Paglakaw Pinaagi sa Pagtuo!

“Kita . . . sa kanunay magmalig-on ug nahibalo nga, samtang ang atong puy-anan anaa sa lawas, kita wala diha sa Ginoo, kay kita nagalakaw pinaagi sa pagtuo, dili pinaagi sa makita.”—2 CORINTO 5:6, 7.

1. Unsa ang pipila sa mga panalanging atong gipahimuslan tungod sa tawhanong mata?

USA sa mga kahibulongan sa lawas sa tawo mao ang mata. Pinaagi niining talagsaong potograpikong mekanismo, kita dili lamang makalikay sa mga babag kondili makadawat usab kita sa labihang daghanang impresyon, nga daghan niana magaapektar kanato. Dayag nga ang Magdidisenyo sa mata wala magtuyo nga kita mangarapkarap sa kangitngit diha sa atong planetang pinuy-anan. Dugang pa, iyang katuyoan nga atong makita ug kalipayan ang kahibulongan niyang mga linalang—ang katawhan ug kahayopan, kabukiran ug kasubaan, kalanawan ug kadagatan, kabulakan ug ubang tanom, ang langit ug ang matahom nga mga bulok sa pagsalop sa adlaw. Ang mapabilhong tumatan-aw makapatugbaw duyog sa salmista: “Pagkadaghan sa imong mga buhat, O Jehova! Silang tanan imong gibuhat sa kaalam. Ang yuta napuno sa imong mga binuhat.”—Salmo 104:24.

2. Nganong dili paigo ang paglakaw pinaagi sa makita, ug unsay gisulti ni Pablo bahin niini?

² Apan, bisan pag kahibulongan ang pisikal nga panan-aw, ang paglakaw pinaagi niana lamang napunog dakong kapeligrohan. Aron matagamtam nato ang pag-uyon sa Diyos, kinahanglang molakaw kita pinaagi sa pagtuo sa Magdidisenyo sa mata sa tawo. Kinahanglang atong tinguhaon ang iyang giya sa pagbuhat kon unsay maayo. Sa pagsulat ngadto sa isigkadinihogang mga Kristohanon, si apostol Pablo mipahayag sa haom: “Kita . . . kanunay nga magmalig-on ug nasayod nga samtang atong nabatonan ang atong pinuy-anan diha sa lawas, kita wala diha sa Ginoo, kay kita nagalakaw pinaagi sa pagtuo, dili pinaagi sa makita. Apan kita magmalig-on ug mahimuot nga mawala diha sa lawas ug paghimo sa atong pinuy-anan uban sa Ginoo [pinaagi sa pagkamatay ug pagkabanhaw ngadto sa langitnong kinabuhi]. Busa atong ginahimo usab nga atong tumong nga, bisan nga ang atong pinuy-anan maoy uban kaniya o wala diha kaniya, kita mahimong dalawaton ngadto kaniya. Kay kitang tanan kinahanglang mapadayag atubangan sa hukmanan ni Kristo, aron ang matag usa makadawat sa iyang ganti tungod sa mga butang nabuhat pinaagi sa lawas, sumala sa mga butang nga iyang nabuhat, kon kaha kana maayo o daotan.”—2 Corinto 5:6-10.

3. Angay unsa ang tinguha sa tanang dedikadong mga alagad ni Jehova, ug unsang mga pangutana ang angay natong tagdon?

³ Ang tanang dedikadong mga alagad ni Jehova—kon kaha iya sa dinihogang nahibilin o sa nagdaghang “dakong panon” nga may yutan-ong mga paglaom—buot mobuhat kon unsay maayo. (Pinadayag 7:9) Apan nganong ikaingon nga may dakong kapeligrohan ang ‘paglakaw pinaagi sa makita’? Ug unsay kahulogan sa ‘paglakaw pinaagi sa pagtuo’?

Mga Kapeligrohan sa ‘Paglakaw Pinaagi sa Makita’

4. (a) Nganong dili isipon ang tanang butang sa dayag nga bili? (b) Sa unsang paagi ang Magbubuhat sa mata nagatan-aw sa mga butang?

⁴ Kon atong isipon ang tanang butang sa dayag nga bili ug mag-agad lamang sa gawas nga mga dagway may kapeligrohang hilimbongan nga kita mismo madaot. Pananglitan, ang usa ka tawo tingali magalakaw ubay sa balasong dapit dihang kalit iyang hiamgohang siya gilamoy sa huyonghuyong. O tingali ang usa ka tawo dili makabantay tungod sa mahigalaong panagway sa usa nga mosangpot nga ‘usa ka lobo sa panapot sa karnero.’ (Mateo 7:15) Busa kinahanglang kita magmabinantayon. Ang Magbubuhat sa mata wala giyahi sa panagway lamang sa gawas. Iyang giingnan ang manalagnang si Samuel: “Ang Diyos nagatan-aw dili sa paagi sa pagtan-aw sa tawo, tungod kay ang tawo nagatan-aw sa makita sa mga mata; apan bahin kang Jehova, siya nagatan-aw kon unsa ang kasingkasing.” (1 Samuel 16:7) Sa pagkamatuod, ang Usa nga nagbuhat sa mata makaila sa kinahiladmang mga hunahuna ug mga tuyo, ug ang iyang pagtulotimbang kang bisan kinsa o sa bisan unsa kanunayng husto. (Itandi ang Hebreohanon 4:12.) Tungod sa iyang hingpit nga panan-aw ug pagsabot, siya gayod mao ang Usa nga makakita sa tanan.

5. Nganong hinungdanong kita pasidan-an daan mahitungod sa mga kapeligrohan sa ‘paglakaw pinaagi sa makita’?

⁵ Apan, kay mga tawo lamang, kita dili makaila sa tin-aw kon unsay anaa sa kasingkasing sa laing tawo. Bisan pag uban sa atong hinatag-sa-Diyos nga mga katakos, kita dili hingpit ug kadaghanan hilimbongan. Ngani, mahimong limbongan kita sa atong kaugalingong kasingkasing, kay kini “labi pang maluibon kay sa bisan unsa ug walay paglaom.” (Jeremias 17:9) Busa hinungdanong kita mapasidan-an daan sa mga kapeligrohan sa ‘paglakaw pinaagi sa makita.’ Gitagana ba ni Jehova ang maong dinalian kaayong panginahanglan? Gitagana gayod niya! Alang sa atong instruksiyon, iyang gipasulat ang rekord bahin sa pipila ka talagsaong hitabo nga nagapakita sa mga kapeligrohan sa paglakaw pinaagi lamang sa makita.—Roma 15:4.

6. Ang ‘paglakaw pinaagi sa makita’ adunay unsang mga epekto diha sa mga Israelinhon?

⁶ Ang mga kasinatian sa karaang katawhan sa Diyos, ang mga Israelinhon, nahiangay kaayo. Bisan pag ang dili-masayop nga giya ni Jehova gitagana alang niadtong pinaboran kaayong nasod, ang walay-pagtuo nga kapid-ang mga panon sa pagkagahian milakaw “sa ilang kaugalingong mga tambag.” (Salmo 81:12) Tungod kay ‘naglakaw pinaagi sa makita,’ sila nangliso sa pagsimbag mga idolo o mga diyosdiyos nga makita sa kinaiyanhong mata. Kay gigiyahan sa mga dagway sa gawas, sila nangurog sa kahadlok tungod sa labihang pagkadaghan sa ilang mga kaaway. Dugang pa, tungod sa ‘paglakaw pinaagi sa makita, dili pinaagi sa pagtuo,’ gihagit usab sa mga Israelinhon ang hinatag-sa-Diyos nga pagpangulo ni Moises ug mimulo sa ilang kahimtang sa kinabuhi. (Itandi ang Judas 16.) Oo, ug daghan kanila ang lagmit nasina sa mipatim-awg sama sa kagawasan ug kauswagan sa kanasoran sa palibot, nga wala manumbaling sa kamatuorang kadtong mga tawhana nahunob sa pagkadaotan ug nailalom sa demonyohang impluwensiya.—Levitico 18:1-3, 30.

7. Unsay nahitabo sa mga Israelinhon nga misalikay sa balaang giya?

⁷ Unsay nahitabo sa mga Israelinhon nga mipugos sa paglakaw sa ilang kaugalingong paagi, nga misalikway sa balaang giya? Aw, naagoman nila ang kasuko ni Jehova, ug iyang gikuha ang iyang panalipod mao nga napildi sila sa ilang mga kaaway! Bisan sa Yutang Saad, ang mga Israelinhon subsob nahimong mga ulipon sa ilang walay-kaluoy nga mga kaaway. (Maghuhukom 2:17-23) Lahi kang Moises, si kinsa midumili sa pagpahimulos sa kalibotanong mga kaharuhay sa mga magmamando sa Ehipto, ang katawhan sa Israel nagtinguha sa “umalagi nga pagpahimulos sa sala” ug wala magpadayon sa paglakaw “nga samag nakakita sa Usa nga dili makita.” Sila nawad-ag pagtuo. Ug hinumdomi, “kon walay pagtuo dili mahimo ang pagpahimuot [sa Diyos].”—Hebreohanon 3:16-19; 11:6, 24-27.

8. Nganong ang modernong-adlawng mga alagad ni Jehova angay mapasidan-an pinaagi sa mga kasinatian sa karaang mga Israelinhon?

⁸ Ang modernong-adlaw nga mga alagad ni Jehova mapasidan-an nianang mga hitabo sa nangagi. Kita, usab, mameligrong maluya sa pagtuo o mawad-an pa sa atong pagtuo. Dili ba tinuod nga kita mahimong hinobrang maimpluwensiyahan sa gawas nga panagway sa mga butang ug sa ingon mosugod sa ‘paglakaw pinaagi sa makita’? Oo, ug kana ang hinungdan malulutong gitagana ni Jehova ang giya alang niadtong magaalagad kaniya sa pagtuo. Gigamit niya ang mga Israelinhon ug ang iyang mga pakiglabot kanila ingong mga leksiyon alang sa ulahing mga kaliwatan, apil ang atoa. (1 Corinto 10:11) Sa ingon kita malig-on sa tukmang kahibalo, sa lig-ong paglaom, ug sa pagkamainantoson.

9. Aron kita ‘magalakaw pinaagi sa makita,’ unsay atong bation mahitungod sa tinong mga lihok ug teokratikanhong mga kahikayan?

⁹ Kon wala kining tinong paggiya sa atong mahigugmaong Maglalalang, kita mameligrong magahagit sa Labaw nga Moises, si Jesu-Kristo, nga mahikalimot nga ang Diyos ug si Kristo nagadumala sa matuod nga mga Kristohanon karong adlawa. (Itandi ang 1 Corinto 11:3; Efeso 5:24.) Basin isipon nato ang organisasyon sa mga Saksi ni Jehova ingong tawhanon lamang ug sinugdanan ug sa ingon basin mobating may kagawasan sa pagbuhat kon unsay mopatim-awng matarong sa atong mga mata mismo. (Itandi ang Maghuhukom 21:25.) Dugang pa, kita basin mahulog sa sayop sa pipila nga mopatim-awng nagahunahunang basta ang usa ka buhat dili makasamok sa ilang konsensiya, kana maayo ra. Ang uban tingali mosugod sa paghunahunang ang teokratikanhong organisasyon maoy alang sa ilang kaharuhay ug kasayon ug ang tanang mga kinahanglanon niana kinahanglang himoong sayon, nga dili kinahanglang sila magsakripisyo sa kaugalingon. Ang laing kapeligrohan mao ang pag-abiabi sa ideya nga ang mga kahikayan sa organisasyon angayng ipahiuyon sa atong kabubut-on inay sa iya sa Diyos. Apan, ang atong Sulundan, si Jesu-Kristo, malipayon sa kanunay nga nagbuhat sa kabubut-on sa iyang langitnong Amahan.—Salmo 40:8; Hebreohanon 10:5-10.

10. Sa unsang paagi ang atong tinamdan sa pagsangyaw ug sa ubang teokratikanhong mga buluhaton maapektahan kon dili nato panumbalingon ang balaang pagtultol o dili kana isipong ugdang?

¹⁰ Tungod kay wala manumbaling sa balaang pagtultol o nagpakawalay-bili niana, basin maghunahuna ang pipila nga ang atong mga tigom angay pamub-on, ang mga dapit sa asembliya angayng dili layo, ug ang materyal nga tun-anan angayng sa kanunay yano, dili gayod mag-apil sa “magahing pagkaon.” (Hebreohanon 5:12) Sa mga kayutaan diin ang mga Kristohanon nagapahimulos sa kalinaw ug kahilom, tingali dili ra isipong ugdang sa pipila ang mga panalangin sa Gingharian, kay mobating angay dili maghago diha sa balaang pag-alagad. Kon ugmaron nato ang ingong mga tinamdan, kita mahimo pang “mga mahigugmaon sa kalingawan inay sa Diyos,” nga lagmit magreserba sa halos matag hinapos-sa-semana alang sa kalingawan inay gamiton ang maong panahon sa pagsangyaw ug sa ubang teokratikanhong mga kalihokan nga nagapadayag sa bug-os-kasingkasing nga debosyon kang Jehova. (2 Timoteo 3:1, 4) Kon mahitabo kana, kita matinud-anon bang makaingong kita tinuod “nagalakaw pinaagi sa pagtuo, dili pinaagi sa makita”?

¹¹ Anaa usab ang kapeligrohan sa pagpatuman sa atong gusto. Sayon ang pagkombinsir sa atong kaugalingon sa paghunahunang ang diyutayng labad sa ulo o susamang suliran grabe kay sa tinuod nga kahimtang. Ang atong dili-hingpit nga unod basin mohulhog kanato sa paggamit niana nga pasangil aron dili tumanon ang usa ka responsabilidad, sama sa paghatag ug pakigpulong sa Tunghaan sa Teokratikanhong Ministeryo. Apan posible ba nga dili gayod nato hunahunaong ang maong sakit mopugong kanato sa pag-apil sa usa ka matang sa kalingawan? Siyempre, angay natong gamiton ang maayong pangisip ug dili kay dili ra balihon ang seryosong mga sakit. Apan, kinahanglan gayod nga kita manlimbasog. (Lucas 13:24) Ug tinong ang pagtuo dakog bahin sa atong mga desisyon mao nga kita dili ‘magalakaw pinaagi sa makita’ lamang, nga nahiuyon sa kaugalingon natong walay-tabang nga tambag.—Roma 12:1-3.

12. Sa unsang matang sa pakig-away kita anaa, nga nagkinahanglan sa unsang tinamdan sa atong bahin?

¹² Ayaw gayod hikalimting kita anaa sa pakig-away batok sa daotang espirituhanong mga gahom. (Efeso 6:11-18) Ang panguna natong kaaway, si Satanas nga Yawa, makapahinabo nga kita maapektahan sa dagko kaayong mga impluwensiya pinaagi sa paggamit sa iyang mga hinagiban nga gilaraw sa paglaglag sa atong pagtuo. Pahimuslan ni Satanas ang tanang hakog nga hilig sa mga tawo ug walay sayloan nga matang sa panghaylo nga basin makahaylo sa atong panghunahuna. Kon kita nakig-uban sa “nahibilin” sa “binhi” sa “babaye” sa Diyos, o sa langitnong organisasyon, kita anaa sa pakiggubat. Kini pakiggubat nga walay pahulay hangtod nga si Jehova, kinsa nagalig-on kanato sa pagsagubang sa satanasnong pangatake, magalaglag sa tibuok nga organisasyon sa Yawa. (Pinadayag 12:16, 17; 1 Pedro 5:6-11) Busa, dili ba angay nga kita karon magmalig-on ug mobati sa pagkadinalian? Tinong pagabuhaton nato kana!—Salmo 31:24.

Kon Unsay Kahulogan sa ‘Paglakaw Pinaagi sa Pagtuo’

13. Unsay kahulogan sa ‘paglakaw pinaagi sa pagtuo’?

¹³ Ang “paglakaw pinaagi sa pagtuo” nagkahulogan sa pag-abante latas sa lisod nga mga kahimtang uban ang pagtuo sa Diyos, sa iyang katakos sa paggiya sa atong mga lakang, ug sa iyang kaandam sa pagdala kanato ngadto sa luwas nga dapit. (Salmo 22:3-5; Hebreohanon 11:6) Kini nagkahulogang dili magpagiya sa gawas lamang nga panagway sa mga butang o sa walay-tabang nga tawhanong pangatarongan. Ang pagtuo magadasig kanato sa paglakaw sa direksiyong ginapunting kanato ni Jehova, bisan unsa tingali ka lisod ang dalan. Kon kita ‘magalakaw pinaagi sa pagtuo,’ kita mahisama kang David, kinsa miingon mahitungod sa Diyos: “Imong ipaila kanako ang dalan sa kinabuhi. Ang pagkalipay sa pagkatagbaw maoy uban sa imong nawong; adunay pagkamaayo sa imong tuong kamot sa walay kataposan.” (Salmo 16:11) Dugang pa, kon tugotan nato si Jehova sa pagtultol sa atong mga lakang, hatagan niya kitag kalinaw sa hunahuna ug tabangan niya kita nga makaangkon sa kadaogan, bisan unsa ka dako ang mga kakulian. (Juan 16:33; Filipos 4:6, 7) Apil sa ubang mga butang, ang “paglakaw pinaagi sa pagtuo” magadala kanato ngadto sa regular nga pagpakig-uban sa atong espirituhanong mga igsoong lalaki ug babaye alang sa nagkahiusang pagtuon sa Bibliya ug pag-ampo.—Hebreohanon 10:24, 25.

14, 15. (a) Unsa ang tinamdan ni Jesus mahitungod sa bahandi, dungog, ug pagkalangkit sa politika? (b) Sumala sa gipadayag sa Kasulatan, unsay pag-isip ni Jesus sa giya sa Diyos?

¹⁴ Sa pagkamatuod, ang “paglakaw pinaagi sa pagtuo” nagahimo usab kanato nga mga kauban sa matinumanong mga alagad ni Jehova sa nangagi. Ang panguna kanila mao si Jesu-Kristo, “ang Pangulong Ahente ug Maghihingpit sa atong pagtuo.” Samtang maningkamot kita sa “pagsunod sa iyang mga lakang,” unsay atong makaplagan?—Hebreohanon 12:1-3; 1 Pedro 2:21.

¹⁵ Gilikayan ni Jesus ang pagkalangkit sa kalibotanong politika ug wala gayod tinguhaa ang bahandi ug dungog nga giagpas sa daghan. Hinunoa, gipunting niya nga ang iyang Gingharian “dili bahin niining kalibotan,” ug halayo sa pagkamateryalista, siya ‘wala gani kapahilunaan sa iyang ulo.’ (Juan 6:14, 15; 18:36; Lucas 9:57, 58) Bisan pag si Jesus may hingpit nga kaisipan, siya wala molihok nga independente kondili misalig sa iyang langitnong Amahan alang sa giya.—Juan 8:28, 29.

16. Sa kahayag sa panig-ingnan ni Jesus, unsay ikaingon mahitungod sa tinamdan sa mga Saksi ni Jehova?

¹⁶ Tungod sa panig-ingnan ni Jesus, unsay ikaingon bahin sa mga Saksi ni Jehova karong adlawa? Aw, ingong mga tigpaluyo sa langitnong Gingharian sa Diyos, kita nagatahod sa kagamhananong “labaw nga mga pagbulot-an” apan nagahupot sa neyutralidad diha sa politikanhong mga kahikayan. (Roma 13:1-7; Mateo 6:9, 10; Juan 17:16) Inay nga magtinguha sa bahandi ug dungog niining kalibotana, kita ‘nagapangita pag-una sa Gingharian,’ kay masaligong itagana ni Jehova ang mga kinahanglanon sa kinabuhi. (Mateo 6:24-34; Salmo 37:25) Ug sama kang Jesus, kita ‘dili mosalig sa atong kaugalingong salabotan’ kondili mapasalamatong nagadawat sa giya sa atong mahigugmaong Diyos. (Proverbio 3:5, 6) Sa pagkamatuod, kining tanan nagatabang kanato sa ‘paglakaw pinaagi sa pagtuo.’

Mga Pagsulay ug mga Panalangin

17. Ang katawhan ni Jehova kinahanglang mag-antos sa unsa samtang sila ‘nagalakaw pinaagi sa pagtuo’? Palihog iilustrar kini.

¹⁷ Sa daghang kayutaan ang atong kaubang mga Saksi ni Jehova kinahanglang moantos sa linaing mga kalisdanan ug kasakitan, bisan sa mabangis pang paglutos, samtang sila ‘nagalakaw pinaagi sa pagtuo.’ Hinuon, ang mga pagsulay sa pagtuo motungha sa nagkadaiyang matang. Pananglitan, palandonga ang mga kalisdanan ug matinumanong pag-alagad sa usa ka tigulang igsoong lalaki sa Ecuador. Siya nakadungog sa kamatuoran sa edad 80, unya nagtuon sa pagbasa ug pagsulat. Siya nabawtismohan duha ka tuig sa ulahi. Sanglit nagpuyo man siya sa lasang, kinahanglang mobaktas siyag tulo ka oras sa pag-abot sa Kingdom Hall. Ang iyang masupakong asawa magtago sa iyang sinina ug kuwarta aron siya maluya sa pagtambong sa Kristohanong mga tigom. Apan ang maong matinumanong igsoong lalaki wala magpadaog nianang mga sulirana. Siya nag-alagad nga temporaryo o auxiliary nga payunir, sa kada bulan sulod sa napulo ka tuig ug misangyaw sa daghang balangay, nga kadaghanan panamastamasan pa sa mga tagabalangay. Bisan pa niana, sa misangyaw sa ulahi ang mga payunir ug mga misyonaryo nianang mga dapita, daghang tawo ang miduol kanila ug mihangyog mga pagtuon sa Bibliya. Busa, miresulta ang maayong mga butang sa pagkugi niadtong madasigong igsoon. Siya namatay sa kanser sa edad 92 apan migugol ug 40 oras sa pagsangyaw sa bulan mismo nga siya namatay.

18. (a) Unsay kinahanglang atong buhaton aron atong mapahimuslan ang balaang pag-uyon? (b) Unsang mga ganti ang atong maangkon kon kita magapadayon sa “paglakaw pinaagi sa pagtuo, dili pinaagi sa makita”?

¹⁸ Kita, usab, kinahanglang molahutay bisan pa sa mga suliran ug mga kalisod. (Mateo 24:13) Aron mapahimuslan ang balaang pag-uyon, hinungdanong magpadapat kita sa tambag sa Diyos, mosalig kaniya, ug magpabiling bulag sa kalibotan, sa mga tinamdan niini, ug sa mga paagi niini. (Salmo 37:5; 1 Corinto 2:12; Santiago 1:27) Busa, manlimbasog kita sa pagsunod sa atong Sulundan, si Jesu-Kristo. Magmasakripisyohon kita sa atong kaugalingon ug maandam sa paghago sa mahimayaong pag-alagad kang Jehova. Samtang buhaton nato kini, kita masaligong makapaabot sa pagkatuman sa talagsaong mga panaad sa atong langitnong Amahan sa iyang maunongong mga magsisimba. Ug sa unsang kahibulongang mga panalangin kini motultol diha sa iyang gisaad nga Bag-ong Kahikayan! Labaw sa tanan, ang “paglakaw pinaagi sa pagtuo, dili pinaagi sa makita” mohatag kanato sa ganti nga mao ang pag-ambit sa pagbayaw sa unibersohanong pagkasoberano ni Jehova.

Nahinumdom Ka Ba?

◻ Unsa ang mga kapeligrohan sa ‘paglakaw pinaagi sa makita’?

◻ Ang mga kasinatian sa mga Israelinhon nagahatag sa unsang pasidaan alang sa katawhan ni Jehova karong adlawa?

◻ Inay sa pagpatuman sa atong gusto, unsay kinahanglang atong buhaton?

◻ Ang “paglakaw pinaagi sa pagtuo” nagkahulogan sa pagbuhat sa unsa?

11. Ang pagpatuman sa atong gusto mahimong adunay unsang epekto, apan kinahanglang atong buhaton ang unsa?

[Mga letrato sa panid 12]

Samtang ang kaubang mga saksi ni Jehova nagaapil sa teokratikanhong mga buluhaton, ikaw ba ug ang imong pamilya kanunay nagapaingon sa dapit-lulinghayawan?

[Hulagway sa panid 14]

Gihatag kanato ni Jesu-Kristo, ang labing maayong panig-ingnan. Sama kaniya, ikaw ba “nagalakaw pinaagi sa pagtuo”?