Mga Magmamantala sa Gingharian Nagtaho
“Mga Maghuhupot sa Integridad” nga mga Kombensiyon sa Pilipinas
ANG 1985 nga serye sa 23 ka “Mga Maghuhupot sa Integridad” nga Kombensiyon nga gihimo sa Pilipinas malamposon kaayo sa tanang paagi. Ang giipon nga tumatambong nga 213,734, usa ka pag-uswag nga 27 porsiento kay sa gidaghanon sa miaging tuig, maoy kapin sa duhag tunga ka pilo sa bug-os nga gidaghanon sa magmamantala sa nasod. Kini nagapakitang daghang interesadong tawo ang mitambong sa mga kombensiyon. Gawas pa, 2,223 ang nabawtismohan, pag-uswag nga 14.5 porsiento kay sa miaging tuig.
Sa Tuguegarao, Cagayan, gidahom nga 12,000 ang motambong sa kombensiyon, apan 24,327 ang mitambong! Ang usa ka sibya sa estasyon sa radyo may 30-minutos nga interbiyo uban sa mga igsoon, nga pihong nakaamot sa daghang tumatambong. Ang nag-interbiyo nangutana sa unsang paagi atong mahuptan ang kalinaw ug kahusay panahon sa atong mga kombensiyon. Gipatin-aw nga ang tanang sakop sa atong organisasyon naningkamot sa pag-ugmad sa mga bunga sa espiritu nga mao ang gugma ug pakigdait. Busa dihang kita may mga kombensiyong sama niini, walay away. Ang nag-interbiyo natingala ug miingon: “Talagsaon kaayo ang inyong organisasyon! Ang ubang organisasyon dili makahimo niini. Dihang adunay panon nga sama niini, kanunay nga may daotang mga hitabo.”
Sa mao mismong kombensiyon, usa ka instruktor sa Cagayan State University miingon: “Daghan kaayo ang tumatambong; disiplinado ang mga delegado; may kooperasyon sa ilang taliwala; ilang gipakita ang bug-os nga dedikasyon ngadto sa ministeryo. Bisan sa pagkadaghan sa mga delegado, ang dapit mahinlo kaayo; may kahusay ug walay daotang mga hitabo, nga nagapamatuod lamang nga ang mga Saksi nagatumang binuotan sa ilang natun-an gikan sa Kasulatan.”
Ang concessionaire sa Rizal Memorial Stadium sa Manila mikomento panahon sa kombensiyon: “Nakadayeg ako sa kahikayan sa inyong asembliya. Organisado ang inyong Sosyedad, ug karon lamang ako makakita sa maong matang sa kahusay sa mga Saksi tungod kay karon lamang ako makakitag asembliya nga sama niini.”
Sa kombensiyon sa Calbayog City, 7 ka magmamantala mitambong gikan sa usa ka nahilaing grupo, ug sila nagdalag 14 ka interesadong tawo. Sa pagpabili sa panginahanglan nga mapresente sa maong espirituwal nga kombira, ang usa ka pamilya sa Palawan migasto sa mga 20 porsiento sa ilang tinuig nga kinitaan aron motambong sa Puerto Princesa City.
Daghang langyawng mga delegado mibiyahe ngadto sa kombensiyon sa Manila, ug mga 80 porsiento kanila anaa sa usa ka matang sa bug-os-panahong pag-alagad. Makalipay ang pagkakita nga nadasig kaayo ang mga igsoon sa dramang Ang Imong Umaabot—Usa ka Hagit, nga naghisgot sa bug-os-panahong pag-alagad. Sa Iloilo City, tulo ka tawong may bahin sa maong drama natandog kaayo panahon sa mga pagbansaybansay nga sila nagpadala sa mga aplikasyon sa regular payunir sa wala pa mosugod ang kombensiyon. Sa Ormoc City, ang tsirman sa kombensiyon miasoy nga pagkahuman dayon sa drama, unom ka magmamantala nangayog mga aplikasyon sa regular payunir.
Tinong ang espiritu ni Jehova nagadasig sa iyang katawhan sa “pagtanyag sa ilang kaugalingon nga kinabubut-on” niining kataposang mga adlaw. (Salmo 110:3) Ang “Mga Maghuhupot sa Integridad” nga mga Kombensiyon sa Pilipinas nakadasig pag-ayo sa mga igsoon ug mga tawong interesado.