Mga Pangutana Gikan sa mga Magbabasa

◼ Kinsa o unsay gihulagwayan sa “Leviathan” sa Isaias 27:1?

Ang Isaias 27:1 mabasa: “Niadtong adlawa silotan ni Jehova, sa iyang magahi ug dako ug malig-on nga espada, ang Leviathan, ang matulin nga serpente, bisan ang Leviathan, ang baliko nga serpente, ug iyang pagapatyon ang dragon nga anaa sa dagat.” Atong nasabot kining propesiya nga aplikado kang Satanas nga Yawa ug sa iyang daotang organisasyon sa yuta.

Ang The Watchtower sa Oktubre 15, 1985, nagbatbat nga ang Isaias kapitulo 27 maoy tagna sa pagpasig-uli. Ang unang katumanan niini nalangkit sa karaang nasod sa Israel, nga ipasig-uli sa yutang natawhan niini tapos sa 70 ka tuig sa pagkabihag sa Babilonya. Bisag ang kadaghanan sa mga binihag gikan sa Babilonya, ang uban mibalik sa Ehipto ug sa teritoryo sa Asiria. Gitino ni Jehova nga makagawas ang iyang katawhan, busa kining mga nasora dili makapugong kaniya pinaagi sa independente o hiusang mga paningkamot. Alang sa tawo sila gamhanon ug malimbongon, sama sa karaang Leviathan (tingali usa ka buaya), apan milampos si Jehova alang sa karaang Israel.​—Itandi sa Job 41:1-34.

Nan, unsa, ang gihulagyawan sa “Leviathan” diha sa mas dakong katumanan sa kapitulo 27 sa Isaias? Masabot, si Satanas nga Yawa ang motungha sa hunahuna, kay ang Pinadayag 12:9 nagbatbat kaniya nga mao “ang dakong dragon” ug ang “orihinal nga serpente.” Dugay na siyang kaaway sa Diyos ug sa Iyang katawhan. Dugang pa, ang Kasulatan nagpatin-aw nga modangat ra sa iyang kalaglagan si Satanas. Ang Diyos nagtakda ug adlaw sa paggamit sa iyang gahom pinaagi sa iyang Anak sa pagpapha sa Yawa. Busa kanang “dragon” kun “serpente” pagaputlon sa dako ug malig-ong espada.​—Hebreohanon 2:14; Pinadayag 20:1-3, 10.

Apan, hinumdomi, nga ang mga kaaway nga giatubang sa karaang Israel mao ang makitang mga kaawayng nasod, sama sa Ehipto, Asiria, ug Babilonya. Sa susama karon, ang Kristohanong mga alagad sa Diyos karon sa tibuok yuta giatubang sa makitang mga kaaway tali sa makisaw nga dagat sa katawhan nga bulag sa Diyos. (Pinadayag 17:1, 15) Si Satanas ang nagmando sa tibuok kalibotang organisasyon nga iyang gigamit sa pagbabag niadtong “nagabantay sa mga sugo sa Diyos ug may buluhaton sa panghimatuod mahitungod kang Jesus.” (Pinadayag 12:17) Kining gikontrolar sa Yawa nga organisasyon napamatud-ang maliputon ug mabangis, sama sa usa ka leviathan. Apan, sayo niini nga siglo kining “Leviathan” nawad-an sa iyang pagmando ibabaw sa espirituwal nga Israel, nga mao, ang dinihogang Kristohanong mga saksi ni Jehova. Ug kini sa bug-os putlon dihang, duyog sa manulonda nga mga sundalo, si Jesus magasakay uban ang “mahait hataas nga espada, nga maoy iyang itigbas sa kanasoran.”​—Pinadayag 19:11-16.

Busa bisan ug sa usa ka paagi si Satanas mahimong ikasulti nga mao ang Leviathan sa Isaias 27:1, kanang tagnaa naglakip ug labaw pa kay sa “orihinal nga serpente.” Kini nagpunting ilabina sa makita yutan-ong organisasyon nga iyang gimandoan. Busa, ang The Watchtower nga gihisgotan sa ibabaw nagpunting sa mga magbabasa sa panahon dihang “ang presente daotang sistema nga niini si Satanas nga Yawa mao ang nagmando ingong diyos, laglagon. Mobali si Jehova sa iyang pagtagad sa simbolikong Leviathan, ang matulin, balikong serpenti nga anaa sa tunga sa dagat sa katawhan. Siya ug ang kanasoran ug bisan ang nahiusang kanasoran, mahanaw.”