“Unsay Imong Tubag?”

1. Sa unsa nalisdan ang kadaghanan kanato?

¹ Gusto mo ba gayod ang Pulong sa Diyos apan nalisdan ka lang sa paghinumdom sa mga detalye bahin sa mga asoy sa Bibliya o kon asa nasulat ang espesipikong mga pahayag diha sa Kasulatan? Gusto mo bang masabtan gayod sa imong mga anak ang pangunang mga impormasyon ug mga pagtulon-an sa Bibliya? Ang artikulo nga “Unsay Imong Tubag?” nga gipatik matag bulan diha sa panid 31 sa Pagmata! makatabang sa mga bata ug tigulang nga mas masinati sa Pulong sa Diyos.—Buh. 17:11.

2. Sa unsang paagi mahimong gamiton ang nagkalainlaing mga bahin sa “Unsay Imong Tubag?”

² Sa unsang paagi imong mapahimuslan pag-ayo kining artikuloha? Ang Enero 2006 nga gula sa Pagmata! naghatag niining mosunod nga mga sugyot: “Tan-awa kadiyot ang panid 31 . . . Ang pipila ka seksiyon niini nga panid makadani sa batan-ong mga magbabasa; ang ubang mga seksiyon magsulay sa memorya sa dugaydugay nang mga estudyante sa Bibliya. Ang seksiyon nga ‘Kanus-a Nahitabo?’ makatabang kanimo sa paghimog talaan sa mga hitabo kon kanus-a nagkinabuhi ang mga tawo nga gihisgotan sa Bibliya ug kon kanus-a nahitabo ang hinungdanong mga panghitabo. Samtang ang mga tubag sa seksiyon nga ‘Gikan Niining Gulaa’ makaplagan sa tibuok magasin, ang mga tubag sa kadaghanan sa ubang mga pangutana makita diha sa gipailang panid nianang gulaa ra usab, nga gibalit-ad pagpatik. Nganong dili una manukiduki sa dili pa nimo basahon ang mga tubag ug dayon ipaambit sa uban ang imong makat-onan? Mahimong gamiton usab nimo kining bag-ong artikulo nga ‘Unsay Imong Tubag?’ ingong basehanan sa mga panaghisgot sa Bibliya sa pamilya o sa usa ka grupo.”

3. Sa unsang paagi nakakuhag kaayohan ang pipila ka pamilya gikan niining artikuloha, ug unsang mga bahina niini ang imong nagustohan pag-ayo?

³ Sa pagkatinuod, daghang pamilya ang nalingaw sa paggamit niining artikuloha ingong basehanan sa ilang pagtuon sa pamilya. Usa ka inahan misulat: “Naghunahuna mi sa akong bana nga ang ‘Mga Hulagway nga Pangitaon sa mga Bata’ maayong ilakip sa among pagtuon sa pamilya aron bibo ug makalingaw kini alang sa among tres-anyos nga anak babaye. Nalingaw kaayo ming nagtan-aw niya nga naggunit sa iyang kopya sa Pagmata! ug nagpakli sa matag panid hangtod nga iyang nakaplagan ang iyang gipangita.” Usa ka padre de pamilya sa Brazil miingon: “Gusto kaayo nako ug sa akong siyete-anyos nga anak lalaki kining artikuloha sa Pagmata! Kini nakatabang kang Moises sa pagpaminaw pag-ayo, pagpangita sa mga teksto sa Bibliya, pagpabili sa mga hulagway, ug sa pagsabot sa mga petsa.” Si Ashley, nga nag-edad ug otso anyos, misulat: “Salamat sa ‘Unsay Imong Tubag?’ sa likod nga bahin sa Pagmata! Daghan akog nakat-onan sa Bibliya gikan niini.”

4. Sa unsang paagi mahimong gamiton sa pamilya ang “Unsay Imong Tubag” nga bahin sa ilang pagtuon sa Bibliya sa pamilya?

⁴ Nganong dili ninyo sulayan ang paggamit usahay sa “Unsay Imong Tubag?” ingong bahin sa inyong pagtuon sa pamilya? Inyong magamit ang Index o Watchtower Library diha sa CD-ROM sa pagpangita sa mga tubag sa pipila ka lisod-lisod nga mga pangutana. Pinaagi niana, inyong matudloan ang inyong mga anak kon unsaon pagpanukiduki. Kon kamo may dodagko nang mga anak, nganong dili hangyoon sila sa pagpanukiduki sa mga tubag sa mga pangutana nga “Kinsa Ako?” o “Kanus-a Nahitabo?” sa dili pa ang inyong pagtuon sa pamilya? Pagkahuman, mahimo nilang ipaambit ang ilang mga nadukiduki panahon sa pagtuon. Ang epektibong paggamit niining panira maoy usa ka paagi nga masilsil sa mga ginikanan ang Pulong sa Diyos diha sa ilang mga anak, nga magtabang kanila sa pagkahibalo sa “balaang mga sinulat” sukad sa pagkamasuso.—2 Tim. 3:15; Deut. 6:7.