Tibuok-Kalibotang Kasegurohan Ilalom sa “Prinsipe sa Pakigdait”
Kapitulo 5
Kalamdagan Alang sa “Konklusyon sa Sistema sa mga Butang”
MAHITUNGOD sa “konklusyon sa sistema sa mga butang,” ang “Prinsipe sa Pakigdait”miingon sa Mateo 24:38 nga “ang mga lalaki nanagpangasawa ug ang mga babaye nanagpamana.” Apan sa mao mismong panahon, didto sa langit nagsugod ang labing dakong kaminyoon sa tanan. Kini ang kaminyoon nga gihisgotan sa ilustrasyon ni Jesus sa napulo nga nagdalag mga lamparahan, ang napulo ka ulay.—Mateo 24:3; 25:1-12.
2 Ang kaminyoon nahitabo sa Tungang Sidlakan. Kini nahitabo sa gabii na kaayo, nga niabot sa tungang gabii. Ang kminyoon sa pangasaw-onon ug sa iyang pamanhonon unang gihimo ug dayon gisundan sa prosisyon paingon sa balay sa kombira. Ang dalan walay mga suga. Ang kahayag gitagana sa mga miapil sa halangdong prosisyon, ug ang mga tumatan-aw makatan-aw sa pag-agi sa prosisyon, nga manhinaot ug kalipay alang sa mga bag-ong kinasal.
3 Nahiuyon sa ilang babayen-ong hilig, ang mga ulay interesado sa kasal. Busa, ubay sa dalang agian sa prosisyon, ang napulo ka ulay naghulat hangtod ang prosisyon sa kasal makaabot sa ilang nahimutangan. Buot nilang magmasadya pa ang okasyon, ug tungod niana sialng tanan nagdalag dinagkotang mga lamparahan, apan lima lamang kanila ang may emerhensiyang suplay sa makapasigang lana. Kining lima maoy maalamong mga ulay. Ang katumanan niining sambingaya angay makapaikag kanato karong adlawa, tungod kay sumala kang Jesu-Kristo, kini dugang nagapamatuod nga kita ania sa konklusyon niining daang sistema.—Mateo 25:13.
4 Kita magmalipayon kon kita maalamon ug maksabot sa pagkatuman niining kaminyoon sa tanang kaminyoon ug sa duyog niining mga kahikayan! Kinsa karong adlawa ang gitugotang mosulod sa kombira? May si bisan kinsa ba kanato? Atong tan-awon!
5 Ang ilustrasyong gihatag ni Jesus mahitungod sa napulo ka ulay may kalabotan sa “gingharian sa mga langit,” ang kagamhanan sa kalibotan nga magpanalangin sa tanang tawo. Busa si Jesu-Kristo miingon: “Ang gingharian sa mga langit mahimong sama sa napulo ka ulay nga nagdala sa ilang mga lamparahan ug milakaw sa pagsugat sa pamanhonon. Lima kanila maoy buangbuang, ug ang lima maalamon. Kay ang mga buangbuang, ug ang lima maalamon. Kay ang mga buangbuang nagdala sa ilang mga lamparahan apan wala magdalag lana, samtang ang mga maalamon nagdalag lana diha sa ilang mga prasko uban sa ilang mga lamparahan. Samtang nalangan ang pamanhonon, silang tanan nanagduka ug nahikatulog.”—Mateo 25:1-5.
6 Karon kinsay giilustrar nianang napulo ka ulay? Sila nag-ilustrar sa umaabot nga mga sakop sa pangasaw-onon sa espirituwal nga Pamanhonon, si Jesu-Kristo. Pihong tungod niining katarongana nga ang pangasaw-onon wala hisgoti diha sa ilustrasyon ni Jesus; ang pamanhonon lamang ang makita. Busa, walay kalibog bahin sa katin-awan, nga daw ang mga ulay naghulagway sa lain pang matang.
7 Ang paghiusa sa umaabot nga mga sakop sa pangasaw-onong matang ngadto sa ilang langitnong Pamanhonon diha sa kaminyoon wala mahitabo, sumala sa gidahom, sa pagkatapos sa “tinudlong mga panahon sa mga nasod” niadtong 1914. (Lucas 21:24) Makataronganon, alang kanila mipatim-awng ang Pamanhonon nalangan sa iyang pag-abot, bisan tuod ang iyang presensiya sa iyang langitnong Gingharian nahitabo sa 1914. Kadtong makapasubong katuigan sa Gubat sa Kalibotan I nahisamag gabiing mangitngit kaayo sa kasinatian sa mga ulay nga matang.
8 Sa masambingayong pagkasulti, nahitabo ang pagduka ug pagkahikatulog sa bahin sa mga ulay. Halos nahunong ang dayag nga pagsangyaw sa maayong balita sa umaabot nga paghari ni Kristo sa usa ka libo ka tuig sa pagpanalangin sa tanang tawo. Sukad sa kataposang tuig sa Gubat sa Kalibotan I, ang lisod nga panahon sa paghukom nagsugod alang niadtong masambingayong mga ulay. Kadto maoy tungod kay maibot sa espirituwal nga templo ang nagmandong Hari si Jesu-Kristo. Sa iyang pag-abot didto, gisugdan niya ang palakaw sa paghukom nga naghinlo niadtong gitudlo sa pag-alagad sa templo kang Jehova nga Diyos. (Malakias 3:1-3) Kadto ang panahon sa iyang pagpadayag dihang, ingong langitnong Pamanhonon, siya magadawat sa iyang kaugalingon sa langit sa inuyonang mga sakop sa pangasaw-onong matang nga niadto patay na.
9 Sa 1919, human sa pagpagawas sa walo ka iladong membro sa Watch Tower Bible and Tract Society gikan sa dili-makataronganong pagkabilanggo, kadto ang angayang panahon nga ang mga ulay nga matang nga buhi pa sa yuta pukawon gikan sa ilang paghikatulog sa pagkawalay-buluhaton. Diha sa unahan ang buluhaton sa paglamdag sa tibuok kalibotan. Panahon kadto nga sila, uban ang dinagkotang mga lamparahan, mosugat sa Pamanhonon, nga mianha sa espirituwal nga templo. Kadto maoy aron ang katawhan gikan sa tanang kanasoran moganayan ngadto sa “balay ni Jehova” nga gibayaw ibabaw sa mga tumoy sa kabukiran, ingnon ta.—Isaias 2:1-4.
Paghikay sa Ilang mga Lamparahan
10 Ang mga maalamon sa mga ulay nga matang nagdalag emerhensiyang suplay sa lana diha sa ilang mga prasko. Sila wala maglangan sa pagtubil sa ilang mga lamparahan. Ang likidong lana sa paglamdag mihulagway sa makapalamdag nga Pulong ni Jehova ug sa iyang balaang espiritu. Busa, unsay gihulagwayan sa lana ng gikuha gikan sa mga prasko sa maalamong mga ulay? Ang reserba nga espiritu ni Jehova nga mohatag kahayag sa iyang sinulat nga Pulong ug nabatonan mismo sa dinihogang nahibilin sa inanak-sa-espiritung mga tinun-an sa Pamanhonon sa dihang misugod na ang human-gubat nga buluhaton sa paglamdag sa tibuok kalibotan bahin sa “gingharian sa mga langit.”
11 Ang mga prasko mihulagway sa masambingayong maalamong mga ulay mismo ingon nga nagbaton sa simbolikong lana sa kalamdagan. Kini wala magkahulogang kadto ang unang panahong ang mga ulay nga matang gidihogan sa espiritu ni Jehova. Wala, ang mga ulay wala magdihog sa ilang kaugalingon sa iyang espiritu. Siya ang nagabuhat niana!—Isaias 61:1, 2; Lucas 4:16-21.
12 Sa pagpaluyo sa ilang pagkatinudlo ngadto sa dako kaayong buluhaton sa paglamdag sa kalibotan mahitungod sa “gingharian sa mga langit,” ang maalamong mga ulay gipaboran sa pagkatuman diha kanila sa Joel 2:28, 29. Kini mao ang pagkutlo ni apostol Pedro sa maong mga bersikulo: “‘Ug sa kataposang mga adlaw,’ nagaingon ang Diyos, ‘akong igabubo ang bahin sa akong espiritu ibabaw sa tanang matang sa unod, ug ang inyong mga anak lalaki ug inyong mga anak babaye managpanagna ug ang inyong mga batan-ong lalaki makakitag mga panan-awon ug ang inyong mga tigulang lalaki magadamgo ug mga damgo.’” (Buhat 2:17) Busa sukad sa 1919 paunahan ang mga maalamon sa masambingayong mga ulay nga matang magdala sa ilang galamiton sa paglamdag, ang ilang simbolikong mga lamparahan—ang ilang kaugalingon. Kadto ilang gibuhat aron sa paghatag ug kahayag sa tanan nga diha pa sa espirituwal nga kangitngitan. Tungod sa matang sa mga kinabuhi nga ilang gikinabuhi ilalom sa impluwensiya sa Pulong ug espiritu sa Diyos, sila nahimong “mga kahayag sa kalibotan.” (Filipos 2:15) Sa ingon ilang gisunod ang mga lakang sa Pamanhonon samtang siya nangandam sa pagdala sa tanang sakop sa pangasawonong matang alang sa iyang kaugalingon ngadto sa langitnong Gingharian tapos sa ilang pagkamatay sa yuta.—Mateo 5:14-16.
Mga Sangpotanan sa Espirituwal nga Pagkabuangbuang
13 Karon, komosta man ang mga buangbuang sa mga ulay nga matang? Si Jesus miingon: “Ang mga buangbuang miingon ngadto sa mga maalamon, ‘Hatagi kamig diyutay sa inyong lana, tungod kay hapit nang mapalong ang among mga lamparahan.’ Ang mga maalamon mitubag sa mga pulong, ‘Tingalig kini dili paigo alang kanamo ug kaninyo. Pangadto hinuon kamo sa mga nagabaligya niini ug pagpalit alang kaninyo.’”—Mateo 25:8, 9.
14 Kadtong midumili sa pagpakigbahin sa mga buangbuang dili kay hakog, maalamon lamang hinuon. Sila nagpabilin sa pagtuman sa ilang orihinal, nanghinaot-sa-kaayohan nga katuyoan sa pagdan-ag sa mangitngit nga palibot alang sa Pamanhonon. Sila dili obligado sa pagkompromiso, sa pagkunhod sa gidaghanon sa ilang balaang espiritu ni Jehova aron sa pagpahiuyon niadtong buangbuang sa espirituwal. Ang maong mga buangbuang wala maandam sa ilang kaugalingon sa pagsulod dayon sa pribilehiyo sa pag-alagad nga nabuksan alang kanila sa 1919.
15 Sa pagsugod sa yugto sa kalinaw, ang pipila niadtong nangangkong nagpahinungod, bawtismadong mga kauban misugod sa pagpadayag sa espirituwal nga pagkabuangbuang. Tapos sa pagkamatay sa unang presidente sa Watch Tower Society, si Charles Taze Russell, sila wala bug-os mosulod sa espiritu sa mga kaugmaran pinaagi sa makitang galamiton ni Jehova nga Diyos ilalom sa bag-ong presidente niadto, si J. F. Rutherford. Ang ilang mga kasingkasing wala gayod mahiuyon sa paagi s pagbuhat sa mga butang. Sila nagpakita sa kakulang sa pagpabili sa paagi sa pagpakiglabot ni Jehova sa iyang katawhan. Busa, kadtong nahisama sa maalamong mga ulay dili makahatag sa tinuod nga espiritu sa kinasingkasing nga pakigtambayayong ngadto sa maong mga buangbuang gna nagpahilayo sa ilang kaugalingon sa dugang ug dugang pa.
16 Ang espirituwal nga pagkabuangbuang sa ingon nadayag. Sa unsang paagi? Pinaagi sa pagkapakyas sa pagbaton sa simbolikong lana sa hinungdanong panahon dihang may dakong panginahanglan sa espirituwal nga kalamdagan samtang mipadayon sa unahan ang bag-ong mga kaugmaran, nga nagpakita nga presente ang Pamanhonon. Busa panahon na niadto sa paglakaw aron sa pagsugat kaniya uban ang lamparahan nga kusog ug siga, sa masambingayong pagkasulti. Apan inay hinuon, kadtong nahisama sa buang buang nga mga ulay, kansang mga lamparahan nagkaawop na, mibulag sa mga maalamon.
17 Pagkadako ang kapildihan dihang ang usang nagaangkong nahiapil sa mga ulay nga matang mawad-an sa dili-na-masubling pribilehiyo ug kahigayonan sa pagdawat sa espirituwal nga Pamanhonon, si Jesu-Kristo! Ang maong kapildihan mao ang maagoman sa mga buangbuang taliwala sa modernong-adlawng mga ulay, sumala sa gipaila sa dugang mga pulong sa ilustrasyon ni Jesus: “Samtang sila nanglakaw aron sa pagpalit, miabot ang pamanhonon, ug ang mga ulay nga andam na mikuyog kaniya ngadto sa kombira sa kasal; ug ang pultahan gitakpan.”—Mateo 25:10.
18 Pagkamakapasubo ang kasinatian nga naagoman s modernong-adlawng buangbuang nga mga ulay! Sa maong labing mangitngit nga panahon sa tibuok kasaysayan sa tawo, napakyas sila sa pag-apitl sa buluhaton sa paglamdag niadtong nagapuyo sa espirituwal nga kangitngitan ug sa landong sa kamatayon sa panahon sa “gubat sa dakong adlaw sa Diyos nga Makagagahom sa Tanan”! (Pinadayag 16:14) Tungod kay walay lana sulod sa ilang masambinagyong mga lamparahan sa pagdanag sa ilang agianan, sila nanglakaw ug kinahaglang magsukarap sa ilang agianan latas sa kangitngitan sa tungang gabii. Tungod niini sila wala moabot sa tukmang panahon aron mosunod sa mga lakang sa Pamanhonon sa masadyaong prosisyon agi sa pultahan ug ngadto sa kombira sa kasal nga dan-ag kaayog mga suga. Nawala ang ilang ilhanan ingong iyang mga sumusunod nga nakalinya sa pagpakigminyo kaniya sa langitnong Gingharian. Sila wala hikaplaging “andam” sa tinudlong panahon. Talagsaong mapasidan-ong panigingnan ang ilang gitagana!
19 Kining masakit nga kamatuoran tin-awng gihulagway sa kataposang bahin sa ilustrasyon nga gihatag ni Jesu-Kristo, ang Pamanhonon, ilabina alang kanatong nagapuyo sa “konklusyon sa sistema sa mga butang.” Busa atong hisgotan sa dugang kanang butanga! Ang makapalipay nga kalamdagan nagapaabot kanato sa pagbuhat niana, sumala sa atong makita sa sunod nga kapitulo.
[Mga Pangutana nga Pagatun-an]
1. Alang niining “konklusyon sa sistema sa mga butang,” unsang talagsaong kaminyoon ang gitagna sa “Prinsipe sa Pakigdait,” ug sa unsang sambingay?
2. (a) Sa unsang panahon sa adlaw nahitabo kining masambingayong kaminyoon? (b) Unsay mosunod sa kasal, ug sa unsang paagi gitagana ang kahayag?
3, 4. (a) Kinsay maikag sa prosisyon nga mosunod, ug uban ang unsang mga pagpangandam? (b) Ang pagkatuman sa maong sambingay mohatag ug dugang pamatuod sa unsang kamatuoran? (c) Kita magmalipayon kon atong buhaton ang unsa?
5. Unsay mihimog kalainan taliwala niadtong nagalangkob sa napulo ka ulay, ug unsay nahitabo panahon sa pagkalangan sa pamanhonon?
6. (a) Kinsay gihulagwayan sa napulo ka ulay? (b) Nganong ang pangasaw-onon wala hisgoti sa sambingay?
7. Sa unsang panahon mipatim-aw nga ang Pamanhonon nalangan sa iyang pag-abot alang sa pangasaw-onon, ug ngano?
8. (a) Sa unsang paago nga, sa masambingayong pagkasulti, ang pagduka ug pagkahikatulog nahitabo sa bahin sa mga ulay? (b) Alang sa unsang katuyoan nga ang Pamanhonon miabot sa templo, ug nganong ang pangasaw-onong matang maikagon niini?
9. Kanus-a moabot ang panahon nga ang mga ulay nga matang pagapukawon gikan sa pagkawalay-buluhaton, ug ngano?
10. Unsay gihulagwayan sa lana nga gikuha gikan samga prasko sa maalamong mga ulay?
11. Unsa ang simbolikong mga prasko gna gisudlan sa lana?
12. (a) Unsang tagna ni Joel ang pagatumanon diha sa maalamong mga ulay? (b) Kanus-a moabot ang panahon nga ilang padan-agon ang kahayag pinaagi sa ilang mga lamparahan?
13. Unsay tubag sa maalamong mga ulay sa hangyo sa buangbuang nga mga ulay?
14. Nganong ang mga ulay nga wala makigbahin sa ilang lana maalamon inay kay hakog?
15. (a) Dihang nagsugod ang panahon sa kalinaws, kinsa sa mga ulay nga matang ang misugod sa pagpadayag sa mga kiling sa espirituwal nga pagkabuangbuang? (b) Nganong ang maalamong mga ulay wala makatabang sa mga ulay nga buangbuang sa espirituwal nga paagi?
16. Sa unsang paagi nadayag ang espirituwal nga pagkabuangbuang sa bahin sa buangbuang nga mga ulay?
17. Unsang dili-mapasig-uling kapildihan ang naagoman niadtong gihulagwayan sa buangbuang nga mga ulay, sumala sa gipaila sa Mateo 25:10?
18. (a) Sa unsang pribilehiyo napakyas sa pagpakig-uban ang buangbuang nga mga ulay niining sigloha? (b) Nganong ang mga buangbuang ulahi na kaayo aron moapil sa prosisyon sa kasal ug sa pagsulod ngadto sa kombira?
19. Unsang kasinatian ang nagahulat kanato tungod sa pagsunod niining butanga hangtod sa konklusyon niini?