak sa tawo motungha sa langit, ug ang tanang banay sa yuta magapukpok sa ilang mga dughan sa kaguol, ug ilang makita ang Anak sa tawo nga moabot diha sa mga panganod sa langit uban ang gahom ug dakong himaya. Ug iyang igapadala ang iyang mga manulonda uban ang kusog nga tingog sa trompeta, ug ilang pagatigomon ang iyang mga pinili gikan sa upat ka hangin, gikan sa usa ka tumoy sa mga langit ngadto sa laing tumoy.”—Mateo 24:29-31.

14. Unsang tugon ug halad ang gitumong sa Salmo 50:5?

¹⁴ Ang gitagnang pagtigom nianang “mga pinili” panahon sa konklusyon niining sistema sa mga butang maoy katumanan sa sugo sa Diyos: “Tigoma ngari kanako ang akong mga maunongon, kadtong mihimo sa akong tugon ibabaw sa halad.” (Salmo 50:5) Sanglit si Jehova nagatawag niini “akong tugon,” kini dili mahimong usa ka pagpahinungod nga himoon sa indibiduwal ngadto sa Diyos inigkahimong Kristohanon ug nga iyang ikapatuman pinaagi sa pagsakripisyo sa iyang kaugalingon. Dili, kining tugona nga gihimo tali ni Jehova ug sa “mga maunongon” mao ang gisaad sa Diyos nga “bag-ong tugon” uban sa balay sa espirituwal nga Israel. Ang halad nga ibabaw niana gipasukad ang bag-ong tugon mao ang halad-lukat sa “Anak sa tawo,” si Jesu-Kristo.—Jeremias 31:31-34; Mateo 24:30.

15. Kinsa ang “mga maunongon,” ug sila karon nagaalagad nga unsa alang sa kalibotan?

¹⁵ Ang “mga maunongon” nga gidala sa bag-ong tugon gihimong espirituwal nga mga Israelinhon. (Lucas 22:19, 20) Gibaod sa Diyos nga mahitabo ang pagpanigom aron siya makasusi niadtong natigom, makauyon sa maunongon ug makasalikway niadtong wala magkinabuhi sumala sa ilang mga pangangkong anaa sila sa iyang tugon, ang bag-ong tugon. (Salmo 50:16) Sukad sa Gubat sa Kalibotan I, ang ebidensiya mao nga ang Kakristiyanohan, nga nagaangkong anaa sa bag-ong tugon, wala makapamatuod nga dalawaton kang Jehova nga Diyos. Sa dakong kasukwahi nagabarog ang gamayng nahibilin sa tinuod nagpahinungod, bawtismadong mga tinun-an sa Tigpataliwala sa bag-ong tugon, si Jesu-Kristo. Ilang gipamatud-an nga sila mao ang espirituwal nga mga Israelinhon. Kining maunongon nga mga tigpaluyo sa bag-ong tugon mao ang “mga pinili” si kinsa gitigom sa Anak sa tawo nganha kaniya pinaagi sa iyang mga manulonda. Ilang ginatuman ang mga obligasyon sa bag-ong tugon, ang “akong tugon,” sumala sa pagtawag sa Diyos niana. Tungod sa ilang kalihokan sa pagpaluyo sa Gingharian sa Diyos pinaagi ni Jesu-Kristo, sila nahimong usa ka ‘ilhanan’ sa tibuok kalibotan.—Isaias 8:18; Hebreohanon 2:13, 14.

16. (a) Kanus-a nga may espirituwal nga pagkanahigmata alang sa nahibilin sa “mga maunongon”? (b) Sa sambingay sa napulo ka ulay, kinsa ang Pamanhonon, ug kinsay naglangkob sa iyang simbolikong pangasaw-onon?

¹⁶ Alang nianang nahibilin sa “mga maunongon,” kinahanglang adunay espirituwal nga pagkanahigmata sulod sa sayong bahin sa “konklusyon sa sistema sa mga butang.” Kadto usa ka talagsaong bahin sa “ilhanan” nga gitagna ni Jesus diha sa iyang dakong tagna. Alang sa nahibilin, ang panahon sa pagkanahigmata maoy panahon sa dakong kalipay, usa ka kalipay nga sama sa iya sa lima ka maalamong ulay nga nakamata sa singgit sa tungang gabii: “Ania na ang pamanhonon! Lakaw na kamo sa pagtagbo kaniya.” (Mateo 25:1-6) Ang maong malipayong pagkanahigmata nahitabo sa tingpamulak sa 1919, sa dihang sugod naulian ang dinihogang nahibilin gikan sa mga epekto sa tibuok-kalibotang paglutos ug pagbalda nga ilang naagoman panahon sa mangiob nga yugto sa Gubat sa Kalibotan I. Siempre, ang Pamanhonon sa sambingay sa napulo ka ulay mao si Jesu-Kristo, ug ang iyang simbolikong pangasaw-onon mao ang iyang maunongong kongregasyon nga may 144,000 ka membro nga mahiuban kaniya sa langitnong Gingharian. (Pinadayag 14:1-4) Ang kronolohiya sa Bibliya ug ang modernong mga katumbas nagapaila nga ang Pamanhonon nga Hari miabot sa espirituwal nga templo sa tingpamulak sa 1918. Unya iyang gisugdan pagbanhaw gikan sa mga patay ang matinumanong mga membro sa espirituwal nga pangasaw-onon ug paghiusa kanila alang sa iyang kaugalingon sa langitnong Gingharian. Ingong kapahayagan sa nahibilin sa pangasaw-onon, nga gihulagwayan sa maalamong mga ulay, ang Pinadayag 19:7 nagaingon: “Magkalipay kita ug magmasadyaon, ug atong ihatag kaniya ang himaya, tungod kay miabot na ang kaminyoon sa Kordero ug ang iyang pangasaw-onon nag-andam na sa iyang kaugalingon.”

17. (a) Nganong mahimong maglipay ang ‘maalamong ulay’ nga matang? (b) Ang maalamong mga ulay nagdala sa unsa, ug busa makabuhat sila sa unsa?

¹⁷ Oo, ang panahon sa espirituwal nga pagkanahigmata sa ‘maalamong ulay’ nga matang ug ang ilang pagkasabot sa kahulogan sa “ilhanan” nga misugod pagpakita sa 1914 maoy okasyon alang sa dakong pagkasadya. Unya mapadapat kanila ang mga pulong: “Malipayon kadtong gidapit sa panihapon sa kagabhion sa kaminyoon sa Kordero.” (Pinadayag 19:9) Sa sambingay ni Jesus, ang lima ka maalamong ulay nagdalag reserbang lana aron makadagkot pag-usab sa ilang mga lamparahan ug sa ingon makakuyog sa malipayong prosisyon sa kaminyoon nga may dinagkotang mga lamparahan. Sa pag-abot sa pamanhonon, ang “mga ulay nga nakaandam misulod uban kaniya ngadto sa kombira sa kasal; ug gitak-opan ang pultahan.”—Mateo 25:1-10.

18. (a) Tapos sa Gubat sa Kalibotan I, ang dinihogang nahibilin sa gihapon nakabaton sa igong makapalamdag nga Pulong sa Diyos ug sa iyang balaang espiritu sa ilang kaugalingon sa pagbuhat sa unsa? (b) Unsay gianunsiyo sa ilang unang tapos-gubat nga kombensiyon?

¹⁸ Katumanan sa hulagway sa lima ka maalamong ulay, ang dinihogang nahibilin mihatag sa madan-agon ug malipayong pag-abiabi sa langitnong Pamanhonon, kansang panahon sa kaminyoon ngadto sa iyang pangasaw-onong kongregasyon miabot na. Tapos sa ilang makapasamok sa espirituwal nga mga kasinatian panahon sa Gubat sa Kalibotan I, sila nakabaton pag igong makapalamdag nga Pulong sa Diyos ug sa iyang balaang espiritu sulod sa ilang kaugalingon ingong “mga sudlanang kolonon” sa pagpasiga na usab sa ilang buluhaton sa paglamdag sa katawhan mahitungod sa Gingharian sa Diyos pinaagi sa iyang Pamanhonon-Hari. (2 Corinto 4:7) Sumala niana, sa Septiyembre 1-8, 1919, ang ‘maalamong ulay’ nga matang mihimo sa ilang unang internasyonal nga kombensiyon sa Cedar Point, Ohio. Didto gianunsiyo ang gisugyot nga pagpatik sa bag-ong magasin dugang sa The Watch Tower. Ang maong bag-ong magasin pagatawgong The Golden Age, usa ka ngalang mabatbaton sa matang sa panahon nga tagamtamon sa napasig-uling katawhan sulod sa Usa ka Libong Tuig nga Pagmando sa Pamanhonon-Hari nga si Jesu-Kristo. Kanang magasina ginapatik gihapon, nga karon ilalom sa ngalang Pagmata!

19. (a) Sa unsang paagi ang ‘maalamong ulay’ nga matang nahimong usa ka talagsaong bahin sa “ilhanan” sa “presensiya” ni Jesus? (b) Kinsa karon ang mga malipayon sa yuta?

¹⁹ Pagkatapos gayod niadtong kombensiyona, ang unang isyu sa The Golden Age—ang isyu sa Oktubre 1, 1919—gipatik. Uban nianang magasina ug sa ubang basahon sa Watch Tower Bible and Tract Society, ang maunongong ‘ulayng matang’ nanglakaw alang sa ilang misyon nga mao ang paglamdag sa kalibotan. Gilansad nila ang tapos-gubat nga buluhaton sa ‘pagwali niining maayong balita sa gingharian alang sa usa ka pamatuod sa tanang nasod’ una moabot ang kataposan niining sistemaha sa mga butang. (Mateo 24:14) Sa maong paagi ang dinihogang nahibilin, ang ‘maalamong ulay’ nga matang, nahimong usa ka talagsaong bahin sa daghag-bahing “ilhanan” nga nagtimaan sa dili-makitang “presensiya” ni Jesus ingong gihatagag-gahom nga Hari ug sa “konklusyon sa sistema sa mga butang.” Ang maong makapalamdag nga buluhaton maoy dugang bug-at nga pamatuod nga ang “panahon sa kataposan” misugod sa pagkatapos sa Hentil nga mga Panahon sa 1914. Malipayon ang tanan si kinsa uban ang pagsabot nakakita niining gitagnang bahin sa “ilhanan” diha sa bug-os nga kahulogan niini!

Unsay Imong Tubag?

◻ Ang buluhaton sa pagwali sa Gingharian maoy usa ka bahin sa unsa?

◻ Kinsa o unsay gihulagwayan sa magkakabayo sa maputing kabayo; sa mapulang kabayo; sa maitom nga kabayo; sa luspad nga kabayo?

◻ Ang Hudiyonhong nasodnong katalagman sa 70 K.P. maoy matagnaong tipo sa unsa?

◻ Kinsay naglangkob sa ‘maalamong ulay’ nga matang, ug nganong sila mahimong magkalipay?

[Hulagway sa panid 14]

‘Tug-ani kami, unsa unya ang ilhanan sa imong presensiya?’