Ang Matuod nga mga Kristohanon Nagapasidungog sa mga Tigulang!

“ANG mga tigulang,” matud sa tigdukiduking si Suzanne Steinmetz, “anaa na sa tumoy sa mabungahon nilang ekonomikanhong paagi sa kinabuhi, nga mao ang pasikaranan diin ang atong kultura nagapabili sa mga indibiduwal ug nagahatag kanilag pagtamod, dungog, pagtahod ug mga balos.” Sa ingon ang panglantaw sa modernong katilingban sa mga tigulang maoy ngiob, negatibo. Nan, dili katingad-ang kita sagad makabasa nga sila gipasagdan ug giabusahan.

Bisan pa niana, unsa ang pag-isip sa Bibliya sa mga tigulang? Ang Pulong sa Diyos matinud-anong nagaila nga ang pagkatigulang dili sayon. Miampo ang salmista: “Ayaw ako pag-isalikway sa panahon sa pagkatigulang; sa dihang ang akong kusog maluya na, ayaw ako pagbiyai.” (Salmo 71:9) Sa iyang pagkatigulang, labaw niyang gibati ang panginahanglan sa pagpaluyo ni Jehova. Ug ang hunahuna sa Bibliya positibo sa pagpakita nga kita, usab, angay mohatag pagtagad sa mga panginahanglan sa mga tigulang.

Tinuod, gitawag ni Solomon ang pagkatigulang nga “ang daotang mga adlaw” diin ang usa “walay kalipay.” (Ecclesiastes 12:1-3) Apan ang “gitas-on sa mga adlaw ug mga tuig sa kinabuhi” gilangkit usab sa Bibliya sa mga panalangin gikan sa Diyos. (Proverbio 3:1, 2) Sa pag-ilustrar, si Jehova misaad kang Abraham: “Alang kanimo, . . . ikaw igalubong sa pagkatigulang na kaayo.” (Genesis 15:15) Tino, ang Diyos wala magsilot sa matinumanong si Abraham ngadto sa masulob-on, “daotang mga adlaw” nga niana siya “walay kalipay.” Nakaplagan ni Abraham ang kalinaw ug kahilom sa ulahi niyang katuigan, nga naghinumdom uban ang katagbawan sa kinabuhing gigugol sa pag-alagad kang Jehova. Siya nakapanan-aw usab sa “siyudad nga may matuod nga mga patukoranan,” ang Gingharian sa Diyos. (Hebreohanon 11:10) Sa ingon siya namatay nga “tigulang ug matagbawon.”​—Genesis 25:8.

Nan, nganong gitawag ni Solomon ang pagkatigulang “ang daotang mga adlaw”? Gitumong ni Solomon ang mapinadayonong pagkadaot sa panglawas nga mahitabo sa pagkatigulang. Bisan pa niana, ang usang napakyas sa ‘paghinumdom sa iyang Dakong Maglalalang sa mga adlaw sa iyang pagkabatan-on’ ang makakaplag ilabina nga daotan ang iyang talisalop nga katuigan. (Ecclesiastes 12:1) Tungod kay iyang giusikan ang iyang kinabuhi, ang maong tigulang nga tawo ‘walay kalipay’ sa iyang ulahing mga adlaw sa kinabuhi. Ang iyang dili-diyosnong paagi sa kinabuhi tingali miresulta pa sa mga suliran sa lawas nga mopasamot sa mga kalisdanan sa pagkatigulang. (Itandi ang Proverbio 5:3-11.) Busa sa dihang motan-aw sa unahan, ang iyang makita lamang mao ang lubnganan. Ang usa ka tawong nagdeboto sa iyang kinabuhi sa pag-alagad sa Diyos makasinati usab sa “daotang mga adlaw” samtang maluya ang iyang lawas. Apan sama kang Abraham, siya makakaplag ug kalipay ug katagbawan sa kinabuhing maayong pagkagugol ug sa paggamit sa nahibilin niyang kusog sa pag-alagad sa Diyos. “Ang pagkaubanon maoy usa ka purongpurong sa katahom sa dihang kini hikaplagan sa dalan sa pagkamatarong,” matud sa Bibliya.​—Proverbio 16:31.

Sa pagkamatuod, ang pagkatigulang may tino ganing mga bentaha. “Ang pagkabatan-on ug ang banagbanag sa kinabuhi maoy kakawangan,” matud ni Solomon. Bisan pag ang mga batan-on tingali nagapahimulos sa kabaskog, kadaghanan sila kulag kasinatian ug panghukom. Ang pagkatigulang, hinunoa, nagadala sa tibuok-kinabuhing kasinatian. Ang tigulang ‘nagasagang sa kadaotan,’ nga lahi sa mapahinaykong batan-on si kinsa kadaghanan nagadalidali nga mahitumpawak niana. (Ecclesiastes 11:10; 2 Timoteo 2:22) Busa, si Solomon nakaingon: “Ang katahom sa mga lalaking tigulang mao ang ilang pagkaubanon.”—Proverbio 20:29.

Busa ang Bibliya nagapasidungog sa mga tigulang. Sa unsang paagi kini nagaapektar sa paagi sa pagpakiglabot sa mga Kristohanon kanila?

‘Pagtindog’ Atubangan sa mga Tigulang

Gihimo sa Diyos ang pagtahod sa mga tigulang nga usa ka nasodnong polisa sa Israel. Ang Moisesnong Kasugoan mipahayag: “Atubangan sa buhok nga ubanon magtindog ka, ug magpakita kag pagkamahunahunaon sa pagkatawo sa usa ka tawong tigulang.” (Levitico 19:32) Lagmit nga sa ulahing katuigan giisip nga literal sa mga Hudiyo kining kasugoana. Matud ni Dr. Samuel Burder diha sa iyang librong Oriental Customs: “Ang Hudiyong mga magsusulat nag-ingon nga ang lagda mao, ang pagtindog ngadto kanila dihang sila anaa sa gilay-on nga upat ka siko; ug sa makalabay na sila, sa paglingkod na usab, aron mopatim-aw nga sila mitindog tungod lamang sa pagtahod kanila.” Kadtong pagtahora dili limitado ngadto sa mga tawong inila. “Tahora bisan ang tawong tigulang nga nawad-an sa iyang kinaadman,” mipahayag ang Talmud. Ang usa ka rabbi nangatarongan nga ang maong pagtahod angay magalakip usab sa usa ka ignorante ug dili-edukadong tawong tigulang. “Ang kamatuoran mismo nga siya natigulang na,” siya nangatarongan, “takos gayod sa pila ka balos.”​—The Jewish Encyclopedia.

Karong adlawa ang mga Kristohanon dili na ilalom sa mga silot sa Moisesnong Kasugoan. (Roma 7:6) Apan kini wala magkahulogang sila dili na obligado sa pagpakitag linaing pagtagad sa mga tigulang. Kini dayag sa mga instruksiyon nga gihatag ni apostol Pablo sa Kristohanong magtatan-aw nga si Timoteo: “Ayaw sawayang grabe ang usa ka lalaking tigulang. Sa kaatbang, isipa siyang usa ka amahan, . . . ang mga babayeng tigulang ingong mga inahan.” (1 Timoteo 5:1, 2) Si Pablo nag-ingon sa batan-ong Timoteo nga siya may awtoridad sa “pagsugo.” (1 Timoteo 1:3) Bisan pa niana, kon may usa nga mas tigulang kay kaniya​—ilabina usang nag-alagad nga magtatan-aw​—nga nasayop sa panghukom o mihimog sayop nga pahayag, si Timoteo dili angay “magsaway nga grabe” kaniya ingon nga ubos. Hinunoa, siya angay nga matinahorong “mag-isip kaniya nga amahan.” Angay ipakita ni Timoteo ang susamang pagtahod sa mga babayeng tigulang diha sa kongregasyon. Oo, siya sa gihapon, sa pagkamatuod, angay ‘motindog atubangan sa buhok nga ubanon.’

Ang Kristiyanidad sa ingon maoy usa ka relihiyon nga nagatahod sa mga tigulang. Katingad-anan, hinunoa, ang dakong pagmaltratar sa mga tigulang nagakahitabo diha sa kanasoran nga nagaangkong Kristohanon. Hinuon, adunay mga magsisimba nga nagasunod pa sa mga sukdanan sa Bibliya. Pananglitan, ang mga Saksi ni Jehova nagakalipay sa presensiya sa linibong mga tigulang sa ilang taliwala; wala sila mag-isip nga sila palas-anon o sagabal. Bisan tuod ang tandogon nga panglawas tingali makapugong sa maong mga tigulang sa pagkahimong aktibo sama sa nangagi, daghan adunay hataas nga mga rekord sa matinumanong Kristohanong pag-alagad, ug kini nagadasig sa batan-ong mga Saksi sa pagsundog sa ilang pagtuo.​—Itandi ang Hebreohanon 13:7.

Bisan pa niana, ang mga tigulang wala dahoma nga magbatog pasibong bahin sa kongregasyon. Sila giawhag sa paghatag ug maayong mga panig-ingnan sa pagka “kasarangan sa mga batasan, ugdang, makataronganon sa hunahuna, mahimsog sa pagtuo, . . . balaan sa kagawian,” nga madagayaong nagapakig-ambit sa ilang kaalam ug kasinatian sa uban. (Tito 2:2, 3) Gitagna ni Joel nga taliwala niadtong nagapakig-ambit sa pagmantala sa mensahe sa Bibliya, mao ang “mga tawong tigulang.” (Joel 2:28) Pihong imong napanid-ang personal nga daghang tigulang Saksi nagakalipay pa sa pagpakig-ambit nga aktibo sa ganghaan-sa-ganghaang buluhaton sa pagsangyaw.

Pagpakita Nilag Pasidungog “sa Bug-os Pa”

Ang mga Saksi ni Jehova nanlimbasog sa paghatag sa mga tigulang ug linaing pagkamahunahunaon sa daghang paagi. Panahon sa tinuig relihiyosong mga kombensiyon, pananglitan, kadaghanang hikayon nila nga igahin ang mga lingkoranan alang sa mga tigulang. Ang pagkamahunahunaon ipakita usab kanila sa tinagsa ka paagi. Sa Hapon ang usa ka Saksi mihatag sa iyang lingkoran sa kotse sa pamilya aron makasakay ang usa ka 87-anyos nga babaye paingon sa mga miting sa kongregasyon. Sa unsang paagi siya moadto sa miting mismo? Pinaagig bisikleta. Sa Brazil adunay usa ka bug-os-panahong magwawali nga 92 anyos sa edad. Ang mga nakapaniid mitaho nga ang mga Saksi didto “nagatagad kaniya uban ang pagtahod, nagapakigsulti kaniya . . . Siya usa ka mapuslanong bahin sa kongregasyon.”

Kini wala magkahulogang walay dapit sa pag-uswag sa pagpasidungog sa mga tigulang. Si Pablo misulat sa mga Kristohanon sa Tesalonica: “Hinuon, mahitungod sa inigsoong gugma, . . . kamo nagabuhat niini ngadto sa tanang igsoon sa tibuok Macedonia. Apan kami nagatambag kaninyo, mga igsoon, sa pagpadayon sa pagbuhat niini sa bug-os pa.” (1 Tesalonica 4:9, 10) Ang susamang tambag usahay gikinahanglan karong adlawa kon bahin sa atong pagtagad sa mga tigulang. Pananglitan, ang usa ka 85-anyos nga Kristohanon nahiubos kaayo sa dihang wala siya makadawat ug usa ka kopya sa bag-ong binase-sa-Bibliya nga basahon. Ang suliran? Siya bungolbungol ug wala makadungog sa pahibalo nga nagpahinumdom sa tanan sa pagpedido sa basahon; ni may usa sa kongregasyon ang nakahunahuna sa pagpedido niana alang kaniya. Hinuon, ang kahimtang daling gitul-id. Bisan pa niana kini nagailustrar nga kinahanglang magmahunahunaon sa linain sa mga panginahanglan sa mga tigulang.

Adunay ubay-ubayng paagi nga kini mahimo sa katawhan sa Diyos “sa bug-os pa.” Ang Kristohanong mga miting nagahatag ug higayon sa “pagdasig” sa mga tigulang “sa gugma ug sa maayong binuhatan.” (Hebreohanon 10:24, 25) Ug bisan tuod ang batag tigulang libreng nagapakigbuylog diha sa mga Kingdom Hall sa mga Saksi ni Jehova, tingali mahimo ang dugang paningkamot bahin niini. Pananglitan, ang pila ka ginikanan nagadasig sa ilang mga anak sa pagduol nga matinahoron ug pagpakigsulti sa senyor nga mga sakop sa kongregasyon.

Ang pasidungog padayong ikapakita usab sa mga tigulang sa dipormal nga paagi. Nahiuyon sa prinsipyong gipahayag ni Jesus sa Lucas 14:12-14, mahimo ang dugang paningkamot sa pagdapit sa mga tigulang sa sosyal nga mga panagkatigom. Bisan pag sila dili makaarang sa pagtambong, tinong ilang pabilhan ang inyong paghinumdom kanila. Ang mga Kristohanon dugang giawhag sa “pagsunod sa dalan sa pagkamaabiabihon.” (Roma 12:13) Kini dili kinahanglang maluho o maayong pagkahikay. Nagsugyot ang usa ka Saksi sa Alemanya: “Dapita ang mga tigulang alang sa usa ka tasang tsa, ug paasoya sila sa ilang mga kasinatian sa kagahapon.”

Si apostol Pablo miingon: “Sa pagpakitag pasidungog sa usag usa manguna kamo.” (Roma 12:10) Taliwala sa mga Saksi ni Jehova, ang tinudlong mga ansiano sa kongregasyon nagapanguna ilabina sa pagpakitag pasidungog sa tigulang nga mga Kristohanon. Kadaghanan ang mga ansiano nagatudlog mga buluhaton sa mga tigulang, sama sa pagbansay sa mga bag-ohan ingong mga magwawali o pagtabang sa mentenasyon sa mga Kristohanong tigomanan. Ang mga batan-on nga nagaalagad nga mga ansiano sa kongregasyon nagapakita sa tigulang nga mga magtatan-aw sa pasidungog pinaagi sa mapaubsanong pagduol kanila alang sa tambag, nga magagamit sa pagkamasinabtanon sa pagbaton sa ilang hamtong nga panghunahuna. (Proverbio 20:5) Sa mga miting sa maong mga ansiano, sila nagasunod sa Biblikanhong panig-ingnan sa batan-ong si Elihu ug matinahorong nagatahod sa tigulang, mas eksperyensiadong mga tawo, nga nagahatag kanilag bug-os nga higayon sa pagpahayag pag-una sa ilang kaugalingon.​—Job 32:4.

Tinuod, madaling dili makapailob sa mga tigulang tungod kay sila tingali dili na daling makalihok o makahunahuna sama sa mga batan-on. Si Dr. Robert N. Butler nagbatbat nga maayo sa pila ka sulirang mahimong moduyog sa pagkatigulang: “Ang usa mawad-an sa lawasnong lahutay, katakos sa usa sa pagnunot, ug kana sa kaugalingon makahahadlok sa labihan. Ang usa tingali mawad-an sa hinungdanong mga sentido sama sa pandungog o panan-aw.” Sa pagpabili niini, dili ba angayng ipakita sa mga batan-on ang pagkamabination ug pagkamahangawaon?​—1 Pedro 3:8.

Oo, ang mga Kristohanon karong adlawa obligado sa pagpakitag matuod nga gugma, pagkamahunahunaon, ug pagtahod sa mga tigulang sa ilang taliwala. Ug taliwala sa mga Saksi ni Jehova, kini ginahimo sa labing maayong paagi. Apan, unsay mahitabo kon ang tigulang nga mga Kristohanon​—o ang mga ginikanan sa mga Kristohanon​—magsakit o matimawa? Kansang responsabilidad ang pag-atiman kanila? Ang mosunod nga mga artikulo magasusi kon giunsa sa Bibliya pagtubag kining mga pangutanaha.

[Mga Letrato sa panid 7]

Sa mga kongregasyon sa mga Saksi ni Jehova, ang mga tigulang makakaplag ug daghang makapatagbawng buluhaton