Papreskohi ang Imong mga Paryente sa mga Tubig sa Kamatuoran
“INGON sa bugnaw nga tubig sa giuhaw nga kalag, mao man ang maayong balita gikan sa halayong yuta,” miingon si Solomon. (Proverbio 25:25) Pagkamakapadasig nga kasinatian alang sa giuhaw nga kalag nga makadungog sa imong maayong taho sa kinabuhing dayon sa umaabot nga Paraiso! Niini nga paagi, ang imong baba mahimong “usa ka tuboran sa kinabuhi.”—Proverbio 10:11; Isaias 52:7.
Ang tubig mohunob sa yuta ug mopatubo, samtang ang baha mahimong malaglagon. Dugang pa, ang tubig diha sa pormang ilimnon nga bugnaw makapapresko, apan kinsa bay gustong maabtan diha bunok sa niyebe o ulan sa nanigbug-ok nga tubig? Sanglit ang bisan unsa nga mogula sa atong baba gitandi man sa tubig, ang maidlot nga pagtagad sa atong pagpanudlo kinahanglan. (1 Timoteo 4:16) Ilabinang hunahunaon nato ang nagkalainlaing mga epekto niini nga “tubig” sa dihang kita mosangyaw sa mga paryente.
“Pagbisibis” sa mga Paryente
Sa karaang mga panahon, gibuksan ni Rahab ang dalan sa kaluwasan alang sa iyang pamilya, ug si Cornelio nagpamatuod sa iyang mga paryente. (Josue 2:13; 6:23; Buhat 10:24, 30-33) Ang igsoon ni Pedro nga si Andres mitabang kaniya nga mahimong tinun-an ni Jesus. (Juan 1:40-42) Ug karong adlawa daghan sa mga Saksi ni Jehova ang nagasangyaw sa kamatuoran sa Bibliya sa ilang mga paryente. Ang Proverbio 11:25 nagsaad: “Ug kadtong dagayang nagabisibis sa uban dagayang pagabisbisan usab.”
Ang usa ka babaye sa Uropa nagtinguha sa pagpaambit sa iyang bag-ong pagtuo uban sa iyang mga ginikanan, igsoong mga lalaki, ug igsoong mga babaye nga nagpuyo sa Pilipinas. Siya miasoy: “Gihimo ko kini sa matag sulat ko ngadto kanila. Sa wala pa ako mabawtismohi, ako nagpadala usab ug mga libro kanila ug nangutana kon gusto ba nila nga duawon sila sa mga Saksi ni Jehova.” Sa iyang dakong kalipay, sila miuyon nga duawon, ug karon walo kanila ang nag-alagad na kang Jehova. Ang ubang mga Saksi nakakitag maayong mga resulta pinaagi sa pagpadalag mga gasang suskrisyon sa Ang Bantayanang Torre ug Pagmata! sa ilang mga paryente.
Apan komosta kon ang mga membro sa pamilya walay interes? Nakaatubang si Jesus niining situwasyona, kay may higayon nga ang “iyang mga igsoon, sa pagkamatuod, walay pagtuo kaniya.” Sa ulahi, hinunoa, “uban sa panaghiusa” sila milahutay sa pag-ampo, uban sa mga apostol. (Juan 7:5; Buhat 1:14) Nganong dihay kausaban sa kasingkasing? Dayag gitabangan ni Jesus ang iyang mga paryente sa wala pa siya mokayab sa langit. Sa unsang paagi? Siya mitabang kanila nga makabaton ug pagtuo pinaagi sa pagpakita sa iyang igsoon sa inahan nga si Santiago. (1 Corinto 15:7) Busa, ayawg hunong sa imong paningkamot sa pagtabang sa imong mga paryente. Daghang mga Saksi ang nakahimo sa pagkighisgot uban sa dili-magtutuong mga paryente bahin sa kamatuoran sa Bibliya human sa mapailobong paghulat sa hustong panahon.
“Ang pagbisibis” sa mga paryente wala magkahulogan, hinunoa, nga lumsan sila sa mga pulong. Ang usa ka magtiayong taga Yugoslavia mikomento: “Adunay kapeligrohan nga masobrahan sila sa pagsangyaw.” Ang usa ka nagapanawng magtatan-aw nakamatikod: “Pasaobrahan usahay kini sa mga igsoon, mopakitag wala sa lugar nga kadasig.” Si Ludwig nakahinumdom sa panahong siya misugod sa pagtuon sa Bibliya: “Ako dayong gisangyawan sa daghang oras ang akong inahan nga naghatag katin-awan halos tanang butang nga akong natun-an gikan sa Bibliya, ug kini kanunay mitultol ug panaglalis, ilabina sa akong amahan.”
Pagkahimong “Atabay sa Kaalam”
Atong mabasa nga “ang dila sa manggialamon sa matul-id nagapamulong ug kahibalo, apan ang baba sa mga buang nagpagula sa mga kabuangan,” ug “ang kasingkasing sa tawong matarong nagatuon sa angay nga ipanubag.” (Proverbio 15:2, 28) Ang maayong panghunahuna, kaalam, ug pagsabot gikinahanglan aron ang atong mga pulong makapapresko ug makapadasig nga pamation. Kanus-a, unsa, ug unsa ka daghan ang atong isulti dakog kalabotan.
Diha sa mainit nga adlaw, pananglitan, pagkamakapapresko ang usa ka baso sa bugnaw nga tubig alang sa tawong giuhaw! (Mateo 10:42) Apan walay mangandoy sa pagbubo ug usa ka baldi nga puno sa tubig diha sa iyang ulo! Ang magtatan-aw sa sirkito nga gikutlo sa itaas mikomento: “Ang maayong mga resulta nakab-ot niadtong nakapukaw sa pagkamaukit-ukiton sa ilang mga paryente pinaagi sa pangsangyaw sa tukmang gidaghanon.” Sa dihang ang usa ka misupak nga paryente uhawon, pagaingnon pa, ug misugod sa pagpangutana, ang mabungahong panaghisgot sa Bibliya ang kasagarang mosunod.
Si Huriye, usa ka Saksi sa Turkey, milampos niini diha sa balay pinaagi sa pagbiya nga bukas ang mga publikasyon sa Bibliya nga naghisgot sa materyal nga basig makapaikag sa iyang dili-magtutuong bana. Iyang basahan ug mga estorya sa Bibliya ang iyang mga anak, ug—kon ang iyang bana nagapaminaw—mohatag siyag katin-awan nga makabenepisyo kaniya. Usahay, yano nga mangutana siya: “Ako nakakat-on niining mga butanga sa akong pagtuon karong adlawa. Unsay imong hunahuna bahin niana?” Iyang gisulti usab ang mga lagda sa paggawi nga iyang gisilsil sa hunahuna: “Magmakalmado, ug ayaw kasuko o masilo. Ayaw pagpakaaron-ingnon nga ikaw nahibalo-sa-tanan. Magmapainubsanon ug pagpabiling ubos.” Ang iyang bana sa kataposan midawat sa kamatuoran sa Gingharian ug karon nagaalagad ingong bug-os panahong ministro.
Si Marijan nakatabang ug ubay-ubayng mga paryente sa pagdawat sa iyang pagtuo. “Ayaw ipugos ang mga butang kondili paghulat sa hustong panahon,” siya mitambag. “Angay natong tahuron kana sa dihang sila mohangyo kanato sa dili paghisgot uban kanila bahin sa kamatuoran. Kita kinahanglang magpailob ug mahigugmaon.” Ilabinang matuod ang Ecclesiastes 3:7 sa dihang ang mga paryente mosupak. Kini nag-ingon nga “adunay panahon sa paghilom ug panahon sa pagsulti.” Kana nagpasabot sa pagkamainandamon sa pagpamati nga mapailobon, dili mosanta, ug tahoron ang ubang mga opinyon. “Walay hinungdan nga masuko kon makigsulti sa mga paryente,” miingon si Petar, kinsa kanhi supak kaayo apan nausab ang iyang baroganan.
Tugoting ang Maayong Paggawi Maoy Mosangyaw
Sa daghang mga katuigan ang usa ka dili-magtutuong bana naghatag kasamok sa iyang Kristohanong asawa, usahay sirad-an siya gawas sa balay. Dihay higayon nga nasuko kaayo siya nga gigisi niya ang libro nga nakalimtan pagtago sa iyang asawa. Unsay nakapausab sa iyang tinamdan? Siya miasoy: “Nagsige akog pangutana sa akong kaugalingon kon nganong ang akong asawa malig-on kaayo ug padayong nagasalig kang Jehova. Ako walay nakitang sayop kaniya, kay maayo man siyang moatiman sa balay, ug siya maayong asawa ug inahan sa among mga anak.” Usa ka adlaw ang bana nangitag maayong materyal nga ikapresentar diha sa lima-ka-minutong seminar, busa gihatagan siya sa iyang asawa ug duha ka isyu sa Pagmata! Ang iyang bana mapanukohong mitan-aw niana, ug sa iyang katingala iyang nakita ang usa ka maayong ulohan bahin sa paggamag mga lapis. Niining paagiha napukaw ang iyang interes niining mga magasina. Karon, kini nga pamilya nagkahiusa na sa pagsimba kang Jehova.
Ang tambag ni apostol Pedro nga may purohang makabig sa asawa ang iyang dili-magtutuong bana ‘nga walay pulong pinaagi sa putli nga paggawi uban ang halalom nga pagtahod’ ikapadapat usab sa ubang mga membro sa pamilya. (1 Pedro 3:1, 2) Sa dihang gitalikdan sa magtiayon ang karaan dili-biblikanhong tradisyon ug ang relihiyon sa ilang Romanhong mga ginikanan, ang ilang pamilya nahimong grabe nga mga magsusupak. Gani ang asawa giatake sa iyang ugangan-nga-babaye, kinsa misulay sa pagpatay kaniya. “Wala namo tugoti kini nga mopaluya o mopasuko kanamo. Among gisalig ang among tanang kabalaka kang Jehova,” miingon si Nikolic. Sa milabay ang napulog usa ka tuig ang iyang mga ginikanan, ang ilang mga igsoong babaye, ug ang iyang mga bayaw nga babaye mga bawtismadong Saksi na. Unsay nagpahinabo sa kausaban? “Ang maayong pananglitan ug Kristohanong pamatasan. Sa laing mga pulong, wala kami mogahig daghang panahon sa paghisgot kanila sa kamatuoran. Hinunoa, among gipadapat kini.”
Ayaw Pagkawala sa Paglaom!
Samtang mopahinabog dakong kalipay ang pagkakita sa mga paryente nga nagsugod na sa pagsimba sa matuod nga Diyos, komosta kon ang uban magpadayon sa pagsupak? Unsay imong reaksiyon? Gipakita nang daan ni Jesus nga ang matuod nga pagsimba usahay mopahinabog kalit nga pagbahinbahin sa mga paryente. (Mateo 10:34-37) Si Marica gisalikway sa tanang membro sa pamilya sa dihang siya nahimong usa sa mga Saksi ni Jehova. Bisag wala niya ikompromiso ang iyang pagsimba, sa gihapon siya miila “nga bisan ang mga paryente adunay katungod sa ilang kaugalingong panghunahuna ug mga opinyon.” Ang iyang tinamdan nagpukaw kanila sa pagtahod kaniya sama sa ilang gibuhat kaniadto.
Naamgohan ni Ludwig nga siya obligado sa paghigugma sa iyang mga ginikanan bisan pa nga sila mopilig lahi nga dalan sa kinabuhi. Iyang gihinumdoman kanunay ang hinungdanon mga pulong sa Bibliya, sama sa: “Tahora ang imong amahan ug inahan”; “himoa nga ang imong sinultihan kanunay nga madanihon, tinimplahan ug asin”; “magmaandam sa pagtubag . . . uban ang kaaghop ug lalom nga pagtahod”; ug, “ang ulipon sa Ginoo dili angay makig-away.” (Efeso 6:2; Colosas 4:6; 1 Pedro 3:15; 2 Timoteo 2:24) “Sa dihang ako motawag sa telepono sa akong mga ginikanan o moduaw kanila, ako miampo kang Jehova ug kaalam, ug sa hinay-hinay ang among relasyon nahimong mas relaks, mas mahigalaon,” siya miasoy.
Ayaw wad-a ang imong paglaom nga ang mga binhi sa kamatuoran sa kataposan mamulak diha sa mga kasingkasing sa imong mga paryente. Nabawtismohan ingong usa sa mga Saksi ni Jehova 31 ka tuig human sa iyang asawa, ang bana miingon: “Agig paghandom, admitihon ko nga ang akong asawa nagpailob ug dako kanako. Nahibalo ako nga siya kanunayng nag-ampo kang Jehova alang kanako.”
Hinaot nga ang mga pulong nga magagula sa imong baba kanunay nga makapalagsik ug makapatagbaw sa uhaw sama sa mabugnaw nga tubig! Oo, ipakig-ambit “ang mahimayaong maayong balita sa malipayon nga Diyos” sa tanang katawhan, lakip ang imong mga paryente. (1 Timoteo 1:11; Pinadayag 22:17) Unya ang mga pulong ni Jesus ikapadapat: “Siya nga nagatuo kanako, sumala sa giingon sa Kasulatan, ‘Gikan sa iyang kasingkasing modagayday ang mga sapa sa tubig nga buhi.’”—Juan 7:38.