Kalipay Tungod sa Bililhong Relasyon

“ANG buhi nga iro labi pang maayo kay sa patay nga leyon.” (Ecclesiastes 9:4) Nianang pila ka pulong, gipahayag ni Haring Solomon sa kakaraanan ang paninugdang kamatuoran nga ang kinabuhi labi pang bililhon kay sa bisan unsang materyal nga katigayonan o ambisyosong mga tumong nga tingali atong laomang makab-ot. Kon walay kinabuhi, dili kita makapahimulos sa bisan unsa niining mga butanga. Oo, ang kinabuhi kinahanglanon sa atong pangagpas sa kalipay.

Butang “Labi Pang Maayo kay sa Kinabuhi”

Apan, bisan pag bililhon ang kinabuhi, adunay butang labi pang maayo. ‘Posible ba kana?’ tingali mahibulong ka. ‘Unsa ba ang labi pang bililhon kay sa kinabuhi mismo?’

Gitagana ni Haring David sa karaang Israel ang tubag. Sa pagtumong sa Maglalalang, si Jehova nga Diyos, siya miingon nga may halalom nga pagpabili: “Tungod kay ang imong mahigugmaong-kalulot labi pang maayo kay sa kinabuhi, ang akong mga ngabil magadayeg kanimo.” (Salmo 63:3) Ang kinasingkasing nga mga pulong ni David nagpakita nga ang pagkadawat sa mahigugmaong-kalulot sa Diyos, nga gipasukad sa pagbatog maayong relasyon uban kaniya, labi pang bililhon kay sa kinabuhi mismo. Nganong matuod man kini?

Kon Unsay Nagapaposible sa Kinabuhi

Pananglitan hatagan kag gasa, usa ka butang naangayan gayod nimo. Siyempre, malipay ka kaayong modawat sa gasa ug tingali mahimuot kag dako sa paggamit niana. Apan ikaw mahimong ingrato kon ang imong hunahuna dili mosaylo sa gasa ug moadto sa naghatag. Dili ba ang personal nga relasyon tali nimo ug sa naghatag ang mitukmod sa gasa? Kon wala pa ang maong relasyon, wala unta ing gasa ug wala ang kahimuot niana.

Kana matuod usab sa kinabuhi. Bisan pag kini bililhon, kinahanglang ibutang nato sa hunahuna kon diin gikan ang atong kinabuhi ug sa unsang paagi kini gisustentohan. Sa pagkamatuod kita wala maglalang sa atong kaugalingon ni kita makasustento niini nga bulag sa tanang kahibulongang tagana nga gibuhat ni Jehova sa yuta. (Salmo 100:3; Buhat 14:17) Ang kamatuoran mismo nga kita may kinabuhi, ug pihong kita nagakahimuot niini sa usa ka sukod, maoy kapahayagan sa mahigugmaong-kalulot sa bahin sa Dakong Maglalalang, si Jehova nga Diyos. Dili ba nato hisabtan nganong si Haring David mibati sa tibuok kasingkasing nga “ang mahigugmaong-kalulot sa Diyos labi pang maayo kay sa kinabuhi”?

Adunay laing hinungdan nganong ang pagbaton sa giuyonang relasyon uban sa Maglalalang labi pang bililhon kay sa kinabuhi mismo—ang atong kaugmaon nagaagad niana. Atong tan-awon sa unsang paagi matuod kini.

Dili ka ba mouyon nga ang kinabuhi umalagi ug puno sa mga kawalay-kapihoan? Ang usa ka tawo tingali maghago sa daghang katuigan sa pagkab-ot sa materyalistikanhong tumong nga iyang giisip nga mapuslanon. Bisan pa niana, sa dili madugay ang kamatayon maghikaw kaniya sa tanang iyang nakab-ot. Kini maoy sumala sa giingon sa maalamong Haring Solomon: “Unsay maangkon sa tawo tungod sa tanan niyang pagbudlay ug sa pagpakigbisog sa iyang kasingkasing nga tungod niana siya nagabudlay sa silong sa adlaw? Kay sa tanan niyang adlaw ang iyang buhat nagkahulogan sa mga kasakit ug kaguol, sa magabii usab ang iyang kasingkasing dili makapahulay. Kini usab kakawangan.”—Ecclesiastes 2:22, 23; itandi ang 2:3-11.

Bisan pa niini, katuyoan sa atong mahigugmaong Maglalalang nga ang tanang nahigugma ug nagasugot kaniya pagawson gikan sa kapakyasan ug kakawangan nga atong naangkon karong adlawa. Gipasalig kanato ni Jehova kining kahibulongang saad: “Sila dili magatukod ug lain ang magapuyo; sila dili magatanom ug lain ang magakaon. Kay ang mga adlaw unya sa akong katawhan mahisama unya sa mga adlaw sa usa ka kahoy; ug ang akong mga pinili magapahimulos sa bug-os sa buhat sa ilang mga kamot.”—Isaias 65:22.

Kining kapahayagan sa mahigugmaong-kalulot sa Diyos dili ba labi pang maayo kay sa atong limitado ug dili-pihong kinabuhi karon? Ang pagdawat sa iyang mahigugmaong-kalulot, oo, ang pagkinabuhi nianang Bag-ong Kahikayan ug pagtagamtam sa kinabuhi nga punog katuyoan ug kahulogan mahimo gayod usa ka labing mapuslanong tumong. Sa pagkab-ot nianang makalipayng kalaoman, ang usa kinahanglang makabaton sa pag-uyon ni Jehova karon ug paghupot padayon sa suod nga relasyon uban kaniya ug sa iyang katawhan.

Dili-Magdugay nga Interes Batok sa Magdugay nga Kaayohan

Tungod sa nahaunang mga puntos, tinong pagkamubog-panglantaw ug dili maalamon nga kita mapuliki sa pagpangagpas sa kaugalingong kaayohan, mahimong kana kabantog, bahandi, karera, akademikanhong kahimoan, personal nga katagbawan, o bisan unsa nga giisip nga mapuslanon niining sistema sa mga butang. Bisan tuod kining mga tumonga tingali dili daotan sa kaugalingon, ang pagpangagpas sa bisan hain niini kanila ingong labing bililhong butang basin magpahinabo nga atong mapasagdan ang atong mga kaakohan atubangan sa atong Maglalalang. Sa kataposan, basin kita mawad-an sa iyang pag-uyon ug mapakyas sa pagbaton sa “matuod nga kinabuhi.”—1 Timoteo 6:19; Lucas 9:24.

Ang pagsubay nianang dalana ikatandi ngadto sa usa ka batan-ong moundang sa pag-eskuyla ug motrabaho ingong dili-hanas nga mamumuo aron makabaton lamag salaping panggastos. Tingali siya mobati nga siya sa kataposan nahigawas sa mga pagpiot sa eskuylahan ug makalipaylipay na. Apan wala ba niya isakripisyo ang iyang magdugay nga kaayohan tungod sa kaduhaduhaang dili-magdugay nga interes? Nan, sa susama dili ba ang usa ka tawo mubog panglantaw kon iyang pasagdan ang iyang relasyon uban sa Maglalalang tungod kay siya puliki kaayo sa pagpangagpas sa usa ka personal nga tumong?

Bisan tuod kitang tanan puliki, kita kasagarang makakitag panahon ug kusog sa pagbuhat sa mga butang atong giisip nga tinuod bililhon, dili ba? Busa, tungod sa dili-masayop nga pagsabot sa kinaiya sa tawo, si Jesus pintok mipunting: “Kay hain gani ang imong bahandi, atua usab didto ang imong kasingkasing.”—Mateo 6:21.

Busa, sa unsang matang sa “bahandi” imong gibutang ang imong kasingkasing? Ang pangidlap sa kalibotan tingali madanihon kaayo. Apan pangutan-a ang imong kaugalingon: Unsa ka malungtaron ang gituohang mga kaayohan nga mabatonan gikan nianang mga butanga? Kana mohatag bag tinuod nga kalipay o sa umalagi rang mga kalingawan, sama sa droga, nga magbilin sa dili-tilinguhaon o masakit pang resulta?

Himoa ang Maalamong Pagpili

Adunay bililhong pagtulon-ang makat-onan gikan sa katawhan sa adlaw ni Lot. “Sila nanagpangaon, sila nanag-inom, sila nanagpamalit, sila nanagpamaligya, sila nanagpananom, sila nanagtukod,” matud ni Jesus. Sa laing mga pulong, sila puliki kaayo sa pagpangagpas sa butang ilang giisip nga bililhon, nga wala magtagad sa kabubut-on sa Diyos. Ang sangpotanan? “Sa adlaw sa pagpahawa ni Lot sa Sodoma gikan sa langit miulan ug kalayo ug asupre ug gilaglag silang tanan.” Unya, sa atong kaayohan, si Jesus midugang: “Maingon man usab unya sa adlaw nga igapadayag ang Anak sa tawo.”—Lucas 17:28-30.

Ang tanang timailhan mao nga “kanang adlawa” ania na kanato. Kay mahunahunaon sa atong walay-kataposang kaayohan, giluwatan ni Jehova nga Diyos ang gisublisubli nga mga panawag pinaagi sa iyang Pulong ug sa iyang organisadong katawhan diha sa tanang kanasoran. Ang pagdapit mao nga motalikod sa mahakogong mga pangagpas ug magpasig-uli kaniya. Matuod nga dili maalamong atong tugotang ang atong personal nga intereses magahurot sa tanan natong panahon ug kusog, mao nga kita mapakyas sa pagsanong niining mahigugmaong panawag. Hinunoa, sumala sa pagpahayag niana ni apostol Pablo, atong pagailhon ang pagkadinalian sa atong mga panahon: “Tan-awa! Karon ilabina mao ang adlaw nga gikahimut-an. Tan-awa! Karon mao ang adlaw sa kaluwasan.”—2 Corinto 5:20; 6:2.

Mahiapil ka ba unya niadtong panalanginan sa makalipayng kalaoman sa paglabang-buhi sa kalaglagan sa daotang sistema sa mga butang karon ngadto sa matarong Bag-ong Kahikayan nga gisaad sa Diyos? Kana depende sa kon unsay imong giisip nga labing bililhon sa imong kinabuhi karon ug sa kon unsay imong ginabuhat bahin sa pagbatog giuyonang relasyon uban sa Diyos. Ikaw ang magpili!

[Mga Letrato sa panid 5]

Kon mapasalamaton ka sa naghatag . . .

. . . komosta man ang labing dakong maghahatag, si Jehova nga Diyos?