Paglakaw Uban sa Diyos—Ang Unang mga Lakang
“Duol sa Diyos, ug siya moduol kaninyo.”—SANTIAGO 4:8.
1, 2. Nganong makaingon ka nga usa ka dakong pribilehiyo ang pag-alagad kang Jehova?
ANG tawo nag-antos sa bilanggoan sa daghang katuigan. Unya siya gipatawag atubangan sa magmamando sa yuta. Kusog nga midagan ang mga hitabo. Sa kalit, nakita sa binilanggo ang iyang kaugalingon nga nag-alagad sa labing gamhanang hari niadtong panahona sa yuta. Ang binilanggo kanhi gihatagan ug dakong katungdanan ug talagsaong dungog. Si Jose—ang tawo kansang mga tiil kas-a gikadenahan—karon naglakaw uban sa hari!—Genesis 41:14, 39-43; Salmo 105:17, 18.
2 Karong adlawa, ang mga tawo adunay higayon sa pagpakigbahin sa pag-alagad sa usa nga mas dako kay kang Paraon sa Ehipto. Ang Supremong Usa sa uniberso nagdapit kanatong tanan sa pag-alagad kaniya. Pagkadakong pribilehiyo ang paghimo niini ug pag-ugmad ug suod nga relasyon uban kang Jehova, ang labing-gamhanang Diyos! Diha sa Kasulatan, ang halangdong gahom ug kaambong maingon man kalinaw, katahom, ug pagkamaayo nalangkit kaniya. (Ezequiel 1:26-28; Pinadayag 4:1-3) Tugob sa gugma ang tanan niyang mga pakiglabot. (1 Juan 4:8) Dili gayod siya mamakak. (Numeros 23:19) Ug dili gayod si Jehova mohigawad sa mga maunongon kaniya. (Salmo 18:25) Pinaagi sa pagsunod sa iyang matarong nga mga kinahanglanon, atong matagamtam ang malipayon, makahuloganong mga kinabuhi karon, nga anaa sa hunahuna ang walay kataposang kinabuhi. (Juan 17:3) Walay tawhanong magmamando ang nakatanyag ug bisan unsa nga ikatandi sa maong mga panalangin ug mga pribilehiyo.
3. Sa unsang paagi si Noe “naglakaw uban sa matuod nga Diyos”?
3 Sa dugay na kaayong panahon, ang patriarkang si Noe determinado sa pagkinabuhi nga nahiuyon sa kabubut-on ug katuyoan sa Diyos. Mahitungod kaniya, ang Bibliya nag-ingon: “Si Noe maoy usa ka tawong matarong. Iyang gipamatud-an ang iyang kaugalingon nga matul-id taliwala sa iyang mga katalirongan. Si Noe naglakaw uban sa matuod nga Diyos.” (Genesis 6:9) Sa pagkamatuod, si Noe wala sa literal naglakaw uban kang Jehova, sanglit wala ganiy tawo nga “nakakita sa Diyos sa bisan unsang panahon.” (Juan 1:18) Hinunoa, si Noe naglakaw uban sa Diyos sa pagkaagi nga iyang gituman ang gisugo sa Diyos kaniya nga pagabuhaton. Tungod kay gideboto ni Noe ang iyang kinabuhi sa pagtuman sa kabubut-on ni Jehova, iyang natagamtam ang mainit, suod nga relasyon uban sa Labing-Gamhanang Diyos. Sama kang Noe, minilyon karong adlawa ang ‘naglakaw uban sa Diyos’ pinaagi sa pagkinabuhi nga nahiuyon sa tambag ug instruksiyon ni Jehova. Sa unsang paagi ang tawo makasugod ug ingon niana nga dalan?
Tukmang Kahibalo Hinungdanon
4. Sa unsang paagi gitudloan ni Jehova ang iyang katawhan?
4 Aron makalakaw uban kang Jehova, una kita kinahanglang mahibalo mahitungod kaniya. Ang manalagnang Isaias nagtagna: “Mahitabo sa ulahing bahin sa mga adlaw nga ang bukid sa balay ni Jehova malig-ong pagatukoron sa ibabaw sa tumoy sa kabukiran, ug kini igatuboy gayod ibabaw sa kabungtoran; ug ang tanang nasod magaganayan ngadto niana. Ug daghang tawo mangadto ug manag-ingon: ‘Umari, kamong katawhan, ug manungas kita ngadto sa bukid ni Jehova, ngadto sa balay sa Diyos ni Jacob; ug kita pagatudloan niya sa iyang mga dalan, ug manglakat kita sa iyang mga alagianan.’ Kay gikan sa Sion mogula ang kasugoan, ug ang pulong ni Jehova gikan sa Jerusalem.” (Isaias 2:2, 3) Oo, kita makasalig nga pagatudloan ni Jehova ang tanan niadtong nagtinguha sa paglakat sa iyang mga dalan. Si Jehova nagtagana sa iyang Pulong, ang Bibliya, ug siya motabang kanato sa pagsabot niana. Ang usa ka paagi nga iya kining himoon maoy pinaagi sa ‘matinumanon ug maalamong ulipon.’ (Mateo 24:45-47) Gigamit ni Jehova ang ‘matinumanong ulipon’ sa pagtagana sa espirituwal nga instruksiyon pinaagi sa pinasukad-sa-Bibliya nga mga publikasyon, Kristohanong mga tigom, ug sa kahikayan sa libreng pagtuon sa Bibliya diha sa balay. Tabangan usab sa Diyos ang iyang katawhan nga makasabot sa iyang Pulong pinaagi sa iyang balaang espiritu.—1 Corinto 2:10-16.
5. Nganong ang Kasulatanhong kamatuoran bililhon kaayo?
5 Bisan pag wala kitay ibayad nga salapi alang sa kamatuoran sa Bibliya, kini bililhon. Samtang kita magtuon sa Pulong sa Diyos, kita makakat-on mahitungod sa Diyos mismo—sa iyang ngalan, iyang personalidad, iyang katuyoan, ug paagi sa iyang pagpakiglabot sa mga tawo. Kita makakat-on usab sa makahatag-ug-kagawasan nga mga tubag sa hinungdanong mga pangutana sa kinabuhi: Nganong ania kita dinhi? Nganong gitugotan sa Diyos ang pag-antos? Unsay anaa sa umaabot? Nganong kita matigulang ug mamatay? Aduna bay kinabuhi luyo sa kamatayon? Dugang pa, kita makakat-on kon unsa ang kabubut-on sa Diyos alang kanato, sa ato pa, kon unsaon nato paglakaw aron mapahimut-an siya sa bug-os. Atong makat-onan nga ang iyang mga kinahanglanon makataronganon ug sa katingalahan makahatag ug kaayohan kon kita magkinabuhi sumala niana. Kon walay instruksiyon sa Diyos, dili gayod nato masabtan ang maong mga butang.
6. Ang tukmang kahibalo sa Bibliya nagpaarang kanato sa pagsubay sa unsang dalan?
6 Ang kamatuoran sa Bibliya gamhanan ug magpalihok kanato sa paghimog mga kausaban sa atong mga kinabuhi. (Hebreohanon 4:12) Sa wala pa makabaton ug kahibalo sa Kasulatan, kita makalakaw lamang nga “uyon sa sistema sa mga butang niining kalibotana.” (Efeso 2:2) Apan ang tukmang kahibalo sa Pulong sa Diyos naglatid ug lahi nga dalan alang kanato aron kita ‘makalakaw nga takos kang Jehova sa katuyoan nga makapahimuot kaniya sa bug-os.’ (Colosas 1:10) Pagkadakong kalipay ang pagtikang sa atong unang mga lakang diha sa paglakaw uban kang Jehova, ang labing halangdong Persona sa tibuok uniberso!—Lucas 11:28.
Duha ka Hinungdanong mga Lakang—Pagpahinungod ug Bawtismo
7. Samtang kita magtuon sa Pulong sa Diyos, unsang kamatuoran bahin sa tawhanong pagpangulo ang madayag?
7 Sa dihang motubo ang atong pagsabot sa Bibliya, kita mosugod sa pagsusi sa tawhanong mga kalihokan ug sa atong kaugalingong mga kinabuhi sumala sa espirituwal nga kahayag sa Pulong sa Diyos. Sa ingon usa ka hinungdanong kamatuoran ang madayag. Kana nga kamatuoran gipahayag sa dugay na kaayong panahon kanhi ni manalagnang Jeremias, kinsa nagsulat: “Ako nasayod pag-ayo, Oh Jehova, nga ang dalan sa tawo dili iyang kaugalingon. Dili iya sa tawo nga naglakaw sa pagbuot sa iyang lakang.” (Jeremias 10:23) Ang mga tawo—kitang tanan—nagkinahanglan sa pagtultol sa Diyos.
8. (a) Unsay magpalihok sa mga tawo sa pagpahinungod sa Diyos? (b) Unsa ang Kristohanong pagpahinungod?
8 Ang pagsabot niining hinungdanong kamatuoran mopukaw kanato sa pagpangita sa pagtultol gikan kang Jehova. Ug ang gugma alang sa Diyos mopalihok kanato sa pagpahinungod sa atong kinabuhi ngadto kaniya. Sa pagpahinungod ngadto sa Diyos nagpasabot nga moduol kaniya diha sa pag-ampo ug tim-os nga mosaad sa paggamit sa atong kinabuhi sa pag-alagad kaniya ug sa paglakaw nga matinumanon diha sa iyang mga dalan. Sa paghimo niini, atong gisunod ang panig-ingnan ni Jesus, kinsa mitanyag sa iyang kaugalingon ngadto kang Jehova nga may malig-ong determinasyon sa pagtuman sa kabubut-on sa Diyos.—Hebreohanon 10:7.
9. Nganong ang mga indibiduwal nagpahinungod sa ilang kinabuhi ngadto kang Jehova?
9 Si Jehova nga Diyos dili gayod manghunat o mamugos kang bisan kinsa nga magpahinungod ngadto kaniya. (Itandi ang 2 Corinto 9:7.) Dugang pa, ang Diyos wala magpaabot kang bisan kinsa nga magpahinungod sa iyang kinabuhi ngadto Kaniya tungod sa pipila ka lumalabayng emosyon. Una bawtismohan, ang usa ka tawo kinahanglang usa na ka tinun-an, ug kana nagkinahanglan ug tim-os nga paningkamot sa pagkuhag kahibalo. (Mateo 28:19, 20) Nangaliyupo si Pablo niadtong nabawtismohan na sa ‘pagpresentar sa ilang mga lawas ingong usa ka halad nga buhi, balaan, dalawaton sa Diyos, usa ka sagradong pag-alagad uban sa ilang gahom sa pangatarongan.’ (Roma 12:1) Pinaagi sa samang paggamit sa atong gahom sa pangatarongan nga kita nagpahinungod kang Jehova nga Diyos. Human nakakat-on kon unsay nalangkit ug nangatarongang mainampingon sa maong butang, kita kinabubut-on ug malipayong nagpahinungod sa atong kinabuhi ngadto sa Diyos.—Salmo 110:3.
10. Sa unsang paagi ang pagpahinungod nalangkit sa bawtismo?
10 Human sa pagduol sa Diyos sa tago diha sa pag-ampo sa pagpahayag sa atong determinasyon sa paglakaw diha sa iyang mga dalan, atong himoon ang sunod nga lakang. Atong ipadayag sa publiko ang atong pagpahinungod pinaagi sa atong pagpabawtismo sa tubig. Kini maoy pagdeklarar sa publiko nga kita nanumpa sa pagtuman sa kabubut-on sa Diyos. Sa sinugdanan sa iyang yutan-ong ministeryo, si Jesus gibawtismohan ni Juan, sa ingon naghatag ug usa ka panig-ingnan alang kanato. (Mateo 3:13-17) Sa ulahi, gisugo ni Jesus ang iyang mga sumusunod sa paghimog mga tinun-an ug sa pagbawtismo kanila. Busa, ang pagpahinungod ug bawtismo maoy hinungdanong mga lakang alang kang bisan kinsa nga buot molakaw uban kang Jehova.
11, 12. (a) Sa unsang paagi ang bawtismo ikatandi sa kasal? (b) Unsang kaamgiran ang makuha tali sa atong relasyon kang Jehova ug nianang naglungtad tali sa bana ug asawa?
11 Ang pagkahimong usa ka nagpahinungod, bawtismadong tinun-an ni Jesu-Kristo may pagkaamgid sa pagpakasal. Diha sa ubay-ubayng kayutaan, daghang lakang ang himoon una pa ang adlaw sa kasal. Ang lalaki ug babaye magkita, magkailhanay, ug magkahigugmaay. Mosunod ang pagkahimong sinayoran. Ang kasal nagpadayag sa publiko sa kon unsay nahukom sa tago—sa pagsulod sa kaminyoon ug dayon mag-ipon ug puyo ingong bana ug asawa. Ang kasal mao ang dayag nga timaan sa sinugdanan sa maong espesyal nga relasyon. Kana nga petsa magtimaan sa sinugdanan sa kaminyoon. Sa susama, ang bawtismo magtimaan sa pagsugod sa usa ka kinabuhi nga gideboto sa paglakaw diha sa usa ka gipahinungod nga relasyon uban kang Jehova.
12 Palandonga ang laing kaamgiran. Human sa adlaw sa ilang kasal, ang gugma tali sa bana ug asawa angay molalom ug mohamtong. Aron mas masuod pa sa usag usa, ang duha nga kapikas sa kaminyoon kinahanglang sa dili-mahinakogon maningkamot sa pagpatunhay ug pagpalig-on sa ilang relasyon sa kaminyoon. Bisan tuod kita dili mosulod sa kaminyoon uban sa Diyos, human sa atong bawtismo kita kinahanglang maningkamot nga makabaton ug suod nga relasyon uban kang Jehova. Siya nagapaniid ug nagapabili sa atong mga paningkamot sa pagtuman sa iyang kabubut-on ug moduol kanato. “Duol sa Diyos,” nagsulat ang tinun-ang Santiago, “ug siya moduol kaninyo.”—Santiago 4:8.
Paglakaw Diha sa mga Lakang ni Jesus
13. Sa paglakaw uban sa Diyos, kang kinsang panig-ingnan ang angay natong sundon?
13 Aron makalakaw uban kang Jehova, kita kinahanglang mosunod sa panig-ingnan nga gipakita ni Jesu-Kristo. Si apostol Pedro nagsulat: “Niini nga dalan kamo gitawag, tungod kay bisan si Kristo nag-antos alang kaninyo, nga nagbilin kaninyo ug sulondan aron inyong sundon pag-ayo ang iyang mga tunob.” (1 Pedro 2:21) Sanglit si Jesus hingpit ug kita dili-hingpit, kita dili gayod sa bug-os makasunod sa panig-ingnan nga iyang gipakita. Bisan pa niana, si Jehova nagdahom nga atong himoon ang labing maayo nga atong maarangan. Atong tagdon ang lima ka bahin sa kinabuhi ug pag-alagad ni Jesus nga angay paningkamotan sa nagpahinungod nga mga Kristohanon nga pagasundon.
14. Unsay nalangkit sa pagkahibalo sa Pulong sa Diyos?
14 Si Jesus adunay tukma ug bug-os nga kahibalo sa Pulong sa Diyos. Sa panahon sa iyang pag-alagad, si Jesus kanunayng mokutlo gikan sa Hebreohanong Kasulatan. (Lucas 4:4, 8) Siyempre, ang daotang relihiyosong mga lider niadtong mga adlawa nagkutlo usab sa Kasulatan. (Mateo 22:23, 24) Ang kalainan mao nga si Jesus nakasabot sa gipasabot sa Kasulatan, ug iyang gipadapat kini sa iyang kinabuhi. Siya nahibalo dili lamang sa literal nga kahulogan sa Kasugoan kondili sa tinuod nga diwa usab niana. Samtang atong sundon ang panig-ingnan ni Kristo, kita usab angay maningkamot sa pagsabot sa Pulong sa Diyos, pagkuha sa kahulogan, o diwa, niana. Sa paghimo niini, kita mahimong inuyonan sa Diyos nga mga mamumuo nga makahimo sa ‘paggamit sa husto sa pulong sa kamatuoran.’—2 Timoteo 2:15.
15. Sa unsang paagi nagpakita si Jesus ug panig-ingnan sa paghisgot bahin sa Diyos?
15 Si Jesu-Kristo nakigsulti sa uban bahin sa iyang langitnong Amahan. Wala tagoa ni Jesus ang iyang kahibalo sa Pulong sa Diyos diha sa iyang kaugalingon. Bisan ang iyang mga kaaway nagtawag kaniya ingong “Magtutudlo,” tungod kay bisag asa siya moadto siya nakigsulti sa uban bahin kang Jehova ug sa Iyang mga katuyoan. (Mateo 12:38) Si Jesus nagsangyaw sa publiko diha sa dapit sa templo, sa mga sinagoga, sa mga siyudad, ug sa kabanikanhan. (Marcos 1:39; Lucas 8:1; Juan 18:20) Siya nagtudlo nga may kahangawa ug kalulot, nga nagpakitag gugma ngadto sa iyang mga natabangan. (Mateo 4:23) Kadtong nagsunod sa panig-ingnan ni Jesus makakaplag usab ug daghang dapit ug mga paagi sa pagtudlo sa uban bahin kang Jehova nga Diyos ug sa iyang katingalahang mga katuyoan.
16. Unsa ka suod ang relasyon ni Jesus uban sa mga isigkamagsisimba ni Jehova?
16 Gibati ni Jesus ang suod nga bugkos diha sa uban nga nagsimba kang Jehova. Samtang si Jesus nagpahayag ngadto sa mga tawo sa usa ka higayon, ang iyang inahan ug dili-magtutuong mga igsoon miabot aron sa pagpakigsulti kaniya. Ang asoy sa Bibliya nag-ingon: “May miingon kaniya: ‘Tan-awa! Ang imong inahan ug ang imong mga igsoon nagabarog sa gawas, nga nagatinguhang makigsulti kanimo.’ Ingong tubag miingon siya sa usa nga nagasulti kaniya: ‘Kinsa ang akong inahan, ug kinsa ang akong mga igsoon?’ Ug mipunting sa iyang kamot ngadto sa iyang mga tinun-an, siya miingon: ‘Tan-awa! Ang akong inahan ug akong mga igsoon! Kay si bisan kinsa nga nagabuhat sa kabubut-on sa akong Amahan nga anaa sa langit, mao ang akong igsoong lalaki, ug igsoong babaye, ug inahan.’” (Mateo 12:47-50) Wala kini magpasabot nga gisalikway ni Jesus ang iyang pamilya, kay ang sunod nga mga hitabo nagpamatuod nga wala. (Juan 19:25-27) Bisan pa, kining asoya nagpasiugda sa gugma ni Jesus alang sa mga isigkamagtutuo. Sa susama karong adlawa, kadtong naglakaw uban sa Diyos mangita sa panag-uban sa ubang mga alagad ni Jehova ug nakakat-on sa paghigugma gayod kanila.—1 Pedro 4:8.
17. Unsay gibati ni Jesus labot sa pagtuman sa kabubut-on sa iyang langitnong Amahan, ug sa unsang paagi kini makaapektar kanato?
17 Pinaagi sa pagtuman sa kabubut-on sa Diyos, si Jesus nagpakitag gugma sa iyang langitnong Amahan. Gisugot ni Jesus si Jehova sa tanang butang. Siya miingon: “Ang akong pagkaon mao ang pagbuhat ko sa kabubut-on niya nga nagpadala kanako ug ang paghuman sa iyang buluhaton.” (Juan 4:34) Si Kristo miingon usab: “Ako kanunayng nagabuhat sa mga butang nga makapahimuot [sa Diyos].” (Juan 8:29) Gihigugma pag-ayo ni Jesus ang iyang langitnong Amahan nga tungod niana “siya mipaubos sa iyang kaugalingon ug nagmasinugtanon hangtod sa kamatayon, oo, kamatayon diha sa sakitanang estaka.” (Filipos 2:8) Sa baylo, gipanalanginan ni Jehova si Jesus, gibayaw siya ngadto sa usa ka posisyon nga may awtoridad ug dungog nga ikaduha lamang kang Jehova mismo. (Filipos 2:9-11) Sama kang Jesus, kita magpakita sa atong gugma sa Diyos pinaagi sa pagbantay sa iyang mga sugo ug pinaagi sa pagtuman sa iyang kabubut-on.—1 Juan 5:3.
18. Sa unsang paagi si Jesus naghatag ug panig-ingnan bahin sa pag-ampo?
18 Si Jesus maoy usa ka tawo nga nag-ampo kanunay. Siya nag-ampo panahon sa iyang bawtismo. (Lucas 3:21) Sa wala pa magpili sa iyang 12 ka apostoles, iyang gigugol ang tibuok gabii sa pag-ampo. (Lucas 6:12, 13) Gitudloan ni Jesus ang iyang mga tinun-an kon unsaon pag-ampo. (Lucas 11:1-4) Sa gabii una pa sa iyang kamatayon, siya nag-ampo alang ug uban sa iyang mga tinun-an. (Juan 17:1-26) Ang pag-ampo maoy usa ka hinungdanong bahin sa kinabuhi ni Jesus, maingon man angay nga hinungdanong bahin usab kini sa atong mga kinabuhi, sanglit kita iyang mga sumusunod. Pagkadakong kadungganan ang pagpakigsulti ngadto sa Soberano sa Uniberso diha sa pag-ampo! Dugang pa, si Jehova motubag sa mga pag-ampo, kay si Juan nagsulat: “Mao kini ang pagsalig nga atong gibatonan ngadto kaniya, nga, walay sapayan kon unsay atong pangayoon sumala sa iyang kabubut-on, kita iyang dunggon. Dugang pa, kon nahibalo kita nga iya kitang dunggon mahitungod sa bisan unsa nga atong ginapangayo, nahibalo kita nga mabatonan nato ang mga butang nga gipangayo sanglit ato mang gipangayo kini kaniya.”—1 Juan 5:14, 15.
19. (a) Unsang mga hiyas ni Jesus ang angay natong pagasundon? (b) Sa unsang mga paagi kita makabaton ug kaayohan gikan sa pagtuon sa kinabuhi ug ministeryo ni Jesus?
19 Daghan pa kaayo ang pagakat-onan gikan sa pagsusig maayo sa yutan-ong kinabuhi ug ministeryo ni Jesu-Kristo! Palandonga ang mga hiyas nga iyang gipasundayag: gugma, kahangawa, kalulot, kalig-on, pagkatimbang, pagkamakataronganon, pagkamapainubsanon, kaisog, ug pagkadili-hakog. Kon dugang kita nga magtuon bahin kang Jesus, mas modako pa ang atong tinguha nga mahimong iyang matinumanong mga sumusunod. Ang kahibalo bahin kang Jesus mas magpasuod usab kanato kang Jehova. Kon buot sabton, si Jesus maoy usa ka hingpit nga sumbalik-silaw sa iyang langitnong Amahan. Suod kaayo siya kang Jehova nga siya nakaingon: “Siya nga nakakita kanako nakakita na usab sa Amahan.”—Juan 14:9.
Salig sa Diyos nga Molig-on Kanimo
20. Sa unsang paagi kita makabaton ug pagsalig sa paglakaw uban kang Jehova?
20 Kon ang mga bata nagtuon pa sa paglakaw, ang ilang mga lakang dili-tarong. Sa unsang paagi sila makakat-on sa paglakaw nga masaligon? Pinaagi lamang sa pagbansay ug pagkamalahutayon. Aw, kadtong naglakaw uban kang Jehova naningkamot sa paglakaw nga may masaligon, tarong nga lakang. Kini usab nagkinahanglag panahon ug pagkamalahutayon. Gipasiugda ni Pablo ang bili sa pagkamalahutayon sa paglakaw uban sa Diyos sa dihang siya nagsulat: “Sa kataposan, mga igsoon, kami nagahangyo kaninyo ug maawhagong nagatambag kaninyo pinaagi sa Ginoong Jesus, maingon sa inyong gidawat ang instruksiyon gikan kanamo kon sa unsang paagi kamo angay magalakaw ug magapahimuot sa Diyos, maingon sa inyo gayong paglakaw karon, nga kamo padayong magabuhat niini sa mas bug-os pa.”—1 Tesalonica 4:1.
21. Samtang kita maglakaw uban kang Jehova, unsang mga panalangin ang atong matagamtam?
21 Kon kita bug-os nga debotado sa Diyos, siya motabang kanato aron makapadayon sa paglakaw uban kaniya. (Isaias 40:29-31) Walay ikatanyag kining kalibotana nga ikatandi sa mga panalangin nga iyang ihatag ngadto niadtong nagalakaw sa iyang mga dalan. Siya mao ‘ang Usa nga nagatudlo kanato aron kita makabaton ug kaayohan, ang Usa nga nagpalakaw kanato diha sa dalan nga angay natong pagalaktan. Ug kon kita magbantay gayod sa iyang mga sugo, ang atong pakigdait mahisama sa suba, ug ang atong pagkamatarong mahisama sa mga balod sa dagat.’ (Isaias 48:17, 18) Pinaagi sa pagdawat sa imbitasyon sa paglakaw uban sa Diyos ug pinaagi sa matinumanong paghimo niini, atong matagamtam ang kalinaw uban kaniya sa walay kataposan.
Unsay Imong Tubag?
◻ Nganong usa ka kadungganan ang paglakaw uban sa matuod nga Diyos?
◻ Nganong ang pagtuon, pagpahinungod, ug bawtismo maoy unang mga lakang sa paglakaw uban kang Jehova?
◻ Sa unsang paagi atong masunod ang mga lakang ni Jesus?
◻ Sa unsang paagi kita nahibalo nga lig-onon kita ni Jehova samtang maglakaw kita uban kaniya?
[Mga hulagway sa panid 13]
Ang pagtuon, pagpahinungod, ug bawtismo maoy unang mga lakang sa paglakaw uban sa Diyos