Mga Magmamantala sa Gingharian Nagtaho
Ang Talagsaong mga Kombensiyon sa Argentina
“ANG mga Saksi ni Jehova nakatuon sa pagtigom nga wala ang kapintasan o kagubot, wala ang tabako o alkohol, wala ang bisan unsang matang sa pagpatuyang. Usa ka pagtulon-an, sa walay duhaduha, alang sa katilingban nga sama sa atoa, nga sa opisyal nailhan uban sa Katolisismo, apan may mga suliran sa pag-atiman sa dagkong mga panon diha sa mga dulaanan sa potbol nga wala ang mga hitabo sa pagkapanatiko, nga usahay makapasubo,” mitaho ang magasing Flash sa Argentina. Kining mga komentoha gipahayag bahin sa usa sa upat ka “Mga Maghuhupot sa Integridad” nga Kombensiyon sa mga Saksi ni Jehova nga gihimo sa Argentina sa Enero 1986. Sa pagkamatuod, ang mga igsoon nalipay sa pagtan-aw nga 97,736 ang mitambong sa upat ka kombensiyon. Usa ka malipayong okasyon nga sila may halos 600 sa ilang mga igsoon gikan sa 19 ka laing nasod ug sa 5 ka kontinente nga mitambong uban kanila. Sila nalipay, usab, sa pagkahibalong sa 97,736 nga mitambong, mga 40,000 maoy mga tawong bag-o pang interesado.—Salmo 122:1.
Ang mga mantalaan nagdayeg kaayo sa mga kombensiyonista tungod sa ilang maayong organisasyon ug pamatasan. Ang mantalaang La Razon nagpasiugda sa mosunod maylabot sa kombensiyon sa Buenos Aires sa River Plate Stadium diin kapin sa 57,000 mitambong: “Kahusay, kahinlo, ug ang iladong kahilom, ang mga timaan . . . Ang pagtambong sa mga matinuohon nagpadayag sa hingpit nga organisasyon . . . kahusay nga tagsa rang makita kon bahin sa kapid-ang tawo.”
Ang mantalaang La Nacion mikomento bahin sa kombensiyong gihimo sa Rosario diin 15,000 mitambong: “Bisan pa sa kadaghan sa mga tawong gidapit sa mga Saksi ni Jehova, walay bisan usa ka polis ang nakita sa palibot, ug hingpit ang kahusay.”
Ang mga delegado migamit sa tanang paagi sa transportasyon aron makaadto sa maong mga kombensiyon: mga ayroplano, mga tren, mga bus, mga kotse, ug mga bisikleta. Kapin sa 870 ka bus ug usa ka tren ang gipakyaw sa pagdala sa mga delegado gikan sa Rio Negro Valley sa habagatan sa nasod ngadto sa River Plate nga kombensiyon. Ang usa ka tawong interesado misakayg bisikleta sulod sa upat ka adlaw, 800 kilometros (500 milya), sa pagtambong sa kombensiyon sa Córdoba.
Nganong may ingong paningkamot sa pagtambong? Tungod kay ang mga Saksi ni Jehova mahunahunaon kaayo sa ilang espirituwal nga panginahanglan. (Mateo 5:3) Ang mantalaang Clarin miingon: “Ang tambag, ang kinaiyanhong tambag, ang mga katin-awan sa Bibliya, gisunod pag-ayo sa libolibong mga lalaki ug mga babaye si kinsa, nga nagsulat ug mga nota dihang gisitar ang usa ka teksto sa Bibliya, nagsusi sa Sagrada Eskritura ug nagtan-aw sa gikutlo.” Ang La Voz del Interior sa Córdoba miingon: “Ang asembliya nagpasiugda nga kinahanglang tun-an kon unsaon pagtuman nga maampingon ang kasugoan sa Diyos, bisan sa mga detalye sama sa asosasyon, sa musika, ug sa personal nga pamiste.”
Sa pagpadayag sa epekto sa impormasyon nga gipahayag, ang usa ka lalaki mipahayag sa wala madugay usa ka panahon tapos sa kombensiyon: “Sukad niadtong adlawa [sa pagtambong sa kombensiyon], ang akong kinabuhi bug-os nabag-o. Ako makasabot na sa mga membro sa akong pamilya. Ako nagatrabaho nga mas maayo. Ako malipayon kaayong nakasinati kaninyo, nga nakaamgong aduna pay maayong mga tawo, mga tawong nagatabang sa ilang silingan tungod sa paghigugma kang Jesus. Ang mga babaye nagabisteng kasarangan, walay nagatabako o nagainom. Usa ka tinuod nga paraiso, uban ang daghan kaayong tawo nga nagakahiusa ug nagagawing samag sila usa ka dakong pamilya.”
Ang maong mga komento nagatabang kanato sa pagpabili nga pinaagi sa espiritu ni Jehova posible ang maong kahusay ug gugma.