Ikaw ba Kaniadto Nakig-uban sa Organisasyon ni Jehova?
ANG batan-ong lalaki naulaw ug naguol kaayo. Ang iyang mga sapot, nga nagkagidlay ug nagkagisigisi, daw uso nga sapot niadto. Karon sa tino nagpadayag kini nga nagkalisodlisod siya. Samtang mibalik ang iyang panumdoman ngadto sa iyang halayong yutang-natawhan, gibati siyag dakong kasilag sa iyang mahilayng kinabuhi ug sa iyang pag-usik-usik sa panulondon nga iyang gipugos nga maiya nga wala sa panahon. Nakadugang sa iyang kalisod ang iyang gikuraw nga tiyan, ug gimingaw siya. Gani, ang mga sulogoon sa iyang amahan mas maayo pag pagkabutang kay kaniya! Oh, pagkadako sa iyang tinguha nga makapuli sa ilang dapit!
Apan unsa kahay pagdawat ang iyang malaoman sa iyang amahan kon mopauli siya karon? Dili siya makalaom ug mainit nga pag-abiabi o makasulod sa balay human sa makauulawng paagi sa iyang pag-abuso sa kalulot sa iyang amahan. Apan, nangibabaw ang maidlot nga pagbati diha sa iyang hunahuna ug kasingkasing: Kinahanglang mopauli siya.
Pagkakulang sa pagsabot kining batan-ona sa mga pagbati sa iyang amahan alang kaniya! Pagkadakong katingala ang naghulat kaniya dihang nagkaduol na siya sa iyang daang panimalay! Sa pagkatinuod, “samtang didto pa siya sa halayo, nakita siya sa iyang amahan ug kini giabot ug kaluoy, ug midalagan ug migakos kaniya ug gihagkan siya.”—Lucas 15:20.
Sama sa usikang anak, mibulag ka ba sa imong panimalay? Napalayo ka ba sa imong Amahan, si Jehova, ug sa iyang organisasyon? Nagatinguha ka na ba karon sa ‘pagpauli’?
Diha sa kadaghanang mga kaso, kadtong napalayo sa organisasyon ni Jehova dili gayod sama sa usikang anak. Diha sa kadaghanan, sa anam-anam kadto, halos wala mamatikdi, nga pagpalayo—sama sa sakayan, nga naglutaw ug hinayhinayng napadpad sa halayo gikan sa mamala. Ang uban nabug-atan sa pinansiyal nga mga problema ug sa mga problema sa pamilya, nga nagkasakit o “gustong moasenso” sa kalibotan, nga sa ingon napadaplin na lang ang espirituwal nga mga butang. Gitugotan sa uban ang ilang kaugalingon nga mapandol sa mga indibiduwal nga kauban sa Kristohanong kongregasyon o mibiya tungod kay misupak sila sa pipila ka pagsabot sa organisasyon ni Jehova bahin sa Kasulatanhong punto. Gitugotan sa uban nga sila maluya ug mihunong dihang wala moabot ang kataposan niining presenteng sistema sa mga butang sa panahon nga ilang gilaoman.
Kon usa ikaw nga dili na aktibo sa organisayon ni Jehova, malagmit usa o dugang pa niining mga katarongana ang mohaom sa imong mga sirkumstansiya. Bisan unsa pay katarongan, dili ba panahon na karon nga magpalandong sa pagbalik?—Mateo 18:12-14.
Napandol Ka Ba?
Sa pagpalandong kon unsa na ka layoa nga nahulog ang katawhan gikan sa pagkahingpit, malaoman sa usa nga ang kasugian tungod sa personalidad mahitabo matag karon ug unya. Nahimong kapangdolan kini sa uban. Ang pipila napandol dihang ilang makita ang usa ka indibiduwal nga gitahod kaayo nila nga sa kalit lang milihok nga walay paghunahuna o sa dili-kristohanong paagi o nalangkit sa daotang buhat.
Nahitabo ba kini kanimo? Kon unsay nakapandol kanimo, si Jehova sa dayag dili mao ang mipahinabo sa pagkapandol. (Itandi sa Galacia 5:7, 8.) Busa duna ba gayoy katarongan sa pagputol sa atong relasyon kaniya tungod sa nahimo sa uban? Hinunoa, dili ba angay magpadayon kitang mag-alagad kaniya nga matinumanon, masaligon nga nahibalo si Jehova sa nagakahitabo ug atubangon kita sa mahigugmaon?—Colosas 3:23-25.
Sa molabay ang panahon, nakita sa uban nga ang nakapandol kanila daw dili na importante karong panahona o tingali nawala na. O sa malinawong pagpalandong sa butang, tingali moingon sila karong panahona nga sila gayod ang nasayop. Tinuod kini kon wala mouyon ug napandol ang usa sa tambag o sa disiplinang gihatag kaniya. Samtang nagapalandong, tingali naamgohan niya nga ang maong disiplina gihatag sa tinuod nga gugma ug alang sa iyang kaayohan. (Hebreohanon 12:5-11) Nan, pagkatukma, sa paglihok sa tambag ni Pablo! Siya misulat: “Palig-ona ang inyong nanghuyhoy nga kamot ug mahuyang nga mga tuhod, ug patul-ira ang inyong mga lakang. Aron ang bakol dili malisa, kondili mamaayo hinoon sila.”—Hebreohanon 12:12, 13, The New English Bible.
May Gikasupakan Ka Bang Doktrina?
Tingali mibulag ka sa organisasyon ni Jehova tungod kay may lahi kang pagsabot sa pila ka Kasulatanhong punto. Sama nga ang mga Israelinhon nga giluwas sa Ehipto daling “nakalimot sa mga binuhatan” sa Diyos ug “wala maghulat sa iyang tambag,” tingali naghunahuna ka nga sanglit wala man ipatin-aw sa organisasyon ang punto de bista nga imong giisip nga husto, dili ka na makiglangkit pa niana. (Salmo 106:13) Tingali dugay nang napatin-aw ang maong punto, nga nausab o kaha napalig-on pinaagi sa dugang Kasulatanhong pagdukiduki ilalom sa pagtultol sa espiritu sa Diyos. Dili ba mas maayong magpabilin na lang sa organisasyon, ug maghulat kang Jehova?
Maayong hinumdoman nga nagalihok si Jehova pinaagi lamang sa usa ka organisasyon. Sa atong panahon, “ang matinumanon ug maalamong ulipon” nagahatag sa espirituwal nga pagkaon sa “hustong panahon.” Matikdi nga kining maong ulipon ‘nakit-ang nagabuhat niini sa dihang miabot ang Agalon.’ (Mateo 24:45-47) Sa pagkatinuod, kinsa karong panahona ang nasayod nga miabot na ang Agalon? Ug kinsa lamang ang puliki sa gihisgotang buluhaton? Kadto lamang nakig-uban sa organisasyon ni Jehova sa Kristohanong mga saksi!
Dihang mibiya ang uban kang Jesus, si apostol Pedro miingon: “Ginoo, kang kinsa kami moadto? Ikaw mao ang may mga pulong mahitungod sa kinabuhing dayon.” Sa walay duhaduha si Pedro nahibalo nga si Jesus mao ang Mesiyas. Busa dihang nakita sa ubang mga disipulo nga makalilisang ang mga pulong ni Jesus, nasayod si Pedro nga dili maalamong biyaan ang tuboran sa “mga pulong mahitungod sa kinabuhing dayon.” Ang bisan unsang pagduhaduha kun sayop nga pagsabot mapatin-aw ra sa ulahi. (Juan 6:51-68; itandi sa Lucas 24:27, 32.) Mao gihapon kini ang kahimtang karon, samtang mauswagong ginatultolan ni Jehova ang iyang mga alagad sa dalan sa kamatuoran.—Proverbio 4:18.
Balik na Karon
“Susihon ta ug sulayan ta ang atong mga dalan, ug mamalik kita ngadto kang Jehova,” pangaliyopo pa ni propetang Jeremias. (Lamentaciones 3:40) Apan, ang uban nagapanuko gihapon, tingali nahadlok nga dili abiabihon niadtong sakop sa kongregasyon. Apan unsa ang pagsanong dihang mipauli sa balay ang usikang anak? “Kinahanglang himoon ta ang . . . pagsadya,” miingon ang amahan, “kay kining imong igsoon namatay na apan karon nabuhi siya pag-usab, ug siya nawala na apan karon hingkaplagan siya.” (Lucas 15:32) Ang samang mainitong pag-abiabi ang naghulat niadtong ‘mobalik kang Jehova’ nga may tim-os nga tinguha sa pagbuhat sa iyang kabubut-on.—Itandi sa Lucas 15:7.
Apan ang Kristohanong kongregasyon dili lamang maglingkod ug maghulat sa pag-abiabi kanila kon ugaling mohukom sila nga ‘mobalik.’ Diha sa ilustrasyon ni Jesus, midagan ang amahan sa pagtagbo sa iyang anak “samtang didto pa siya sa halayo.” Sa susama, giisip sa mga Saksi ni Jehova kini nga usa ka personal nga obligasyon sa pagpangita sa mga tawo nga kauban niadto ug tabangan sila sa pagbalik sa organisasyon ni Jehova.
Apan komosta kon sad-an ang usa ka tawo sa seryosong kalapasan samtang nabulag sa organisasyon ni Jehova? O komosta kon ang usa kinahanglang tangtangon gikan sa pag-ubanay sa katawhan sa Diyos tungod sa seryosong kalapasan apan mihunong na sa pagbuhat sa dili-kristohanong paggawi? Ang mga ansiano nahibalo kon unsaon sa pagtabang kaniya sa maluluton ug mahigugmaong paagi aron sa pagtul-id sa mga butang uban kang Jehova. Busa ang bisan kinsa nga nagatinguha sa pagbalik ug sa pagkinabuhi kaharmoniya sa kabubut-on sa Diyos kinahanglang ipahibalo kining tinguhaa ngadto sa mga ansiano. “‘Umari kamo, karon, ug maghusay kita,’ nagaingon si Jehova. ‘Bisan pa ang inyong mga sala mapula, sila pagapution ingon sa niyebe.’”—Isaias 1:18.
Unsa ka maluluton, ka mainiton, ug ka mahigugmaon sa atong langitnong Amahan! Ug unsa siya ka mapailobon ug maikagon sa matag usa kanato! Gani, dili siya buot nga kita malaglag uban niining daotang sistema sa mga butang. (2 Pedro 3:9) Si Jehova mao ang nag-awhag sa iyang karaang katawhan: “Bumalik kamo kanako, ug ako mobalik nganha kaninyo.” Nagapadayon gihapon kanang maong imbitasyon.—Malaquias 3:7.
Haduol na ang panahon, busa ayaw paglangan. Pinaagi sa katawhan ni Jehova, matagamtama pag-usab ang ‘dagayang pakigdait nga iya niadtong nahigugma sa sugo sa Diyos.’ “Ug kanila walay kahigayonan sa pagkapandol,” miingon ang salmista. (Salmo 119:165) Sa ilalom sa imong kasingkasing, gihigugma ba nimo ang kasugoan ni Jehova? Kon usa ikaw ka dedikadong alagad sa Diyos, kini ang hinungdan nganong imong gipahinungod ang imong kaugalingon kaniya. Walay butang—oo, wala gayoy butang—ang mas bililhon kay sa pagpasig-uli sa imong relasyon kang Jehova. Ayaw siya ug talikdi. Palandonga pag-ayo kining butanga ug sa mainampoon. Kon gimingaw ka sa panaghiusa ug paghigugmaay sa katawhan ni Jehova, dili pa ulahi kaayo ang pagbalik sa organisasyon ni Jehova. Buhata kini sa walay paglangan.