Ang Ipasabot sa mga Balita

Mga Klero ug AIDS

“Nagkadaghan ang mga Kaso sa AIDS Taliwala sa mga Paring Katoliko” maoy mabasa diha sa ulohan sa usa ka artikulo nga migula sa International Herald Tribune. Ang taho nag-ingon: “Samtang imposibleng mapamatud-an ang gidakoon sa problema, ang mga doktor, mga klerigo ug mga social worker sa daghang siyudad sa tibuok nasod miingon nga miuswag ang gidaghanon sa mga paring Katoliko nga natakdan sa AIDS, . . . Ang pagdaghan sa nakahibalo nga apil sa mga biktima sa [AIDS] ang mga paring Katoliko nahimong suliran sa iglesya tungod sa mga implikasyon nga ang ubang mga pari ug mga hermano nakabungkag dili lang sa ilang mga panaad sa pagpabiling dili-minyo kondili nakahimo usab ug homoseksuwal nga mga buhat nga nagasupak sa mga balaod sa iglesya.”

Apan, ang pagbungkag sa mga panaad sa pagpabiling dili-minyo, dili lang mao ang mabasol, kay bisan ang mga iglesya kansang mga ministro gitugotan sa pagminyo may mga talaan sa mga kaso sa AIDS taliwala sa ilang mga klero. Ang samang taho nagpakita nga ang “AIDS mitakod sa dakong bahin sa mga Amerikano, lakip ang mga rabbi, mga pastor sa Episkopal, mga ministro sa Buddhista ug ubang mga klero.”

Siyempre, dili tanan sa mga klerigong may AIDS mga homoseksuwal. Motakod usab ang AIDS sa normal nga pakigsiping ug pinaagi sa mga pagdugang sa dugo. Bisan pa, ang maong mga kaso taliwala sa klero nagpakita kon unsay mahitabo kon ang mga indidbiduwal dili mosunod sa tin-awng sugo nga gihatag sa unang-siglong konsilyo sa Jerusalem, nga mao, “sa pagpahilayo . . . sa dugo, sa mga mananap nga naluok, ug sa gidiling seksuwal nga relasyon.”​—Buhat 15:29, The New American Bible (Katoliko).

Sayop nga Tigpataliwala

“Higugmaa ang imong kaugalingon; usa ikaw ka Diyos.” Katingalahang mensahe ba, alang kanimo? Oo, apan taliwala sa nagkadaghang mga tawong nagapangitag kapilian gikan sa tradisyonal nga relihiyon, ang mensahe nahimong popular. Kadtong mga pulonga, nga gipahayag sa 27-anyos nga ginang sa panimalay sa California si Penny Torres, ginaingon nga gisulti sa aktuwal sa Mafu, “nga mipormang ‘binuhat gikan sa ikapitong dimension’ nga kataposang nagpakaunod ingong sanlahon sa 1ng Siglong Pompeii,” nga kaniya nag-alagad si Torres ingong “tigpataliwala,” mitaho ang Los Angeles Times. Si Torres maoy usa sa mga tawo sa Tinipong Bansa kinsa “mga tigpataliwala” sa “patayng mga espiritu” nga nagtudlo nga ang tanan Diyos mismo.

“Ang mga tigpataliwala,” sumala sa Times, maoy “mga espiritista kinsa tuyong mosulod sa mga tawong may diyutay o walay-panimuot aron sa pagpakigsulti sa dili-makitang ‘mga espirituhanon’” o sa “mga dili-yutan-on.” Niining kahimtanga, mahimo silang tawgon sa paghatag ug tambag o mga tubag sa mga pangutana may kalabotan sa personal nga mga butang. Gibanabana nga sa Los Angeles lamang adunay mga 1,000 ka tawong nag-angkong mga tigpataliwala. Nganong may kalit nga kaikag sa mga tigpataliwala? Diha sa The Miami Herald, si Ronald F. Theimann, dean sa Harvard Divinity School, miingon nga ang “teolohiya dugang nga gipadaplin na lang diha sa intelektuwal nga kinabuhi sa Amerikano.”

Sa unang mga siglo, mipasidaan si Moises sa Israel: “Dili hikaplagan uban kaninyo ang bisan kinsa . . . . nga mangutana sa espiritista o sa propesyonal nga mananag-an sa mga hitabo o mangutana sa mga minatay.” Ang katarongan? “Ang bisan kinsa nga mobuhat niining mga butanga dulumtanan kang Jehova.”​—Deuteronomio 18:10-12.

Nangapkap sa Kangitngit

Ang mga membro sa ISSOL (International Society for the Study of the Origin of Life) nagtigom sa miaging tuig sa Berkeley, California, sa ilang ikawalong komperensiya. Tapos sa pag-ila sa panginahanglan sa “kaugalingong kahibalo sa pagtumpig mga kalamposan hangtod ning petsaha,” ang kaubang tagmugna sa ISSOL si Propesor Klaus Dose miingon diha sa Naturwissenschaftliche Rundschau, magasin sa siyensiya sa Alemanya, nga ang mga tuig sa pagdukiduki walay nahimo sa mga ebolusyonista aron masabtan ang sinugdanan sa kinabuhi.

Si Propesor Dose misulat: “Tingali walay disiplina sa natural nga siyensiya nga nagpakitang lahi kini pinaagi sa nagkalainlaing nagkasumpaking mga ideya, mga pagbanabana, ug mga teoriya dili sama sa tibuok natad sa ebolusyon sa kinabuhi. Sa 1986, kapin sa 30 ka tuig human sa maayong sinugdanan sa panahon sa simulation experiments, kami walay ikatudlong malig-ong mga kamatuoran sa katin-awan sa aktuwal nga mekanismo sa sinugdan sa kinabuhi kay sa nahimo ni Ernst Haechel sa 120 ka tuig kanhi. Sa pagkaalaut, kinahanglang ilhon nga ang mga produkto nga miresulta sa mga simulation experiments, sa katibuk-ang pagkasulti, halayo sa kinabuhi kay sa mga substansiya nga mahimong alkitran.” Sa susama, ang propesor sa New York University si Irving Kristol misulat nga “ang anam-anam nga kausaban sa populasyon sa mga espisye ngadto sa laing espiye maoy mga biyolohikal nga mga pagbanabana, dili biyolohikal nga kamatuoran.”

Samtang ang mga ebolusyonista nagpadayon sa pagpangapkap sa mga tubag, ang katin-awan sa Bibliya tukma sa tanang nahibaloang mga kamatuoran. Sumala sa girekord sa magsusulat sa Bibliya nga si David: “Kay kanimo [Diyos] anaa ang tuboran sa kinabuhi.”​—Salmo 36:9.