Ang Relihiyosong mga Konsilyo Giuyonan ba sa Diyos?

ANG pulong “konsilyo” makapahinumdom sa iladong bahin sa lokal nga kagamhanan. Ang mga termino sama sa “konsilyo o konseho sa siyudad” o “konsilyo sa lungsod” daling masabtan. Apan, ang dili kaayo pamilyar, tingali mao ang terminong “konsilyo sa relihiyon” kun “konsilyo sa simbahan.” Kining konsilyo sa simbahan gibatbat ingong “usa ka hawas sa katigoman sa iglesya nga may awtoridad sa pagsabotsabot ug kasagaran sa paghimog balaod sa mga isyu may kalabotan sa pagtuo, moral, ug disiplina sa iglesya.”

Bahin sa daghang relihiyosong mga konsilyo nga gihimo sa nanglabayng kasiglohan, gilantaw sa Romano Katolikong Iglesya ang 21 ingong ekumenikal, ug nagkalainlain kini sila gikan sa Konsilyo sa Nicaea sa 325 K.P. ngadto sa Ikaduhang Konsilyo sa Batikano sa 1962-65. Sumala sa The Encyclopedia Americana, “ang mga konsilyo ekumenikal sa kasagaran ginapatawag sa papa, ug siya ang mangulo niana, maoy modesisyon kon unsay hisgotan, motapos sa konsilyo, ug mopahayag sa mga sugo. . . .  Lakip sa papa ang konsilyo ekumenikal mao ang kasangkapan sa iglesya, ug nausa kaniya ang awtoridad sa pagkadili masayop nga pagtulon-an sa iglesya may kalabotan sa pagtuo ug sa moral.”​—Tomo 8, panid 85.

Pagtuki sa Sinugdan Niini

Daghang mga lider sa relihiyon nagtuo nga ang relihiyosong mga konsilyo sa Kakristiyanohan ikatandi sa unang siglong tigom sa mga apostoles ug sa mga tigulang sa Jerusalem. Busa, ang mga konsilyo sa ulahi nga iglesya ginaingong may samang awtoridad sa paghimog desisyon sa mga butang may kalabotan sa pagtuo ug sa moral. (Buhat 15:2, 6, 22) Apan kini bang matanga sa relihiyosong mga konsilyo awtorisado sa Diyos? Giuyonan ba niya sila?

Makaikag, diha sa Marcos 3:6 ang ekspresyong “naghimog konsilyo” nagagikan sa Gregong pulong nga nagkahulogang ‘panagtigom sa mga tawo nga magpahayagay sa ilang mga opinyon ug tambag.’ Nianang bersikuloha, atong mabasa nga ang mga Pariseo ‘naghimog konsilyo’ uban sa partido sa mga sumusunod ni Herodes aron sa pagpatay kang Jesus. Siempre wala gayod uyoni sa Diyos kadtong konsilyoha! Ug gipasidan-an ni Jesus ang iyang mga disipulo sa dili pagsalig niining mga tawhana. (Marcos 8:15) Makita ba gihapon ang samang pagkawalay pagsalig diha sa mga konsilyo sa relihiyon sa Kakristiyanohan?

Si Jesus miingon usab: “Pinaagi sa ilang mga bunga mailhan ninyo kanang mga tawhana.” (Mateo 7:20) Busa, atong susihon ang mga bunga sa nagkalainlaing mga konsilyo sa iglesya.

Gimandoan sa Unsa?

Sumala sa The Encyclopedia Americana, ang rehiyonal nga mga konsilyo nga nahimong kasangkapan sa pag-organisar sa Katolikong mga iglesya sa Espanya, Britanya, ug sa ubang dapit sa “kasagaran gitawag ug gidumala sa sekular nga gahom.” Ang konsilyo heneral sa relihiyosong mga lider sa tibuok Imperyo sa Roma “wala hiilhi sa wala pa ang Konsilyo sa Nicaea (325 A.D.),” nga gipatawag ni Imperador Constantino. Ang manalaysayng taga Britanya si H. G. Wells misugyot nga giusa ni Constantino ang politika ug ang bug-os nga paggahom diha sa nabahin na kaayong Kakristiyanohan. Si Wells misulat: “Dili lang ang konsilyo nga gitigom ni Constantino nga Bantogan sa Nicæa, kondili ang tanang dagkong mga konsilyo, ang duha diha sa Constantinople (381 ug 553), Efeso (431), ug Chalcedon (451) gipatawag sa imperyal nga gahom.” Apan sa unsang paagi uyonan kana sa Diyos, sanglit dili man gayod ilangkit sa tinuod nga mga Kristohanon ang relihiyon ug ang politika apan, hinunoa, sa paghupot sa bug-os nga neyutralidad?​—Juan 17:16; Santiago 1:27.

“Ang ulahing mga konsilyo heneral kanunay nalandongan sa imperyal nga mga politika sa iglesya ug sa kaatbang nga dagkong patriarkal nga sede [mga dapit nga ginakontrolar sa obispo o arsobispo],” midugang ang The Encyclopedia Americana. Sanglit gitiman-an ang mga konsilyo sa iglesya sa relihiyosong mga politika ug indigay, sila walay mga bunga sa espiritu sama sa gugma ug kalinaw. Hinunoa, namansahan kini sa unodnong mga buhat nga naglakip sa “pagdumtanay, awayay, kasina, . . . hakog nga pag-indigay, pagbahinbahin, pundok-pundok.” Mahitungod sa mga buhat sa unod, si apostol Pablo mipasidaan: “Kadtong magabuhat niining mga butanga dili makapanunod sa gingharian sa Diyos!” (Galacia 5:19-23, Catholic New American Bible) Busa, sa unsang paaging ikaingon nga ang mga konsilyo sa Kakristiyanohan giuyonan sa Diyos?

Makalilisang nga mga Kabangisan!

Nagtuo si H. G. Wells nga ang espiritu ni Constantino maoy nagkontrolar sa mga kalihokan sa iglesya, ug siya miingon: “Ang ideya sa pagwagtang sa tanang kontrobersiya ug pagbahinbahin, ang pagwagtang sa tanang opinyon, pinaagi sa pagpakanaog ug usa ka dogmatikong doktrina diha sa tanang mga magtutuo, . . . maoy ideya sa usa ka tawo nga nagtuo nga aron libreng makabuhat kinahanglang gawas siya gikan sa pagsupak ug pagsaway. Ang kasaysayan sa Iglesya ilalom sa gahom [ni Constantino] nahimo karong usa ka kasaysayan sa mapintas nga pag-awayay nga misunod sa iyang kalit ug mabangis nga sugo nga magkausa. Gikan kaniya nakahua sa Iglesya ang disposisyon sa pagkadiktador ug dili-malalis, sa pagpalambog sentralisadong organisasyon ug nga ipaangay sa imperyo.”

Ang mga sumbong sa sayop nga doktrina nakitang usa ka mabangis nga plano sa pagwagtang sa mga kaaway nga mangahas sa pagbatok sa mga konsilyo sa iglesya sa Kakristiyanohan. Ang tanan nga mopahayag ug lahi nga mga opinyon o mosulay sa pagpresentar ug Kasulatanhong pamatuod nga magpanghimakak sa mga doktrina ug mga canon (mga balaod sa iglesya) sa mga konsilyo gilantawng mga erehes.

Ang plano sa pagwagtang sa pagsupak mitultol sa makalilisang nga kabangisan. Ang kadaghanan niadtong gihukmang sad-an sa erehiya batok sa popular nga doktrina sa konsilyo gipangsunog sa estaka, nag-antos sa kasakit sa hinayhinayng kamatayon nga nahimong talan-awon sa katilingban​—nga ginaingong sa ngalan ni Kristo!

Pananglitan, ang Konsilyo sa Constance (1414-18 K.P.) gihimo aron sa pagtapos sa panagbangi kon kinsa ang may katungod nga mahimong papa ug sa pag-atiman sa mga erehiya ni Wycliffe ug Hus. Giingong gihatod sa katloan ka libong kabayo ang mga tawo ngadto sa Constance alang niining dakong okasyon. Sa panahon sa konsilyo, gibista si John Hus ug gihukman, dayon gihatag ngadto sa sekular nga mga awtoridad ug gisunog sa estaka.

Unsay Ikasulti Bahin sa Doktrina?

Tinuod nga ang tanang matuod nga mga Kristohanon “magasulti nga may paghiusa.” Apan dili kini tungod sa dili madaog nga pagpiit sa relihiyon. Kondili, tungod kini kay ang ilang mga pagtulon-an ug mga buhat sa makataronganon gipasukad sa dinasig nga Pulong sa Diyos. (1 Corinto 1:10; Buhat 17:10, 11; 2 Timoteo 3:16, 17) Apan, unsay lakat sa mga konsilyo sa iglesya kon atong tagdon ang ilang doktrinal nga mga desisyon?

Bisag ang mga konsilyo sa iglesya mahimong papution sa gawas ingong pinakamohon sa teolohiya, diha sa hunahuna sa kadaghanan sila nahimong mga lapida nga timaan sa kabangisan aron ang tinuod nga Kristohanong mga pagtulon-an mawagtang. Sa pag-ilustrar: Sa 325 K.P. ang Konsilyo sa Nicaea mipailaila sa doktrina sa Nagpakaunod nga Kristo, o Tawong-Diyos. Kining paglimod nga nahimong tawo si Jesus nahimong usa sa labing makapahisalaag nga mga doktrina sa Kakristiyanohan. (Itandi sa 2 Juan 7.) Gani, kini nakapalayo sa milyonmilyon gikan kang Jehova nga Diyos ngadto sa makalibog nga Trinidad! Walay bisan usa sa mga konsilyo nga gihimo human niana ang misulay sa pagtul-id niining sayopa. Apan ang doktrina sa Trinidad bug-os dili kasulatanhon, kay si Jesus miingon: “Ang Amahan labaw pa kanako.” (Juan 14:28) Uyonan ba sa Diyos ang bisan unsang konsilyo nga nagpalubog sa kamatuoran bahin sa iyang pagkapersona ug nianang sa iyang Anak?

Ang doktrina nga gitukod sa usa ka konsilyo mahimong paklingon sa lain. Pananglitan, sumala sa gipakita sa nag-ubang tsart, ang paggamit sa mga larawan sa pagsimba gisalikway sa panahon sa usa ka konsilyo sa Constantinople sa 730 K.P. Apan gipailailag balik ang paggamit kanila sa ulahi nga konsilyo. Sa pagkatinuod, ang Bibliya nagpakita nga ang paghimo ug paggamit sa relihiyosong mga larawan maoy pagsimbag diyosdiyos ug dili-kristohanon.​—Exodo 20:4-6; 1 Juan 5:21.

Sumala sa gipakita usab sa tsart, lakip sa mga doktrina nga giduso sa mga konsilyo sa mga iglesya sa Kakristiyanohan mao ang bawtismo sa masuso, pinugos nga pagpabiling dili-minyo, purgatoryo, ug impiyerno. Apan, wala paluyohi sa Kasulatan ang bawtismo sa masuso, ug ang pagpabiling dili-minyo, ug impiyernong kalayo, ni naghisgot sila bahin sa purgatoryo. (Mateo 28:19, 20; 1 Timoteo 4:1-3; Job 14:13) Sanglit kadtong nagtinguha sa pagbaton sa pag-uyon ni Jehova kinahanglang magasimba kaniya sa “espiritu ug sa kamatuoran,” sa unsang paagi iyang uyonan ang mga konsilyo nga nagapasiugda sa bakak nga mga doktrina?​—Juan 4:23, 24.

Ang Panagtigom sa Jerusalem

Mahitungod sa relihiyosong mga Konsilyo, si Otto Karrer misulat: “Gawas sa gitawag Konsilyo sa mga Apostoles [mga 49 K.P.], kansang desisyon maoy bahin sa tradisyon sa balaan, apostolikong proklamasyon, ang tanang mga konsilyo maoy bunga sa iglesya tapos nangamatay ang mga apostoles. Dili sila iya sa yugto sa pagkatukod sa iglesya.”​—The Councils of the Church.

Sa walay duhaduha, ang tanang mga konsilyo sa iglesya sa Kakristiyanohan dako kaayog kalainan gikan sa unang-siglong panagtigom sa mga apostoles ug sa mga ansiano sa Jerusalem. Walay gutom ug gahom nga mga klero ang mitambong niadto aron sa paghatag ug mabug-at nga mga yugo sa mga liog sa uban o sa pagpasilab sa mga kahoyng bitayan. Hinunoa, ang bunga sa espiritu sa Diyos ang gipakita. Ang gisabotan giniyahan sa espiritu ug kaharmoniya sa Pulong sa Diyos. Ug kanang sumbanana sa pagsulbad sa Kasulatanhong gumonhap gisunod sa Nagamandong Lawas sa mga Saksi ni Jehova karon.

Ang sulat nga gipadala sa mga apostoles ug sa mga tigulang sa Jerusalem ngadto sa kaubang mga magtutuo sa lakbit miingon: “Ang balaang espiritu ug kita mismo ming-uyon sa dili paghatag ug dugang luwan kaninyo, gawas lamang sa pipila ka kinahanglanong mga butang nga mao kini, nga magpahilayo gikan sa mga butang nga nahalad ngadto sa mga diyosdiyos ug gikan sa dugo ug sa mga mananap nga naluok ug sa pagpakighilawas.” (Buhat 15:22-29) Kini dili kabalaoran nga gimugna sa tawo kondili sila maoy mga kinahanglanon pinasukad sa unang mga sugo sa dakong Magbabalaod.​—Genesis 9:3, 4; Deuteronomio 5:8-10, 18; Isaias 33:22.

Kanang unang siglong tigom sa mga apostoles ug mga tigulang sa Jerusalem may pag-uyon kang Jehova, sanglit ang mga desisyon niini adunay iyang panalangin, ug nakapauswag kini sa buluhaton sa pagwali sa Gingharian nga nakaagak sa daghang mga Hentil ngadto sa Kristohanong kongregasyon. Apan, ang kamatuoran sa kasaysayan naghatag matin-awng ebidensiya nga ang mga konsilyo sa simbahan sa Kakristiyanohan wala gayod uyoni sa Diyos.

[Chart sa panid 26]

DOKTRINANG NAAPROBAHAN KONSILYO PETSA

Bawtismo sa Masuso Cartago 253 K.P.

Pagpabiling Dili-minyo Trent 1545 K.P.

Diborsiyo sa Pagpanapawa Arles 314 K.P.

Diborsiyo Gidili Trent 1545 K.P.

Impiyernong kalayo Lyons 1274 K.P.

Florence 1573 K.P.

Mga Larawan Gisalikway* Constantinpole 730 K.P.

Mga Larawan Gibalik Constantinople 842 K.P.

Nicaea 787 K.P.

Imaculada Concepcion Avignon 1457 K.P.

Pagpakatawo ni Kristo Nicaea 325 K.P.

Chalcedon 451 K.P.

Walay Pagwali sa Pulpito

sa mga Layko Constantinople 681 K.P.

Purgatoryo Florence 1573 K.P.

Trent 1545 K.P.

Trinidad Nicaea 325 K.P.

[Mga footnote]