Ang Papa ug ang Apokalipsis

ANG librong AVERTING ARMAGEDDON mao ang titulo nga gihatag sa duha ka reporter sa ilang 1984 nga libro bahin sa politika sa kapapahan. Si Gordon Thomas ug Max Morgan-Witts nagtaho mahitungod sa kapapahan sa nangaging 17 ka tuig. Unsang katin-awan ang atong makuha gikan kanila may kalabotan sa dagkong mga lider sa Katolikong Iglesya mahitungod sa apokalipsis?

Sumala niining maong mga reporter, si Monsignor Emery Kabongo, personal nga kalihim ni Juan Paulo II, miingon: “Kaamgid ang Papa sa espirituwal nga Hercules nga nanlimbasog sa pagbulag sa dagkong mga gahom, nanlimbasog sa pagsanta sa nukleyar nga Armageddon.”

Mopatim-aw nga ang mga lider sa iglesya nabalaka tinuod bahin sa tibuok yutang kalaglagan pinaagi sa tawhanong buhat imbes sa mapiliong pagpangilabot sa tawhanong kahikayan​—ang Apokalipsis nga gitagna sa Bibliya. Busa, ang Averting Armageddon miingon: “Taliwala sa kaubanan ni Kabongo, walay timaan sa tensiyon sa atubangan sa pagpaningkamot sa pagsumpo sa apokalipsis nga ilang namatikdan. . . . Apan luyo niini adunay tensiyon nga gikan sa internasyonal nga Katigoman sa mga Obispo. Kini mihimog deklarasyon nga makatalagmanon, nga nayugot sa ‘makiggubatong pagkaagresibo, kabangisan ug terorismo, sa pagtumpig ubang mga kagamitan sa gubat ug ilabina sa nukleyar nga mga armas, ug sa makauulawng negosyo sa tanang hinagiban sa gubat.’” Nalangkit bisan ang papa. Si Thomas ug Morgan-Witts mitaho nga ang mga libro sa estante sa iyang tun-anan may mga sinulat sama sa International Defense Review, The Problems of Military Readiness, ug Surprise Attack: Lessons for Defense Planning. Sila midugang:

“Sunod sa mga basahon sa relihiyon may mga libro nga gikaikagan karon sa Papa: ang eskatolohiya, ang pagtuon sa mga pagtulon-an sa Bibliya nga nagpamatuod nga inagurasyonan sa Diyos ang Iyang Gingharian sa yuta pinaagi sa sunodsunod nga ‘mga hitabo’ aron sa pagtapos sa usa ka panahon. Si Juan Paulo hugot nga nagtuo . . . nga, sa dili pa matapos ang siglo, usa ka butang nga ‘mahukmanon’ mosilhig sa kalibotan. Kamatay kaha kini, Ikaduhang Itom nga Kamatayon? O hulaw ba o kagutmanan sa dili mahanduraw nga sukod? O nukleyar ba nga gubat? Ang iyang gikahadlokan karon mao ang naulahi; tingali, kay nailhan siya nga nagapalandong, siya ang natudlo sa katungdanan sa pagkaulo sa Iglesya sa yugto sa panahon nga mahimong mao ang kataposang dekada sa kalibotan sa dili pa kini sa dumalayon madaot sa nukleyar nga kaugdawan sa kinabuhi.”

Gihatagan usab ug pagtagad sa Averting Armageddon ang simbolikong “orasan sa kalaglagan” nga kanunayng gipasiugda sa Bulletin of the Atomic Scientists. Sa gipatik kining maong “orasan” sa Disyembre 1947, giyawihan kini sa menos siyete sa dili pa magtungang gabii sa pagpakita “kon unsa ka duol ang kalibotan sa nukleyar nga Armageddon.” Human sa kasabotan sa 1972 sa paglimiti sa hinagiban (SALT), ang mga kamot sa orasan gisibog sa 12 minutos sa dili pa magtungang gabii. Sa 1984 si Thomas ug Morgan-Witts misulat: “Ang orasan karon mabasa nga orasan na lang ka minuto sa dili pa magtungang gabii. Kini ang kinaduolan sa adlaw sa kalaglagan sulod sa katloan ka tuig.”

Bisan pa sa mga paningkamot sa kapapahan “sa pagsumpo sa nukleyar nga Armageddon,” sa Nobyembre 1985, ang mga kamot sa relo nagpakita nga 3 minutos na lang ang nahibilin. Hinunoa, pasagdi nga kita dili madala sa kabalaka kon laglagon ba sa kanasoran ang katawhan. Imbes mangusog sa paglikay sa apokalipsis, kita maalamon kon atong pangitaon ang paagi sa Diyos sa kaluwasan latas sa apokalipsis, kay kini tino nga “moabot diha sa tanang ginapuy-ang yuta.”​—Pinadayag 3:10.