Pagsangyaw sa mga Paryente—Sa Unsang Paagi?
1. Nganong nagkinahanglag pagsabot sa dihang mosangyaw sa mga paryente?
1 Pagkadako sa atong kalipay nga mosulod sa bag-ong kalibotan uban sa atong mga paryente, nga nahiusa uban kanila diha sa pagsimba kang Jehova! Pinaagi sa atong pagsangyaw sa mga paryente, kining masadyang palaaboton mamatuman. Apan, nagkinahanglag pagsabot ang pagbuhat niana sa makapahupay nga paagi. Usa ka magtatan-aw sa sirkito nag-ingon: “Ang labing maayong mga sangpotanan makab-ot niadtong magpukaw sa pagkamausisahon sa ilang mga paryente pinaagi sa pagsangyaw kanila sa popanahon.” Unsaon man nato paghimo niini?
2. Sa unsang paagi ang sinserong interes ngadto sa atong mga paryente motabang kanato sa pagpukaw sa ilang pagkamausisahon?
2 Pukawa ang Ilang Pagkamausisahon: Hunahunaa pag-ayo kon unsaon nimo pagpukaw ang interes sa imong mga paryente. (Prov. 15:28) Unsay ilang mga gikabalak-an? Unsang mga kalisod ang ilang ginasagubang? Mahimong ipaambit nimo ang usa ka artikulo o hisgotan ang usa ka makapadaning teksto bahin sa ulohan nga makapaikag gayod kaniya. Kon ang imong mga paryente nagpuyo sa layo, basin mahimo nimo kini pinaagi sa pagsulat o pagtawag sa telepono. Nga dili sila lumsan sa impormasyon, ipugas ang mga binhi sa kamatuoran, ug salig kang Jehova nga maoy magpatubo sa maong mga binhi.—1 Cor. 3:6.
3. Sa unsang paagi ang interes sa atong mga paryente kanato magbukas sa dalan aron kita makasangyaw?
3 Gisugo ni Jesus ang tawo nga iyang gihinginlan ug daghang demonyo: “Pauli ngadto sa imong mga paryente, ug itaho kanila ang tanang butang nga gihimo ni Jehova alang kanimo ug ang iyang kaluoy kanimo.” (Mar. 5:19) Handurawa ang maayong impresyon nga nahimo niadto sa iyang mga paryente! Bisan tuod dili ka makasinati ug ingon niana ka kulbahinam, lagmit ang imong mga paryente mainteres sa imong mga kalihokan o sa kalihokan sa imong mga anak. Ang paghisgot bahin sa imong pakigpulong sa Teokratikanhong Tunghaan sa Ministeryo, sa kombensiyon nga imong gitambongan, sa pagduaw sa Bethel, o sa usa ka mahinungdanon nimong kalihokan basin maoy magbukas sa dalan aron imong ikapaambit kanilag dugang ang bahin kang Jehova ug sa iyang organisasyon.
4. Unsang mga lit-ag ang atong likayan sa dihang mosangyaw sa mga paryente?
4 Magmasinaboton: Sa dihang mosangyaw sa mga paryente, ayaw sila saysayi ug daghan kaayong butang sa usa ka higayon. Sa paghinumdom kaniadto sa iyang pagsugod sa pagtuon sa Bibliya, usa ka igsoong lalaki miadmitir: “Gidabodabohan dayon nako ang akong inahan sulod sa daghang oras nga nagsaysay kaniya sa tanan nakong nakat-onan sa Bibliya, ug sagad misangpot kadto sa panaglalis, ilabina gyod sa akong amahan.” Bisan pag ang usa ka paryente mopahayag ug interes sa mensahe sa Bibliya, tubaga siya sa paagi nga mapukaw ang iyang dugang interes sa pagkat-on. (Prov. 25:7) Ipakita kanunay ang pagtahod, kalulot, ug pailob, sama sa imong ipakita sa dihang ikaw makigsulti sa mga estranghero diha sa ministeryo.—Col. 4:6.
5. Unsay angay natong himoon kon ang mga paryente dili manumbaling sa dihang ato silang sangyawan?
5 Sa usa ka higayon, ang mga paryente ni Jesus naghunahuna nga siya nalisoan sa pangisip. (Mar. 3:21) Apan, sa ulahi ang uban kanila nahimong mga magtutuo. (Buh. 1:14) Kon ang una nimong mga paningkamot sa pagpaambit sa kamatuoran ngadto sa imong mga paryente dili panumbalingon, ayawg kaluya. Ang mga kahimtang ug mga tinamdan mausab. Padayon sa pagpangitag laing higayon sa pagpaambit ug punto nga makapukaw sa ilang pagkamausisahon. Mahimong makabaton kag kalipay sa pagtabang kanila nga mosugod pagsubay sa dalan ngadto sa kinabuhing walay kataposan.—Mat. 7:13, 14.