Mga Pangutana sa mga Magbabasa

◼ Sa ilustrasyon ni Jesus mahitungod sa tawong dato nga dili dato sa atubangan sa Diyos, kinsa ang “nila” nga nangayo sa kalag sa tawo?

Wala magpunting si Jesus sa bisan unsang grupo sa mga tawo ug mga manulonda. Sa Lucas 12:20 siya migamit ug indefinite nga “nila” ingong paagi lamang sa pagpahayag kon unsay mahitabo sa tawo.

Kining ilustrasyona makita sa Lucas 12:16-21. Ang tawong dato wala matagbaw sa iyang igong materyal nga mga butang. Siya nagpadayon sa pagtagad sa iyang negosyo aron modaghan ang iyang bahandi. Si Jesus miingon: “Apan ang Diyos miingon sa [tawong dato], ‘Buangbuang, karong gabhiona pagakuhaon nila ang imong kalag gikan kanimo. Nan, kinsa, ang makapanag-iya sa mga butang nga imong gitagana?’ Maingon niana ang nagatigom ug mga bahandi alang sa iyang kaugalingon apan dili bahandianon ngadto sa Diyos.”

Gigamit sa ubang mga hubad ang passive nga pagkahubad, sama sa: “Karong gabhiona ang imong kalag kuhaon gikan kanimo.” (New American Standard Bible) “Karong gabhiona ang pangayo mao ang imong kalag.” (The Jerusalem Bible) “Karong gabhiona pangayoon ang imong kalag.” (The Twentieth Century New Testament) “Karong gabhiona ang imong kalag gikinahanglan.” (Byington) Apan, ang Hebreohanon (nga maoy pinulongan ni Jesus) ug Grego (nga maoy pagsulat ni Lucas) migamit ug indefinite third person plural nga porma. Ang Gregong teksto sa Lucas 12:20 sa literal nag-ingon “karong gabhiona ang imong kalag pangayoon nila gikan kanimo.” Ang Gregong teksto sa Lucas 12:20 sa literal nag-ingon “karong gabhiona ang imong kalag ilang kuhaon gikan kanimo.” Ang berbo anaa sa third person plural. Busa, imbes ilisdan kini sa walay kapuslanan sa passive nga porma (sama sa pananglitan sa ibabaw), ang The New World Translation ug uban migamit sa mga hubad sama sa “pagakuhaon nila.”

Apan, maayo nga dili nato tugotang ang mga teknikalidad sa gramatika nga mopalubog sa matin-awng tambag ni Jesus bahin sa materyalismo. Wala niya ipadayag kon sa unsang paagi mamatay ang tawong dato. Ang punto mao nga sa usa ka paagi ang tawo mawad-an sa iyang kalag, o kinabuhi, nianang gabhiona. Apan unsay iyang baroganan atubangan sa Diyos? Kitang tanan mahimong malinga sa pagpalambo sa atong materyal nga kahimtang ug sa ingon mapakyas sa pagkahimong dato atubangan sa Diyos. Ang kalibotan sa negosyo nagadasig ug espiritu sa ‘dugang pa.’ Bisan ang mga tawo kansang mga kompaniya nakahimog dakodakog ganansiya gikan sa mga halin sa milyonmilyong dolyares, pounds, marks, ug uban pa, tingali matintal sa pagpangitag dugang pa—dugang mga empliyado, dugang halin, dugang ganansiya, dugang kaluho, dugang pundo sa banko. Ang pangutana ni Jesus ingon usab ka bililhon karon sa unang gibangon niya kini: “Nan, kinsa, ang makapang-iya sa mga butang nga imong gitagana?”—Lucas 12:20.