Mga Saksi ni Jehova sa Misyonerong Natad

ANG mga misyonero sa mga Saksi ni Jehova sa Asia ug sa ubang dapit ginapangutana: “Nganong kamo wala may Iningles nga mga klase sama sa ubang mga misyonero?” “May mga eskuylahan ba kamo nga akong kapadad-an sa akong mga anak o mga ospital alang sa mga masakiton?” Ang tubag, sa tinuod, wala. Apan nganong wala? Sa dayag, unsa ang tumong sa mga Saksi? Ug unsay ilang nahimo alang sa mga tawo niining mga nasora?

Lahi nga mga Panghunahuna

Dili ikalimod nga ang mga misyonero sa Kakristiyanohan nakakabig ug daghan pinaagi sa sosyal nga mga serbisyo nga ilang gihatag. Sanglit ang dakong buluhaton gitumong man lamang sa pagtagbaw sa materyal nga mga panginahanglan sa tawo inay sa ilang espirituwal nga mga panginahanglan, kining mga misyoneroha wala molampos sa paghimog tinuod nga mga tinun-an ni Jesu-Kristo. (Mateo 7:22, 23; 28:19, 20) Labing hinungdanon, wala silay gihatag nga permanenteng solusyon sa sosyal nga mga kasakitan nga ilang gipaningkamotang mabuntog.

Ang mga Saksi ni Jehova, sa laing bahin, mabalak-on sa mas importanteng sugo sa pagwali sa maayong balita sa Gingharian sa Diyos. (Mateo 24:14) Kini dili tungod kay wala silay kasayoran o walay pagtagad maylabot sa tanang tawhanong pag-antos ug mga inhustisya nga ilang nakita. Hinunoa, tungod kini kay sila nakahibalo nga ang bugtong sulbad niining seryosong mga suliran nasandig, dili sa tawhanong mga kamot, kondili sa Gingharian sa Diyos.​—Salmo 146:3-10.

Mao gayod kana ang giwali ni Jesus ug sa iyang mga tinun-an sa unang siglo. “Kinahanglang iwali ko ang maayong balita sa gingharian sa Diyos,” miingon si Jesus, “tungod kay alang niini ako gipadala.” (Lucas 4:43) Gipunting ug giwali ni Jesus ang Gingharian sa Diyos nga mao lamang ang bug-os nga sulbad, tungod kay siya nasayod nga ang suliran sa kalibotan sobra ra kaayo ka dako alang sa tawo sa pagsulbad nga mag-inusara. Bisan pag naghimo si Jesus ug daghang milagrosong mga pagpangayo, iyang giawhag ang iyang mga tinun-an sa “pagpadayon sa pagpangita pag-una sa gingharian ug sa pagkamatarong [sa Diyos], ug kining tanang ubang mga butang igadugang ra kaninyo.”​—Mateo 6:33.

Sa ulahi, dihang gipadala ni Jesus ang iyang mga tinun-an, iyang unang gisultihan sila: “Ug samtang magapanglakaw kamo, pagwali kamo nga magaingon, ‘Ang gingharian sa langit haduol na.’” Dayon siya midugang: “Ayoha ninyo ang mga masakiton, banhawa ang mga patay, hinloi ang mga sanlahon, pagulaa ang mga demonyo.” (Mateo 10:7, 8) Mao kanay giuna sa modernong adlawng mga disipulo ni Jesu-Kristo. Kinahanglang ilang unahon usab ang pagwali sa maayong balita sa Gingharian ingong ilang pangunang tumong, labaw pa sa paghimong mga buluhaton sa pagtabang sa tawo. Mao kanay gipaningkamotan sa mga misyonero sa mga Saksi ni Jehova nga buhaton.

Pagtagana sa Espirituwal nga Panginahanglan sa mga Tawo

Ingong grupo sa mga Kristohanon, ang mga Saksi ni Jehova nakigbahin sa dakong buluntaryong programa sa pagtaganag edukasyon sa Bibliya alang sa katawhan. Sanglit mga magmamantala sa maayong balita, sila interesado sa pagtabang sa uban nga makabaton ug kaayohan gikan sa kaalam ug sa tambag sa Bibliya, karon ug sa umaabot. (Salmo 68:11) Ngano man?

Ang mga Saksi nahibalo nga dihang matabangan ang tawo nga makasabot ug mosunod sa tambag sa Bibliya, sila mas nasangkapan sa pag-atubang sa mga suliran ug sa mga kalisdanan sa kinabuhi. Sa laing bahin, sila nakabaton ug moral nga kalig-on nga gikinahanglan sa pagbuntog sa mga batasan nga makapaulipon ug makadaot sa pisikal sama sa pagtabako, sobrang pag-inom, pag-abuso sa mga droga, dili maayong batasan sa kahindikan, pagpanugal, ug seksuwal nga kahilayan. Sa laing bahin, ang kamatuoran sa Bibliya nakatabang kanila sa pagbag-o sa ilang salabotan, sa paghatag kanila ug katuyoan sa kinabuhi ug realistikanhong paglaom alang sa umaabot.

Busa, pinaagi sa pagtagana sa labing taas nga porma sa edukasyon​—nga nagagikan sa Pulong sa Diyos, ang Bibliya​—ang mga Saksi ni Jehova nakahimog direktang kontribusyon sa pagpataas sa moral ug pisikal nga panglawas sa komunidad nga ilang gipuy-an ug giwalihan. Kasagaran namatikdan kini sa uban nga nakapaniid kanila sa maayong paagi. Pananglitan, si Dr. Bryan Wilson sa Oxford University, nga nagtuon sa mga kalihokan sa mga Saksi ni Jehova sa Aprika, mipahayag diha sa sulat ngadto sa Times sa London:

“Ang mga Saksi ni Jehova kugihan ug kasagaran matarong ug masingkamoton kay sa kasarangan taliwala sa ilang kaubang mga lungsoranon. Sila giduyogan sa ilang mga lider sa pagbayad ug sayo sa ilang mga buhis, sa pagpugong sa kabangisan, ug sa paglikay sa pagpakasala. Sila mahapsay, matinuoron ug maligdong. Kining mga hiyasa hinungdanon kaayo diha sa ekonomikanhon ug sosyal nga kaugmaran sa katilingban sa Kasadpan, ug dili paghinobra ang pag-ingon nga ang mga Saksi ni Jehova mao ang labing matul-id ug kugihang lungsoranon sa mga nasod sa Aprika.”

Sa samang pagkapamulong, laing tigpaniid sa South America mipahayag niini diha sa editoryal sa peryodiko:

“Ang mga Saksi ni Jehova kugihan, matinud-anon, mahadlokon ug Diyos nga katawhan. Sila makasaranganon ug mahigugmaon ug tradisyon ug ang ilang relihiyon gipasukad sa mga pagtulon-an sa Bibliya.”

Busa bisag wala hatagig pasiugda sa mga Saksi ni Jehova kanang gitawag sa kadaghanan nga sosyal nga ebanghelyo, sila aktibo sa pagtabang sa intereses sa komunidad pinaagi sa pagtabang sa uban sa pagpaangay sa ilang kinabuhi sibo sa hataas nga mga sukdanan sa Bibliya. (Roma 12:1, 2) Labing hinungdanon, sila nagatabang usab sa mga tawo sa tanang dapit sa pagtan-aw labaw pa sa mga inhustisya ug sa pagkadili-timbang niining tulin nga nagakadunot nga sistema sa mga butang ngadto sa bag-ong sistema nga himoon sa Diyos, sa dili magdugay.​—Pinadayag 21:5.

[Mga Letrato sa panid 8, 9]

Kasulbaran sa Sosyal nga mga Kasakitan Pinaagi sa Gingharian sa Diyos

Basaha diha sa imong kaugalingong Bibliya ang mosunod nga mga kasulatan ug mapahalipayan sa pagtan-aw kon sa unsang paagi wagtangon ang mga problema ug sosyal nga mga kasakitan sa mosunod nga mga dapit:

Panglawas Isaias 33:24; 35:5, 6; Pinadayag 21:4

Edukasyon Isaias 11:9; Habacuc 2:14

Trabaho Isaias 65: 21-23

Kalan-on Salmo 67:6; 72:16; Isaias 25:6

Inhustiya Isaias 11:3-5; 32:1, 2