Ang Bibliya—Ang Libro Alang sa Tanang Katawhan

“TAN-AWA! usa ka dakong panon sa katawhan, nga walay tawo nga makaihap, gikan sa tanang kanasoran ug kabanayan ug katawhan ug pinulongan, nga nagbarog sa atubangan sa trono.”

Unsang matanga sa panon kana? Ug unsay ilang gihimo?

“Nanagdala silag mga palwa sa palmera sa ilang mga kamot,” mipadayon ang asoy. “Ug nanagsinggit sila sa makusog nga tingog, nga nag-ingon: ‘Ang kaluwasan nautang namo sa atong Diyos, nga nagalingkod sa trono, ug sa Kordero.’” Dili, dili kini mapintas nga panon sa katawhan nga may gipangayo o naghimog demonstrasyon alang sa usa ka kawsa. Hinunoa, kini maoy malipayon, masadyaong panon nga bag-o pang nakasinati sa makalilipayng hitabo. “Mao kini sila ang nanagpakalabang sa dakong kasakitan, . . . Sila dili na gutomon ni uhawon, . . . ug pagapahiran sa Diyos ang tanang luha sa ilang mga mata.”

Usa ka Balita Alang sa Tanang Katawhan

Ang paghulagway nianang internasyonal nga “dakong panon” makita sa kataposang basahon sa Bibliya, ang Pinadayag, sa kapitulo 7, bersikulo 9 ngadto sa 17. Sa mahulagwayong paagi, naghatag kini kanato ug pasiunang talan-awon sa panahon sa dinha nga ang katawhan dili na mabahin tungod sa rasa, pinulongan, ug nasyonalidad kondili magkahiusa diha sa pakigdait ug kalinaw ug makatagamtam sa tinuod nga kagawasan gikan sa kahadlok ug kawalad-on. Kana, sa kinatibuk-an, mao ang tagsaong balita nga gipadayag sa Bibliya alang sa tanang katawhan.

‘Apan,’ tingali mangutana ka, ‘sa unsang paagi tagsaon kanang balitaa? Dili ba ang tanang katawhan sa kalibotan naghisgot man ug pakigdait ug panaghiusa?’ Tinuod, naghisgot sila. Karong panahona sa internasyonal nga kapit-osan, nga migrabe tungod sa politikal, rasanhon, ekonomikanhon, ug relihiyosong mga paningkamot, kinsa ba ang may maayog panghunahuna nga dili mabalaka bahin sa kalinaw sa kalibotan? Apan sa una pang panahon sa mitungha ang internasyonal nga mga paningkamot ug sa una pang panahon nga nahimong isyu ang kaluwasan sa katawhan, ang Bibliya naghisgot na ug panahon diin tagamtamon sa tanang katawhan ang pakigdait ug panaghiusa ilalom sa usa ka kagamhanan, ang Gingharian sa Diyos.

Panghunahuna sa Kalibotan Sukad sa Sinugdan

Sukad pa sa sinugdan, gipahayag sa Bibliya ang panghunahuna sa kalibotan kon mahitungod sa umaabot sa katawhan. “Sumanay ug dumaghan kamo ug pun-a ninyo ang yuta ug magagahom kamo niini” mao ang unang sugo nga gihatag ngadto kang Adan ug Eva sa ilang Maglalalang, si Jehova nga Diyos. (Genesis 1:28) Si Adan ug Eva dili lang kay mahimo unyang mga ginikanan sa usa ka partikular nga rasa o nasod. Hinunoa, sila mahimong mga ginikanan sa tawhanong rasa. Gipamatud-an ni apostol Pablo kining kamatuorana sa iyang gidala ang balita sa Bibliya ngadto sa mga Gresyanhon sa Atenas. Iyang gisultihan sila nga ang Diyos mao ang “nagbuhat sa tanang nasod sa katawhan gikan sa usa ka tawo, aron papuy-on sa tanang dapit sa yuta.”—Buhat 17:26.

Kinahanglang atong dawaton nga dugay na diha sa hunahuna sa katawhan sa kinatibuk-an ang ideya nga mga igsoong lalaki ug igsoong babaye ang tibuok tawhanong rasa. Gani sa karon, bisan pa sa tanang pagsultihay sa kalibotan sa kalinaw ug panag-igsoonay, dili ba tinuod nga nagpadayon ang rasanhong pagpinig ug nasyonalismo nga lakip sa labing makapabahing puwersa nga naghampak sa katawhan? Apan, gidaog kini ug ang ubang mga kababagan sa Bibliya. Naghisgot kinig katawhan sa tanang kanasoran ingong usa ka dakong pamilya ug naghisgot kini nga ang yuta mao ang dakong puloy-anan alang sa bug-os tawhanong kaliwat. Niini nga diwa, kini sa pagkatinuod maoy basahon alang sa tanang katawhan.

Ang palaabuton nga magkinabuhi ang tibuok tawhanong kaliwat ingong malipayong pamilya sa tibuok yuta makab-ot unta kon nagpabilin pa si Adan ug Eva nga matinumanon kang Jehova nga Diyos. Apan wala kana mahitabo nianang paagiha. “Ang sala misulod sa kalibotan pinaagi sa usa ka tawo [Adan] ug ang kamatayon misulod pinaagi sa sala, nga tungod niini ang kamatayon mikuyanap ngadto sa tanang mga tawo tungod kay sila nakasala,” nag-ingon ang Bibliya kanato.​—Roma 5:12.

Tungod niini, walay rasa o nasod ang mas labaw o ubos sa bisan unsang rasa o nasod. Sa makausa pa, nagpahayag ang Bibliya sa tanang katawhan nga walay pagpinig o pinalabi. Sa matin-aw nagpakita lamang kini nga “ang tanan nakasala ug nakabsan sa himaya sa Diyos.” (Roma 3:23) Bisan tuod ang mga tawo sa pila ka dapit adunahan, mas edukado, ug uban pa, dili ba tinuod nga bisan asa pa kita motan-aw, makakita kitag mga tawo nga nagaatubang ug samamg pangunang mga problema​—sakit, pagkatigulang, pagkadili-hingpit, ug kamatayon?

Usa ka Saad nga Makaayo sa Tanang Katawhan

Bisan ug misamot ang tawhanong kahimtang, ang tawo wala pasagding mawad-ag paglaom. Sa malisod nga yugto, nangilabot si Jehova nga Diyos nga may saad. Diha kang Abraham, ang Diyos miingon: “Pinaagi sa imong binhi ang tanang kanasoran sa yuta magapanalangin sa ilang kaugalingon.” (Genesis 22:18) Sa sulagma, gidawat kining saara sa tulo ka dagkong relihiyon sa kalibotan​—Hudaismo, Kristiyanidad, ug Islam​—ingong bahin sa ilang mga pagtulon-an. Ang Bibliya lamang ang nagbutyag sa katumanan niining saara pinaagi sa pagtala sa mga pakiglabot ni Jehova nga Diyos kang Abraham ug sa iyang mga kaliwat, lakip sa karaang nasod sa Israel.

Apan wala kini dawata sa kadaghanang mga tawo. Ilang gibati nga kini maoy hulagway sa nasyonalistikong pagpalabi o pagpinig. Pinasukad niini ilang isalikway ang Bibliya, o ang daghang bahin sa Hebreohanong Kasulatan, ingong sugilanon lamang sa usa ka rasa. Apan makataronganon ba kini? Nganong nagpakita si Jehova ug pagsalig kang Abraham ug mihimog pakigsaad kaniya?

Ang Bibliya miasoy: “‘Si Abraham mituo kang Jehova, ug kini giisip kaniya nga maoy pagkamatarong,’ ug siya ginganlan nga ‘higala ni Jehova.’” (Santiago 2:23) Makaikag, ang balaang basahon sa Islam, ang Koran, nagpunting usab sa pagtuo ingong rason sa pagdawat sa Diyos kang Abraham nga higala. “Kinsa ang nakabaton sa mas maayong relihiyon kondili siya nga nagpasakop sa iyang kaugalingon sa bug-os kang Allah? Ug siya mao ang mamumuhat ug maayo (ngadto sa uban) ug nagsunod sa pagtuo ni Ibrahim [Abraham], ang matarong nga usa, ug gidawat ni Allah si Ibrahim ingong higala.”​—SURAH IV, bersikulo 125, Holy Qur’an, gihubad ni M. H. Shakir.

Komusta ang mga Israelitas? Kapin sa 400 ka tuig tapos nga mihatag ug saad ang Diyos kang Abraham, gisultihan sila ni Moises: “Si Jehova wala mahigugma kaninyo ni nagpili kaninyo tungod kay kamo ang labing daghan sa tanang mga katawhan, kay kamo mao ang labing diyutay sa tanang mga katawhan. Apan tungod kay si Jehova nahigugma kaninyo, ug tungod kay buot niyang pagabantayan ang panumpa nga gipanumpa niya sa inyong mga amahan.”​—Deuteronomio 7:7, 8.

Busa dili tungod kay si Abraham o ang mga Israelitas mas superyor nga rasa o nasod, o tungod kay sila mas maayo kay sa ubang katawhan. Hinunoa, tungod kadto sa gugma sa Diyos ug sa dili-takos nga kalulot nga gipakita tungod sa pagtuo ug sa matarong nga mga binuhatan. Gipasiugda ni apostol Pedro kining puntoha sa dihang miingon siya: “Ang Diyos walay pinalabi, hinunoa nga sa matag usa ka nasod iyang pagakahimut-an ang bisan kinsa nga magakahadlok kaniya ug magabuhat sa matarong.”​—Buhat 10:34, 35.

Busa, bisag ang nasod sa Israel lamang ang gitagad ni Jehova nga Diyos sa usa ka yugto, may panglantaw siya sa kaayohan sa tanang katawhan. Ang iyang mga pakiglabot sa Israel wala irekord sa Bibliya aron sa pagpaugda sa espiritu sa nasyonalismo o sa pagtuboy sa usa ka nasod kay sa uban. Hinunoa, “ang tanang butang gisulat sa pagtudlo kanato, nga pinaagi sa atong pag-antos ug sa paglipay gikan sa Kasulatan kita makabaton ug paglaom.” (Roma 15:4) Oo, kadtong mga hitaboa nagpasiugda sa gugma ug pailob sa Diyos sa katumanan sa paglaom nga ang tanang katawhan sa makausa pa mahiusa diha sa pakigdait ug kalinaw. Sa unsang paagi makab-ot kining paglaoma?

Usa ka Administrasyon sa Kalinaw

“Sumala sa gikahimut-an [sa Diyos] nga iyang gilaraw sa iyang kaugalingon ang usa ka administrasyon inig-abot sa tukmang panahon, nga mao, ang pagtigom sa tanang butang diha kang Kristo, ang mga butang sa mga langit ug sa mga butang sa yuta,” mibatbat si

Pablo. (Efeso 1:9, 10) Unsa kining “administrasyona”?

Ang termino gihubad gikan sa Gregong pulong nga oi·ko·no·miʹa nga nagkahulogang “pagdumala sa panimalay.” Busa, bisag nabahin ang katawhan sa politikanhon, rasanhon, ekonomikanhon, ug sa relihiyosong paagi, katuyoan sa Diyos sa pagwagtang niining makapabahing mga gahom ug sa pagtigom sa tanang masinundanong katawhan pag-usab ingong usa ka malipayong pamilya sa tibuok yuta. Sa unsang paagi iyang himoon kini? Iyang himoon kini pinaagi sa Mesyanikong Gingharian sa mga kamot sa iyang Anak, si Jesu-Kristo.​—Tan-awa ang Daniel 2:44; Isaias 9:6, 7.

Karon, bisan pa sa kagubot ug mga problema sa tibuok yuta, minilyon sa katawhan sa tibuok kalibotan misanong sa balita sa Bibliya bahin sa pakigdait ug kalinaw. Sila nanagpanggula sama nianang dili-maisip nga “dakong panon” nga gibatbat sa libro sa Pinadayag. Sa malarawanong paagi, sila nagawarawara na sa palwa sa palmera atubangan sa trono sa Diyos, nga nagatanyag sa ilang pagdayeg ug pagpasakop sa usa “nga naglingkod sa trono,” si Jehova nga Diyos, “ug sa Kordero,” si Jesu-Kristo.​—Pinadayag 7:9, 10.

Madanihon ba kanang balitaa alang kanimo? Bisan unsa pay imong rasa, nasyonalidad, o pinulongan, pinaagi sa pagsusi ug sa pagdawat sa balita sa Bibliya karon, ikaw makahimo sa pagpakig-uban nianang internasyonal nga “dakong panon.” Uban kanila, ikaw masaligong makaingon: “Adunay bag-ong langit ug usa ka bag-ong yuta nga atong gipaabot sumala sa saad [sa Diyos], nga niini nagapuyo ang pagkamatarong.”​—2 Pedro 3:13.

Sa pagkatinuod, ang Bibliya maoy Libro alang kanimo!

[Hulagway sa panid 5]

Si Adan ug Eva mao ang ginikanan sa tawhanong rasa

[Hulagway sa panid 7]

Si Abraham, nga mibiya sa iyang yutang natawhan, nakabaton sa pag-uyon sa Diyos tungod sa pagtuo ug sa matarong nga binuhatan