Paglaom Kang Jehova
“Paglaom kang Jehova ug pagbantay sa iyang dalan, ug siya magabayaw kanimo sa pagpanunod sa yuta. Sa diha nga pagalaglagon ang mga daotan, ikaw makakita niana.”—SALMO 37:34.
SA MAKINAADMANON, nakab-ot sa tawhanong pamilya ang kinatayoktokang ang-ang sa kaugmaran. Tungod sa iyang mga paningkamot, iyang nakab-ot sa kataposan ang nukleyar nga katuigan. Ang atomikong gahom nakataganag abundang enerhiya ug busa nagabukas ug dagkong mga butang sa tibuok yuta. Apan sa kabaliskaran, kini nakabukas usab sa dalan sa dakong kasakit sa tawhanong pamilya.
1, 2. Hain nakitang nagbarog ang katawhan, ug sa unsang paagi nalangkit ang Hiniusang Kanasoran?
2 Unsay nakaulang sa paglaglag sa tawhanong pamilya sa iyang kaugalingon sa nukleyar nga gubat? Mopatim-aw nga kini mao ang Hiniusang Kanasoran, nga nagapasigarbo nga may duolan sa 159 ka membrong nasod nga dunay nagkalainlaing mga porma sa kagamhanan. Sa politikanhong pagkasulti, kining maong mga kagamhanan nagkasumpakiay sa usag usa, ang kada usa nagtuo nga ang iyang kaugalingong porma sa pagmando mao ang superyor, oo, ang labing maayo. Busa, sulod kaniya, ang HK maoy usa ka nabahinbahin nga lawas. Kaylap ang garbo sa nasod ug ang tinguha sa pagkinaugalingon. Dugang pa, daghang nasod misalikway sa pagtuo ug Diyos, nangahimong atiyesta.
3. Sa unsang paagi ang paglantaw sa Kakristiyanohan sa Diyos lahi gikan sa paglantaw sa Diyos sa iyang kaugalingon?
3 Ang ngalang Kakristiyanohan aplikado gihapon sa mga nasod nga dili gustong iklasipikar nga walay diyos apan nagaangkong nagtuo kang Jesu-Kristo nga nalangkit sa “Diyos nga Amahan” sa Trinidad uban kang Jesus ug sa gihimong persona nga “espiritu santo,” o balaang espiritu. Ang mga bahin sa Trinidad ginaingon nga managsama. Apan gipasulat sa Amahan ni Jesus kining mga pulonga sa pag-ila: “Ako mao si Jehova. Kini mao ang akong ngalan; ug ang akong himaya dili nako igahatag sa uban, ni ang akong pagdayeg sa mga linilok nga larawan.” (Isaias 42:8) Kining si Jehova, kun Yahweh (The Jerusalem Bible), naghimog walay-ikatanding rekord sa kasaysayan alang sa iyang kaugalingon.
4. Gikan sa unsa gipasimang sa Hiniusang Kanasoran ang katawhan?
4 Dili makapasigarbo sa bisan unsang paagi, ang Hiniusang Kanasoran naglikay sa paghatag ug angay nga paghimaya ug pag-ila sa ngalan sa Diyos. Wala niini dasiga ang katawhan, nga karon nagaatubang sa labing peligrosong kahimtang, sa paglaom diha sa nagadala nianang ngalana. Apan, kanang Usa tukmang gitawag nga “ang Diyos sa paglaom,” sanglit iyang gipahimutang ang basehanan sa bugtong paglaom sa katawhan nga mahimong tagamtamon karon sa katawhan. (Roma 15:13, King James Version) Ang paglaom nga iyang gihatag nakalig-on ug nakabaskog sa daghang mga lalaki ug babaye.
Sa Sinugdanan Pa—Paglaom!
5. Kanus-a gitukod ang basehanan sa paglaom?
5 Ang basehanan sa paghangop nianang paglaoma gitukod sayo sa kasaysayan sa tawhanong pamilya. Oo, gipahimutang kini una pa gipapahawa ang atong unang mga ginikanan gikan sa ilang Edenikong puloy-anang tanaman sa Tungang Silangan. Ang rekord nga gisulat sa Hebreohanong pinulongan bahin nianang tanaman, o Paraiso, dili sugilambong, dili sugilanon sa mga tawo nga mipalayo sa pagsimba sa ilang Maglalalang.—Genesis 2:7–3:24.
6. Sa unsang paagi midangat ang tawo sa panginahanglag paglaom?
6 Kapin sa 4,000 ka tuig sa ulahi, ang Kristohanong apostol Pablo gidasig sa pagsulat: “Ang sala misulod sa kalibotan pinaagi sa usa ka tawo, ug busa ang sala mikuyanap ngadto sa tanang mga tawo sanglit ang tanang mga tawo nakasala man.” (Roma 5:12) Diha sa iyang laing mga sinulat, iyang gipaila ang usa ka tawong sad-an: “Kay maingon nga diha kang Adan ang tanan nangamatay, maingon man usab diha kang Kristo ang tanan mangabuhi.” (1 Corinto 15:22) Usa ka doktor nga ginganlag Lucas, sa ika-3 nga kapitulo sa iyang Ebanghelyo, gisubay ang kaliwat ni Jesus balik kang Adan, kinsa, sa wala pa ipalagpot gikan sa Eden, nakadungog sa balita sa paglaom ni Jehova.—Lucas 3:23-38.
7. Unsang makapadasig nga butang ang gihimo sa Diyos samtang buhi pa si Adan?
7 Siyempre, gusto kang masayod sa diwa nianang balitaa. Apan sa dili pa kana basahon, matikdi ang kamatuoran nga dugay nang panahon nga maghahatag ug paglaom si Jehova. Sa sinugdan si Adan maoy yutan-ong anak sa Diyos, ug gitugotan siya ni Jehova sa pagpatunghag mga anak. Kon makakita ka sa umaabot ug dili maayong kahimtang, hayan dasigon nimo o hatagan nimog paglaom ang imong anak. Ang Diyos mihimo ug samang butang. Human nga nadunggan ni Adan ang mga pulong sa pagtunglo nga gipahayag sa Diyos diha kaniya mismo, siya nakadungog ug mga pulong sa paglaom alang sa iyang mga anak.
8. Sa unsang paagi gitagana sa Genesis 3:15 ang basehanan sa paglaom?
8 Unsa kadtong mga pulonga nga gikan niining nagahatag-paglaom nga Diyos? Ngadto sa “bitin” nga nalangkit sa pagkasala ni Adan, ang Diyos miingon: “Ibutang ko ang panagkaaway sa taliwala mo ug sa babaye ug sa taliwala sa imong binhi ug sa iyang binhi [kaliwat]. Siya magasamad sa imong ulo ug ikaw magasamad sa iyang tikod.” (Genesis 3:14, 15) Tingali mahibulong ka kon sa unsang paagi kadtong mga pulonga makahatag ug paglaom. Una, atong nahibaloan nga “ang bitin” pagasamdan sa iyang ulo.
9. Kinsa “ang bitin” nga gihisgotan sa Genesis 3:14, 15?
9 Diha sa Pinadayag 12:9 kini ang nasulat: “Gitambog ang dakong dragon, ang bitin nga karaan, ang ginganlag Yawa ug Satanas, ang maglilimbong sa tibuok kalibotan; siya gitambog ngadto sa yuta, ug ang iyang mga manulonda gitambog uban kaniya.” Oo, “ang bitin” nga nalangkit sa Eden walay lain kondili ang daotang espiritung linalang nga nailhang Satanas nga Yawa. Dili lamang kanang simbolikong bitin nakabaton ug mga manulonda sa langit kondili siya adunay “binhi” dinhi sa yuta, ang “binhi” nga sa tinudlong panahon malaglag uban kaniya.
10. Sa unsang paagi gipamatud-an ni Jesus kon kinsa “ang bitin”?
10 Aron mapamatud-an nga ang Yawa mao “ang bitin” nga maoy hinungdan sa pagkahulog sa atong orihinal nga mga ginikanan, si Jesu-Kristo miingon sa Hudiyhanong reliyosong mga pangulo sa unang siglo: “Kamo gikan sa inyong amahan nga mao ang Yawa, ug ang inyong tinguha mao ang pagtagbaw sa mga pangibog sa inyong amahan. Siya maoy usa ka mamumuno sukad pa sa sinugdan, ug siya wala mobarog nga malig-on sa kamatuoran . . . Inigpamakak niya, siya magsulti tukma sa iyang kaugalingong kinaiya, kay siya bakakon man ug mao ang amahan sa mga bakak.” (Juan 8:44) Gitawag usab ni Jesus kadtong relihiyosong mga kaaway nga “mga anak sa bitin.”—Mateo 12:34; 23:33.
Paglaom Gipabiling Buhi
11. Unsang dugang katarongan sa paglaom ang gihatag sa Genesis 3:15?
11 Ang saad sa Diyos sa pagsamad sa ulo sa simbolikong bitin nakahatag ug makalipay sa kasingkasing nga paglaom sa atubangan sa tanang tawhanong pamilya nga umaabot niadto sa paglungtad. Atong makita ang katarongan pinaagi sa pagsusi sa ubang bahin sa Genesis 3:15. Gihisgotan ang “binhi” sa babaye. Ang pag-ila niana nga “binhi” dugay nang nalikban sa misteryo. Apan matin-aw nga himoon ni Jehova nga Diyos kanang wala pa mailhing “binhi” nga kaaway sa simbolikong bitin ug sa iyang nagabatok sa Diyos nga “binhi.” Gisaad ang kadaogan, oo, seguradong kadaogan, alang sa “binhi” sa “babaye.”Ang kadaogan niini gipahiluna ingong paglaom atubangan sa katawhan. Busa ang mga sakop tawhanong pamilya makalaom sa pag-abot sa “binhi” sa “babaye.”
12. Sa ulahi, unsa ang dugang gibutyag bahin sa “binhi” sa “babaye”?
12 Sa milabay ang kasiglohan, gibutyag sa Diyos nga kining maong “binhi” mao ang iyang bugtong Anak, nga gipadala sa yuta aron mahimong ang Mesiyas ug sa paghatag sa iyang kinabuhi ingong halad lukat. (Genesis 22:17, 18; Galacia 3:16; 1 Juan 2:2; Pinadayag 5:9, 10) Tungod ning katarongan ang paglaom sa mga Saksi ni Jehova wala masandig sa Hiniusang Kanasoran. Kini nasandig diha sa buhi nga si Jesu-Kristo, ang Pangunang Tigpamaba ni Jehova nga Diyos. Makasalig kita nga buhi si Kristo, sanglit mibangon siya gikan sa patay aron molingkod sa tuong kamot ni Jehova sa langit. Si Pablo miingon: “Kon niini rang kinabuhia [lakip niini nga kinabuhi ang atong ika-20ng siglo] may paglaom kita kang Kristo, nan, sa tanang mga tawo kita mao ang labing makaluluoy. Apan, ang tinuod mao nga si Kristo gibanhaw gikan sa mga nangamatay, ang unang mga bunga niadtong gibanhaw gikan sa mga patay.” (1 Corinto 15:19, 20) Sama sa masubsob nang gipamatud-an sa Bibliya pinaagi sa mga panid niining mga magasina, si Jesu-Kristo naentrono na karon ingong langitnong Hari.—Pinadayag 11:15.
13, 14. Diin gibutang sa mga Saksi ni Jehova ang ilang paglaom, ug unsay ilang gihimo bahin niini?
13 Sa pagkatinuod, wala pulihi ni Jesus si Jehova ingon nga mao ang paglaom sa katawhan. Ang Salmo 37:34 aplikado gihapon: “Paglaom kang Jehova ug pagbantay sa iyang dalan, ug siya magabayaw kanimo sa pagpanunod sa yuta. Sa diha nga pagalaglagon ang mga daotan, ikaw makakita niana.” Kinahanglan gihapong magpadayon sa paglaom kang Jehova ug sa pagdasig sa mga katawhan sa dili paglaom sa hinimog-tawong mga institusyon.
14 Kaharmoniya niining kamatuorana, aktibo ang mga Saksi ni Jehova sa 208 ka nasod, nagawali sa maayong balita sa Gingharian. Dili sila mapahunong sa pagbuhat niini. Ang politikal nga mga institusyon, gipaluyohan ug gihulhogan sa relihiyosong mga organisasyon, walay balaang katungod sa pagsulay sa pagpahunong kanila. Kita makapadayon nga mahimong mga saksi ni Jehova ug sa paglaom diha kaniya, sama kang David sa Bethlehem, kinsa misulat:
15. Unsang matang sa paglaom ang nabatonan ni Haring David kang Jehova?
15 “Si Jehova mao ang akong magbalantay; walay nakulang kanako. Siya nagapahigda kanako sa mga sibsibanan nga malunhaw; siya nagatultol kanako sa mga tubig nga malinaw. Gipalig-on niya ang akong kalag: Ginamandoan niya ako sa mga dalan sa pagkamatarong tungod sa iyang ngalan. Oo, bisan magalakaw ako latas sa walog sa landong sa kamatayon, ako walay kahadlok sa bisan unsa nga daotan; kay ikaw nagauban kanako; ang imong baras ug ang imong sungkod, kini nagapalipay kanako. Ikaw nagaandam ug pagkaon sa atubangan ko tinambongan sa akong mga kaaway: Gidihog mo ang akong ulo sa lana; ang akong kopa nagaawas. Sa pagkamatuod ang kaayo ug ang mahigugmaong-kalulot magasunod kanako sa adlaw ngatanan sa akong kinabuhi; ug sa balay ni Jehova magapuyo ako sa walay kataposan.”—Salmo 23, American Standard Version.
16. Nganong ikaingon nga si Jesus adunay samang panglantaw kang David?
16 Si Haring David mao ang espirituwal nga magbalantay sa mga pamilya sa karaang Israel, ug siya ang mibukas sa dalan alang sa Jerusalem aron mahimong kaulohan sa nasod, nga niini ang iyang anak nga si Solomon nagmando sulod sa 40 ka tuig. Uban sa maayong katarongan, si Jesu-Kristo gihisgotan ingong “anak ni David.” (Lucas 1:31; 18:39; 20:41) Kon naglaom si David kang Jehova nga Diyos, naglaom usab ang iyang yutan-ong kaliwat si Jesu-Kristo. Ug mao kanay iyang gihimo.
17. Unsay pamatuod nga naglaom si Jesus kang Jehova?
17 Ingong pamatuod nga gisunod sa labing iladong yutan-ong kaliwat ni David, si Jesu-Kristo, ang tambag sa Salmo 37:34 dihang miginhawa sa iyang kataposang ginhawa diha sa kahoy sa pagsakit, si Jesus miingon: “Amahan, nganha sa imong mga kamot itugyan ko ang akong espiritu.” (Lucas 23:46) Nagkutlo siya ug nagtuman sa mga pulong ni David diha sa Salmo 31:5, nga gipahayag ngadto sa Diyos: “Ngadto sa imong mga kamot itugyan ko ang akong espiritu.” Wala mapakyas ang paglaom ni Jesus, ug maingon man kang Haring David. Gibanhaw si Kristo gikan sa patay sa ikatulong adlaw. Kap-atan ka adlaw sa ulahi siya mibalik ngadto sa iyang langitnong Amahan. Sa kataposan sa Hentil nga Panahon sa 1914, gibayaw ni Jehova ang iyang Anak aron mahimong Magmamando sa yuta.
Panahon sa Paglaom Karon
18. Nganong mao na karon ang tukmang panahon sa paglaom?
18 Karon, samtang ang bag-ong tuig 6,014 A.M. (sa Tuig sa Kalibotan) nagaagak sa tawhanong panimalay paingon sa umaabot, unsay paglaom ang ginapaabot alang sa tawhanong pamilya? Tukma kaayo karon ang pangutana tungod kay hapit na kita sa 1,900 ka tuig tapos sa panahon sa Bibliya. Dugay na kaayong panahong milabay sukad nga gisulat ni David ang Salmo 37:34.
19. Unsay gihimo ni Jehova kang Jesus, nga nakahatag kanatog paglaom?
19 Si Jehova nga Diyos, ang Labing Makagagahom nga Diyos nga nagbanhaw kang Jesus gikan sa patay, adunay labi pang dakong papel alang kaniya kay sa gihunahuna sa mubog-panan-awng mga tawo. Pinaagi sa pagbanhaw ug pagbayaw sa iyang bugtong Anak diha sa iyang tuong kamot sa mga langit, si Jehova nga Diyos may dugang katarongan alang kanato sa paglantaw Kaniya uban sa dili-mapakyas nga paglaom, ang atong kinatayoktokang paglaom. Kini magkahulogan sa atong kinabuhing dayon diha sa kalipay, sama sa gipamulong sa dinasig nga magsusulat nga si Pablo: “Kita nangaluwas diha niini nga paglaom.”—Roma 8:24.
20. Nganong kita makaingon nga si Jehova mao gihapon “ang Diyos sa paglaom”?
20 Si apostol Pablo mipadayon sa pag-ingon: “Apan ang paglaom nga makita dili paglaom, laoman ba sa usa ka tawo ang butang nga iyang makita? Apan kon magalaom kita alang sa butang nga dili makita, kita nagapaabot niini uban sa pailob.” (Roma 8:24, 25) Busa kanang orihinal nga paglaom buhi gihapon, oo, haduol na sa mahimayaong katumanan diha sa tawhanong rasa. (2 Pedro 3:13; Pinadayag 21:4, 5) Tungod sa maong katarongan nga mao kana ang paglaom sa tanang katawhan, kini takos nga ipahibalo sa tanan. Mao kini ang ideya sa atong “Diyos sa paglaom.”
21, 22. Unsay atong ginalaomang buhaton sa mga nasod sa haduol nga umaabot?
21 Karon na ang panahon sa tanang panahon nga kining ideyaha matuman. Bisan sa atong panahon dihang nakab-ot sa ubang mga nasod sa HK ang kalamposan sa siyensiya nga nahimong uyokan sa tanang butang, ang mga lider niining mga kagamhanana wala mobati sa panginahanglan sa pagtugyan sa pagsulbad sa mga suliran diha sa usa ka labi pang makinaadmanon.—Itandi sa Genesis 11:6.
22 Wala pa sukad mahitabo, nga madepensahon ang popular nga relihiyon, ug kini wala nay kaikyasan. Ang iyang makapabahing impluwensiya kinahanglang wagtangon. Ang Bibliya nagpakita nga barogan sa nagamandong mga elemento ang ilang pagkalabaw ug mobulag gikan sa samag alimatok nga mga relihiyon nga nanlimbasog sa dugay nang panahon sa pagsupsop sa kalibotanong sistema sa mga butang kutob sa ilang makuha. Busa, dili ikatingalang buhaton kini sa politikal nga elemento. Ang ilang pagkaikyas gikan sa pag-atake sa relihiyon nagapakita, alang sa ilang punto de bista, nga walay Diyos nga takos pagasimbahon ug alagaran. Ang tagna nagapakita nga moatake sila batok sa mga saksi sa Diyos, nga nagapabilin. Mangita sila sa labing masayon nga mga kadaogan batok sa mga Saksi ni Jehova ingong kataposan sa ilang batok sa Diyos nga kampaniya.—Pinadayag 17:12-17; Ezekiel 38:10-23.
23, 24. Unsay reaksiyon ni Jehova sa pag-atake sa mga nasod sa iyang katawhan?
23 Apan, sa kataposan makaila sila sa makauulawng kapildihan nga modangat sa usa ka tawong mangahas sa pagpakig-away kang Jehova sa mga panon, nga wala pa gayod sukad mapildi sa gubat. Kana sa walay pagkasipyat nagapatin-aw nga sila nagaalagad sa mga katuyoan sa pangunang kaaway sa bugtong tinuod nga Diyos, nga mao, “ang bitin,” si Satanas, “ang diyos niining sistema sa mga butang.”—2 Corinto 4:4.
24 Pagkadakong kaulawan unya kini alang kanila! Ang ilang gilaomang ipasundayag makitang mao unya ang labing grabeng kaulawan, nagahagit sa Diyos sa langit ug sa yuta sa matarong nga kasuko. Ngadto sa mahuyang nga katawhan siya makaingon: “‘Kay ang akong mga hunahuna dili inyong mga hunahuna, ni ang inyong mga dalan akong mga dalan,’ nagaingon si Jehova. ‘Kay maingon nga ang mga langit hataas kay sa yuta, mao man ang akong mga dalan labi pang hataas kay sa inyong mga dalan. Kay maingon nga ang ulan ug ang niyebe managpanulo gikan sa langit, ug dili na mobalik didto, apan nagabubo sa yuta, ug nagahimo niini nga manalingsing, ug magahatag sa binhi sa mga magpupugas ug tinapay sa kumakaon, sa ingon niini ang akong pulong nga magagula gikan sa akong baba kini dili mobalik kanako nga walay kapuslanan, kondili nga kini magatuman sa akong gikahimut-an, ug kini sa tino makabatog kalamposan nga tungod niana kini akong gipadala.’”—Isaias 55:8-11.
25. Nan, nganong may maayo kitang katarongan sa paglantaw kang Jehova ingong atong “Diyos sa paglaom”?
25 Kining Maglalalang sa tawo nagbutang diha sa kasingkasing sa tawo ug mainitong pagbati, sama kaniya. “Kay mao kini ang giingon ni Jehova sa mga panon, ‘Sunod sa himaya gipadala niya ako ngadto sa mga nasod nga nanagtulis kaninyo; kay siya nga nagahilabot kaninyo, nagahilabot sa kalimutaw sa akong mata.’” (Zacarias 2:8) Busa, ang mga Saksi ni Jehova magalaom kang Jehova. Iyang himoon kana nga paglaom nga labing matahom nga dayandayan sa iyang unibersal nga soberano. Dili ikalalis nga iyang pamatud-an nga siya mao ang labing hataas, labing makagagahom, walay kataposang Diyos, nga nakatuman sa labing hataas nga mga paglaom sa iyang mga linalang sa tibuok langit ug yuta. Hallelujah!—Salmo 150:6.
Unsaon Nimo sa Pagtubag
◻ Nganong malimbongon ang paglaom sa mga nasod?
◻ Nganong nagtagana ang Diyos ug basehanan sa paglaom diha sa Genesis 3:15?
◻ Unsay baroganan ni Jesus bahin sa Salmo 37:34?
◻ Nganong may katarongan na kita karon sa paglaom?
[Hulagway sa panid 10]
Sama sa karnero nga nagasunod sa ilang magbalantay, si David milantaw ug milaom kang Jehova
[Tinubdan]
Pictorial Archive (Near Eastern History) Est.