Kapitulo 6
Pagtukaw sa Panahon sa “Konklusyon sa Sistema sa mga Butang”
KITA ania na sa hinapos sa “konklusyon sa sistema sa mga butang,” apan kita “wala mahibalo sa adlaw o sa takna” dihang matapos ang panahon sa moluwas-sa-kinabuhing paglamdag. Kana ang hinungdan nga si Jesus miingon: “Busa, magpadayon sa pagtukaw tungod kay kamo wala mahibalo sa adlaw o sa takna.”—Mateo 24:3; 25:13.
2 Makapahiubos gayod kaayo alang sa usa ka tawo kon siya malangan sa pag-abot sa dapit sa kombira sa kasal ug hikaplagan nga gitakpan na ang pultahan. Apan kana gayod ang mahitabo sa kinabag-an sa nag-angkong mga Kristohanon sa duol na kaayo. Ang “Prinsipe sa Pakigdait” nag-ilustrar niini pinaagi niining mga pulonga: “Tapos niadto ang ubang mga ulay miabot usab, nga miingon, ‘Senyor, senyor, ablihi kami!’ Sa pagtubag siya miingon, ‘Sultihan ko kamo sa tinuod, wala ko kamo hiilhi.’”—Mateo 25:11, 12.
3 Sukad 1919 ang espirituwal nga paglamdag pinaagi sa mga maalamon uban sa tabang sa “lana” sa Pulong ug balaang espiritu ni Jehova anaa na, apan ang mga buangbuang nagasulay sa pagpalit ug espirituwal nga lana gikan niadtong anaa sa Kakristiyanohan ang hustong matang sa lana. Sila wala makataganag kalamdagan bahin sa presensiya ni Jesu-Kristo ingong langitnong Pamanhonon. Ilang ginadahom nga inigkamatay nila sila moadto dayon sa langit ug sugaton siya, nga walay pagpakig-ambit sa buluhaton sa paglamdag sa panahon niining “konkulsyon sa sistema sa mga butang.”
4 Sa laing bahin, anaa kadtong si kinsa, samag espirituwal nga mga ulay, nakapamatuod ng may reserba sa “lana” sa balaang espiritu ug sa Pulong sa Diyos alang sa human-gubat nga buluhaton sa tibuok-kalibotang paglamdag mahitungod sa “gingharian.” (Mateo 24:14) Kadtong gihulagwayan sa sambingay ni Jesus ingong buangbuang nga mga ulay wala makig-ambit niini pinaagi sa pagpadanag sa kahayag bahin niining maayong balita nga bililhon sa tanang nasod. Sila walay “lana” sa makapalamdag nga Pulong sa Diyos ug sa iyang balaang espiritu, ug ang Pamanhonon nga Maghuhukom sa espirituwal nga templo nakasabot sa maong kapakyasan sa ilang bahin. Ang ilang mga kasingkasing wala diha sa tapos-gubat nga buluhaton nga gihimo gilayon sa 1919 sa Kristohanong mga ulay nga maalamon sa pagsabot sa pahahon ug sa buluhaton.
5 Sa pagbulag niadtong nagpaluyo sa makitang organisasyon ni Jehova, ang mga buangbuang wala makaapil sa tibuok-kalibotang pagsangyaw bahin sa Gingharian. Sa kataposan nabatonan nila ang “lana” sa relihiyosong kalamdagan, apan kadto dili mao ang hustong matang sa lana. Kadto wala motaganag kalamdagan alang sa hustong hitabo sa hustong panahon. Busa sila wala magsangyaw sa mensahe sa Gingharian ug sa “adlaw sa panimalos sa bahin sa atong Diyos.” (Isaias 61:1-3) Sila wala magdayeg as Pamanhonong Hari sama sa ginabuhat sa dinihogang nahibilin s mga ulay nga matang.
Epekto sa Kahayag sa Lamparahan sa Tungang Gabii
6 Sa tunga sa katuigang 1930, nahitabo ang butang talagsaon. Ang butang nahitabo nagpaila nga nakompleto na ang mga membro sa espirituwal nga pangasaw-onon ni Kristo, nga diha na sa yuta ang igong inanak-sa-espiritung mga tinun-an sa Pamanhonon aron maglangkob sa bug-os nga gidaghanon sa iyang langitnong pangasaw-onon.
7 Niadtong panahona, sa 1935, gisugdan ang pag-awhag sa pagtagad sa laing matang sa samag-karnerong mga tinun-an ni Jesus. Kadto ang matang nga giawhag sa pagtagad sa publiko sa panahon sa unang gubat sa kalibotan. Maoy niadtong Pebrero 24, 1918 nga ang usa ka pakigpulong sa ulohang “Minilyong Buhi Karon Mahimong Dili na Gayod Mamatay” gipahayag sa natingala, lagmit punog-pagduhaduhang mamiminaw. Sa 1935 nga kombensiyon sa mga Saksi ni Jehova sa Washington, D.C., ang butang positibo gipailaila manitungod sa pagtigom sa maong minilyong “ubang mga karnero” ni Kristo ngadto sa nahiusang “panon” sa ilalom ni Jesu-Kristo ingong ang “usa ka magbalantay.” (Juan 10:16) Gipaila ang ilhanan niining bahin sa “ubang mga karnero” sumala sa gitagna sa Pinadayag 7:9-17.
8 Ang nahibilin sa “gamay nga panon” sa maong panahon naobligar sa pagsugod sa pagtigom sa maong “dakong panon” sa “ubang mga karnero.” (Lucas 12:32) Kadto tungod kay ang gidaghanon sa maalamong mga ulay nga gikinahanglan sa pagkompleto sa pangasaw-onon ni Jesus sa maong panahon nabug-os na. Apan ang maong mga ulay wala dayon dad-a sa langit. Kinahanglan pang sila pasudlon nianang langitnong lawak sa kombira dihang ilang matapos ang ilang yutan-ong kinabuhi ingong nagahupot-sa-integredad nga mga saksi sa ilang Diyos, si Jehova. Tungod sa ilang matinumanong buluhaton sa paglamdag hangtod sa 1935, sila gipasulod sa usa ka linaing pribilehiyo nga wala gayod nila dahoma una pa sa tungatunga sa katuigang 1930.
9 Kapin sa tunga sa siglo na ang milabay sukad 1935, ug sulod nianang mga tuiga ang gidaghanon sa mga maalamon sa mga ulay nga matang nag-us-os. Sa laing bahin, ang buluhatong pagsangyaw nakakaylap sa tibuok kalibotan, oo, nga nagaapil sa kapin sa 200 ka linaing kayutaan. Sa pagkakaron, ang mga ulay nga matang mius-os ngadto sa mga 9,000 sa gidaghanon.
Matinabangong mga Kauban sa mga Magdadala sa Kahayag
10 Ang dinihogang nahibilin sa masambingayong mga ulay halos nagigawas na sa hulagway tungod sa kapin sa tulo ka milyong magmamantala sa Gingharian diha sa kapin sa 49,000 ka kongregasyon sa mga Saksi ni Jehova sa tibuok yuta. Sa unsang paagi ang diyutay nga dinihogang nagibilin nakaatiman sa buluhatong pagsangyaw sa kapin sa 200 ka kayutaan diin nahimutang ang maong linibong kongregasyon? Sila dili makaatiman.
11 Hinuon, sila sa Kasulatanhon nagaalagad sa gitagnang katungdanan sa pagka “matinumanon ug maalamong mga ulipon” si kinsa hikaplagang matinumanon sa Pamanhonon nga Agalon sa iyang pag-abot sa templo alang sa paghukom. Maoy niadtong panahona nga misugod pagkahitabo ang pagbahinbahin tali sa maalamong mga ulay ug sa buangbuang nga mga ulay sa masambingayong mga ulay nga matang. Kadtong giisip nga “kadtong daotang ulipon” nga matang walay lana sa makapalamdag nga Pulong sa Diyos ug sa iyang balaang espiritu diha sa ilang mga prasko sa pagpasiga sa ilang mga lamparahan. Busa sila walay igong espirituwal nga kahayag sa pagsabot sa “dakong panon” sa “ubang mga karnero,” nga ginatigom na sukad 1935 ingong bahin sa “usa ka panon.”—Mateo 24:45-51.
12 Sukad sa Gubat sa Kalibotan II, ang pagkatuman sa tagna ni Jesus alang sa “konklusyon sa sistema sa mga butang” maoy tungod ilabina sa papel nga ginatuman sa “dakong panon” sa “ubang mga kernero.” Ang kahayag gikan sa dinagkotang mga lamparahan sa nahibilin nagpadan-ag sa mga mata sa ilang mga kasingkasing, ug sila natabangan sa pagbanaag sa kahayag ngadto sa uban nga ngapabiloin pa sa kangitngitan niining kalibotana. (Itandi ang Efeso 1:18.) Sila nakatabang sa minilyong molupyo niining yutaa sa pagsabot sa presensiya sa Pamanhonong Hari samtang nagakahiduol ang iyang kaninyoon ngadto sa kompletong pangasaw-onong matang. Sial nahimong dili-mobulag nga mga kauban sa nahibilin sa pangasaw-onong matang.
13 Sukad 1935 ang kahimtang sa maong mga kauban sa nahibilin sa pangasaw-onong matang maoy malipayon. Sila nagakalipay dili lamang tungod sa dagkong mga pribilehiyo nga nabatonan sa nahibilin kondili tungod usab sa bulahang mga pribilehiyo nga niana sila gidala pinaagi sa nahibilin sa pangasaw-onong matang.
14 Ang usa ka talagsaong teksto gipasabot sa katawhan ni Jehova sa Washington, D.C., nga kombensiyon sa 1935, ug kadto mitagna sa makapalipayng kahimtang alang sa “dakong panon,” ang mga kauban sa mga dinihogan. Tan-awa sila didto, “nagatindog atubangan sa trono [ni Jehova nga Diyos] ug atubangan sa Kordero, nga nagsul-ob sa maputing mga biste; ug adunay mga sanga sa palmera sa ilang mga kamot”! Pamatia kon unsay ilang kusog nga ginapatugbaw aron mabatian sa katilingban: “Ang kaluwasan utang namo sa among Diyos, nga nagalingkod sa trono, ug sa Kordero”! (Pinadayag 7:9, 10) Sila nagtuo na sa “Kordero sa Diyos nga nagakuha sa sala sa kalibotan,” ug pinaagi kaniya ilang gipahinungod ang ilang kaugalingon kang Jehova nga Diyos ug nabawtismohan ingong simbolo sa maong pagpahinungod. (Juan 1:29) Aw, 840 kanila nabawtismohan sa pagkaugma tapos madungog ang katin-awan sa Pinadayag 7:9-17 sa Biyernes, Mayo 31, 1935.
15 Kapin sa tulo ka milyon ang nagbuhat sa sama sukad niadtong kombensiyon sa Washington niadtong 1935. Sa ingon sila gihulagway ingong nagsul-ob sa maputing mga biste tungod kay gilabhan kana sa makapahinlong dugo sa Kordero. Ug sila may kalaoman nga makagula sa dakong kasakitan nga anaa sa unahan alang sa tibuok katawhan sa kalibotan, tungod kay may balaang panalipod latas gayod nianang kasakitana. (Mateo 24:21, 22) Busa, sila gihulagway ingong anaa sa espirituwal nga templo ni Jehova ug didto nagasimba kaniya uban sa nahibilin sa mga ulay nga matang.—Pinadayag 7:14-17
16 Busa, daghang salamat sa internasyonal, daghag-pinulongang “dakong panon” tungod sa ilang dako kaayong bahin sa pagtuman sa tagna sa Pamanhonon sa Mateo 24:14!
“Ug ang Pultahan Gitakpan”
17 Wala hisayri sa tukma kon kanus-a ang nahibilin sa mga ulay nga matang nakasulod sa masadyaong seremonya sa kasal, ug unya gitakpan ang pultahan. Apan kini tinong mas duol na kay sukad masukad, ug ang panahon talitapos na! Nan, nahiangay nga gitapos ni Jesus ang sambingay sa mga ulay uban ang mga pulong pahimatngon: “Busa, magpadayon sa pagtukaw tungod kay kamo wala mahibalo sa adlaw o sa takna.—Mateo 25:13.
18 Tungod niini ang buangbuang nga mga ulay wala makabantay. Tungod sa ilang pagbulag sa maalamong mga ulay, sila nahimong bahin niining hinukman-sa-kalaglagang kalibotan ug nagaklasipikar sa ilang kaugalingon nga uban sa tanang ubang relihiyonista nga atua sa nagkabagang kangitngitan sa tibuok yuta. Sa ingon sila tinong makaagom sa gihulagway sa Pamanhonong si Jesu-Kristo niining mga pulonga sa sambingay: “Tapos niadto ang ubang mga ulay miabot usab, nga miingon, ‘Senyor, senyor, ablihi kami!’ Ingong tubag siya miingon, ‘Sultihan ko kamo sa tinuod, wala ko kamo hiilhi.’”—Mateo 25:10-12.
19 Busa ang pultahan ngadto sa kombira dili ablihan alang niadtong buangbuang nga mga ulay. Sila nagahulagway pag-ayo niadtong si kinsa sa panahon sa “konklusyon sa sistema sa mga butang” mapakyas sa pagsulod sa “gingharian sa mga langit.” (Mateo 24:3; 25:1) Tungod sa pagpabilin sa ilang piniling matang sa relihiyon, sumala sa gipaila sa ilang pag-adto sa tiyanggihan aron sa pagpalit ug laing lana, sila giklasipikar nga uban sa Dakong Babilonya.
20 Busa, dihang ang simbolikong “mapintas nga mananap,” nga gisakyan sa relihiyosong bigaon, mosungag kaniya pinaagi sa “napulo ka sungay” niini, ilang maambitan ang iyang dulnganan. (Pinadayag 17:16) Inigkakita sa maong mga relihiyonista, nga gihulagwayan sa lima ka buangbuang nga ulay, sa maong sinugdanan sa pagsalikway sa gamhanang mga puwersa sa politikanhong elemento sa Babilonyanhong relihiyon, modangop sila ngadto sa Pamanhonong Hari, nga moangkong sila iya sa “gingharian sa mga langit” nga matang ug takos pasudlon sa espirituwal nga kasadyaan sa kasal uban sa maalamong mga ulay. Nga makapakurat, ang usang ilang tawgong “Senyor,” ang Pamanhonong si Jesu-Kristo, modumili sa pag-ila kanila ingong takos pasudlon sa langitnong Gingharian. Ug sila wala makaambit sa bisan unsang paglaom sa kinabuhing dayon sa yuta duyog sa “dakong panon.” Busa walay laing mahibilin alang niining buangbuang nga mga relihiyonista kondili ang kalaglagan duyog sa imperyo sa kalibotan sa bakak nga relihiyon, ang Dakong Babilonya!
21 Makalilisang gayod nga palaaboton alang kanila! Kay nahibalo niini, ang nahibilin ug ang kapid-an sa ilang mga kauban sa kanunay mamati sa tambag ni Jesus nga “magpadayon sa pagtukaw.” Sila sa kanunay mapuno sa balaang espiritu sa Diyos ug magpasidlak sa kahayag nga walay kahadlok sa himaya ni Jehova nga Diyos ug kang Jesu-Kristo. Ingong ganti, ang pagkamalipayon mao ang ilang tinong bahin! Ug ang prinsipinhong mga katungdanan diha sa “bag-ong yuta” nagapaabot sa mga sakop sa “dakong panon,” nga igatudlo sa kinasal nga Pamanhonong Hari.—Isaias 32:1; itandi ang Salmo 45:16.
22 Busa kining gipadakong katumanan sa sambingay sa napulo ka ulay nagasilbing usa ka pamatuod sa kamatuoran nga kita nagapuyo sa “konklusyon sa sistema sa mga butang.” Mapasalamaton gayod kita nga kita nalamdagan mao nga makakita sa maong ebidensiya sa pagkaduol na sa kasal ni Jesu-Kristo ngadto sa iyang kompletong pangasaw-onong matang! Mahitungod sa maong langitnong kasal, ang langit ug ang matarong “bag-ong yuta” magkalipay sa dili-ikabatbat nga kalipay.—Pinadayag 19:6-9.
[Mga Pangutana nga Pagatun-an]
1. Nganong kinahanglan kita kanunay magtukaw?
2. Unsang makapahiubos nga kasinatian ang pagalikayan?
3. (a) Ang tuig 1919 napamatud-ang panahon alang sa unsa? (b) Ang mga relihiyonista ba sa Kakristiyanohan nakatagana sa gikinahanglang espirituwal nga lana?
4. Hangtod karong petsaha, napakyas sa pagbuhat sa unsa kadtong gihulagwayan sa buangbuang nga mga ulay, ug ngano?
5. Sa unsa ang buangbuang nga mga ulay napakyas sa pagpakigbahin nga kinahanglanon aron mahiusa sa Pamanhonong Hari?
6, 7. (a) Unsay nahitabo sa tungatunga sa katuigang 1930 nga nagpailang may igong mga ulay sa pagkompleto sa mga membro sa pangasaw-onong matang? (b) Ang pagtagad giawhag sa unsang matang nga sa maong panahon kinahanglang matigom na?
8. Unsang obligasyon ang nabatonan sa maalamong mga ulay sa 1935, nga wala nila dahoma?
9. Sa pagkaakron pila na lang ang gidaghanon sa mga nahibilin sa maalamong mga ulay?
10. Tungod sa pagkadako sa buluhaton, ang nahibilin sa maalamong mga ulay nakakab-ot ba sa panginahanglang sa mga magbubuhat?
11. (a) Ang pagkaila sa “matinumanon ug maalamong ulipon” nagpahinabo sa unsa taliwala niadtong nagaangkong mga ulay? (b) Unsay wala hisabti niadtong iya sa “daotang ulipong” matang tungod sa kakulang ug igong espirituwal nga paglamdag?
12. Kinsay nahimong dili-mabulag nga mga kauban sa nahibilin sa pangasaw-onong matang?
13, 14. (a) Unsang makapahimuot nga kahimtang kon bahin sa mga kauban sa nahibilin ang masambingayong gipaila sa Pinadayag 7:9, 10? (b) Unsa ang dihadihang sanong ngadto sa katin-awan niadtong tagnaa?
15. Sukad niadto, pila ang nabawtismohan, ug sa unsang paagi sila gihulagway sa Pinadayag 7:14-17?
16. Nan, kang kinsa ihatag ang daghang pasalamat tungod sa ilang bahin maylabot sa pagtuman sa Mateo 24:14?
17. (a) Kanus-a takpan ang pultahan sa kombira sa kasal? (b) Unsay kinahanglang buhaton karon sa nahibilin sa mga ulay nga matang ug sa ”dakong panon” sa ilang mga kauban?
18. (a) Ang buangbuang nga mga ulay nailhang uban ni Kinsa karon? (b) Unsang bahin sa sambingay ni Jesus ang ilang masinati sa dili madugay?
19. Busa kinsay gihulagwayan sa buangbuang nga mga ulay, ug nganong sila giklasipikar uban sa Dakong Babilonya?
20. (a) Kanus-a makita sa buangbuang nga mga ulay nga mosugod ang “napulo ka sungay” sa “mapintas nga mananap” sa pagsungag sa Dakong Babilonya, kang kinsa sila modangop ug pinasukad sa unsang pangangkon? (b) Bisan pa niana nganong sila makaagom sa kalaglagan?
21. (a) Tungod sa makahahadlok nga palaaboton, unsay ginapadayon sa pagbuhat sa maalamong mga ulay ug sa ilang mga kauban? (b) Unsang mga pribilehiyo sa pag-alagad ang gilaomang mapahimuslan sa mga membro sa ”dakong panon”?
22. (a) Ang pagkatuman sa sambingay sa mga ulay nagasilbing pamatuod sa unsang kamatuoran? (b) Kinsay magkalipay tungod sa maong kasal sa Pamanhonong Hari ug sa iyang ulay nga pangasaw-onon?