Kinabuhi ug Ministeryo ni Jesus

Ang Maalamon ug ang Buangbuang nga mga Dalaga

GITUBAG ni Jesus ang mga pangutana sa iyang mga apostol nga nangayog ilhanan sa iyang presensiya sa Gingharianong gahom. Karon siya mihatag ug dugang mga bahin sa ilhanan diha sa tulo sa sambingay, o mga ilustrasyon.

Ang katumanan sa matag usa ka ilustrasyon makita sa mga tawo nga nagkinabuhi sa panahon sa iyang presensiya. Iyang gipailaila ang una pinaagi niining mga pulonga: “Ang gingharian sa langit mahisama sa napulo ka dalaga nga nanagdala sa ilang mga lamparahan ug miadto sa pagsugat sa pamanhonon. Ang lima kanila mga buangbuang, ug ang lima mga maalamon.”

Pinaagi sa ekspresyon “ang gingharian sa langit mahisama sa napulo ka dalaga,” si Jesus wala magpasabot nga ang katunga niadtong makapanunod sa langitnong Gingharian maoy mga tawong buangbuang ug ang katunga mga maalamon! Dili, apan siya nagpasabot nga kon bahin sa Gingharian sa langit, adunay usa ka bahin nga sama niini o sama niana, o nga ang mga butang maylabot sa Gingharian mahimong kana ug kanang butanga.

Ang napulo ka dalaga nagasimbolo sa tanang mga Kristohanon nga nahilinya o nagaangkon nga mahilinya alang sa langitnong Gingharian. Sa Pentekostes 33 K.P. nga ang Kristohanong kongregasyon gisaaran nga ipakasal sa binanhaw, nahimayang Pamanhonon, si Jesu-Kristo. Apan ang kasal mahitabo sa langit sa dili tino nga panahon sa umaabot.

Diha sa ilustrasyon, ang napulo ka dalaga migula sa katuyoan sa pag-abiabi sa pamanhonon ug sa pagduyog sa prosesyon sa kasal. Sa dihang siya moabot, ilang padan-agan ang agianan sa prosesyon sa ilang mga lamparahan, busa nagapasidungog kaniya samtang iyang pagadalhon ang iyang pangasaw-onon ngadto sa balay nga giandam alang kaniya. Apan, si Jesus misaysay: “Gidala sa mga buangbuang ang ilang mga lamparahan apan wala magdala ug lana, apan ang mga maalamon nanagdalag mga prasko nga sinudlan ug lana uban sa ilang mga lamparahan. Kay ang pamanhonon nadugay man sa pag-abot, silang tanan nanagduka ug nahikatulog.”

Ang nalangan nga pag-abot sa pamanhonon nagpaila nga ang presensiya ni Kristo ingong nagamandong Hari maoy sa halayong umaabot. Siya sa kataposan miabot sa iyang trono sa tuig 1914. Sa panahon sa hataas nga gabii sa wala pa kini mahitabo, ang tanang dalaga nakatulog. Apan sila wala hukmi tungod niini. Ang paghukom sa buangbuang nga mga dalaga maoy tungod sa ilang wala pagdalag lana alang sa ilang mga prasko. Gibatbat ni Jesus ang paghigmata sa mga dalaga sa wala pa moabot ang pamanhonon:

“Sa pagkatungang gabii dihay singgit nga nanag-ingon, ‘Ania na ang pamanhonon! Panggula kamo ug sugata ninyo siya.’ Ug namangon ang tanang dalaga ug gihikay nila ang ilang mga lamparahan. Ug ang mga buangbuang miingon sa mga maalamon, ‘Hatagi kami ug lana kay nagakapalong kining among mga lamparahan.’ Ang maalamon mitubag nga nag-ingon, ‘Tingalig dili kini paigo alang kanamo ug kaninyo. Pangadto hinoon kamo sa mga magbabaligya ug pumalit kamo alang kaninyo.’”

Ang lana nagasimbolo sa butang nga nagpahimo sa matuod nga mga Kristohanon ingong mahayag nga mga maglalamdag, nga mao, ang dinasig nga Pulong sa Diyos, nga ilang hugot nga gihawiran, uban sa balaang espiritu, nga motabang sa pagsabot niana nga Pulong. Ang espirituwal nga lana nagpahimo sa mga maalamong dalaga sa paghatag kahayag sa pag-abiabi sa pamanhonon sa panahon sa prosesyon ngadto sa kombira sa kasal. Apan ang buangbuang nga mga dalaga nga matang wala magdala, diha sa ilang mga prasko, sa gikinahanglang espirituwal nga lana. Busa gibatbat ni Jesus ang nahitabo:

“Samtang [ang buangbuang nga mga dalaga] nangadto sa pagpamalit [lana], miabot ang pamanhonon, ug ang mga dalaga nga andam misulod uban kaniya ngadto sa kombira sa kasal; ug unya ang pultahan gitakpan. Tapos niini nangabot usab ang ubang dalaga, nga nanag-ingon, ‘Senyor, senyor, ablihi kami!’ Apan siya mitubag nga nag-ingon, ‘Sa pagkamatuod, magaingon ako kaninyo, nga ako wala makaila kaninyo.’”

Human nga miabot si Kristo diha sa iyang langitnong Gingharian, ang maalamon nga dalaga nga matang sa matuod nga dinihogang mga Kristohanon nakamata sa ilang pribilehiyo sa paghatag kahayag niining mangitngit nga kalibotan sa pagdayeg sa mibalik nga Pamanhonon. Apan kadtong gilarawanan sa buangbuang nga mga dalaga dili-andam sa pagtagana niining maabiabihong pagdayeg. Busa sa pag-abot sa panahon, wala buksi ni Kristo ang pultahan sa kombira sa kasal sa langit alang kanila. Iyang gipasagdan sila sa gawas sa kangiob sa labing mangitngit nga kagabhion sa kalibotan, nga mahanaw duyog sa tanang ubang mga mamumuhat sa pagkadaotan. “Busa, pagtukaw kamo,” mihinapos si Jesus, “kay wala ninyo hibaloi ang adlaw o ang takna.” Mateo 25:1-13.

◆ Kinsa ang gisimbolohan sa napulo ka dalaga?

◆ Kanus-a gihimo ang saad sa kasal sa pamanhonon, apan kanus-a siya miabot sa pagdala sa iyang pangasaw-onon ngadto sa kombira sa kasal?

◆ Unsay gihawasan sa lana, ug ang pagkabaton niana nagpahimo sa mga dalagang maalamon sa pagbuhat ug unsa?

◆ Diin gihimo ang kombira sa kasal?

◆ Unsang dakong ganti ang giwala sa buangbuang nga mga dalaga, ug unsay mahitabo kanila?