Ikaw ba May Mausisaong Kaisipan?

ANG pagkamausisaon maoy “tinguha nga mahibalo.” Ang kusganong pagkamausisaon mohimo sa usa ka tawo nga ikag mahibalo, masusihan ang mga butang. Gibutang ni Jehova kining kaikag diha kanato, mao nga halos sukad sa gutlo sa pagkatawo kita gitukmod sa pag-usisa sa kalibotan sa atong palibot. Ang atong pagkinabuhi mismo maoy walay-pagkatapos nga palakaw sa pagkakat-on. Aron kita mahimong hamtong, maayong-pagkasibo nga mga hamtong, kinahanglang atong tagbawon ang atong pagkamausisaon, atong tinguha sa pagsusi sa mga butang.

Kini matuod ilabina sa espirituwal nga kahimtang. Ang atong kalaoman sa kinabuhing dayon nagaagad sa atong pagkakat-on bahin kang Jehova nga Diyos. (Juan 17:3) Ang Bibliya nagasugid kanatong buot niyang kita mousisa bahin kaniya, nga “mangita kaniya ug makakaplag gayod kaniya.” (Buhat 17:23, 24, 27) Kon atong pukgoon ang atong pagkamausisaon o mapakyas sa pagtugot nga kini maugmad, ang atong pag-uswag mahimong hinay kaayo. Ngani, ang kakulang sa interes sa espirituwal nga mga butang makapatay.​—Salmo 119:33, 34; Oseas 4:6.

Busa, ang katawhan ni Jehova sukad sa karaang mga panahon kanunay nagpasiugda ngadto kanila sa panginahanglan sa instruksiyon ug pagkakat-on aron matagbaw ang tukmang tinguha sa pagkakat-on. (Deuteronomio 6:6, 7; 31:12; 2 Cronicas 17:9) Si Jesus ang Mesiyas mao ang kinadak-ang magtutudlo sukad sa yuta. (Mateo 9:35) Gisunod sa iyang mga tinun-an ang iyang panig-ingnan. Bisan pag miatubang sa pagsupak, sila “nagpadayon nga walay hunong sa pagtudlo ug pagpahayag sa maayong balita.” (Buhat 5:42) Ang maong pagpanudlo nakapukaw sa interes diha sa mausisaong mga hunahuna. Daghan ang nahisama sa mga taga-Berea, kinsa misanong uban “ang kinadak-ang kaikag sa hunahuna, nga mainampingong nagsusi sa Kasulatan sa matag adlaw aron pagsuta kon ang maong mga butang matuod ba.”​—Buhat 17:11.

Sa susama, daghan sa mga buluhaton sa modernong Kristohanong kongregasyon nasentro sa pagpanudlo. Busa, ang kongregasyon nagatuman sa pangunang katuyoan sa paglungtad niini, nga mao, ang pagpasiugda ug pagtagbaw sa tinguha sa pagkakat-on mahitungod kang Jehova ug sa iyang mga katuyoan. Kining matanga sa pagkamausisaon maayo ug mapuslanon.

Tukmang mga Limitasyon sa Pagkamausisaon

Ugaling, may panahong ang mga bata kinahanglang mapanalipdan gikan sa ilang kaugalingong pagkamausisaon. Inigpangab-ot sa usa ka masuso aron mohikap sa butang mainit o mausisaong ibutang ang usa ka bildong butang sa iyang baba aron susihon kon unsay lami niana, basin siya madaot. Kita dili magababag sa iyang pagtubo kon dili nato idasig ang iyang pagkamausisaon sa maong mga paagi.

Inigkadagko sa mga bata, ang ilang pagkamausisaon tingali motultol na usab kanila ngadto sa suliran. Busa, ang usa ka tin-edyer nga batang lalaki tingali mausisaon kaayo kon unsay anaa sa pornograpikong magasin. O ang tin-edyer nga batang babaye tingali, tungod sa pagkamausisaon, moeksperimento sa tabako o sa ubang droga. Ang usa ka pundok sa mga batan-on tingali magtigom ug moinom ug daghang serbesa​—aron mosulay sa pagkahubog aron lamang tan-awon kon sama kana sa unsa! Sa makausa pa, kita wala magpiot sa kinaiyanhong pagtubo ug kaugmaran sa usa ka tin-edyer kon dili nato idasig kining matanga sa pagkamausisaon.

May mga butang ba nga niana ang pagkamausisaon sa usa ka hamtong nga Kristohanon makapasugamak niya sa suliran? Oo, gayod. Gipasidan-an ni Pablo si Timoteo batok niadtong tingali mopahimulos sa pagkamausisaon sa usa ka Kristohanon sa pagpaningkamot sa pagpukan sa iyang pagtuo. “Oh Timoteo,” matud ni Pablo, “bantayi kon unsay gisalig kanimo, nga magpahilayo sa walay-hinungdang mga pahayag nga nagalapas kon unsay balaan ug gikan sa mga panagsumpaki sa bakak gitawag nga ‘kahibalo.’ Tungod sa pagpagawal sa maong kahibalo ang pipila nahibulag sa pagtuo.”​—1 Timoteo 6:20, 21.

Sa iyang ikaduhang sulat kang Timoteo, gihatag ni Pablo ang dugang pasidaan: “Kining mga tawhana mismo mibulag sa kamatuoran, nga nagaingon nga nahitabo na ang pagkabanhaw; ug sila nagapukan sa pagtuo sa pipila.” (2 Timoteo 2:18) Makahanduraw ka ba giunsa gayod pagpukaw sa maong mga pulong ang kamausisaon? Ang dili-mabinantayong mga tawo tingali naghunahuna: ‘Unsay ipasabot niining mga tawhana? Nganong sila makaingong nahitabo na ang pagkabanhaw?’ Kay nahibulong, sila tingali nagpatalinghog. Ang resulta? Ang pagtuo sa pipila napukan. Ang pagpatalinghog sa maong mga sinultihan tungod sa kamausisaon peligroso sama ra sa pag-eksperimento sa mga droga o pornograpiya tungod sa kamausisaon.

Nagkahulogan ba kini nga ang mga Kristohanon mapig-oton ug hunahuna, nga dili buot mamati sa mga opinyon sa ubang tawo? Dili, dili kana ang punto. Hinunoa, sila gitambagan sa paglikay sa pagbukas sa ilang mga kaisipan alang sa mga butang makapaguol kanila sa ulahi. Hunahunaa ra gud kon unsa unta ka lahi ang kasaysayan kon si Eva wala pa magpatuyang sa iyang kamausisaon pinaagi sa pagpatalinghog sa malimbongong mga pulong ni Satanas nga Yawa! (Genesis 3:1-6) Si apostol Pablo nagpasidaan sa mga ansiano sa Efeso bahin sa “mga lobo” si kinsa, nga nagpadayag sa samang espiritu nga gipadayag ni Satanas ngadto kang Eva, “namulong sa tinuis nga mga butang nga nakakabig ug mga tinun-an alang sa ilang kaugalingon.” (Buhat 20:29, 30) Sila migamit ug “mini nga mga pulong” nga gilaraw aron “pahimudsan” kita. Kining mga pulonga nagapahayag ug mga hunahuna nga makahilo sa espirituwalidad sa usa ka Kristohanon.​—2 Pedro 2:3.

Kon nahibalo ka nga ang usa ka ilimnon makahilo, imnon ba nimo kana tungod sa kamausisaon sa pagsusi kon unsay lami niana, o sa pagsusi kon kaha ang imong lawas may igong kalig-on sa pagsukol sa hilo? Siyempre dili. Sa susama, maalamon ba ang pagbukas sa imong hunahuna ngadto sa mga pulong tinuyong gilaraw sa paglimbong kanimo ug pagpahilayo kanimo gikan sa kamatuoran? Dili gayod!

Pagbantay sa Kalibotanong mga Pilosopiya

Ang kamausisaon makadaot usab kanato, kon kini motultol sa pagsusi sa kalibotanong mga pilosopiya. Ang pilosopiya gihubit ingong “tawhanong mga paningkamot sa pagsabot ug paghubad pinaagi sa pangatarongan ug pagbanabana sa bug-os tawhanong kasinatian, sa nagpahiping mga hinungdan ug sa mga prinsipyo sa realidad.” Hinuon, sa kataposan kadtong nagasugyot sa tawhanong mga pilosopiya mosangpot nga sama niadtong “kanunay nagatuon apan wala mahidangat sa tukmang kahibalo sa kamatuoran.” (2 Timoteo 3:7) Ang ilang kapakyasan maoy tungod sa usa ka paninugdang depekto: Sila nagasalig sa tawhanong kaalam inay sa kaalam gikan sa Diyos.

Ang maong depekto sa prangka giyagyag ni apostol Pablo. Siya namulong ngadto sa mga taga-Corinto mahitungod sa “kaalam niining kalibotana,” nga maoy “kabuangan sa Diyos.” (1 Corinto 3:19) Ug iyang gipasidan-an ang mga taga-Roma batok niadtong “walay buot sa ilang mga pangatarongan.” (Roma 1:21, 22) Si Jehova mao ang tinubdan sa tanang atong nabatonan. Sa tukma, kita nagasalig kaniya sa pagtaganag “tukmang kahibalo ug bug-os nga pagsabot” ug sa pagpadayag kanato sa “halalom nga mga butang sa Diyos.” (Filip. 1:9; 1 Corinto 2:10) Ang pangunang tinubdan sa kaalam sa Diyos mao ang iyang Pulong, ang Bibliya.

Tungod kay ang tawhanong mga pilosopiya wala manumbaling sa Pulong sa Diyos, angay dili gayod nato pakamenosan ang kapeligrohan niini. Ang modernong pilosopiyang panghunahuna nakadani sa daghang magtutudlo sa Kakristiyanohan sa pagdawat sa doktrina sa ebolusyon. Sila nagabiya gani sa ilang pagtuo sa pagkadinasig sa Bibliya sa pagdapig sa higher criticism o pagsaway sa balaang kasulatan sa paningkamot sa pagbatog intelektuwal nga pagkadungganon. Ang politikanhon ug sosyal nga mga pilosopiya nga nagapasiugdag personal nga kagawasan mitultol sa epidemya sa mga aborsiyon, kaylap seksuwal nga imoralidad, pag-abusar sa droga, ug ubang makadaot nga mga buhat. Ang materyalistikanhong panghunahuna nagatultol sa kadaghanang tawo karong adlawa sa pagsukod sa kalipay ug kalamposan pinasukad sa ilang materyal nga katigayonan.

Kining tanang pilosopiya nagahawas sa paningkamot sa pagsulbad sa mga suliran o pagpangitag kalipay pinaagi sa tawhanong pangatarongan ug nga wala ang tabang sa Diyos. Kanang tanan wala manumbaling sa paninugdang kamatuoran nga giila ni Jeremias: “Nahibalo ako, Oh Jehova, nga dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.” (Jeremias 10:23) Ang atong kalipay ug atong kaluwasan nagadepende sa atong pagkamasinugtanon ug pagsalig kang Jehova. Busa maoy dalang maalamon ang pagsukol sa tentasyon sa pagpatuyang sa atong kamausisaon, nga magaladlad sa atong kaisipan ngadto sa tawhanong mga ideya nga makadaot sa atong panghunahuna ug sa kataposan pasagdan kitang nawala taliwala niadtong walay paglaom.

Kamausisaon Mahitungod sa Nagsingabot nga Kataposan

Sukad sa pagpadayag ni Jehova sa Eden nga siya may katuyoan sa paghanaw sa daotang mga epekto sa rebelyon ni Satanas, ang Iyang matinumanong mga alagad kanunay nagbaton sa madasigong kamausisaon bahin sa paglampos sa balaang katuyoan. Aw, bisan ang mga manulonda nagpadayag sa kamausisaon mahitungod niini! (1 Pedro 1:12) Sa adlaw ni Jesus, daghan ang dulot interesado sa pagkahibalo sa tukmang panahon sa pag-abot sa Gingharian. Bisan pa niana, gisulti ni Jesus nga balikbalik kanila nga dili kabubut-on ni Jehova nga sila mahibalo. (Mateo 25:13; Marcos 13:32; Buhat 1:6, 7) Ang pagsulay sa pagbutang ug tinong petsa makawang. Hinunoa, maalamon niyang giawhag sila sa pag-atiman sa ilang Kristohanong mga responsabilidad, nga batonan ang pagsabot sa pagkadinalian sa matag adlaw.​—Lucas 21:34-36.

Karong adlawa, ang mga hitabo sa kalibotan nagataganag dakong ebidensiya nga duol na ang kataposan, ug ang kamausisaon dako mahitungod sa petsa nga kana mahitabo. Ang pila ka hitabo tingali nagkombinsir sa pipila nga ilang nadiskobrehan ang adlaw ug ang takna. Naagoman nila ang dakong kaguol, tingali sa punto nga sila mibulag sa pag-alagad sa Diyos, dihang wala matuman ang ilang mga gidahom. Labi pang maayo nga itugyan kana sa mga kamot ni Jehova, nga mosalig nga iyang ipahinabo ang kataposan sa husto gayod nga panahon. Ang tanang atong gikinahanglan aron maandam gitagana na.

Ang Panginahanglan sa Katimbang

Busa, sama sa daghang ubang butang sa kinabuhi, ang atong kamausisaon mahimong usa ka panalangin o usa ka tunglo. Kon tukmang pagkatultol, kini makapadayag sa bililhong mga kasayoran nga mohatag kalipay ug kahupayan. Ang makataronganong kamausisaon bahin sa atong Maglalalang, sa iyang kabubut-on, ug sa iyang mga katuyoan makapatagbaw ug mapuslanon kaayo. Ang walay-pagpugong, daotang kamausisaon makadani sa usa paingon sa kalapokan sa pagbanabana ug sa tawhanong mga teoriya diin ang tinuod nga pagtuo ug diyosnong debosyon dili makalahutay. Busa, kon ang atong kamausisaon magpameligro nga kita maagak ngadto sa butang kaduhaduhaan, “magbantay nga kamo dili mahisalaag . . . ug mahulog gikan sa inyong kaugalingong pagkalig-on.”​—2 Pedro 3:17.