Imantala ang Kagawasan!
ANG ikalimang bilyong tawo sa yuta giingong natawo sa Hulyo 7, 1986. Unsang matang sa kaugmaon ang pagaatubangon niining ikalimang bilyong tawo, ug sa pagkamatuod sa tanang tawo? May posibilidad bang ang binilyong tawo may adlaw nga makatagamtam ug tinuod nga kagawasan? Sa masaligon, kami magaingon nga oo. Apan unsay atong pagsabot sa “kagawasan”? Nagkahulogan ba kana sa pagtugot sa pagbuhat sa bisan unsang buot buhaton sa usa? Dili, kay sumala sa gisulat sa ika-19ng-siglong Ingles nga nobelista si Charles Kingsley: “Adunay duha ka kagawasan, ang mini diin ang usa libreng mobuhat sa iyang gusto, ug ang tinuod diin siya libreng mobuhat sa butang angay niyang buhaton.”
Maangkon sa tawo ang tinuod nga kagawasan pinaagi sa pagbuhat lamang sa “angay niyang buhaton.” Ug unsay angay niyang buhaton? Sa dinhi si Jesus sa yuta, siya miingon lamang nga adunay duha ka dagkong sugo—ang nahauna, higugmaa ang Diyos uban sa tibuok kasingkasing, hunahuna ug kusog sa usa, ug ang ikaduha, higugmaa ang silingan sama sa kaugalingon. (Marcos 12:29-31) Ang tinuod nga kagawasan maangkon lamang niadtong nagapasundayag sa tinuod nianang tiunay nga gugma—ang gugma sa Diyos ug sa isigkatawo.—Juan 8:31, 32.
Ang kalibotan ba karong adlawa nagapadayag nianang matanga sa gugma? Ikasubo, wala. Kon walay gugma, ang mini nga matang sa kagawasan ang maglungtad. Kini nagabuga sa hakog, independenteng espiritu. Kini mopugos sa ‘pagbuhat kon unsay gusto,’ nga walay pagtagad sa Diyos o sa silingan. Kining espirituha molapaw sa indibiduwal ug moabot sa mga komunidad, mga rasa, ug mga nasod. Samtang mopadayon ang ako-una nga tinamdan, ang patukoranan sa bisan unsang kagawasan, pakigdait, kalipay niining yutaa mahuyang gayod. Hinumdomi, si Jesus miingon, “Higugmaa ang imong silingan sama sa imong kaugalingon.” Ang maong gugma sa silingan kinahanglanon aron matagamtam ang tinuod nga kagawasan.
Ang organisasyong Hiniusang Kanasoran giporma sa pagpahigawas sa katawhan pinaagi sa pagpuli sa hampak sa gubat sa “kalinaw ug kasegurohan.” Sa ika-40ng anibersaryo niini, ang HK nagmantala sa 1986 ingong Internasyonal nga Tuig sa Pakigdait. Apan kini ba misangpot sa usa ka pagmantala sa kagawasan uban ang tinong mga garantiya sa pakigdait? Namenosan ba ang makalilisang gastos sa armas (nga karon mokabat sa kapin ug $1,000 bilyon sa usa ka tuig)? Ang terorismo ug pamomba sa kotse nakunhoran ba? Ang tungod-sa-relihiyong pagpinatyanay sa Amihanang Irlandiya, Tungang Sidlakan, ug Asia nahunong ba? Ang mga pangulo sa relihiyon nangentra sa politika ug sigeng nagahisgot sa kalinaw. Apan ang salampati sa tinuod nga kalinaw maorag nakalupad nga dili hisakpan sa HK ug sa mga relihiyon sa kalibotan.
May usa ba ka pundok karong adlawa nga misalikway sa ako-una nga mga paagi sa kalibotan? Oo, aduna! Ang gitagnang “Prinsipe sa Pakigdait,” si Jesu-Kristo, nagtigom sa mga nahigugma sa kalinaw ‘gikan sa tanang tribo, pinulongan, katawhan ug kanasoran.’ (Isaias 2:3, 4; 9:6, 7; Pinadayag 5:9; 7:9) Sila nagakalipay nga ang Gingharian sa Diyos pinaagi ni Kristo hapit nang maglaglag sa tanang pagkadaotan ug magpatungha sa tibuok-yutang paraiso nga may pakigdait, diin ang tinuod nga kagawasan molungtad. Kining pundoka nailhang mga Saksi ni Jehova. (Daniel 2:31-35, 44; Isaias 43:10, 12; 65:17-25) Nga nagkahiusa, kining maong mga Kristohanon nagapakig-ambit sa masadyaong pagmantala nga gilandongan sa mga bahin sa kahikayan sa Tinghugyaw sa karaang Israel. Sa matag usa sa 200 ug kapin pang kayutaan sa tibuok yuta, sila malipayong nagasugot sa sugo sa Diyos: “Imantala ang kagawasan sa yuta ngadto sa tanang pumuluyo niini.” (Levitico 25:10) Nakadungog ka ba ug namati nianang masadyaong hugyaw?