“Tugob Kaayong Panagtagbo”

SULOD sa ting-adlaw sa 1984, si Gerard, usa ka batan-ong lalaki nga taga-Pransiya, misugod sa usa ka adbentura sa unom ka bulan​—usa ka paglibot sa bisikleta agi sa Tinipong Bansa ug Canada. Ang halangdong Rocky Mountains nakapahibulong kaniya, ang malinawong mga parke nakapakalma kaniya, apan ang talan-awong iyang nakita sa Montmagny, Quebec, Canada, labing nakapahibulong kaniya; kadto nagbag-o sa lakaw sa iyang kinabuhi.

Sa Dominggo, Septiyembre 16, si Gerard nagbisikleta agi sa Montmagny sa namatikdan niya ang taas nga linya sa mga kotse nga giparking ubay sa dalan. Sunod, iyang nakita ang ginatos ka tawong nagsaoysaoy sa usa ka dapit sa konstruksiyon. “Unsa bay nagakahitabo dinhi?” nangutana siya sa usa sa mga trabahante nga nagdirihir sa trapiko. Bisan tuod ang tawo okupado, siya mihatag panahon sa pagsaysay kang Gerard nga ang tanan sa maong mga trabahante maoy mga Saksi ni Jehova nga migamit sa ilang hinapos-sa-semana sa pagtukod ug tigomanan alang sa ilang relihiyosong mga tigom. Nga wala hisayri ni Gerard, siya nakaabot sa kataposang puliking mga oras sa duha-ka-adlawng Kingdom Hall nga proyekto. Siya nakadayeg sa tanan niyang nakita ug nadungog. Niadtong gabhiona siya misulat sa iyang talaadlawan: “Sa gabii akong natagbo ang mga Saksi ni Jehova. Ilang gitukod ang usa ka balay sa duha ka adlaw. May kapin sa 1,000 kanila. Tugob kaayong panagtagbo.”

Sa wala madugay tapos niadto si Gerard mipauli sa Pransiya. Duha ka tuig sa ulahi, niadtong Hulyo 26, 1986, siya nagpadala sa koreyo sa usa ka sulat ngadto sa Kingdom Hall sa mga Saksi ni Jehova sa Montmagny. Siya misulat:

‘Nahinumdom pa ba kamo sa pagpakigsulti sa usa ka tigbisikleta nga taga-Pransiya panahon sa ikaduhang adlaw sa inyong pagtukod sa Kingdom Hall? Niadtong adlawa ang tigkontrol sa trapiko misabod sa binhi. Pila ka bulan sa ulahi ang mga Saksi miduaw kanako sa Pransiya, ug akong gidawat ang tanyag sa pagtuon sa Bibliya uban kanila. Sanglit ako gikan sa hugot nga Katolikong pamilya, ang pagtuon dili sayon. Apan gipatubo ni Jehova ang binhi. Duha ka semana nga miagi ako nabawtismohan sa usa ka kombensiyon sa Nantes. Ako nagapasalamat kang Jehova tungod sa pagtugot nga akong makaplagan ang kamatuoran, ug mapasalamaton ako tungod sa tanang gitudlo kanako sa igsoong lalaki niadtong Dominggo, Septiyembre 16, 1984. Inigsoong pangomosta gikan sa usa ka adbenturero nga nakombertir sa kamatuoran.’

Dako gayod ang kalipay nga gibati sa kongregasyon sa Montmagny tapos sa pagkadungog sa pagbasa sa sulat ni Gerard diha sa ilang Kingdom Hall! Kadtong tanang nakatabang sa pagtukod sa tigomanan nakasinati sa kamatuoran sa mga pulong ni Solomon: “Isalibay ang imong tinapay sa ibabaw sa katubigan, kay kini hikaplagan ra tapos sa daghang adlaw.” (Ecclesiastes 11:1) Oo, ang maayong mga epekto sa mga proyekto sa Kingdom Hall maoy malungtaron ug layog-abot sa daghang paagi.