Mga Pangutana Gikan sa mga Magbabasa

◼ May kalainan ba ang “creation” ug ang “creationism”?

Oo, aduna. Ang pulong “creation” o paglalang, nga makita sa mga 18 ka beses diha sa New World Translation of the Holy Scriptures, tukmang nagatumong sa mga buhat sa paglalang ni Jehova. (Tan-awa, pananglitan, ang Roma 1:20; 8:21; 2 Corinto 5:17) Ang pulong “creationism” dili hikaplagan sa Bibliya.

Ang Webster’s Third New International Dictionary (1971) nagabatbat sa “creation” ingong “ang buhat sa paglalang,” ug sa “creationism” ingong “usa ka doktrina o teoriya sa paglalang.” Ang samang diksiyonaryo nagabatbat sa “ism” ingong “usa ka linaing doktrina, kawsa, sistema, o teoriya​—nga kadaghanan gamitong matamayon.”

Niining katuigang 1980, ang “creationism” nahimong tinuod nga “ism” o ismo tungod kay kini gidawat sa mga pundok nga nagapit-os sa politika, sama sa Moral Majority. Kini dili na neyutral nga pulong, kondili nagasakop sa labihan ka pundamentalistang mga pagtuo sa Bibliya, sama sa pagtuong ang Diyos naglalang sa yuta ug sa tanang butang ibabaw niana sa unom ka adlaw nga may tag 24 oras ang matag usa. Aduna na karoy kapin sa 350 ka librong nagasirkular nga nagapahayag nianang doktrinang “creationism.” Ang mga Saksi ni Jehova nagasalikway sa dili-makataronganong mga teoriya sa “creationism” sa pagpabor sa tinuod ginatudlo sa Bibliya mahitungod sa “creation” o paglalang.

Alang sa mas kompletong tubag sa pangutana sa ibabaw, palihog tan-awa ang artikulong may ulohang “Ebolusyon, Paglalang, kun Teoriya sa Paglalang​—Hain ang Imong Gituohan?” sa mga panid 16-20 sa among kaubang magasing Pagmata! nga pinetsahag Agosto 22, 1983.