Ang mga Mananap sa Apokalipsis—Nganong Basahon ang Bahin Niana?

APOKALIPSIS! Usa kana sa talagsaong mga ngalang gihatag sa kataposang basahon sa Bibliya. Kini gitawag usab nga basahon sa Pinadayag. Ang basahon puno sa tin-awng mga paghulagway pinaagig pulong, nga ilado niana mao ang paghulagway sa usa ka dragon ug sa tulo ka mapintas nga mananap. Malisang ang pipila niining mga mananapa. Isipon sa uban nga kini mga handuraw lamang sa usa ka tawong tigulang. Nan, nganong angay man nimong basahon ang bahin sa mga mananap sa Apokalipsis? Tungod kay nalangkit ang imong kalipay.

Matuod, si apostol Juan usa ka tawong tigulang sa iyang gisulat ang basahon sa Pinadayag sa duolag 1,900 ka tuig kanhi. Apan, nagkahulogan ba kana nga ang mga mananap nga ginabatbat niini maoy mga handurawan sa hunahunang giangoango? Dili, ug si Juan dili ang unang tawong tigulang nga nakabaton sa maong mga panan-awon. Ang usa ka tawong si Daniel nakakita usab ug mga panan-awon sa mga mananap sa iyang pagkatigulang, ug kining maong mga panan-awon napamatud-ang tukmang mga tagna bahin sa mga kausaban sa tawhanong kagamhanan. (Daniel, mga kapitulo 7 ug 8) Dugang pa, si Jesu-Kristo mismo nag-isip kang Daniel nga dinasig sa Diyos, nga nagtawag kaniyang propeta ug nagkutlo sa iyang mga sinulat.​—Mateo 24:15.

Gipaila ni Jesus nga madawat sa iyang mga apostol ang dugang balaang instruksiyon tapos siya mamatay. (Juan 16:12, 13) Ug sanglit daghang bahin sa basahon sa Pinadayag nangatuman sa talagsaong paagi, makatino kitang ang mga panan-awon ni apostol Juan sa mga mananap sa Apokalipsis dinasig usab sa Diyos.​—2 Timoteo 3:16.

Ang introduksiyon sa basahon sa Pinadayag nagaingon: “Usa ka Pinadayag ni Jesu-Kristo, nga gihatag sa Diyos kaniya . . . Ug iyang gipadala ang iyang manulonda ug gihatag kini sa mga ilhanan pinaagi kaniya ngadto sa iyang ulipong si Juan.” (Pinadayag 1:1) Busa, ang mga larawan sa basahon sa Pinadayag, apil ang mga larawan sa mga mananap niini, maoy simboliko, dili literal. Dili kinahanglang mahadlok nga mobasa bahin niini kanila. Kining simbolikong mga mananap mohatag sa mga Kristohanon sa bililhong kahibalo, nga mopaarang kanila sa pagtipig sa ilang relasyon uban sa Diyos. Busa, si apostol Juan nakasulat: “Malipayon ang nagabasa sa makusog ug ang nagapatalinghog sa mga pulong niini nga tagna, ug nagatuman sa mga butang nahisulat niini; kay haduol na ang tinudlong panahon.” Oo, ang pagkasabot nimo niining mga simboloha makahatag kalipay karon ug sa umaabot.​—Pinadayag 1:3.