Ang Espiritu nga Panalanginan ni Jehova

“ANG Ginoo magauban sa espiritu nga imong ginapakita. Ang iyang dili-takos nga kalulot magauban kaninyo.” (2 Timoteo 4:22) Nakahatag gayod ug dakong kalipay ang maong pahayag sa pagdayeg kang Timoteo ug niadtong kauban niya​—ang pagkahibalo nga ilang gipakita ang espiritu nga panalanginan ni Jehova!

Apan unsa ba gayod ang espiritu nga panalanginan ni Jehova? Unsa man ang timaan sa mga duna niining espirituha? Ug sa unsang paagi kita makapasundayag usab niining espirituha ug makadawat sa panalangin ni Jehova?

Sa pagtabang sa pagtubag niining mga pangutanaha, mobalik kita sa panahon ni Moises. Ang mga Israelinhon didto sa kamingawan. Si Jehova bag-o pang mihimo sa tugon sa Kasugoan uban kanila, ug sa maong panahon iyang gipahimangnoan sila sa paagi nga sila angay magasimba kaniya. Kini nagaapil sa pagtukod sa usa ka madaladala nga balongbalong nga tigomanan nga magkinahanglan ug daghang bulawan, mahalong materyales, ug batid nga trabaho aron matukod. Ang oportunidad sa paghimog kinabubut-ong mga gasa sa pagtagana sa gikinahanglang amot ug pagbuhat gipresentar ngadto sa nasod niining mga pulonga: “Padad-a ang matag usa nga masinugtanon sa kasingkasing ingong amot kang Jehova, nga mao, sa bulawan ug salapi ug tumbaga ug asul nga hilo ug sa balhibo sa karnero nga purpura . . . Ug paaria ang tanang maalamon ug kasingkasing sa inyong taliwala ug buhaton ang tanang gisugo ni Jehova, nga mao, ang tabernakulo uban sa balongbalong niini ug sa tabil niini.”​—Exodo 35:5-19.

Unsay sanong sa nasod sa maong oportunidad? Ang nahibilin sa kapitulo 35 nagasugid kanato nga kadtong ‘kang kansang kasingkasing nagtukmod kanila’ ug ‘kansang espiritu nag-aghat kanila’ mihatag sa mga amot ug nagbuhat uban ang kakugi nga nagpakitang ilang gimahal ang maong oportunidad nga gibutang sa ilang atubangan. (Bersikulo 21, 22, 26) Dako ang ilang sanong nga ang kapitulo 36, bersikulo 6, nagasugid kanato nga “si Moises naghatag ug sugo nga ilang ipamantala sa tibuok nga kampo ang usa ka pahibalo, nga magaingon: ‘Mga lalaki ug mga babaye, ayaw na kamo pagpatunghag mga butang alang sa balaang amot.’ Niana ang katawhan mihunong sa pagdala niini.” Oo, sila kinahanglang pahunongon! Si Jehova wala mogamit sa mga taktika sa pamugos sa iyang gihimo ang pahibalo: “Padad-a ang matag usa nga masinugtanon . . . ” Ang resulta mao nga nagpakita ang nasod sa masinugtanong espiritu, ug kadto nagdalag mga panalangin diha sa dagway sa dakong kalipay, ingon man sa panalipod ug pagtultol ni Jehova diha sa tanang ilang gibuhat.

Katuigan sa ulahi, ang samang espiritu gipaila na usab. Kini nahitabo sa dihang si Haring Ezekias nagbuhat aron ipasig-uli ang maputling pagsimba sa Israel. Ang talaan nagasugid kanato nga, kon hatagag oportunidad, “ang kongregasyon misugod sa pagdalag mga halad ug mga halad-pasalamat, ug ang matag usa nga may masinugtanong kasingkasing, mga halad-nga-sinunog.” Ang resulta? “Busa si Ezekias ug ang tanang katawhan nalipay tungod kay ang matuod nga Diyos nag-andam alang sa katawhan, kay ang tanan gibuhat sa madali.”​—2 Cronicas 29:31-36.

Mga Kristohanon Nagapasundayag sa Maayong Espiritu

Nakita ba nato ang samang espiritu sa masinugtanong pagsakripisyo-sa-kaugalingon sa Kristohanong mga panahon? Matikdi ang gisulat ni Pablo mahitungod sa mga Kristohanon sa Filipos sa Filipos 1:3-5: “Ginapasalamatan ko ang akong Diyos sa kanunay tungod sa tanan kong paghandom kaninyo diha sa tanan kong pangamuyo kaninyo, samtang ako nagapangaliyupo uban ang kalipay, tungod sa amot nga inyong gihimo sa maayong balita sukad sa unang adlaw hangtod niining gutloa.” Sa unsang paagi ang mga Kristohanon sa Filipos talagsaon sa ilang ‘amot ngadto sa maayong balita’? Ang mosunod nga mga bersikulo nagapadayag nga dili lamang sila masinugtanong nagpahiuyon sa ilang paagi sa kinabuhi ngadto sa mga prinsipyo sa Bibliya aron sa pagpauswag sa maayong balita kondili sila madasigon usab sa ilang pagwali ug pagtudlo sa maayong balita ngadto sa uban.

Nga ang mga Kristohanon ngatanan angay masinugtanong makig-ambit sa buluhaton sa pagwali niining mga paagiha gipasiugda sa Hebreohanon 13:15: “Pinaagi kaniya himoon ta sa kanunay ngadto sa Diyos ang usa ka halad sa pagdayeg, nga mao, ang bunga sa mga ngabil nga nagahimog dayag nga pagpahayag sa iyang ngalan.” Busa ang pagwali sa maayong balita sa matag usa ug tanang Kristohanon maoy pasukaranang paagi nga atong ikapakita ang masinugtanong espiritu nga maoy timaan sa matuod nga mga magsisimba ni Jehova karong adlawa. Dugang pa, ang mga Kristohanon gipahinumdoman nga angay dili gayod nila “hikalimtan ang pagbuhat sa maayo ug ang pagpakig-ambit sa mga butang sa uban, kay ang Diyos nahimuot gayod sa maong mga halad.”​—Hebreohanon 13:16.

Ang mga igsoon sa Filipos nagpasundayag niining masinugtanong espiritu sa lain pang paagi. Sa kapitulo 4 si Pablo nagahisgot sa daghang okasyon nga sila miayuda kaniya sa pinansiyal nga paagi, mao nga miuswag ang pagwali sa maayong balita. (Filipos 4:14-17) Sa ingon ilang gisundog ang maayong panig-ingnan niadtong unang mga magsisimba ni Jehova. Dayag ilang gipasidunggan “si Jehova pinaagi sa [ilang] bililhong mga butang.” (Proverbio 3:9) Kita nagapakita ba sa samang espiritu dihang ibutang sa atong atubangan ang susamang mga oportunidad?

Ang Giuyonan nga Espiritu Dayag Karong Adlawa

Ang Salmo 110 nagapakita nga daghan ang magpasundayag niining samang maayong espiritu sa masinugtanong pagsakripisyo-sa-kaugalingon sa kataposang mga adlaw niining presenteng sistema dihang ang kinabag-ang katawhan interesado lamang sa ilang kaugalingon.” Kita gisultihan sa bersikulo 3 nga, sa misugod ang Mesiyas sa pagmando sa Gingharian niadtong 1914, ang katawhan sa Diyos “mitanyag sa ilang kaugalingon nga masinugtanon” ug kadtong nagbuhat niana daghan sama sa “mga yamog.” Matuod ba kini?

Niadtong Abril 1881 ang The Watchtower nagpatik sa usa ka paghangyo alang sa 1,000 ka magwawali nga mosulod sa bug-os-panahong buluhaton sa pagwali. Ang Mayo 1881 nga isyu nagpasiugda nga kadtong nagabuhat niining buluhatona kinahanglan mao kadtong “magabuhat alang sa langitnong mga suhol.” Sulod sa upat ka tuig, kapin sa 300 ang misanong​—nga talagsaon tungod sa diyutay rang dedikadong mga Kristohanon nga nakig-uban sa Watch Tower Society niadtong panahona.

Kining samang espiritu nagpadayong dayag karong adlawa. Pananglitan, sa 1986 may 391,294 ka payunir (bug-os-panahong mga ministro) nga nagtaho, sa aberids, sa kada bulan. Kadto maoy 21.2-porsientong pag-uswag, o 68,473 nga dugang kay sa miaging tuig! Bisan pa niana, kining masinugtanong espiritu dili limitado ngadto niadtong makaarang sa paggugol sa ilang bug-os panahon sa buluhaton sa pagwali.a

Daghan nga may ubang Kasulatanhong mga responsabilidad​—sama sa pag-atiman sa usa ka pamilya, sa baldado o tigulang nga mga ginikanan​—ug kadtong kang kansang panglawas dili motugot nga sila makig-ambit sa bug-os-panahong Kristohanong ministeryo nagapasundayag usab niining samang espiritu sa masinugtanong pagsakripisyo-sa-kaugalingon nga makapahimuot kaayo kang Jehova. Kini madayag kon ang usa makaamgo nga ang kinadak-an sa buluhaton sa pagwali sa Gingharian diha sa kadaghanang nasod ginabuhat sa aktuwal sa mga ministro nga nagagugol sa mas dakong bahin sa ilang panahon nga nagatrabaho sa sekular nga trabaho o sa pag-atiman sa mga obligasyon sa pamilya o sa ubang Kasulatanhong mga obligasyon. Dalayegon gayod nga pasundayag sa espiritu nga panalanginan ni Jehova.

Pagpasundayag sa Maayong Espiritu Diha sa Ubang Bahin sa Kinabuhi

Sama sa adlaw ni Moises ug Ezekias, ang mga oportunidad sa pagpakitag masinugtanong espiritu motungha karong adlawa dihang ang lokal nga mga kongregasyon magtukod ug Kingdom Hall o ubang susamang mga pasilidad. Ang sama bang espiritu dayag sa maong mga hitabo? Oo, tino gayod!

Kini dayag ilabina sa usa ka bag-ong paagi sa pagtukod ug Kingdom Hall nga gitawag kadaghanan nga mga proyekto sa Kingdom Hall nga daling matukod. Ginatos ka Saksi magtigom ug motrabaho gikan sa sayo sa buntag sa Sabado hangtod sa gabii sa Dominggo​—ang pipila magatrabaho sa tibuok gabii​—sa pagbuhat sa ginatawag sa mga mantalaan nga “milagro sa hinapos sa semana.” Sa dapit diin may semento lamang sa lote sa Biyernes, ang nahuman nga Kingdom Hall gamiton alang sa tigom sa gabii sa Dominggo!b

Ang dagko pang mga oportunidad sa pagpadayag sa masinugtanong espiritu motungha maylabot sa pagtukod sa mga pasilidad sa sanga diha sa nagkalainlaing kanasoran. Ang gidak-on sa bug-os boluntaryong buluhaton nga giamot sa buluhatong ginahimo sa maong nagkalainlaing mga proyekto makapakurat gayod. Dugang sa amot sa trabaho anaa pa, siyempre, ang mga amot nga kuwarta nga mahimong ipamalit sa gikinahanglang materyales. Masubsob kaayo, ang mga Saksi kinaiyanhong mohatag sa gikinahanglang mga butang nga makapamenos kaayo sa gastos sa tinukod.

Usa ka pananglitan niini nahitabo panahon sa pagtukod sa bag-ong sangang-buhatan sa Sydney, Australia. Didto, ang mga igsoong nagapuyo sa halayong amihanan sa Queensland nag-andam ug nagpadala ngadto sa dapit sa konstruksiyon sa upat ka kargahan sa semitrailers sa troso nga may gibanabanang bili nga $60,000 ngadto $70,000! Panahon sa konstruksiyon sa sanga, ang mga Saksi nga tinaraktarak mibiyahe gikan sa halayong Kasadpang Australia, 2,500 milya (4,000 km) kalayo, aron moboluntaryo sa pagtrabaho sulod sa upat ka semana sa usa ka panahon. Ang pila ka batid nga mga trabahante boluntaryong mitrabaho sa dapit sa daghang bulan ug ang ubay-ubay sa usa pa ka tuig o kapin. Kadto tinuod nga usa ka pagpadayag sa samang espiritu nga gipanalanginan nga madagayaon kaayo ni Jehova sa tibuok kasiglohan nga miagi ug karong adlawa kadaghanan masubli diha sa ubang kanasoran.

Ang dugang mga oportunidad sa pagpakitag masinugtanong espiritu motungha dihang ang mga Saksi magatigom panahon sa mga asembliya ug mga kombensiyon. Sa matag ingon nga asembliya kinahanglan ang daghang boluntaryo, nga kadaghanan abanteg mga bulan sa okasyon, sa pagtino nga ang tanan molihok nga hapsay ug organisado kaayo. Ug sa dihang magsugod na, usahay abot sa usa sa upat ka Saksi nga nagatambong moboluntaryo sa pagtabang sa pagbuhat sa daghang kinahanglanong trabaho nga makatabang sa malinawon ug malamposong kombensiyon. Ang trabaho tingali maglangkit sa pagsilbi sa pagkaon o pagpanglimpiyo. Kini tingali buluhaton nga dili himatikdan sa kinabag-an niadtong nagatambong. Apan kini dili ingong dili himatikdan ni Jehova! Iyang gantihan kadtong kinabubut-ong magatanyag sa ilang kaugalingon sa pagbuhat kon unsay gikinahanglan. Maani ba usab nimo ang ganti nga mosangpot dihang ang mga Kristohanon “pinaagi sa gugma magpaulipon sa usag usa” pinaagi sa boluntaryong pagtanyag sa imong mga pag-alagad sa panahon sa asembliya? Nakahunahuna ka ba sa pagbuhat niana ingong pamilya?​—Galacia 5:13.

Samtang kining espesyal nga mga proyekto nagahatag kanatog maayong mga oportunidad sa pagtanyag sa atong kaugalingon uban niining espiritu sa kaandam, adunay daghang ubang oportunidad sa pagpasundayag sa samang espiritu sa adlaw-adlaw ug semana-semana. Pananglitan, dihang matukod ang Kingdom Hall, bug-os ka bang nagapakig-ambit sa paghinlo ug pagmentenar niini? Nagasuportar ka ba sa mga kalihokan niini pinaagi sa pag-amot ug kuwarta samtang si Jehova magapanalangin kanimo sa materyal nga paagi? Nagasuportar ka ba sa buluhaton sa pagwali sa imong nasod pinaagi sa pag-amot ngadto sa lokal nga sangang-buhatan? Ug labi pang hinungdanon, regular ka bang nagahimo sa buluhatong pagwali sa maayong balita ug paghimog mga tinun-an sa katawhan diha sa imong dapit? Walay makapuli sa atong personal nga bahin sa maong buluhaton nga gitawag ni Jesus nga labing hinungdanong buluhaton nga buhaton karong panahona, una sa kataposan niining sistemaha.​—Mateo 24:14; 28:19, 20; Buhat 1:8.

Ang tanan nga nagaugmad niining espirituha nga tugob kaayong panalanginan ni Jehova nakakaplag nga matuod nga si Jehova “dili hiwi nga hikalimtan ang inyong buhat ug ang gugma nga inyong gipakita alang sa iyang ngalan.” Ikaw, usab, pinaagi sa pagpasundayag niining espiritu sa masinugtanong pagsakripisyo-sa-kaugalingon, makapamatuod nga “ang panalangin ni Jehova​—kana ang makapadato, ug siya dili modugang ug kasakit niini.”​—Hebreohanon 6:10; Proverbio 10:22.

[Mga footnote]