Balaang Hustisya—Usa ka Hinungdan sa Pagkalipay!
“DALI kamo . . . ‘Si Jehova nagmando na; yuta maghimaya.’” Kadtong mga pulonga maoy bahin sa usa ka awit diha sa mga ngabil sa mga delegado sa duolan ka 9,000 ka Arabe, Grego, Italyano, Portuges, ug Katsila diha sa “Balaang Hustisya” Distritong Kombensiyon sa Montreal, Canada. Ang mga kombensiyonista midugok sa natad sa Olympic Stadium alang sa panapos nga mga yugto sa upat ka adlawng kombensiyon aron makaduyog sa pag-awit uban sa 36,900 ka delegado diha sa istadyom.
Ang ubang mga grupo sa pinulongan presente sa samang programa sa kombensiyon sa duol nga mga natad ug mga awditoryom. Karon miduyog sila sa Pransis ug Ingles nga mga kombensiyonista diha sa makatandog nga pasundayag sa panag-igsoonay ug pagkamaunongon—usa ka butang nga mahimo lamang taliwala sa mga alagad sa Diyos sa tinuod nga hustisya, si Jehova. Tungod sa kaylap nga inhustisya sa modernong kalibotan, ang tema sa kombensiyon—“Balaang Hustisya”—tukma gayod sa panahon. Nalambigit sa tibuok nga programa, kining temaha nakapalambo sa atong apresasyon ning pangunang hiyas ni Jehova nga Diyos.
“Malipayon Kadtong Nagasunod sa Hustisya”
Mao kini ang tema sa unang adlaw sa kombensiyon. (Salmo 106:3) Gipatin-aw sa pakigpulong sa tsirman sa pag-abiabi nga ang balaang hustisya dili lang kay bugnawng legal nga praktis sa usa ka hudisyal nga buluhaton. Hinunoa, kini maoy padayong paghupot sa butang matarong diha sa usa ka dili-mapihigon ug makataronganong paagi sumala sa mga sukdanan sa Diyos. Si Jehova ang naghatag labing taas nga mga sukdanan ug hingpit diha sa hustisya tungod kay siya nagapabilin diha niini. Busa, ikaingon nga ang “tanan niyang mga dalan hustisya man.”—Deuteronomio 32:4.
Dugang nga gipasiugda kini diha sa panguna nga pakigpulong, nga nag-ulohang “Gipakita ang Hustisya sa Tanang mga Paagi sa Diyos.” Si Jehova wala gayod motipas gikan sa iyang matarong nga mga sukdanan apan nagagamit sa samang matarong nga mga paagi sa pakiglabot uban sa tanang dili-hingpit nga katawhan. (Malaquias 3:6) Bisan pa nga bakak nga ilang akusahon ang Diyos nga dili-matarong tungod kay sila nakakitag dakong kakulang sa hustisya diha sa tawhanong katilingban, siya dili mao ang may tulobagon sa pagkabaliko sa nadunot nga katawhan.
Sanglit mahigugmaon sa hustisya si Jehova, kita iyang gilaoman nga mosunod niining hiyasa pinaagi sa pagbuhat kon unsa ang matarong ug makataronganon. Atong himoon kini diha sa atong isigkatawo ug sa atong mga pamilya, sulod sa kongregasyon, ug sa tanang bahin sa atong pagsimba. Kini mohatag ug tugob nga mga panalangin, sumala sa makita sa gipresentar sa usa ka programa sa panahon sa nahibilin sa tulo ka adlaw sa “Balaang Hustisya” Distritong Kombensiyon.
“Dawata ang Disiplina nga Mohatag Salabotan”
Kining anaa sa itaas mao ang tema sa ikaduhang adlaw sa kombensiyon, nga gibase sa Proverbio 1:3. Kita gidasig sa “Pagdawat sa Disiplina ug Mahimong Maalamon,” mao kana ang ulohan sa unang bahin sa programa. Ang disiplina gikan kang Jehova nagatimaan sa usa ka paagi sa kinabuhi nga naglakip sa pagputli sa atong gahom sa panghunahuna ug sa moral nga pagkamao. Kini maoy usa usab ka ekspresyon sa gugma sa Diyos alang kanato. (Hebreohanon 12:4-11) Kining disiplinaha makahimo kanatong sensitibo sa labing taas nga mga sukdanan sa hustisya—balaang hustisya.
Kining positibong mga ekspresyon gisundan sa pakigpulong “Magmahinlo sa Hunahuna ug sa Lawas.” Unsa ka makapukaw kadto sa hunahuna! Gipasilsil niadto kanato ang panginahanglan sa pagpresentar sa atong kaugalingon sa Diyos nga putli, mahinlo, ug balaang katawhan. Ngano? Tungod kay si Jehova labaw nga mahinlo ug balaan—usa ka kahimtang nga nagpalahi kaniya gikan sa tanang mahugawng mga diyosdiyos sa mga nasod. Nagpalandong niini nga pakigpulong, ang usa ka batan-ong igsoong lalaki mikomento: “Ang tanang butang bahin sa atong mental, moral, pisikal, ug espirituwal nga pagkahinlo gisusi. Ang atong pamiste, pamostura, balay, kotse, ug personalidad gihatagag pagtagad.” Ang usa ka ansiano miingon: “Ang pagpadapat sa maong tambag mopahimo sa atong mga igsoon nga mangibabaw gikan sa ubang mga tawo palibot kanila ug mohatag maayong panglawas nga wala hibaloi sa kalibotan sa katibuk-an.”
Ang modernong-adlawng drama “Gipatikan Alang sa Kaluwasan” nakadugang sa pagkadinalian diha sa programa, kay sa dili madugay ang balaang hustisya mapatagbaw. Kining makatandog nga presentasyon klarong nagpakita nga dinalian alang sa tanan sa pagbuka sa ilang mga mata sa kahulogan sa atong panahon. Sa pagkatinuod, sa dili pa hampakon ang bakak nga relihiyon, kinahanglang modalagan kita sa dapit nga dalangpanan ug tino nga magpapatik alang sa kaluwasan.
Sa hapon, usa ka simposyom sa mga mamumulong nagpamatuod sa panginahanglan sa “Disiplina Diha sa Pagkamatarong Sulod sa Sirkulo sa Pamilya.” Ang mga bana ug mga amahan gitambagan sa pagbaton ug espirituwal nga programa diha sa balay, manguna sa pag-ampo, pagtuon, ug sa balaang pag-alagad. Ang mga hiyas sa pagkalalaki sa amahan ug sa iyang pagdumala sa iyang pagkaulo dunay madayganong epekto sa paglantaw sa bata sa awtoridad, sa Diyos ug sa tawo. Busa, ang Kristohanong mga amahan kinahanglang makataronganon ug mapinadayonon sa ilang disiplina. Kinahanglang ilang ipakita ang empatiya ug kainit, busa nagabukas sa mga linya sa komunikasyon sa ilang mga anak.
Ang mga ginikanan gidasig sa pagpaangay sa instruksiyon sa mga anak. Hinungdanon ang paghatag sa ilang mga anak ug salabotan pinaagi sa pagpalandong kon unsaon sa pagtudlo ug unsay itudlo aron maabot ang ilang mga kasingkasing. Ang tumong mao ang paghimo nga ang kamatuoran moimpluwensiya sa tibuok pamilya sa maayong paagi.
Ang kataposang mamumulong niini nga simposyom mihimog mainit nga hangyo sa mga kabataan sa pagbuhat sa butang nga gilaoman kanila ni Jehova nga buhaton sulod sa kahikayan sa pamilya. Ang mga batan-on giawhag sa paglikay sa rebelyosong espiritu sa matugotong katilingban karong adlawa ug ikalipay ang disiplina nga mohatag salabotan.
Diha sa mga pahayag nga gibase sa Proverbio 2:1-9, ang mga kombensiyonista gidasig sa “Pagpadayon sa Pagpangita sa Natagong mga Bahandi.” Giilustrar niadto nga ang espirituwal nga mga mutya makita pinaagi sa kuging pagtuon ug pagdukiduki. Nagpakigpulong mahitungod sa ulohan “Dangop Kang Jehova Alang sa Salabotan,” gisaysay sa sunod nga mamumulong nga ang salabotan mao ang katakos sa pagtan-aw sa kahimtang, sa pagtan-aw lapas pa sa makita ug sa pagkasabot sa usa ka butang. (Mateo 13:13-15; Roma 3:11; Efeso 5:17) Kining makalilipay nga adlaw miabot sa kinatayoktokan sa dihang gikonektar ang Olympic Stadium pinaagi sa telepono ngadto sa ubang mga siyudad sa Canada ug sa Tinipong Bansa. Ang duha-ka-bahing simposyom gipasiugda pinaagi sa pagluwat sa duha-ka-tomong publikasyong Insight on the Scriptures, nga nasudlan ug kapin sa 2,500 ka panid sa impormatibong mga artikulo ug mga ilustrasyon nga mopalalom sa atong pagsabot sa espirituwal nga mga butang.
“Ang Iyang mga Paghukom Matuod ug Matarong”
Sa ikatulong adlaw, nga may tema nga gibase sa Pinadayag 19:2, makahatag kanatog dakong kalipay. Ang pakigpulong “Moral nga Kahinlo Mao ang Katahom sa Pagkabatan-on” mihimog kusganong hangyo sa mga batan-on. Sila giawhag sa pagpabili sa katahom nga nalangkit sa paghupot sa mga sukdanan sa Diyos sa pisikal, moral, ug espirituwal nga kahinlo. Ang makapukaw sa kailibgon nga mga awit, imoral nga mga programa sa telebisyon, pornograpikong mga pelikula ug basahon, ang pag-ipit sa isigkaingon kanunayng nagabomba sa Kristohanong mga batan-on. Sumala sa usa ka tuboran, talagsaon lamang kaayong mga batan-on ang wala makahimog sekso gawas sa kaminyoon sa panuigong 19. Apan mainitong mipakpak ang tumatambong sa dihang gidayeg sa mamumulong ang libolibong mga batan-ong Saksi kinsa nagpakita sa ilang kaugalingon nga talagsaon tungod sa paghupot ug hataas nga sukdanan sa pagkamatarong. Ang sayong mga kaminyoon puno sa mga suliran, ug gipakita nga ang mga pulong ni Pablo bahin sa pagminyo tungod sa “mainit nga kailibgon” gipakigpulong dili alang sa mga tin-edyer kondili niadtong “lapas na sa pagpamuswak sa pagkabatan-on.”—1 Corinto 7:9, 36.
“Ayaw Kamo Pakigsangon Uban sa mga Dili-Magtutuo” mao ang sunod nga topiko. Ang pagsunod sa sugo sa Diyos sa pagminyo “diha lamang sa Ginoo” makapalingkawas kanato gikan sa masakit nga mga sangpotanan. (1 Corinto 7:39) Dugang pa, walay labi pang makapalig-on sa kaminyoon kay sa giambitang debosyon kang Jehova ug sa pagsunod sa iyang matarong nga mga sukdanan. Kita sunod nga gitabangan sa pagtan-aw kon unsaon nato sa “Paglihok Uban ang Pagtahod ug Diyosnong Kahadlok.”
Dayon miabot ang kulbahinam nga highlight—ang pakigpulong “Bawtismo nga Mosangpot ug Usa ka Paborableng Paghukom,” nga gisundan sa pagbawtismo sa bag-ong nagapahinungod nga mga tawo. Gipasiugda niadto nga labaw pa ang ginalaoman kanila kay sa yanong paghugas sa kahugaw sa lawas. Ang paghinulsol, pagbag-o, ug tibuok-kinabuhi nga balaang pag-alagad kinahanglang ilangkit uban sa ilang dedikasyon ug bawtismo kon nagtinguha sila sa pagtagamtam ug paborableng paghukom gikan kang Jehova.
Ang programa sa hapon halandomon gayod. Sa makausa pa, pinaagi sa pagkabit diha sa linya sa telepono, ang mga membro sa Nagamandong Lawas sa mga Saksi ni Jehova nakapukaw sa mga tumatambong sa Norte Amerika uban sa makaiikag nga presentasyon sa simposyom “Ang Tinudlong Panahon Haduol Na.” Sulod sa daghang dekada, gisangyaw sa dinihogang mga saksi ni Jehova ang mga mensahe sa balaang paghukom batok sa Babilonyang Bantogan, ang imperyo sa kalibotan sa bakak nga relihiyon. Niining kombensiyona, hinunoa, kining maong mga mensahe mihatag puwersadong tuno. Sad-an ang Babilonyang Bantogan sa paglapas sa matarong nga mga sukdanan ni Jehova. Siya takos sa kalaglagan, kay ang “iyang mga kasal-anan nagtipun-og sungko sa langit, ug nahinumdoman sa Diyos ang iyang daotang binuhatan.” Busa, sama sa gipahayag sa manulonda ni Jehova, “sa usa lamang ka adlaw mangabot ang iyang mga hampak, ang kamatay ug kasubo ug gutom, ug siya pagasunogon pinaagig kalayo, kay si Jehova nga Diyos, nga naghukom kaniya, gamhanan.”—Pinadayag 18:5, 8.
Naghisgot bahin sa ulohan “Ang Daotag Dungog nga ‘Babayeng Bigaon’—Ang Iyang Pagkapukan ug ang Kalaglagan,” gipasiugda sa kataposang mamumulong niini nga simposyom ang dakong sangkoanan sa Pinadayag. Kini nga sangkoanan modangat uban sa kasal sa Kordero, nga nagkausa uban sa iyang pangasaw-onon, ang balaang siyudad, sa pagpanalangin sa katawhan ug kinabuhing dayon. Ang ngalan ni Jehova mabalaan! Gitapos ang simposyom sa makapatandog nga pahayag nga ang tinudlong panahon duol na gayod kaayo! Sa pagkatinuod, ang dakong sangkoanan sa Pinadayag haduol na!
Samtang namakpak pa ang tumatambong, miabot ang pagluwat sa bag-ong 320-panid nga librong Pinadayag—Ang Hingpit nga Sangkoanan Haduol Na! Pagkadako sa hinungdan sa pagkalipay! Kining publikasyona mahimong usa gayod ka epektibong paagi sa pagpahayag nga hinukman na sa kalaglagan ang Babilonyang Bantogan, nga ang mga nasod karon nagaatubang sa Armageddon, ug nga hapit nang mopakanaog sa paghukom si Jehova. Pasagdi nga ang tanang mapabilhon motubag sa panapit sa “espiritu sa pangasaw-onon” nga “umari” sa mga tubig sa kinabuhi. (Pinadayag 21:2, 9; 22:17) Kining kulbahinam nga pinatik nga gula gisundan sa laing hinungdan sa kalipay. Uban sa malipayong pagtuo, ang mga tumatambong sa kombensiyon bug-os nagkauyon sa pagsagop ug klaro kaayo ug prangkang resolusyon nga nagapahayag sa atong kasilag sa Babilonyang Bantogan.
“Hustisya—Hustisya nga Angay Natong Pangagpason”
Binase sa Deuteronomio 16:20, kini mao ang tema sa kataposang adlaw. Gipasiugda sa mga mamumulong sa buntag ang kamatuoran nga aron makabatog kaayohan gikan sa balaang hustisya, kinahanglang lahi kita gikan sa kalibotan. Palandonga ang pakigpulong “Pagdayong Paghupot sa Espirituwal nga Panglawas Diha sa Masakitong Kalibotan.” Kini nagpakita kon unsaon nato sa paglikay nga mahugawan gikan sa masakiton sa espirituwal nga kalibotan pinaagi sa pagbantay batok sa mga kahuyangan sa unod, kalibotanong impluwensiya, ug “sa mga kaugdahan sa Yawa.” (Efeso 6:11, 12; Roma 7:21-25; 1 Juan 2:15-17) Ang pakigpulong “Ang Imo Bang Pagtuo Nagahukom sa Kalibotan?” nagpakita kon kita dunay pagtuo sama kang Noe, kita mangibabaw ingong lahi gikan sa kalibotan. Sa mga adlaw ni Noe, dihay dakong kalainan sa mga nangaluwas sa Lunop ug sa nangalaglag. Matuod usab kana karong adlawa.
Kining importanteng punto mao ang gipasiugda sa drama sa Bibliya nga “Mga Paghukom ni Jehova Batok sa Nagalapas sa Kasugoan nga Katawhan.” Kadto klarong nagtandi sa maglalapas sa kasugoan nga katawhan sa mga adlaw ni Noe ug Lot sa nagakinabuhi sa atong adlaw. Si Noe ug si Lot lahi kaayo, ug ang ilang pagtuo naghukom sa ilang mga katalirongan. Kita ba sa personal nakitang lahi gikan sa mga tawo karong adlawa kinsa okupado kaayo sa materyal nga mga butang ug mga mahigugmaon sa butang daotan?
Ang pakigpulong, “Hustisya Alang sa Tanan Pinaagi sa Tinudlong Maghuhukom sa Diyos,” maoy makaikag nga pag-analisar sa pakigpulong ni Pablo diha sa mga taga Atenas diha sa Areopagos, o Mars’ Hill. Sanglit gilibotan kita sa hingaping mga inhustisya ug bakak nga relihiyon, ang mga pulong ni apostol Pablo dunay dakong kahulogan kanato. Ilabinang duna kitay katarongan sa pagkalipay tungod kay kita nagpuyo na sa kritikal nga panahon sa paghukom kon kita molihok aron makadawat sa pag-uyon sa Diyos. Oo, sama sa gipamulong ni Pablo, katuyoan ni Jehova nga “hukman ang yuta diha sa pagkamatarong pinaagi sa usa ka tawo [Jesu-Kristo] nga iyang gitudlo, ug kini iyang gipanghimatud-an ngadto sa tanang mga tawo pinaagi sa pagbanhaw kaniya gikan sa mga patay.”—Buhat 17:31.
Sa dihang talitapos na ang programa, kita gidasig sa “Pagpadayon sa Pagpangagpas sa Hustisya Samtang Nagakahiduol na ang Kataposan.” Kining mahimayaon kaayong upat ka adlawng kombensiyon nakapatugob kanato sa determinasyon sa pagbuhat sa ingon. Ang programa nakapasilsil usab kanato sa pagpadako sa atong internasyonal nga panag-igsoonay. Pananglitan, pagkadakong kalipay ang pagpamati gikan sa nagaduawng mga misyonero kinsa matinumanong nagaalagad sa ilang mga asaynment sa daghang mga katuigan!
Kita namauli gikan sa kombensiyon uban ang napasig-uling determinasyon sa pagpabiling bulag gikan niining kalibotana aron makapabiling mahinlo sa espirituwal, sa moral, sa mental, ug sa pisikal. Samtang miduyog kita nga mausahon sa panapos nga awit, kita malipayong nag-awit ug mga pagdayeg kang Jehova, mapasalamaton nga gihatagan kita sa balaang hustisya ug dakong katarongan sa pagkalipay.
Diha sa kapin sa 125 ka kombensiyon sa Tinipong Bansa ug Canada lamang, 1,440,932 ka tawo ang mitambong ug 19,878 ang gibawtismohan
[Mga hulagway sa panid 26]
1, 2. Ang mga librong Insight on the Scriptures ug Pinadayag—Hingpit nga Sangkoanan Haduol Na! nga giluwat sa Yankee Stadium, New York City, sa mga membro sa Nagamandong Lawas si J. E. Barr ug si W. L. Barry
3, 4. Mga esena gikan sa drama sa Bibliya “Mga Paghukom ni Jehova Batok sa Nagalapas sa Kasugoan nga Katawhan”
5. Libolibo gibawtismohan sa pagsimbolo sa ilang pagpahinungod kang Jehova nga Diyos
6. Esena gikan sa modernong-adlawng drama “Gipatikan Alang sa Kaluwasan”
7. Ang nadugawng mga misyonaryo, sama kang John Cutforth sa Papua New Guinea, nga nagpaambit sa ilang mga eksperyensiya uban sa mga kombensiyonista