Ang Kinabuhi ug Ministeryo ni Jesus
Sugod niining isyuha sa magasin, ang usa ka bag-ong artikulo bahin sa ulohan sa ibabaw makita sa Bantayanang Torre.
SULOD sa milabay nga lima ka tuig, sukad sa Septiyembre 1980, ang Bantayanang Torre nagdala kas-a sa usa ka bulan sa duhag-panid, ilustradong artikulong “Buhi ang Pulong sa Diyos.” Pinaagi sa mga hulagway nga inubanan sa sayon-basahon nga teksto, daghang doktrina sa Bibliya ug makasaysayanhong mga asoy gihisgotan sa tin-aw, sayon-hisabtan nga paagi. Karon ang usa ka bag-ong artikulo, nga nagapasiugda sa kinabuhi ug ministeryo ni Jesu-Kristo, magapuli sa “Buhi ang Pulong sa Diyos.”
Sa sunod duha ka panid inyong makita ang unang seksiyon niining bag-ong artikulo. Sulod sa sunod ubay-ubayng bulan, makapanglantaw kamo sa unahan sa pagdawat sa bag-ong instolment sa matag isyu sa Bantayanang Torre. Kining bag-ong serye sa mga artikulo makabaton sa samang daghag-ilustrasyon, duhag-panid nga format sa “Buhi ang Pulong sa Diyos.”
Nahiangay nga si Jesu-Kristo pagahisgotan niining paagiha diha sa Bantayanang Torre, kay si Jesus labaw ug impluwensiya diha sa kasaysayan sa katawhan kay ni bisan kinsang tawo. Apan, labi pang bililhon, ang mga kinabuhi sa minilyong katawhan sa tanang rasa ug nasyonalidad nangausab sa pagkamaayo sa dihang sila nakapabili sa iyang kinabuhi ug mga pagtulon-an.
Lagmit daghan kamog nasayran bahin kang Jesus ug iyang ministeryo. Apan nasilsil ba diha sa inyong hunahuna ang panahon ug dapit sa mga hitabo mao nga makasugid kamo niana sa usag usa ug busa mas makahinumdom niana? Pananglitan, kanus-a pilia ni Jesus ang iyang 12 ka apostoles—sinugdanan sa iyang ministeryo o sa ulahi na kaayo? Kadto una ba o tapos sa pag-ila sa Samaritanhong babaye nga siya ang Kristo? Ug diin ba siya sa iyang gipili ang 12, o milagrosong gipakaon ang 5,000, o gihatag ang Wali sa Bukid? Sanglit kining bag-ong artikulo magasugid sa estorya sa kronolohikanhong paagi sa kinabuhi ug ministeryo ni Jesus ug motagana sa makita nga mga nahitaboan ug sa mabatbatong komentaryo, kini mobulig sa pagsilsil nga dili mapapas sa maong halandumong mga hitabo sa inyong hunahuna.
Kining artikuloha makatabang sa karaang mga magbabasa sa Bibliya ingon man sa bag-ong mga estudyante sa Bibliya, ug sa mga ginikanan sa dihang magatuon sila uban sa ilang mga anak. Ang mga pangutana gitagana alang niining tuyoa. Pagkamaayong paagi sa pagpasinati kanila sa magtutukod sa Kristiyanidad ug sa iyang mga pagtulon-an! Basin makapanan-aw kamo daan sa mga paagi nga makagamit ka niining mga artikuloha sa pag-alagad sa inyong pamilya ug sa uban. Hinumdomi, halos ang tanan gustog mga estorya, ug daghan ang mahimuot kanila diha sa serye nga dagway diin ilang madawat ang mga seksiyon sa regular nga mga interbalo.
Busa, sukad gayod sa unang instolment niini, dasiga ang uban sa pagsagnunot sa maong nagapadayong estorya. Inyong mapanid-ang ang mga pagkutlo sa Bibliya gipahayag nga mubo aron mas sayong sabton, nga ang gikuhaang bahin sa Bibliya gitagana sa kataposan sa matag estorya. Dasiga ang pagbasa niining mga asoy sa Bibliya. Oo, pahimusli pag-ayo kining bag-ong artikulo diha sa Bantayanang Torre diha sa inyong buluhaton sa paghimog tinun-an!