Kagawasan—Pagkamaayo Gayod!

“HATAGI ako sa kagawasan o hatagi ako sa kamatayon!” mipatugbaw ang Amerikanong bayani si Patrick Henry kapin ug 200 ka tuig kanhi. Alang kaniya, ang kagawasan labi pang bililhon kay sa kinabuhi mismo. Latas sa kasiglohan, nabatonan sa minilyong tawo ang susamang mga pagbati.

Apan, sulod sa milabay nga katungang siglo ang tinguha sa kagawasan nagbatog bag-ong mga kinaiyahan. Ang koloniyal nga mga gahom nawad-an ug minilyong mga ginsakpan samtang sila nagtinguha ug nakaangkon sa politikanhong kaugalingnan. Gitukod pa ang sosyal, ekonomikanhon, ug relihiyosong mga organisasyon sa pagtinguhag kagawasan gikan sa pagpanglupig ug pagkamapihigon, tinuod man o hinanduraw. Wala pa sukad mahitabong ang daghan kaayong lalaki nagtinguhag kagawasan gikan sa pagbulot-an sa mga amo ug mga gobyerno, daghan kaayong babaye gikan sa pagbulot-an sa mga bana ug mga amahan, ug daghan kaayong anak gikan sa pagbulot-an sa mga ginikanan ug mga magtutudlo. Bisan pa niana, dili bag-o ang mga kalihokan bahin sa kagawasan. Ngani, kana halos sama ka tigulang sa tawo mismo. Ang labing karaang basahon sa kalibotan, ang Balaang Bibliya, nagatug-an kanato sa labaw pa. Ang pinakasumaryo sa estorya, sumala sa hikaplagan sa Genesis 3:1-7, mao kini:

Sa wala madugay tapos mabuhat ang lalaki ug babaye, ang babaye giduol sa usa ka manulondang linalang. Gipadayag sa iyang mga lihok ang tinguhang mogawas sa pagbulot-an sa iyang Maglalalang. Busa dili katingad-ang iyang gipatuo nga ang kagawasan mao ang gikinahanglan niya ug sa iyang bana. Dili ba tinuod, siya nangatarongan, nga gipahamtang sa Diyos ang mga pagpiot diha kanila? Apan ngano, siya nangutana, nga sila dili mokaon gikan sa “bunga sa kahoy . . . diha sa taliwala sa tanaman”? Kon buot sabton, “ang kahoy nindot tan-awon,” dili ba? May lain pa!

Bulag kamo, siya miagda, ug “ang inyong mga mata mangabuka ug kamo mahisama sa Diyos, nga nahibalo sa maayo ug sa daotan.” Pagkamaayo gayod! Oo, ang kagawasan gikan sa “malupigong” pagmando sa Diyos gipatim-aw nga bililhon kay sa kinabuhi mismo.

“Hatagi ako sa kagawasan o hatagi ako sa kamatayon!” Nabatonan ni Adan ug Eva kanang duha​—sa ilang kagul-anan ug sa atoa! Sa unsang paagi naingon?