Pagdayeg Kang Jehova Pinaagi sa Honi
DAGHAN ang paagi nga makadayeg ang mga alagad ni Jehova kaniya. Sa walay duhaduha, taliwala sa labing matahom ug ang usa nga makahatag dakong kalipay sa iyang kasingkasing mao kanang ‘pag-awit ug mga pagdayeg kaniya.’ (Salmo 105:2) Nakita nga ang awit mao ang usa sa “mga timaan sa pagkatawhanon sa tawo.”
Ang musika gitawag usab nga “mao ang tagsaong gasa sa tawo, sa pagkamamugnaon ug sa pagmugna pag-usab.” Ang mga hayop, ihalas man o anad, walay abilidad sa musika. Tinuod, adunay ubang mga langgam nga moawit ug matahom nga mga honi, apan kinaiyanhon lang kana. Sila walay nasabtan sa musika sama sa mga periko nga walay nasabtan sa mga pulong nga siya gibansay sa pagsulti. Apan pinaagi sa matahom nga awit, atong maabot ang mga kasingkasing sa uban, sama sa pagpakigsulti, kita makakomunikar sa hunahuna sa uban.
Oo, ang musika maoy gasa gikan sa Malalalang sa tawo, ug pagkatahom nga gasa kana! Ang bag-ong mga pagtuki nagpakita nga bisan ang mga bata sa tagoangkan magpaila na sa awit nga ilang gusto—mananoy ug mahonihon—ug sa dili nila gusto—makusog ug magahob, sama sa musikang rock. Gisultihan usab kita nga makaugmad ang wala pa matawong bata ug abilidad sa musika kon makadungog kinig matahom nga musika. Busa makahatag kalipay ang musika sa mga tawo dili lamang gikan pa sa pagkabata hangtod sa lubnganan kondili gikan sa tagoangkan hangtod sa lubnganan! Sanglit gilantaw ang musika nga bug-os kinahanglanon sa tawhanong paglungtad, ang pagpaposible sa Maglalalang sa mga tawo sa pagkomposo ug musika ug sa pagkalipay niini maoy laing pananglitan sa iyang kaalam ug gugma. “Mahigugmaon ug musika ang mga Hebreohanon,” kita gisultihan. Ug tinuod nga tagsaon ang awit sukad pa sa sinugdan sa tawhanong kasaysayan nga gipasiugda, uban sa agrikultura ug pagpanggama, ingong usa sa mga buluhaton sa tawo.—Genesis 4:20-22.
Mga Epekto sa Awit
Apan, dili nato kalimtan ang kamatuoran nga ang musika mahimong makaayo o makadaot. Gilangkoban ang maayong musika ug matahom nga mga tuno nga duyog sa honi, harmoniya, ug pangompas; kini makapukaw sa dungganong kagawian sa tawo. Apan ang dili maayong awit makadani sa daotang mga hilig sa tawo. Kining matanga sa mga awit giterminohag: “Ang dili balaan nga trinidad sa . . . kabangisan, sekso ug kagahob.”
Makasubo, ang ubang mga musikero nga nag-angkong nag-alagad kang Jehova nga Diyos nagkulang niining bahina. Ang pipila kanila nagpabayad sa pagtokar diha sa mga kasal ug dayon nagpakitag kakulang sa pagpabili sa mga prinsipyo sa Bibliya pinaagi sa matang sa musika nga ilang ipatugtog. Kusog kaayo ang ilang musika nga dili na madunggan ang normal nga pagkabildohay. Daw ilang nakalimtan nga ang mga dinapit sa kasal wala motambong sa pagpamati sa mga musikero nga nagpasiatab sa ilang mga abilidad.
Ang maayong musika nakaalagad ug daghang mapuslanong mga katuyoan. Ang mananoyng musika makahupay, makarelaks. Ang kadaghanan nianang giterminohang “bantogang musika,” sama sa musika sa simponiya ug kanang madungog sa mga opera house, makadani sa mga makinaadmanon, o makapukaw kini sa handurawan ug sa mga emosyon. Dili kalimtan mao ang mga oratoryo, nga sagad pinasukad sa mga tema sa Kasulatan, diin nalangkit ang dakong orkestra ug mga koro sa pagpasundayag niini. Ang usa sa labing ilado mao ang “Messiah” ni Handel.
Ang musika mahimong panalangin sa mga tigulang, sa mga bakol, ug sa mga masakiton. Gigamit kini aron maabot ang daot ug pangutok nga mga bata dihang mapakyas ang tanang mga paagi. Gipatuo nga adunay pila ka musika nga may makaayo makakalmang katuyoan sa mga opisina sa mga doktor ug mga dentista. Ang tukmang matang sa musika nadunggan nga nakatabang sa mga trabahante sa pabrika nga makatrabahog maayo ug makatrabahog daghan. Makaiikag, ang makaayong bili sa honi gipabilhan kapin sa 3,000 ka tuig kanhi ni Haring Saul sa Israel.—1 Samuel 16:14-23.
Siyempre, ang labing maayong paagi nga magamit ang awit mao ang pagdayeg kang Jehova nga Diyos. Ang pag-awit ug pagdayeg balik pa sa mga 3,500 ka tuig kanhi sa panahon dihang miawit ang Israel ug pagdayeg kang Jehova tapos sa ilang paglabang sa Pulang Dagat. (Exodo 15:1-21) Ang pagdayeg kang Jehova pinaagi sa awit ug musikal nga mga instrumento gipasiugda sa pagsimba diha sa templo sa Diyos. Ang musika sa templo giapilan sa kapin sa napulo ka bahin sa bug-os nga gidaghanon sa mga Levihanon. (1 Cronicas 23:3, 5) Dihay dakong orkestra ug koro sa dedikasyon sa templo ni Solomon. (2 Cronicas 5:12, 13) Sa pagkatinuod, ang Hebreohanong Kasulatan (ilabina sa basahon sa Salmo) sa matag karon ug unya nag-awhag kanato sa pag-awit ug pagdayeg kang Jehova nga Diyos.
Diha sa Kristohanon Gregong Kasulatan, atong mabasa ang bahin kang Jesus ug sa iyang mga apostoles nga nanag-awit sa Panihapon sa Ginoo. Miawit si apostol Pablo ug si Silas dihang nabilanggo sila sa Filipos. (Mateo 26:30; Buhat 16:25) Ang Unang Corinto 14:15 nagsugyot nga ang pag-awit maoy regular nga bahin sa pagsimba sa kongregasyon sa mga panahon sa mga apostoles. Gani, gitambagan kita ni Pablo nga atong mabasa diha sa Colosas 3:16: “Magtinudloay ug magtinambagay kamo ang usa sa usa pinaagi sa mga salmo, sa pagdayeg sa Diyos, sa espirituwal nga mga alawiton uban ang pagkamapasalamaton diha sa inyong mga kasingkasing ngadto kang Jehova.” Imong makita ang samang sugo diha sa Efeso 5:18-20.
Ingong pagsunod niining mga sugoa, sukad pa sa unang mga panahon gipahimuslan sa Kristohanong mga saksi ni Jehova karon ang gasa sa musika diha sa ilang pormal nga pagsimba. Sa unang tuig nga gipatik ang Zion’s Watch Tower (1879) may gipatik usab nga libro sa alawiton, Songs of the Bride. Sa 1896 gipatik sa Sosyedad ang isyu sa Zion’s Watch Tower nga nasudlad ug bug-os bag-ong mga awit nga gikomposo sa mga Estudyante sa Bibliya. Ang misunod nga gula sa magasin nag-ingon: “Ang pag-awit sa kamatuoran maoy maayong paagi sa pagsilsil niini diha sa mga ulo ug sa mga kasingkasing sa katawhan sa Diyos. . . . Kami nagpasalamat sa Diyos sa mga abilidad sa musika ug sa pagkamagbabalak sa pipila sa iyang mga santo.” Tapos sa usa ka tuig nga pagpatik ug mga libro sa alawiton, ang usa nga nagpasundayag sa labing hawod nga abilidad sa musika ug sa pagkamagbabalak mao kanang gipatik sa 1984. Kini nag-ulohang Sing Praises to Jehovah.
May Labot sa Honi
Ang bag-ong libro sa alawiton doble ug gidaghanon sa mga panid sa miaging libro sa awit. May libro nga de bulsa kini ug dagkog letrang mga pulong ug nota sa musika nga daling mabasa. Ang mga liriko ug mga honi niini giamot sa mga Saksi gikan sa upat ka suok sa yuta, lakip sa Australia, Brazil, Canada, Denmark, Inglaterra, Federal Republic of Germany, Finland, Pransiya, Alemanya, Italya, Japan, ug ang Tinipong Bansa.
Lahi sa tanang nangaging mga libro sa awit nga gipatik sa Watch Tower Society, ang naandang upat ka bahing harmoniya giwala. Hinunoa, ang mas mahonihon ug mas masayon nga duyogan ang giandam. Ang mga nota alang sa sista gidugang usab.
Duha ka bag-ong honi gikomposo alang sa paboritong mga pulong tungod kay nahibaloan nga ang mga honing gigamit sa miagi dili Saksi ang nagkomposo. Nganong nahitabo kana? Ang tigkomposo tingali nakadungog ug dili kaayo inilang honi. Dihang mitungha kini sa iyang hunahuna, tingali naghunahuna siya nga siya ang nagkomposo niadto.
Gipatahom pa ang Diwa
Dihang nagakasanag ang kamatuoran sa Diyos kaharmoniya sa Proverbio 4:18, nakita nga kinahanglang bag-ohon ang mga awit sa atong miaging mga libro sa awit. Tinuod kana diha sa bag-ong Awit 215. Sa 1974 midangat kita sa pagsabot nga naglarawan ang arka ni Noe sa atong espirituwal nga paraiso, dili Gingharian. (Tan-awa ang The Watchtower, 1974, panid 634.) Busa ang linya diha sa daang libro sa awit “Dangop sa arka sa kaluwasan, Sa Gingharian nga nia na” giusab sa “Lihok na! Ug magpahinungod na; Kay ang Gingharian sa Diyos nia na.”
Lakip sa mga gibag-o aron matukma mao ang mosunod: Sa bag-ong sistema sa mga butang, wala nay “daotan” nga kalisangan, imbes wala nay “panulay” nga kakuyawan, kay ang katawhan sa Diyos dili malisang sa mga panulay. (Awit 129) Sibo sa mga pulong ni Jesus diha sa Mateo 6:22, ang Awit 26 nagdasig kanato sa ‘paghimo sa atong mata nga yano’ imbes ‘usahon nato ang panan-aw.’
Sa daghang okasyon may pipila ka honi nga gihatagag bag-ong mga pulong nga nakitang mas epektibo ug mapuslanon. Ang Awit 60, “Ang Gingharian sa Diyos sa Usa ka Libo ka Tuig,” migamit sa honi sa Awit 86 diha sa daang libro sa alawiton. Ang mga liriko sa Awit 2, “Pagsugot sa Diyos Inay sa mga Tawo,” maoy pagpadako sa daang Awit 79. Daw kining temaha takos himoong tibuok panid imbes tunga sa panid.
Espirituwal nga Bahandi
Ang labing bag-ong libro sa awit nga nag-ulohang Sing Praises to Jehovah, gibase sa Salmo 96:1, 4. Daghang mga awit gitumong kang Jehova ug nagbayaw sa iyang mga hiyas. Matikdi ang pipila: “Jehova, Bantogang Diyos!” (naglista ug duolan sa 20 ka awit bahin sa mga hiyas kun mga titulo ni Jehova); “Jehova, Atong Labing Maayong Higala”; “Si Jehova May Kahangawa”; “Panalangin ni Jehova Nagapadato”; “Jehova, ang Manluluwas”; “Kalalangan Nagabutyag sa Himaya ni Jehova”; ug “Jehova, ‘Diyos sa Tanang Kalipay.’”
Kita gisugo nga ‘magpanudloay ug magtinambagay sa usag usa pinaagi sa salmo, mga pagdayeg sa Diyos ug espirituwal nga mga awit,’ ug gihimo kana niining libroha sa awit. (Colosas 3:16) Imong makita kini diha sa mga ulohan sama sa: “Magmalig-on, Dili Matarog!”; “Magpakalalaki”; “Buhata ang Labaw Pa—Sama sa mga Nazareo”; “Sulong, mga Ministro sa Gingharian!”; “Maunongong Magpasakop sa Teokratikanhong Kahikayan”; ug “Magtukaw, Magbarog nga Malig-on, Magmakusganon.”
Aron matabangan kita sa pagsunod sa sugo ni Pablo, “Magkalipay kamo kanunay diha sa Ginoo” (Filipos 4:4), kita dunay: “Awit sa Kasadya”; “Magmasadya sa Paglaom sa Gingharian”; “Masadyaon sa Bug-os Adlaw”; “Mag-awit sa Awit sa Kasadya sa Gingharian”; “Malipayong Nakig-ambit sa Pagpangani”; ug “Mga Kasadya ug mga Bunga sa Pag-alagad sa Gingharian.”
Ang mga panalangin sa Gingharian may bahin usab sa ilang pagtagad diha sa bag-ong libro sa awit: “Usa ka Libo ka Tuig sa Gingharian sa Diyos”; “Saad sa Diyos sa Paraiso”; “Kinabuhing Dayon na Gayod!”; “Uban Kang Kristo sa Paraiso.”
Gikalipayan sa atong mga batan-on ilabina ang bag-ong mga awit sama sa: “Mga Batan-on! Sunda ang Ilang Pagtuo”; “Luna sa Batan-on sa Kahikayan sa Diyos”; ug “Kabataan—Gasang Mahal sa Diyos.” Ang usa ka awit nga nagapahayag sa pagpabili sa maayong binuhatan sa atong mga igsoong babaye mao ang “Dakong Panon ang Kababayen-an.”
Sa unsang paagi atong ikapakita ang atong pagpabili niining maanindot nga mga awit? Una, pinaagi sa paghatag ug dakong pagtagad sa atong pribilehiyo ug sa kaakohan sa pag-awit kanila ingong bahin sa atong pormal nga pagsimba diha sa atong mga Kingdom Hall. Maningkamot kita nga makaabot sa miting nga sayo, ug magpabilin hangtod nga matapos, aron makabahin sa pag-awit niining mga awita. Atong awiton kini sa bug-os natong mga kasingkasing, bukahag dako ang mga baba, duyog ang kainit ug kadasig. Ikapakita usab nato ang pagpabli kanila pinaagi sa paggamit kanila kon kita may mga salosalo. Makakuha kitag mga teyp sa awit gikan sa libro sa awit aron mapatokar kon gusto kitang mamatig musika. Busa kita mapalig-on sa espirituwal sa matag panahong atong pamation ang matahom nga musika.
Ang labing hinungdanon sa tanan, atong ipakita ang atong pagpabili niining matahom nga mga awit pinaagi sa atong pagkinabuhi sa adlaw-adlaw sibo sa ilang maayong mga sentimento, mahitungod sa atong adlaw-adlaw nga paggawi ug sa atong mga kaakohan sa ministeryo.