Maunongong mga Batan-on Gipatay Tungod sa Gingharian sa Diyos
MGA alas 8:30 kadto sa buntag sa Oktubre. Ang batan-ong si Elmer ug si Alex, 16 ug 14 anyos, nagdula sa atubang nga tugkaran sa ilang balay sa San Salvador, ang kaulohang siyudad sa gubot nga El Salvador. Sa kalit mitungha ang usa ka puting pik-ap trak nga may lima ka armadong lalaki. Mikawas ang duha ka lalaki ug gimandoan ang mga batang lalaki nga mosakay sa trak. Sila gidalang wala hisayri sa ilang pamilya.
Sa nahibaloan sa ilang mga ginikanan kon unsay nahitabo, ilang gipahibalo ang mga ansiano sa lokal nga kongregasyon sa mga Saksi ni Jehova, ug misugod ang malisangong pagpangita. Ang kapintasang tinukmod sa politika mao ang matag-adlawng hitabo sa El Salvador sa dugay nang panahon. Ang mga ginikanan, si Napoleón ug si Obre, nahadlok nga ang pinakadaotan nahitabo. Gipahibalo ang mga awtoridad ug miduyog usab sa pagpangita.
Sa sunod adlaw ang pila ka lalaki, nga nagdrayb sa usa ka sakyanan sa patay alang sa lokal nga punerarya, nagpahibalo sa usa sa mga ansiano nga ilang nakita ang mga lawas sa duha ka batang lalaki uban sa ubang minatay sa tingob nga labayanan sa mga biktima sa kapintasan. Oo, nakaplagan si Elmer ug Alex, nga ang ilang mga lawas natusaktusak sa mga bala. May mga ilhanan nga sila gipaantos una patya. Gituohang ang usa sa maalsahong mga pundok naningkamot sa pagkombinsir kanila nga moanib sa ilang grupo sa pagpakig-away sa gobyernong anaa sa gahom. Ugaling, ang mga batang lalaki, kay mga Saksi ni Jehova, dili molapas sa ilang Kristohanong neyutralidad pinaagi sa pag-anib sa maong grupo. Lagmit nga tungod sa maong hinungdan sila gipatay. Sila maoy duha pa ka sinakit sa hataas nga talaan sa matinumanong mga Kristohanon nga namatay tungod kay dili makig-apil sa politika sa kalibotan. Gisugot nila ang Diyos inay ang mga tawo.—Juan 17:16; 18:36; Buhat 5:29.
Busa, sa usa ra ka adlaw, ang pamilyang López nakunhoran gikan sa lima ka membro ngadto sa tulo. Dako kadtong kaguol sa mga ginikanan. Sa panahon sa ilang dakong panginahanglan nadawat nila ang paglipay ug tabang gikan sa ilang Kristohanong mga igsoon sa sangang buhatan sa El Salvador sa Watch Tower Society ug gikan sa kongregasyon. Karong bag-o sila nagsulat sa usa ka sulat sa apresasyon nga buot namong ipaambit sa among mga magbabasa.
Ang mga Saad sa Diyos Makapaalim
“Palihog dawata gikan sa akong asawa, si Orbe, akong anak babaye, si Reyna Noemi, ug kanako ang among pagkamapasalamaton ug apresasyon tungod sa pagdasig ug paghupay nga gihatag kanamo sa panahon nga kini gikinahanglan pag-ayo. Kami mapasalamaton kaninyo sa atong Amahan, si Jehova nga Diyos, kinsa pinaagi sa Kasulatan nagtagana sa kalig-on nga atong gikinahanglan—oo, tungod sa trahedya nga nahitabo kanamo sa miaging Oktubre 27. Maingong dili kami malimot sa among minahal nga mga anak si Elmer ug si Alex, kami dili usab malimot sa inyong gugma niadtong panahona.
“Matuod nga gibati namo gihapon ang dakong kaguol tungod sa pagkamatay sa among mga anak. Apan karon gibati namong labaw pa nga atong gikinahanglan ang bag-ong kahikayan, ug ang pagkakita sa ginabuhat niining daotang sistema sa mga butang makapauswag lamang sa among apresasyon nga kinahanglan ang Gingharian sa Diyos.
Mga igsoon, among napabilhan sa dugang pa kining mga butanga, ug kami nagapasalamat kang Jehova tungod kay kita dunay seguradong paglaom—dili lamang mga damgo kondili usa ka tinuod nga gobyerno.
“Ang usa ka igsoon mahigugmaong miingon kanako. ’Dili ka malimot kang Elmer ug Alex, ug usa ra ang tambal sa imong kasubo—ang pagpakigsulti sa uban bahin sa imong paglaom. Oo, pagpakigsulti sa uban bahin sa Gingharian kon ikaw may higayon sa pagbuhat niana.’ Pagkatinuod niini! Sa magabii kami makigsulti sa among mga silingan, ug kini nakahatag namog paglipay. Si Orbe, ang akong asawa, nakahatag ug pamatuod ngadto sa ’importanteng’ mga tawo nga nagtinguha sa pagsusi sa atong pagtuo. Usa ka adlaw ang usa ka doktor miingon kaniya: ’May pagtuo ka ba?’ ’Oo,’ siya mitubag. Aw, sa usa ka oras siya nagpatalinghog, nga nagpakitag dakong interes bisan pag daghan siyag pasyente nga nagpaabot kaniya. Gitanyag niya kaniya ang librong Ang Kamatuoran nga Motultol sa Kinabuhing Dayon, ug iya kanang gidawat dayon. “Usa ka adlaw ang katibuk-ang manedyer sa pabrika nga akong gitrabahoan nagtawag kanako ug miingon: ’Napoleón, buot kong makigsulti kanimo ug mangutana. Nagtuo ka ba nga ang kalibotan matapos na sa dili madugay?’ Kining tawhana sa nangagi katolikong pari apan mibiya sa pagkapari. Sa gisaysay ko nga ang Bibliya nagahatag ug lig-ong pamatuod nga kita ania na sa kataposang mga adlaw niining daotang sistema sa mga butang, siya miingon nga siya may pagduhaduha sa Bibliya. Samtang akong gihisgotan ang organisasyon sa mga Saksi ni Jehova, siya natingala sa dihang akong gisaysay nga kita dili bahin sa ebanghelikal nga mga pundok. Unya gisultihan ko siyang kita dili motuo sa mga doktrina. Gusto niyag panig-ingnan. ’Pananglitan,’ miingon ako, ’nga si Maria mao ang inahan sa Diyos.’ ’Unsa, dili mo motuo nga si Jesus Diyos ug busa si Maria mao ang inahan sa Diyos!’ ’Dili,’ miingon ako, ’ang Bibliya dili mosuportar sa maong doktrina.’ Kay natingala kaayo, siya mitindog ug miingon: ’Diin ba mo nagatigom? Ihatag kanako ang adres, kay buot kong motambong.’ ’Ngano?’ nangutana ako. Siya mitubag nga sa dihang siya didto sa seminaryo siya wala gayod magtuo sa maong doktrina ug naghinapos nga ang tanang relihiyon nagtuo niana. Katingad-anan gayod! Usa ka pari nga wala magtuo sa Trinidad!
“Sa pagkamatuod, mga igsoon, labaw kay sukad masukad karong adlaw kami nagaampo kang Jehova aron ang iyang ’Gingharian moabot’ ug magtapos sa tanang pagkadaotan. Matuod, mga igsoon, nga kami wala pa maulii sa bug-os. Sa pag-abot sa matag bag-ong adlaw, ang handumanan sa among mga anak anaa sa among atubangan, ug ang tanan nahisamag mangilngig mga damgo. Apan pagkamalipayon namo nga si Jehova nagatabang kanamo! Oo, among gibati ang iyang mahigugmaong-kalulot diha sa kongregasyon. Pagkamapasalamaton namo sa saad ni Jehova nga pinaagi kang Kristo kadtong natulog sa kamatayon MABUHI! (Buhat 24:15) Ug talagsaon gayod unya nga panalangin, sa dihang ang among mga anak mahibalik, sa pagsulti kanila nga ang ilang ’pagbiya’ mihatag kanamog higayon sa pagsulti bahin sa Gingharian ngadto sa mga tawong dili tingali namo maduol sa laing paagi!
“Bisag usahay kami sa gihapon mobating nalumsan sa kaguol, ug makapasubo kanamo ang pagkawala sa among mga batang lalaki, bisan pa niana sa matag adlaw kami nagapasalamat kang Jehova tungod kay among nasayran ang kamatuoran, tungod sa iyang malulutong kamot sa tungod sa mga igsoon ug mga higala nga sama kaninyo nga nakatabang kanamo niadtong mga gutlo sa kagul-anan.
“Salamat kaayo,
Napoleón ug Orbelina López“
[Kahon sa panid 31]
Tanang batan-ong Saksi—lig-ona ang inyong kaugalingon sama kang Elmer ug Alex pinaagi sa inyong pagtuon sa Pulong sa Diyos, aron kamo “makabarog nga malig-on“ bisan pa kon unsay moabot nga mga pagsulay,—Efeso 6:11; 1 Pedro 5:8-10