Ilang Gituman ang Kabubut-on ni Jehova

Usa ka Boluntaryong Halad sa Pagpauswag sa Putling Pagsimba

ANG mga Israelinhon maoy mga saksing-nakakita sa gahom ni Jehova sa pagluwas. Ilang nakita ang katubigan sa Pulang Dagat nga milagrosong nabahin, nga nagtugot kanila sa pagtabok sa mamala nga yuta ug pag-ikyas gikan sa Ehiptohanong kasundalohan. Sa pikas tampi, sila nagtan-aw gikan sa luwas nga gilay-on samtang kadtong mao gihapong katubigan mitabon sa ilang mga kaaway. Giluwas ni Jehova ang ilang kinabuhi!​—Exodo 14:21-31.

Apan, ikasubo nga gibalewala sa pipila ka Israelinhon ang gibuhat sa ilang Diyos. Samtang si Moises didto sa Bukid sa Sinai, ilang gipresentar ang ilang bulawang alahas ngadto kang Aaron ug mihangyo nga siya magbuhat ug idolo aron ilang simbahon. Sa pagbalik, nakaplagan ni Moises kining panon sa mga rebelde nga nangaon, nanginom, nanayaw, ug nanagyukbo sa bulawang nating baka! Sa sugo ni Jehova mga 3,000​—lagmit ang pangunang mga tighulhog sa rebelyon—​ang gipamatay. Nianang adlawa, ang katawhan sa Diyos nakakat-on ug hinungdanong pagtulon-an bahin sa panginahanglan sa paghatag ug eksklusibong debosyon kang Jehova.​—Exodo 32:1-6, 19-29.

Wala madugay human niini nga panghitabo, si Moises nangandam sa pagtuman sa sugo sa Diyos sa pagtukod ug tabernakulo, usa ka mabalhinbalhin nga tolda sa pagsimba. Kining proyekto sa pagtukod magkinahanglan ug mahalong materyales ug hanas nga mga trabahante. Asa kini kuhaon? Ug unsay atong makat-onan gikan niining asoya sa Bibliya?

Amot nga Materyales ug mga Kahanas

Pinaagi ni Moises, gisugo ni Jehova ang mga Israelinhon: “Pagkuha ug amot alang kang Jehova. Ang matag tawo nga andam ug kasingkasing padad-a niini ingong amot nga iya ni Jehova.” Unsang matanga sa amot? Lakip sa mga manggad nga gilista ni Moises mao ang bulawan, plata, tumbaga, mga hilo, mga panapton, mga panit, kahoy, ug mahalong mga bato.​—Exodo 35:5-9.

Ang mga Israelinhon adunay daghan kaayong kahinguhaan sa paghimo sa maong dagayang amot. Hinumdomi, sa dihang sila mibiya sa Ehipto, nagdala sila ug mga bulawan ug plata, uban sa daghang sapot. Sa pagkamatuod, “ilang gihukasan ang mga Ehiptohanon.”a (Exodo 12:35, 36) Sa miagi, ang mga Israelinhon andam nga mihubo sa ilang alahas aron himoong idolo alang sa bakak nga pagsimba. Sila ba niining tungora magpakita nga sila sama ka maikagon nga mohalad aron sa pagpauswag sa matuod nga pagsimba?

Matikdi nga si Moises wala magbungat ug tinong kantidad nga kinahanglang ihatag sa matag usa, ni iyang gigamit ang pagkasad-an o kaulaw sa pagpalihok sa paghatag. Hinunoa, siya yanong mihangyo sa “matag tawo nga andam sa kasingkasing.” Dayag nga wala na batia ni Moises ang panginahanglan sa pagpugos sa katawhan sa Diyos. Siya masaligon nga ang matag usa mohatag sa tanan nga iyang maarangan.​—Itandi ang 2 Corinto 8:10-12.

Ugaling, ang proyekto sa pagtukod magkinahanglan ug labaw pa kay sa mga materyal nga donasyon. Gisultihan usab ni Jehova ang mga Israelinhon: “Paanhaa ang tanang maalamon ug kasingkasing taliwala kaninyo ug ipabuhat ang tanan nga gisugo ni Jehova.” Oo, kining proyekto sa pagtukod nagkinahanglag hanas nga pagtrabaho. Sa pagkamatuod, “ang tanang matang sa kahanas”​—nga naglakip sa pamanday, pagpanalsal ug metal, ug pagpanaod ug mutya—​kinahanglanon sa pagkompleto sa proyekto. Siyempre, si Jehova mogiya sa mga katakos sa mga trabahante, ug ang dungog sa kalamposan sa proyekto angayng ihatag kaniya.​—Exodo 35:10, 30-35; 36:1, 2.

Ang mga Israelinhon maikagong misanong sa pagdapit sa paghatag sa ilang mga kahinguhaan ug sa ilang mga kahanas. Ang asoy sa Bibliya nag-ingon: “Sila nangabot, ang matag usa kansang kasingkasing nagtukmod kaniya, ug sila nagdala, ang matag usa kansang espiritu nagdasig kaniya, sa amot nga iya ni Jehova alang sa buluhaton sa tolda nga tigomanan ug alang sa tanang pag-alagad niini ug alang sa balaan nga mga besti. Ug sila nagsigeg pangabot, ang kalalakin-an uban sa kababayen-an, ang matag usa nga andam sa kasingkasing.”​—Exodo 35:21, 22.

Pagtulon-an Alang Kanato

Karon ang dako kaayong buluhaton sa pagsangyaw sa maayong balita sa Gingharian sa Diyos napalampos pinaagi sa boluntaryong mga donasyon. Kasagaran, kini maoy pinaagi sa salapi. Sa ubang mga kaso, ang Kristohanong igsoong mga lalaki ug babaye mogamit sa ilang daghang kasinatian sa pagtabang sa pagtukod ug mga Kingdom Hall, mga Assembly Hall, ug mga pasilidad sa sangang buhatan. Dayon dunay buluhaton diha sa kapin sa usa ka gatos ka puy-anang Bethel sa tibuok kalibotan, buluhaton nga naglangkit ug daghang lainlaing mga kahanas. Ang tanang andam ug kasingkasing nga mga tawo nga mihimo niana nga mga paghalad makaseguro nga si Jehova dili malimot sa ilang paghago!​—Hebreohanon 6:10.

Ang susama mapadapat ngadto sa pagpakig-ambit sa matag usa kanato diha sa Kristohanong ministeryo. Ang tanan giawhag sa pagpalit sa panahon aron masibotong makapakig-ambit sa pagsangyaw. (Mateo 24:14; Efeso 5:15-17) Ang uban naghimo niini ingong bug-os-panahong mga ebanghelisador, o mga payunir. Tungod sa mga kahimtang, ang uban dili makahimo sa paggugol ug samang gidaghanon sa panahon diha sa ministeryo ingong payunir. Bisan pa niana, sila usab kahimut-anan alang kang Jehova. Sama sa mga amot sa tabernakulo, si Jehova wala magtakda ug tinong kantidad nga kinahanglang ihatag sa matag usa. Apan, ang iyang gikinahanglan mao nga ang matag usa kanato moalagad kaniya uban sa atong tibuok kasingkasing, kalag, kaisipan, ug kusog. (Marcos 12:30) Kon atong ginabuhat kana, kita makaseguro nga siya moganti kanato tungod sa boluntaryong mga paghalad nga atong gihimo sa pagpauswag sa matuod nga pagsimba.​—Hebreohanon 11:6.

[Footnote]