Mga Magmamantala sa Gingharian Nagtaho

Pagtigom sa “Ubang mga Karnero” sa Ginoo sa Australia

“AKONG pagauyogon ang tanang kanasoran, ug ang tilinguhaong mga butang sa tanang kanasoran magasulod,” misulat si propetang Haggeo kapin ug 2,500 ka tuig nga miagi. (Haggeo 2:7) Karong adlawa, ang maong mga tilinguhaon tinuod nagapanon ngadto sa balay ni Jehova sa pagsimba. Hinuon, sa sinugdan sila tingali dili mopatim-awng tilinguhaon kaayo sa gawas, sumala sa gipakita niining kasinatian gikan sa Australia:

◻ Ang usa ka igsoong lalaking nagsakay sa iyang kotse paingon sa tigom usa ka Dominggo mibuhat sa usa ka butang wala niya mabuhat sa nangagi. Siya mihunong sa pagpasakay sa usa ka tig-angkas. Wala masayod ang igsoon nganong iyang gibuhat kadto, kay ang batan-ong lalaki may taas, dili-sinudlay nga buhok ug bungot, dili maayog pamiste, ug wala gani mosenyas aron mosakay. Sa kalit ang igsoong lalaki mibating siya angay mohunong ug mopasakay kaniya. Sa misakay ang batan-ong lalaki sa kotse, siya miingon: “Moadto ka sa simbahan, dili ba?” Nga natingala, ang igsoon mitubag: “Aw, oo, moadto ako sa Kingdom Hall.” “Mouban ko nimo,” matud sa batan-ong lalaki.

Tungod sa iyang dagway, gisulayan sa igsoon ang pagpakigsulti aron siya dili modayon. Apan mipugos ang batan-ong lalaki nga moadto ug misugilon niining estoryaha: Siya milayas sa balay sa edad 16 ug sukad niadto nalangkit pag-ayo sa mga droga ug imoralidad. Siya nagpuyo sa silong sa usa ka pliegong plastik luyo sa mga bungtod sa balas duol sa baybay. Samtang didto, misugod siya sa pagpalandong nga seryoso sa kahulogan sa kinabuhi. Wala siya moangay sa iyang gidangatan, mao nga siya miampo sa Diyos alang sa panabang. Siya miingon nga iyang giingnan ang Diyos nga siya moadto sa dalan ug miampo nga Siya magtultol sa usa ka tawo sa pagpasakay kaniya ug pagdala kaniya ngadto sa hustong simbahan. Talagsa ra ang mga kotse nga moagi sa maong mingaw nga dalan. Tulo lamang ang milabay sa daghang oras, ug walay mausa ang mihunong alang kaniya. Hapit na siyang mosurender sa dihang milabay ang igsoon ug mipasakay kaniya.

Mitambong siya sa tanang tigom nianang semanaha ug misugod sa paghinlo sa iyang kaugalingon. Iya ganing gitangtang ang krus nga iyang gikuwentas. Mihukom siya sa pag-uli ngadto sa iyang balay sa Tasmania, diin iyang gigugol ang usa ka bulan sa pagbasa sa Bibliya ug pag-ampo. Siya, kay nakaamgong gikinahanglan niya ang personal nga tabang aron mouswag sa dugang, miadto sa Australianong sangang buhatan sa Watch Tower Society. Ang pila ka payunir gipadala sa pagtuon uban kaniya, ug kusog ang iyang pag-uswag. Ang kamatuoran gikan sa Bibliya mihatag ug kahulogan sa iyang kinabuhi ug paglaom sa ugma-damlag. (Proverbio 10:28) Sulod sa pito ka bulan siya nabawtismohan ug nag-auxiliary payunir, ug karon siya nagaalagad ingong regular payunir sa Sydney.

◻ Kita “makadayandayan sa pagtulon-an sa atong Manluluwas, ang Diyos,” pinaagi sa pagsunod sa mga prinsipyo sa Bibliya diha sa atong kagawian. (Tito 2:10) Kini giilustrar sa kaso sa usa ka igsoong lalaki nga nagtrabaho sa usa ka kompaniya diin misilaob ang usa ka industriyal nga panaglalis mahitungod sa pag-eksportar sa mga karnero ug mga baka. Ang matag trabahante gihangyong moamot ug usa ka dolyar sa pagtabang sa pagprotesta sa panaglalis. Sa midumili ang igsoon, gibaharan siya sa opisyal sa unyon nga mawad-an sa iyang trabaho. Ang igsoon mipatin-aw nga, sumala sa konsensiya, siya dili makasuportar sa kasamok nga giorganisar. Gihatagan siya sa opisyal sa unyon ug usa ka oras sa pagpalandong niana.

Sa maong panahon ang igsoon nahimong tumong sa pagbiaybiay sa iyang kaubang mga trabahante. Iyang gipatin-aw kanila nga kadto dili tungod sa dolyar, apan sanglit ang pipila niadtong nalangkit sa panaglalis may mga pusil ug mga batotang dala, siya mahimong sad-an sa dugo kon siya mosuportar kanila ug may masamad o mapatay. Usa ka trabahante miingong siya wala makadungog sa nangagi sa maong punto de vista ug buot masayod sa dugang. Sa wala madugay, ang igsoon nakasugod ug usa ka pagtuon sa Bibliya uban sa trabahante, ug bisan pa sa pagsupak sa asawa sa trabahante, kining tawhana sa wala madugay misugod sa pagtambong ug mga tigom. Karong adlawa siya usa sa atong dedikadong mga igsoong lalaki. Bahin sa opisyal sa unyon, siya wala gayod mobalik sa pagkuwestiyon sa igsoong lalaki.

Tinuod nga kadtong nahigugma sa Diyos ug sa pagkamatarong, sa usa o laing paagi, maladlad sa kamatuoran ug makaila niana. Si Jesus miingon: “Ako adunay ubang karnero . . . nga akong pagadad-on, ug sila magapatalinghog sa akong tingog.” (Juan 10:16) Kapin ug 42,000 sa maong “ubang mga karnero” sa Australia nagpatalinghog na sa tingog sa Maayong Magbalantay, ug sa matag adlaw dugang ang ginatigom ngadto sa tuong kiliran ni Jesus nga may pag-uyon.​—Mateo 25:31-34.

[Blurb sa panid 22]

Kita “makadayandayan sa pagtulon-an sa atong Manluluwas, ang Diyos” pinaagi sa atong maayong kagawian