Mga Pangutana Gikan sa mga Magbabasa

◼ Tukma ba nga ang Kristohanon magtugot sa awtopsiya diha sa usa ka paryente?

Ang Bibliya wala magkomentong direkta bahin sa awtopsiya, apan dunay pila ka nahiangayng mga hunahuna sa Bibliya nga mapalandong sa Kristohanon. Unya mahimo ang personal nga desisyon sa kahayag sa maong mga teksto ug ang linaing mga bahin sa gihisgotang kahimtang.

Ang awtopsiya maoy surhikal (paghiwahiwa) nga pagsusi sa usa ka patayng lawas aron sa pagtino sa hinungdan sa kamatayon. Kini makahatag usab ug impormasyon bahin sa mga epekto o mekanismo sa sakit. Ang hunahuna sa pila ka relihiyon bahin sa mga awtopsiya naapektahan sa dili-kasulatanhong mga pagtulon-an. Pananglitan, ang usa ka Katolikong ensiklopedia nagaingon: “Ang lawas sa namatay pagatratahon nga balaan ingong kanhing puy-anan sa iyang kalag . . . Kini destinadong mobangon uban sa kalag niini, panahon sa heneral nga pagkabanhaw, ngadto sa kinabuhing dayon . . . Mahimong may interbalo tali sa medikal nga pagkamatay ug sa paggawas sa kalag.” Ugaling, ang Bibliya nagapadayag nga inigkamatay sa usa ka tawo (usa ka buhing kalag), siya mahimong patay nga kalag. (Genesis 2:7; 7:21-23; Levitico 21:1, 11) Komosta man ang iyang lawas? Mahitungod nianang duruha “ang mga anak sa katawhan” ug ang “mga mananap,” atong mabasa: “Silang tanan nagagikan sa abog, ug silang tanan mobalik sa abog.” (Ecclesiastes 3:18-20) Sa pagkabanhaw, ang Diyos dili magbanhaw sa lawas nga dugay nang nahimong abog, apan siya motagana sa usa ka lawas sumala sa iyang kahimut-an.​—Tan-awa ang 1 Corinto 15:38, 47, 48.

Ang laing bahin sa hunahuna sa Bibliya bahin sa patay mahisgotan maylabot sa awtopsiya. Ang Diyos nagsugo sa Israel: “Dili kamo magsamad sa inyong unod tungod sa usa ka patay nga kalag, ug dili kamo magbutang ug timaan sa inyong kaugalingon. Ako mao si Jehova.” (Levitico 19:28; Deuteronomio 14:1, 2; Jeremias 47:5; Miqueas 5:1) Oo, ang katawhan sa Diyos dili angay mosundog sa kanasoran sa palibot sa paghiwahiwa sa ilang unod ingong ilhanan sa kasubo tungod sa patay ni tungod sa ubang bakak relihiyosong hinungdan. Kining sugoa nagdasig gayod usab sa mga Israelinhon sa pagpadayag ug pagtahod sa ilang mga lawas ingong mga linalang sa Diyos.​—Salmo 100:3; 139:14; Job 10:8.

Ang mga Kristohanon angay usab magbatog angayang pagtahod sa ilang mga kinabuhi ug mga lawas, nga ilang gipahinungod na ngadto sa Diyos. (Roma 12:1) Mihinapos ang pipila nga kining matinahorong hunahuna bahin sa lawas angay mag-umol sa ilang panghunahuna bahin sa mga awtopsiya. Ilang gibati nga gawas kon adunay matukmorong hinungdan, palabihon nila nga ang lawas sa usa ka minahal nga paryente dili ipailalom sa paghiwahiwa tapos sa pagkamatay. Tingali sila nasayod nga sa pila ka dapit ang dugo nga kinuha sa mga patayng lawas gigamit alang sa mga abuno o sa ubang katuyoan, nga niana dili nila buot makaambit.a

Nan, nganong ang pila ka Kristohanon mitugot sa mga awtopsiya? Sila nakaamgo nga ang Bibliya wala sa pintok mokomento bahin sa maong medikal nga palakaw. Sila tingali nakamatikod nga ang mga Israelinhon sa Ehipto mitugot sa Ehiptohanong mga mananambal sa pag-embalsamar kang Jacob ug kang Jose, nga lagmit naglangkit sa surhikal nga mga lakang sa pagkuha sa sulod nga mga organo. (Genesis 50:2, 3, 26) Sa pila ka kaso karong adlawa, ang balaod sa yuta nagabaod nga himoon ang usa ka awtopsiya. Pananglitan, kon ang usa ka batan-on, himsog nga tawo mamatay sa walay dayag nga hinungdan, ang awtopsiya tingali giobligar. Dayag, kon ang balaod mobaod sa awtopsiya, ang mga Kristohanon magbutang sa hunahuna sa tambag nga “magpasakop sa labaw nga mga pagbulot-an.”​—Roma 13:1, 7; Mateo 22:21.

Bisan sa kahimtang sa usa ka tawo nga nailalom sa pag-atiman sa usa ka doktor, ug sa ingon ang lagmit nga hinungdan sa kamatayon nahibaloan ang usa ka awtopsiya motagana usab ug makatabang nga impormasyon. Ang mga anak nga nabilin tingali buot masayod sa tukmang hinungdan aron madugangan ang impormasyon mahitungod sa medikal nga kasaysayan sa ilang pamilya. Ang maong impormasyon mahimong mag-apektar sa ilang kaugalingong umaabot nga paagi sa kinabuhi o pagtambal. Adunay ubang hinungdan, usab, nganong mitugot ang pipila ug awtopsiya. Ang usa ka taho tapos sa pagkamatay nga gipamatud-an sa mga pagtuon bahin sa tisyu basin makapaarang sa usa ka pamilya nga makakuwalipikar alang sa mga benepisyo sa mga nabilin, sama sa pagtaganag pamatuod sa sakit sa baga nga nalangkit sa pagminag karbon. Gibati pa sa pipila nga ang awtopsiya makapauswag sa ilang kalinaw sa hunahuna pinaagi sa pagtabang kanila sa pagsabot kon unsa o dili maoy hinungdan sa pagkamatay sa usa ka minahal. Ang mga tawo sa gawas sa pamilya basin nalangkit usab. Ang mga paryente basin sinserong mibati nga ang pagtugot ug awtopsiya makatabang sa doktor sa pagsabot sa lakaw sa sakit, ug sa ingon siya basin mas masangkapan sa pagtambal sa uban.

Busa, nahiangay nga ang mga Kristohanon magpadayag ug pagtahod sa ilang mga lawas, apan adunay ubang hinungdang ilang mapalandong sa paghukom kon kaha itugot ang awtopsiya sa usa ka linaing kahimtang.

[Mga footnote]