Ang Bibliya—Mapuslanon ba Alang sa Atong Adlaw?
KINING kalibotana nausab ug dako sa miaging siglo. Ang kausaban gikan sa mga adlaw sa kabayo ug karatela ngadto sa modernong panahon sa kawanangan tulin kaayong miabante nga subsob madaan dayon ang teknikal nga mga libro tapos sa pag-imprenta kanila. Anaa sa unahan ang bul-og diha sa mga natad sa siyensiya ug teknolohiya. Bisan tuod ang mga ideya bahin sa digital unang gigamit mga 150 ka tuig nga miagi, sa katuigang bag-o pa lang nga gigamit sa tibuok kalibotan ang mga kompiyuter, nga nagagahom sa tanan gikan sa paglansad sa mga satelayt ug salakwanang ngadto sa pagbalanse sa mga badyet sa panimalay. Kini tinuod nga katingalahan! Ang usa halos dili makaapas nianang tanan!
Mapuslanon ang daghang kausaban. Naapil kanila mao ang mga kauswagan diha sa natad sa komunikasyon, transportasyon, makadaginot-ug-kusog nga mga kasangkapan, ug sa medisina. Pananglitan, ang naputol nga kamot o tudlo, nga sa nangagi giisip nga nawala na gayod, kadaghanan mapasig-uli nga magamit pinaagi sa microsurgery. Kita makasakay sa ayroplano paingon sa pikas nga bahin sa atong yuta sa bahin lang sa adlaw, nga sa ingon makadaginot sa binulan nga biyahe. Kon itandi sa pila ka gatos ka tuig nga miagi—dihang wala pay mga kotse, mga radyo, mga TV, mga sine, mga repriherador, mga makina sa panglaba, mga bitamina, mga antibiotiko, mga bakuna, ug ginatos pang ubang butang nga kasagarang dinawat karong adlawa—kita nagapuyo gayod sa usa ka bag-ong panahon.
Apan ang tanan wala mosangpot sa kinalabwan natong kaayohan. Pananglitan, ang pagpahimulos sa nukleyar nga enerhiya nahimong kuyaw nga hulga alang sa katawhan tungod sa pakiggubat o radyasyon. Ang kaylap kemikal nga polusyon, usa ka segundang produkto sa atong industriyal nga teknolohiya, nakadugang nianang kuyawng hulga. Ang supak-balaod nga mga droga ug ang makibag-ong kultura sa droga nagdaot sa daghang kinabuhi.
Labing ilado mao ang kausaban sa mga kinabuhi sa mga tawo. Ang industriyalisasyon ug ang pagbalhin sa pagpuyo gikan sa balangay ngadto sa siyudad nakapabulag sa pamilya. Labaw kay sukad masukad—ug ilabina sa kababayen-an ug kabataan—gibati sa mga tawo nga nahigawas ug independente. Ang kagawasan gikan sa mga pagpiot sa moral nga mga sukdanan nga gituohan sa nangagi misangpot sa bag-ong mga pagkinabuhi ug nabag-ong sosyal nga mga prinsipyo mao nga kini sila karon lahi kaayo gikan sa nasayran sa kalibotan sulod sa kaliboan nga katuigan.
Wala Mausab ang Bibliya
Nan, asa man diay modangop ang usa alang sa giya? Unsang tambag ang mapadapat karong adlawa? Ang modernong mga edukador kanunayng nagarebisar sa ilang mga paagi ug sa mga librong tun-anan aron makanunot sa atong nagakausab nga kalibotan. Ang mga klerigo ug ubang propesyonal nagausab sa gambalay sa ilang tambag sumala kon unsay popular ug dinawat sa kadaghanan.
Sa laing bahin, ang Bibliya nagpabiling wala mausab sulod sa kaliboan nga katuigan. Sa pagkamatuod, nasudlan kinig malig-ong mga pasidaan nga dili dugangan o kuhaan ang mga pulong nga nahisulat niana. (Proverbio 30:5, 6; Pinadayag 22:18, 19) Madawat ba ang Bibliya isip mapuslanong giya sa atong modernong adlaw?
Ang pipila nagaingong dili. “Walay mausa ang moduso nga gamiton ang 1924 nga edisyon sa librong tun-anan sa kemistriya aron gamiton sa klase sa modernong kemistriya—daghan na kaayo ang nasayran bahin sa kemistriya sukad niadto,” misulat si Dr. Eli S. Chesen diha sa iyang librong Religion May Be Hazardous to Your Health. Siya mipadayon: “Sa samang paagi, daghan ang nakat-onan mahitungod sa sosyolohiya, pilosopiya, ug sikolohiya sa milabayng kaliboan nga katuigan; bisan pa niana, ang Bibliya (nga daghag ikasulti niining mga ulohana) gigamit ingong awtoridad ug tagsa rang rebisahon.”
Midugang siya: “Kanunay akong mahibulong dihang may hibatian akong maghisgot sa ‘milagro’ nga ang Bibliya dili limitado sa panahon ug nga karong adlawa kini makahuloganon sama sa panahong kini nahisulat. Kini susama sa pagkahibulong sa ‘katukma’ sa astrolohiya. Nabatonan sa Bibliya ang lig-ong pagbulot-an nga diyutay ra gayod ang maghunahuna sa pagpasagnunot niini sa panahon o pagsalikway niini.”
Apan, ang Bibliya tinuod bang daan na nga dili angay sa atong modernong kalibotan? O ang tambag nga ginahatag niini mapuslanon gihapon ug makahuloganon alang sa atong panahon?